᥈ ᤛᤠᤵᤔᤢ᤺ᤴᤎᤢᤶ 3 - LIFOTNT

ᤛᤥᤗᤥᤔᤏᤖᤧ ᤔᤠᤱᤜᤡᤶ ᤆᤥᤃᤢ᤹

¹ ᤂᤧᤒᤩᤠᤱ ᤛᤥᤗᤥᤔᤏᤖᤧ ᤁᤢᤶᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠᤖᤡᤵ ᤆᤥᤃᤢᤛᤢᤖᤢᤀᤠᤱ ᤘᤕᤧ॥ ᤂᤧᤴ ᤋᤧᤴᤏᤡᤴ ᤕᤖᤢᤛᤗᤧ᤺ᤶᤔᤥᤒᤠ ᤔᤥᤖᤡᤕᤠᤜ ᤁᤥ᤺ᤰᤔᤠᤀᤥ ᤏᤧᤛ᤻ᤛᤧ. ᤂᤧᤵᤔᤥ ᤕᤒᤢᤛᤡ ᤀᤖᤦᤏᤠ᤺ᤸᤗᤧ ᤁᤢᤈᤠ ᤌᤠᤶᤔᤠᤍᤧᤴ ᤏᤧᤛ᤻ᤛᤧ. ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤛᤢᤑᤥ ᤐᤡᤖᤢᤀᤠᤱ ᤘᤕᤧ॥ ᤂᤧᤴ ᤋᤧᤴᤏᤥ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤆᤥ᤺ᤰᤔᤠ ᤜᤣ᤺ᤰᤋᤢ॥

² ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣ ᤏᤡᤛᤡᤃᤣᤰᤐᤠ ᤗᤠ ᤏᤡᤛᤡᤃᤣᤰᤐᤠ ᤕᤧᤴᤏᤥ ᤂᤧᤴ ᤆᤥ᤺ᤰᤔᤠ ᤜᤣ᤺ᤰᤋᤢ॥

³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤛᤥᤗᤥᤔᤏᤖᤧ ᤐᤠᤱᤕᤰᤁᤡᤸᤗᤧ ᤁᤢᤒᤢᤱ ᤕᤢᤰᤂᤢᤒᤠᤴ ᤀᤰᤋᤱᤒᤠ ᤆᤥᤃᤧ—ᤋᤃᤡᤒᤠ ᤜᤢᤰᤛᤡᤰ ᤁᤢᤀᤡᤛᤡᤰ ᤁᤢᤗᤠᤶᤋᤡ ᤋᤢᤰᤐᤥᤱ ᤜᤢᤰᤛᤡᤰ ᤏᤢ ᤁᤢᤓᤧᤖᤧ ᤏᤡᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ॥

⁴ ᤔᤠᤱᤜᤡᤶᤔᤡᤸᤗᤧ ᤁᤢᤍᤃᤡ ᤂᤧᤸᤗᤧ ᤁᤢᤓᤧᤖᤧ ᤕᤠᤖᤡᤰᤁᤣ ᤏᤡᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤁᤣ᤺ᤶᤒᤠ ᤀᤠ᤺ᤶᤓᤥ ᤏᤧᤛ᤻ᤛᤧ॥ ᤛᤡᤃᤠᤱ ᤗᤧᤵᤔᤠᤱᤒᤠᤴ ᤂᤢᤏᤧ᤹ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥

⁵ ᤂᤢᤏᤧ᤹ ᤆᤢᤶᤗᤢᤱ ᤆᤥ᤺ᤰᤔᤠᤍᤧᤴ ᤕᤶᤒᤠ ᤕᤠᤰᤑᤠᤱᤅᤥᤒᤠ ᤗᤢᤱᤎᤠᤰᤁᤥ ᤀᤠ᤺ᤱ ᤛᤡᤱᤓᤧᤸᤗᤧᤰᤜᤠ᤹ ᤑᤳᤇᤢ. ᤜᤧᤰᤁᤩᤠᤱ ᤂᤧᤴ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢᤀᤠᤱ ᤂᤧᤵᤔᤥ ᤂᤧᤒᤰᤛᤡᤱ ᤛᤡᤱᤒᤢᤱᤜᤠ᤹ ᤏᤢ ᤛᤡᤰᤁᤪᤡᤜᤠ᤹ ᤁᤢᤓᤢᤱ ᤗᤰᤋᤢ॥

⁶ ᤂᤧᤸᤗᤧ ᤁᤢᤄᤧᤶᤛᤡᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤂᤧᤴ ᤔᤠᤱᤜᤡᤶᤔᤡᤴ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤢᤎᤡᤱᤗᤢᤱᤜᤠ᤹ᤖᤧ ᤂᤧᤄᤧᤶᤛᤡᤱᤒᤠ ᤆᤥᤃᤢ॥ ᤂᤧᤵᤔᤥ ᤂᤢᤏᤧ᤹ ᤐᤷᤘᤣᤔᤗᤠᤶ ᤔᤧᤎᤠᤰᤋᤢᤒᤠ ᤛᤠᤶᤔᤩᤠᤱᤜᤠ᤹ ᤀᤥᤃᤵ ᤆᤥᤃᤢ॥

⁷ ᤂᤢᤏᤧ᤹ ᤂᤧᤵᤔᤥᤒᤠ ᤐᤧᤖᤧᤶᤛᤡᤱᤜᤠ᤹. ᤗᤠᤶᤎᤣᤳ ᤕᤧᤵᤏᤠᤜᤠ᤹. ᤗᤢᤱᤎᤠᤰᤜᤠ᤹ ᤏᤢ ᤗᤠᤶᤎᤣ᤺ᤳᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤗᤢᤱᤎᤠᤰᤜᤠ᤹ᤀᤥ ᤁᤖᤢᤒᤜᤠ᤹ ᤁᤢᤓᤢᤱ ᤗᤰᤋᤢᤀᤠᤱ ᤑᤳᤇᤢᤛᤡ॥

⁸ ᤂᤢᤏᤧ᤹ ᤔᤠᤱᤜᤡᤶᤔᤡᤸᤗᤧ ᤁᤢᤓᤧᤖᤧ ᤁᤢᤀᤡᤛᤡ᤺ᤰᤁᤣ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤡᤴ ᤏᤡᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤆᤥᤃᤢ॥ ᤂᤢᤏᤧ᤹ ᤛᤡᤃᤠᤱ ᤗᤧᤵᤔᤠᤱ ᤁᤡᤵ ᤋᤢᤰᤛᤡ ᤋᤣᤗᤣᤴᤋ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤂᤧᤴ ᤛᤢ᤺ᤵᤋᤢ॥

⁹ ᤁᤢᤎᤧᤵᤔᤠ ᤛᤠᤶᤔᤩᤠᤱᤜᤠ᤹ ᤁᤢᤓᤪᤧ᤺ᤱ ᤁᤡᤗᤥᤃᤪᤠᤔ ᤕᤠᤖᤡᤰ ᤁᤧᤗᤡ᤺ᤵᤐᤠ ᤆᤥᤃᤧ॥ ᤂᤢᤏᤧ᤹ ᤌᤠ᤺ᤱᤛᤔᤠ ᤁᤢᤗᤰᤜᤠ᤹ᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥

¹⁰ ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤁᤖᤢᤒ ᤏᤧᤳᤇᤡᤖᤧ ᤁᤢᤀᤡᤳᤇᤠᤵᤜᤠ᤹ ᤗᤰᤋᤢᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥

¹¹ ᤁᤴ ᤏᤧᤳᤇᤡ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤏᤡᤒᤥᤱ ᤜᤢᤰᤛᤡᤰ ᤌᤧᤶᤒᤠ ᤜᤵᤑᤧ ᤑᤧᤛᤡᤱᤅᤠᤱ ᤐᤳᤇᤧ॥ ᤗᤳᤇᤠ ᤁᤖᤢᤒᤖᤧ ᤁᤢᤗᤠᤵ ᤌᤡᤰᤁᤧᤴ ᤜᤢᤰᤛᤡᤰ ᤅᤠᤛᤡ ᤐᤳᤇᤧ. ᤜᤧᤰᤁᤩᤠᤱ ᤔᤠᤱᤜᤡᤶ ᤗᤢᤱᤎᤠᤰᤁᤡᤴ ᤛᤢᤛᤢ॥ ᤂᤧᤸᤗᤧ ᤘᤣ᤹ ᤁᤢᤗᤠᤵᤐᤡᤴ ᤘᤣ᤹ ᤁᤖᤢᤒᤧᤸᤗᤧ ᤁᤢᤗᤠᤵᤐᤡᤴ ᤛᤢᤛᤢᤖ ᤌᤠᤖᤡᤰ ᤜᤢᤰᤛᤡᤰ ᤅᤠᤛᤡᤀᤣ ᤐᤳᤇᤧ॥

¹² ᤜᤧᤰᤁᤣᤗ᤹ᤖᤡᤰᤁᤣ ᤏᤡᤛᤡᤃᤣᤰᤐᤠ ᤁᤖᤢᤒᤧᤸᤗᤧ ᤁᤢᤗᤠᤵᤐᤡᤴ ᤔᤠᤱᤜᤡᤶ ᤗᤢᤱᤎᤠᤰᤁᤡᤴ ᤛᤢᤛᤢᤖ ᤌᤠᤖᤡᤰ ᤜᤢᤰᤛᤡᤰ ᤅᤠᤛᤡ ᤐᤳᤇᤧ. ᤜᤧᤰᤁᤩᤠᤱ ᤂᤧᤸᤗᤧ ᤘᤣ᤹ ᤁᤢᤗᤠᤵᤐᤡᤴ ᤘᤣ᤹ᤛᤔᤠ ᤁᤖᤢᤒᤧᤸᤗᤧ ᤁᤢᤗᤠᤵᤐᤡᤴ ᤛᤢᤛᤢᤖ ᤜᤢᤰᤛᤡᤰ ᤅᤠᤛᤡᤀᤣ ᤐᤳᤇᤧ.

¹³ ᤁᤴ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤜᤢᤰᤛᤡᤰ ᤏᤡᤒᤥᤱ ᤕᤠᤖᤡᤰ ᤜᤵᤑᤧ ᤑᤧᤛᤡᤱᤅᤠᤱ ᤐᤳᤇᤧ॥ ᤂᤧᤴ ᤁᤖᤢᤒᤜᤠ᤹ ᤂᤢᤴᤇᤡ᤹ ᤗᤠᤱᤅᤡᤸᤗᤧ ᤋᤰᤏᤧᤛᤡᤀᤠᤱ ᤕᤧᤒᤧᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤢᤖᤠᤴ ᤔᤠᤱᤜᤡᤶᤔᤡᤸᤗᤧ ᤕᤶᤒᤠ ᤁᤢᤗᤰ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤐᤳᤇᤧ॥

¹⁴ ᤂᤢᤏᤧ᤹ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ. ᤐᤠᤖᤠᤴᤗᤠ ᤏᤢ ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤂᤡ ᤏᤢ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤑᤥ᤺ᤴᤍᤠ ᤆᤥᤃᤢ. ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤢᤱ ᤗᤰᤔᤏᤠᤒᤠ ᤁᤖᤢᤒᤜᤠ᤹ ᤆᤥᤃᤢᤛᤡᤖᤥ॥

ᤁᤢᤗ᤺ᤵᤗᤠ ᤏᤧᤳᤇᤡ ᤁᤠᤛᤠ ᤛᤡᤳᤗᤠᤱ

¹⁵ ᤔᤠᤱᤜᤡᤶᤔᤧᤸᤗᤧ ᤁᤢᤍᤃᤠᤱ ᤗᤧᤵᤔᤠᤱ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤛᤡᤳᤗᤠᤱ ᤏᤧᤳᤇᤡ ᤆᤥᤃᤢᤛᤡ॥ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶ ᤌᤰᤔᤠ ᤜᤢᤰᤛᤡᤰ ᤅᤠᤛᤡ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤁᤢᤜᤧᤰ ᤔᤧ᤺ᤌ ᤐᤳᤇᤧ॥

¹⁶ ᤂᤢᤏᤧ᤹ ᤆᤡ᤹ᤗᤧᤱᤃᤣ᤹ᤏᤢ ᤛᤥᤖᤡᤰ ᤁᤧᤓᤥ᤺ᤴᤇᤡᤱᤒᤠ ᤛᤡᤰᤁᤪᤡᤜᤠ᤹ ᤆᤥᤃᤢᤀᤠᤱ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶᤜᤠ᤹ ᤑᤳᤇᤢ॥ ᤂᤢᤏᤧ᤹ ᤁᤡᤵ ᤌᤡᤰ ᤑᤢ᤹ᤗᤧ᤹ᤛᤧ᤹ᤜᤠ᤹ ᤆᤥᤃᤢᤀᤠᤱ ᤂᤧᤴ ᤛᤡᤰᤁᤪᤡᤜᤠ᤹ᤀᤥ ᤑᤳᤇᤢ॥

¹⁷ ᤂᤢᤏᤧ᤹ ᤔᤠᤱᤜᤡᤶᤔᤡᤸᤗᤧ ᤁᤢᤍᤃᤠᤱ ᤗᤳᤇᤠ ᤗᤠᤱᤃᤧᤳ ᤐᤡᤛᤠᤱ ᤏᤢ ᤘᤣ᤹ᤀᤡᤴ ᤌᤠᤱᤃᤧᤳ ᤗᤧᤵᤔᤠᤱ ᤂᤧᤴ ᤏᤧᤳᤇᤡ ᤛᤡᤳᤗᤠᤱᤜᤠ᤹ ᤕᤧᤵᤛᤢᤛᤡ॥ ᤂᤢᤏᤧ᤹ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤛᤡᤳᤗᤠᤱᤅᤡᤸᤗᤧ ᤁᤢᤔᤡᤱ ᤕᤠᤁᤡᤏ ᤘᤠ᤺ᤳᤋᤢ ᤜᤧᤰᤁᤩᤠᤱ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤛᤡᤳᤗᤠᤱᤅᤡᤸᤗᤧ ᤁᤢᤔᤡᤱ ᤒᤥᤀᤈ ᤘᤠ᤺ᤳᤋᤢᤖᤥ॥