᥈ ᤛᤠᤵᤔᤢ᤺ᤴᤎᤢᤶ 30 - LIFOTNTᤜᤡᤈᤁᤡᤕᤠ᤺ᤸᤗᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤋᤥᤛᤢ 1 ᤜᤡᤈᤁᤡᤕᤠ᤺ᤸᤗᤧ ᤕᤖᤢᤛᤗᤧ᤺ᤶᤔᤥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤥᤔᤠ ᤑᤠ᤹ᤀᤠᤱ ᤁᤧᤖᤧᤰ ᤀᤢ᤺ᤳᤋᤢᤛᤡ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤀᤥ ᤀᤡᤱᤄᤱ ᤜᤠᤰᤋᤢᤛᤡᤀᤠᤱ ᤀᤣᤑᤪᤠᤀᤡᤔ ᤏᤢ ᤔᤏᤛ᤻ᤛᤣ᤺ᤴᤏᤠᤱ ᤛᤰᤀᤡᤱᤄᤱ ᤛᤠᤵᤋᤢᤀᤠᤱ ᤜᤠᤰᤋᤢᤛᤡ॥ 2 ᤜᤠᤱᤅᤡᤴ. ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤈᤢᤶᤒᤠ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤏᤡᤛᤡᤃᤣᤰᤐᤠ ᤗᤠᤀᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤴ ᤋᤥᤔᤠ ᤏᤡ᤺ᤴᤎᤥ ᤔᤧᤈᤥᤃᤢ॥ 3 ᤂᤧᤱᤜᤠ᤹ᤖᤧ ᤌᤡᤶ ᤁᤢᤀᤡᤛᤡᤰ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤋᤱᤏᤠᤶᤔᤡᤴ ᤋᤥᤔᤠ ᤔᤧᤴᤇᤢᤰᤁᤣ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤕᤖᤡᤰ ᤁᤢᤛᤡᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤛᤣᤛᤣᤛᤠᤱᤛᤠᤱ ᤔᤧᤴᤈᤥ᤺ᤰᤛᤡᤱᤅᤣ ᤔᤧᤘᤕᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤀᤠᤱ ᤕᤖᤢᤛᤗᤧ᤺ᤶᤔᤥ ᤔᤧᤴᤈᤢᤶᤔᤣ ᤔᤧᤘᤕᤧ॥ 4 ᤁᤴ ᤐᤠ᤺ᤴᤏᤡᤴ ᤜᤠᤱᤅᤡᤴ ᤏᤢ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤅᤧ॥ 5 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤒᤣᤷᤛᤣᤒᤠᤀᤠᤱᤎᤥ ᤍᤠᤏ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤋᤥᤛᤧ ᤔᤏᤠᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤍᤠᤖᤀᤣ ᤐᤥᤱ᤹ ᤑᤠ᤹ᤀᤠᤱ ᤀᤡᤛᤪᤠᤀᤡᤗ ᤁᤧᤖᤧᤰ ᤀᤢᤘᤠ ᤆᤥ᤺ᤰᤔᤠ ᤏᤡ᤺ᤴᤎᤥ ᤔᤧᤈᤥᤃᤢ॥ ᤁᤴᤏᤢ᤺ᤸᤗᤧ ᤋᤃᤡ ᤏᤡ᤺ᤴᤎᤥ ᤁᤧᤒᤥᤱᤒᤠ ᤌᤡᤶ ᤁᤢᤀᤡᤛᤡᤰ ᤁᤶᤓᤩᤠᤖᤡᤰ ᤕᤖᤡᤰᤗᤧ ᤁᤴ ᤋᤱᤏᤠᤶᤔᤡᤴ ᤔᤧᤴᤍᤥᤀᤣ ᤔᤧᤘᤕᤧ॥ 6 ᤜᤡᤈᤁᤡᤕᤠ᤺ᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤗᤠᤶ ᤀᤰᤋᤱᤒᤠ ᤀᤢᤘᤠ-ᤛᤰᤁᤡᤴ ᤔᤧᤍᤣ᤹ᤖᤢᤀᤠᤱ ᤀᤡᤱᤛᤠᤒᤠᤜᤠ᤹ ᤀᤡᤛᤪᤠᤀᤡᤗ ᤁᤧᤖᤧᤰ ᤏᤢ ᤕᤜᤢᤍᤠ ᤁᤧᤖᤧᤰ ᤔᤧᤒᤣᤖᤥ— “ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤀᤡᤛᤪᤠᤀᤡᤗᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤂᤡᤏᤡ᤹ ᤏᤢ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤀᤛ᤻ᤛᤢᤖᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤁᤧᤄᤧᤳᤇᤡᤱᤒᤠᤜᤠ᤹ ᤗᤧᤵᤔᤠᤱ ᤂᤢᤏᤧ᤹ᤀᤠᤱ ᤏᤢ᤺ᤱᤗᤖᤥ॥ 7 ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤏᤢ ᤂᤡᤏᤡ᤹ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ᤜᤠ᤹ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤃ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤏᤛᤠᤴ ᤁᤧᤗᤧᤱᤒᤠ ᤔᤧᤒᤥ᤺ᤰᤂᤧ. ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤁᤡᤔᤠ ᤕᤱᤔᤠ ᤆᤠᤜᤠᤰ ᤆᤥᤃᤢᤛᤡ॥ ᤂᤧᤴ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡᤛᤢᤶ॥ 8 ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤜᤧᤰᤁᤣ ᤂᤡᤏᤡ᤹ᤀᤠᤱ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤀᤠᤵᤑᤣᤰ ᤋᤥ᤺ᤴᤏᤠᤛᤡᤶᤔᤧ᤹ᤀᤠᤱ ᤂᤢᤏᤧ᤹ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤛᤣᤛᤣ ᤆᤥᤃᤢᤒᤠ ᤂᤢᤏᤧ᤹ ᤁᤢᤛᤣᤛᤣᤍᤧᤴᤏᤥ ᤗᤠᤛᤠᤶᤔᤧ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤡᤵᤔᤠ ᤐᤄᤢᤃᤧᤄᤢᤒᤠ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ᤗᤠᤶ ᤌᤡᤰᤏᤠᤜᤠᤱ ᤜᤡᤛᤡᤱ ᤐᤣ᤺ᤰᤗ॥ 9 ᤕᤜᤘᤣ ᤍᤠᤱᤒᤠ ᤗᤧᤵᤔᤠᤱ ᤂᤡᤏᤡ᤹ ᤁᤧᤏᤢ᤺ᤰᤂᤡᤏᤧᤓᤃᤪ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤏᤢ ᤂᤡᤏᤡ᤹ ᤛᤠᤀᤣᤜᤠ᤹ ᤁᤧᤍᤧᤶᤒᤠ ᤁᤧᤍᤣ᤹ᤒᤠᤜᤠ᤹ᤖᤧ ᤂᤧᤱᤜᤠ᤹ ᤏᤢᤖᤡᤰ ᤔᤧᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤴ ᤗᤠᤈᤣ᤹ᤀᤥ ᤔᤧᤏᤢ᤺ᤱ ᤔᤧᤓᤧᤴ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤏᤢ᤹ᤒᤠ ᤏᤢ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰ॥ ᤂᤡᤏᤡ᤹ ᤂᤢᤏᤧ᤹ ᤗᤧᤵᤔᤠᤱ ᤁᤧᤏᤢ᤺ᤰᤂᤡᤏᤧᤓᤃᤪ ᤂᤢᤏᤧ᤹ ᤂᤡᤏᤡ᤹ᤗᤠᤶ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴ॥” 10 ᤂᤧᤒᤩᤠᤱ ᤂᤧᤴ ᤀᤡᤱᤛᤠᤒᤠᤜᤠ᤹ ᤀᤣᤑᤪᤠᤀᤡᤔ ᤏᤢ ᤔᤏᤛ᤻ᤛᤣᤒᤠ ᤗᤠᤈᤣ᤹ ᤁᤢᤗᤧ᤺ᤶ ᤕᤧᤰᤕᤧᤰ ᤕᤧᤰᤕᤰᤜᤠ᤹ᤀᤥ ᤔᤧᤒᤥ᤺ᤰᤂᤧᤖ ᤈᤒᤢᤗᤢᤏ ᤌᤧᤶᤒᤠᤀᤣ ᤔᤧᤒᤣ॥ ᤁᤖ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤀᤠᤱ ᤔᤧᤕᤣ᤺ᤳᤋᤢᤛᤡ॥ 11 ᤂᤶᤓᤛᤠᤱ ᤀᤠᤛᤣᤖ. ᤔᤏᤛ᤻ᤛᤣ ᤏᤢ ᤈᤒᤢᤗᤢᤏᤒᤠ ᤁᤢᤓᤠ ᤁᤢᤓᤠ ᤔᤏᤠᤜᤠ᤹ ᤀᤠᤒᤠᤅᤣ ᤔᤧᤏ᤺ᤶᤛᤡᤱᤅᤠᤱ ᤕᤖᤢᤛᤗᤧᤔ ᤔᤧᤕᤧ॥ 12 ᤁᤴᤏᤢ᤺ᤸᤗᤧ ᤘᤣ᤹ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤐᤡᤖᤢᤛᤡᤒᤠ ᤀᤡᤱᤈᤠᤱᤅᤡᤴ ᤌᤡᤰᤜᤢᤵ ᤐᤥᤱᤔᤠᤀᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤕᤜᤢᤍᤠᤒᤠ ᤔᤏᤠᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰ ᤘᤕᤧᤖᤥ॥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ 13 ᤏᤡᤛᤡᤃᤣᤰᤐᤠ ᤗᤠᤀᤥ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤋᤱᤏᤠᤶ ᤋᤥᤛᤧ ᤛᤠ᤹ᤖᤡᤰ ᤕᤖᤡᤰ ᤔᤏᤠᤛᤢᤶᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤈᤢᤵᤛᤧ॥ 14 ᤂᤧᤱᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤄᤧᤳᤋᤢ ᤔᤧᤍᤣᤛᤢ. ᤜᤧᤰᤁᤩᤠᤱ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤀᤠᤱ ᤔᤧᤄᤧᤳᤋᤢ ᤔᤧᤍᤣᤛᤢᤀᤠᤱ ᤂᤧᤱᤜᤠ᤹ ᤁᤡᤍᤪᤥᤏ ᤜ᤺ᤱᤃᤢᤀᤥ ᤗᤠᤵᤐᤢᤱ ᤔᤧᤍᤣᤛᤢ॥ 15 ᤂᤧᤱᤜᤠ᤹ᤖᤧ ᤏᤡᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥᤒᤠ ᤔᤧᤸᤗᤢᤰᤁᤡᤴ ᤔᤧᤛᤩᤧᤖᤢ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤛᤠ᤹ᤖᤡᤰ ᤔᤧᤏᤢ᤺ᤴᤍᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤢᤶᤔᤥ ᤀᤠᤵᤑᤣᤰ ᤛᤣᤛᤣᤛᤠᤱᤛᤠᤱ ᤔᤧᤈᤥ᤺ᤰᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤍᤠᤖᤢ॥ 16 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤔᤥᤛᤠ᤺ᤸᤗᤧ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣᤒᤠ ᤋᤠᤰᤑᤠᤀᤥ ᤔᤧᤕᤢᤱᤛᤡᤱ॥ ᤗᤧᤒᤡᤜᤠ᤹ᤗᤠᤶ ᤔᤧᤍᤠ᤺ᤰᤋᤢᤒᤠ ᤛᤠᤔᤠᤰᤂᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤗ᤹ᤖᤡᤰ ᤔᤧᤜᤢᤰᤂᤢ ᤔᤧᤍᤣᤛᤢ॥ 17 ᤁᤖ ᤛᤱᤈᤢᤶᤓᤥᤒᤠ ᤕᤖᤡᤰ ᤁᤢᤛᤡᤱ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤗᤢᤶᤔᤥ ᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤅᤣ ᤔᤧᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤢᤴᤇᤡ᤹ ᤔᤧᤸᤗᤢᤰᤜᤠ᤹ ᤛᤢᤳᤌᤥ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤁᤴ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤠᤃᤡ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥᤒᤠ ᤌᤢ᤺ᤶᤒᤠᤜᤠ᤹ ᤗᤧᤒᤡᤜᤠ᤹ᤖᤧ ᤛᤧᤵᤔᤠᤛᤡ ᤁᤧᤒᤥᤱᤒᤠ ᤐᤥ᤺ᤰᤛᤧ॥ 18 ᤀᤣᤑᤪᤠᤀᤡᤔ. ᤔᤏᤛ᤻ᤛᤣ. ᤀᤡᤛ᤻ᤛᤠᤂᤠᤖ ᤏᤢ ᤈᤒᤢᤗᤢᤏᤗᤠᤶ ᤁᤧᤕᤢᤒᤠ ᤕᤖᤡᤰ ᤔᤏᤠᤜᤠ᤹ ᤌᤡᤶ ᤁᤢᤀᤡᤛᤡᤰ ᤛᤣᤛᤣᤛᤠᤱᤛᤠᤱ ᤔᤧᤶᤒᤥᤱᤅᤣ ᤔᤧᤘᤕᤧ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤌᤡᤶ ᤔᤧᤱᤃᤧᤳᤋᤣ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤴ ᤔᤧᤍᤥᤛᤢ॥ ᤁᤖ ᤜᤡᤈᤁᤡᤕᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤣᤗᤡ ᤑᤠᤰᤋᤢ ᤐᤡᤖᤢᤛᤡ. 19 “ᤛᤣᤛᤣᤍᤧᤴᤏᤥᤒᤠ ᤛᤢᤳᤌᤥ ᤐᤥᤱᤔᤠ ᤌᤡᤶᤜᤠ᤹ ᤁᤢᤓᤠᤖᤧ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤔᤧᤘᤠ᤹ᤛᤠᤱ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤛᤡᤰᤗᤢᤱᤔᤠᤖᤧ ᤔᤧᤱᤃᤥ᤺ᤳᤋᤣ ᤔᤧᤸᤗᤧᤵᤔᤏᤠᤒᤠᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤵᤔᤡ ᤐᤡᤖᤢᤛᤡᤖᤖᤥ॥” 20 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤡᤈᤁᤡᤕᤠ᤺ᤸᤗᤧ ᤁᤢᤒᤣᤗᤡᤴ ᤂᤧᤵᤛᤢᤀᤠᤱ ᤔᤏᤠᤜᤠ᤹ ᤘᤣ᤺ᤴᤍᤢᤛᤡ॥ 21 ᤕᤖᤢᤛᤗᤧ᤺ᤶᤔᤥ ᤁᤧᤈᤢᤶᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤛᤠ᤹ᤖᤡᤰ ᤔᤧᤛ᤺ᤳᤋᤧᤀᤠᤱ ᤛᤛᤠᤱᤛᤪᤥᤳ ᤔᤧᤈᤥᤃᤧᤖ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤴ ᤔᤧᤍᤥᤛᤢ॥ ᤜᤴᤏᤠᤱ ᤗᤧᤒᤡᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤗᤠᤜᤠ᤹ᤏᤢ ᤛᤥᤛᤥᤖᤡᤰ ᤌᤡᤰᤕᤠ᤺ᤴᤎᤰᤔᤠ ᤂᤢᤴᤇᤡ᤹ ᤛᤡᤰᤛᤔᤧᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ॥ 22 ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤵᤔᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤈᤧᤰᤐᤠ ᤏᤡᤱᤘᤠ᤹ ᤁᤧᤃᤵᤐᤠ ᤗᤧᤒᤡᤜᤠ᤹ ᤜᤡᤈᤁᤡᤕᤠ᤺ᤸᤗᤧ ᤀᤠ᤺ᤴᤇᤡᤱᤔᤠ ᤐᤠ᤺ᤴᤈᤠ᤺ᤰ ᤔᤧᤳᤋᤢᤛᤡ॥ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤋᤱᤏᤠᤶᤒᤠ ᤏᤢᤛᤡ ᤕᤧᤴ ᤌᤧᤸᤗᤡᤰ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢᤖ. ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤃᤡ ᤔᤧᤈ᤹ᤖᤢᤒᤠ ᤗᤰᤜᤠ᤹ ᤔᤧᤈᤀᤠᤱ ᤕᤧᤶ ᤔᤧᤍᤣᤛᤢ॥ 23 ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤀᤠᤸᤗᤛᤠᤱ ᤘᤣ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤋᤱᤏᤠᤶ ᤋᤥᤔᤠ ᤔᤧᤍᤧᤴᤍᤧ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤧᤛ᤺ᤳᤋᤧᤖ ᤘᤣ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤋᤱᤏᤠᤶ ᤔᤧᤍᤥᤛᤢ॥ 24 ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ᤺ᤸᤗᤧ ᤛᤱᤈᤢᤶᤓᤥᤜᤠ᤹ᤖᤧ ᤗᤠᤃᤡ ᥇.᥆᥆᥆ ᤛᤧᤃᤶᤒᤠ ᤐᤡᤳᤜᤠ᤹ ᤏᤢ ᥍.᥆᥆᥆ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹. ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤛᤱᤈᤢᤶᤓᤥᤜᤠ᤹ᤖᤧ ᤗᤠᤃᤡ ᥇.᥆᥆᥆ ᤛᤧᤃᤶᤒᤠ ᤐᤡᤳᤜᤠ᤹ ᤏᤢ ᥇᥆.᥆᥆᥆ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤔᤧᤍᤠᤖᤢ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤢᤴᤇᤡ᤹ ᤕᤖᤡᤰ ᤂᤠᤏᤡ᤺ᤳᤋᤥ ᤀᤠᤒᤠᤅᤣ ᤀᤠᤒᤠᤅᤣ ᤛᤣᤛᤣᤛᤠᤱᤛᤠᤱ ᤔᤧᤈᤥ᤺ᤰᤛᤡᤱ॥ 25 ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤗᤧᤒᤡᤜᤠ᤹ᤀᤠᤱ ᤛᤥᤖᤡᤰ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤗᤠᤶ ᤁᤧᤕᤢᤒᤠ ᤁᤧᤈᤢᤶᤒᤠ ᤁᤧᤖᤧᤰ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤀᤠᤱ ᤛᤥᤛᤥᤳᤗᤖᤠᤱ ᤔᤧᤈᤥᤃᤧ॥ 26 ᤕᤖᤢᤛᤗᤧ᤺ᤶᤔᤥ ᤛᤠ᤹ᤖᤡᤰ ᤕᤶᤒᤠ ᤛᤥᤛᤥᤳᤗᤖᤠᤱ ᤐᤥ᤺ᤰᤂᤧ ᤌᤣᤀᤠᤱᤓᤧᤸᤗᤧ ᤜᤧᤰᤋᤱᤒᤠᤃ ᤀᤡᤛᤪᤠᤀᤡᤗᤒᤠ ᤜᤠᤱ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏᤖᤧ ᤁᤢᤕᤧᤶᤔᤠᤱᤎᤥ ᤁ᤹ᤕᤥ ᤀᤰᤂᤣ ᤐᤥ᤺ᤰᤂᤧᤒᤠ ᤜᤥ᤺ᤵᤋᤧ॥ 27 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤔᤏᤠᤜᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤔᤠᤛᤡᤖᤧ ᤗᤠᤃᤡ ᤌ᤺ᤵᤐᤧᤳ ᤔᤧᤕᤧᤶᤛᤡᤱ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣᤒᤠ ᤁᤢᤕᤢᤱᤔᤠᤍᤧᤴᤏᤥ ᤌᤠᤖᤡᤰᤁᤣ ᤁᤧᤖᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.