᥈ ᤛᤠᤵᤔᤢ᤺ᤴᤎᤢᤶ 29 - LIFOTNTᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ ( ᥈ ᤜᤠᤱ ᥇᥎:᥇-᥉ ) 1 ᤜᤡᤈᤁᤡᤕᤠᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤏᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤀᤒᤡᤕᤠ ᤘᤕᤧ. ᤂᤢᤏᤧ᤹ ᤈᤁᤖᤡᤕᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 2 ᤜᤡᤈᤁᤡᤕᤠ᤺ᤸᤗᤧ ᤂᤢᤏᤧ᤹ ᤁᤢᤛᤢᤎᤧᤒᤠ ᤍᤠᤀᤢᤍᤧᤴ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴᤏᤣ ᤆᤥᤃᤢᤖᤥ॥ ᤔᤠᤱᤜᤡᤶᤔᤡᤴ ᤛᤢᤳᤌᤥ ᤔᤧᤈᤥᤃᤢ 3 ᤜᤡᤈᤁᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤌᤡᤰᤛᤡᤃᤣᤰᤐᤠ ᤗᤠᤀᤥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤠᤶᤎᤣ᤺ᤳᤜᤠ᤹ ᤜᤴᤍᤢᤀᤠᤱ ᤂᤧᤱᤜᤠ᤹ ᤆᤠ᤺ᤱᤘᤠ ᤔᤧᤳᤋᤢ॥ 4 ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤋᤠᤖᤢᤛᤡᤀᤠᤱ ᤏᤠᤱᤃᤧᤴ ᤐᤡᤛᤠᤱᤒᤠ ᤗᤰᤂᤢᤶᤔᤥ ᤑᤢᤰᤂᤢᤛᤡ॥ 5 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤗᤧᤒᤡᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤵᤔᤧ᤹ᤀᤥ᥄ ᤂᤡᤏᤡ᤹ ᤗᤢᤶᤔᤥ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤁᤠᤛᤡᤶᤔᤧ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤛᤣᤛᤣ ᤆᤥᤃᤧᤶᤔᤧ᤹ᤀᤠᤱ ᤛᤣᤛᤣᤍᤧᤴᤏᤥᤗᤠᤶ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤂᤧᤳᤋᤧᤶᤍᤣᤛᤧᤶᤔᤧ᤹॥ 6 ᤀᤠᤏᤡ᤹ ᤐᤠᤎᤧᤒᤠᤜᤠ᤹ ᤏᤛᤠᤴ ᤁᤧᤗᤧᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤗᤧᤖᤢ ᤔᤧᤍᤣᤛᤢᤀᤠᤱ ᤂᤢᤏᤧ᤹ ᤁᤢᤕᤢᤱᤔᤠᤍᤧᤴᤏᤡᤴ ᤏᤡᤏᤡ ᤔᤧᤸᤗᤠᤵᤋᤢᤴ॥ ᤂᤧᤱᤜᤠ᤹ᤖᤧᤃ ᤂᤢᤏᤧ᤹ ᤗᤧᤵᤔᤠᤱ ᤂᤢᤴᤇᤡ᤹ ᤀᤣ᤺ᤰᤎᤠ᤺ᤰᤔᤧᤴᤏᤠᤱ ᤔᤧᤴᤜᤡᤛᤢᤴ॥ 7 ᤂᤧᤱᤜᤠ᤹ᤖᤧ ᤀᤠ᤺ᤶᤓᤥ᤹ᤀᤥᤒᤠ ᤗᤠᤶᤎᤣ᤺ᤳᤜᤠ᤹ ᤔᤧᤀᤧᤳᤋᤢ. ᤜᤧᤰᤁᤩᤠᤱ ᤛᤣᤔᤡᤜᤠ᤹ ᤛᤡᤔᤠ ᤔᤧᤓᤠ᤺ᤰᤋᤢ॥ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤍᤧᤴᤏᤥ ᤛᤢᤰᤐᤠ ᤜᤠ᤺ᤶᤔᤠ ᤏᤢ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠ ᤔᤧᤗᤧᤖᤢ॥ 8 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤌᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤧᤒᤡᤜᤠ᤹ᤖᤧ ᤀᤠᤵᤑᤣᤰ ᤔᤡᤰᤁᤧᤸᤗᤧ ᤁᤧᤏᤡᤛᤢᤶᤗ ᤁᤧᤘᤕᤡᤒᤠ ᤜᤧᤰᤁᤣ ᤂᤢᤏᤧ᤹ ᤂᤧᤱᤜᤠ᤹ ᤆᤡ᤺ᤵᤔᤠᤛᤡ. ᤁᤡᤔᤠ ᤕᤱᤔᤠᤀᤥ ᤌᤠᤔᤠᤛᤡ ᤏᤢ ᤀᤣ᤺ᤵᤔᤠᤛᤡ ᤆᤠᤜᤠᤰ ᤆᤥᤃᤢᤛᤡᤀᤠᤱ ᤘᤠ᤹॥ 9 ᤂᤧᤸᤗᤧᤆᤥᤃᤢᤸᤗᤧᤀᤣ ᤀᤠᤏᤡ᤹ ᤐᤠᤎᤧᤒᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤀᤠᤏᤡ᤹ ᤛᤠᤀᤣᤜᤠ᤹ ᤏᤢ ᤔᤣ᤺ᤳᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤠ᤹॥ 10 ᤀᤠᤸᤗ ᤀᤠᤏᤡ᤹ᤗᤠᤶ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤂᤧᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤏᤡ᤹ ᤔᤠᤱᤜᤢᤵ ᤌᤡᤰ ᤆᤥ᤺ᤰᤔᤠ ᤐᤥᤱ᤹ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤘᤠ᤹॥ 11 ᤀᤠᤱᤃᤠ᤹ ᤀᤠᤛ᤻ᤛᤠᤛᤣ. ᤀᤠᤸᤗ ᤔᤧᤴᤏᤡ᤺ᤔᤏᤠᤒᤠ ᤔᤧᤸᤗᤧᤔᤏᤠᤒᤠ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤍᤃᤡ ᤕᤧᤵᤔᤠᤀᤠᤱ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤏᤢ ᤂᤢᤏᤧ᤹ ᤁᤢᤍᤃᤡ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤛᤢᤰᤐᤠ ᤜᤠ᤺ᤶᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤧᤛᤣᤃᤡᤀᤠᤱ ᤘᤠ᤹ᤖᤥ॥” 12 ᤂᤧᤒᤩᤠᤱ ᤁᤴ ᤗᤧᤒᤡᤜᤠ᤹ᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ— ᤁᤜᤠᤋᤡᤜᤠ᤹ᤗᤠᤶ— ᤀᤔᤠᤛᤤᤖᤧ ᤁᤢᤛ᤻ᤛᤠ ᤔᤜᤋ ᤏᤢ ᤀᤈᤷᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤣᤗ॥ ᤔᤖᤠᤖᤡᤜᤠ᤹ᤗᤠᤶ— ᤀᤒ᤻ᤍᤡᤖᤧ ᤁᤢᤛ᤻ᤛᤠ ᤁᤡᤛ ᤏᤢ ᤕᤜᤗᤗᤣᤗᤖᤧ ᤁᤢᤛ᤻ᤛᤠ ᤀᤈᤷᤕᤠᤜ॥ ᤃᤣᤷᤛᤥᤏᤡᤜᤠ᤹ᤗᤠᤶ— ᤈᤡᤶᤔᤠᤜᤖᤧ ᤁᤢᤛ᤻ᤛᤠ ᤕᤥᤀᤠ ᤏᤢ ᤕᤥᤀᤠᤖᤧ ᤁᤢᤛ᤻ᤛᤠ ᤀᤍᤏ॥ 13 ᤀᤣᤗᤡᤈᤠᤐᤠᤏᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤗᤠᤶ— ᤛᤡᤔᤪᤡ ᤏᤢ ᤕᤜᤡᤀᤣᤗ॥ ᤀᤠᤛᤠᤐᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤗᤠᤶ— ᤈᤁᤖᤡᤕᤠ ᤏᤢ ᤔᤳᤋᤏᤩᤠᤜ॥ 14 ᤜᤣᤔᤠᤏᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤗᤠᤶ— ᤕᤜᤡᤀᤣᤗ ᤏᤢ ᤛᤡᤔᤡ॥ ᤕᤍᤢᤋᤢᤏᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤗᤠᤶ— ᤛᤔᤠᤕᤠᤜ ᤏᤢ ᤀᤢᤈ᤻ᤈᤡᤀᤣᤗ॥ 15 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠᤜᤠ᤹ ᤔᤧᤛᤢᤵᤛᤢᤛᤡᤀᤠᤱ ᤂᤧᤱᤜᤠ᤹ ᤀᤠᤵᤑᤣᤰ ᤛᤣᤛᤣᤛᤠᤱᤛᤠᤱ ᤔᤧᤈᤥ᤺ᤰᤛᤡᤱ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤏᤢ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤛᤢᤳᤌᤥ ᤆᤥ᤺ᤰᤛᤧ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠᤛᤧ॥ 16 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤛᤢᤳᤌᤥ ᤆᤥ᤺ᤰᤛᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤡᤃᤠᤱ ᤔᤧᤗᤠᤛᤧ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤄᤥᤛᤢᤒᤠ ᤁᤧᤖᤧᤰ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤗᤰᤂᤢᤶᤔᤥ ᤔᤧᤗ᤺ᤳᤋᤢᤀᤠᤱ ᤔᤧᤏᤧᤛ᤻ᤛᤢ॥ ᤗᤧᤒᤡᤜᤠ᤹ᤖᤧ ᤂᤧᤴ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤔᤧᤍᤣ᤹ᤖᤢᤀᤠᤱ ᤁᤡᤍᤪᤥᤏ ᤜ᤺ᤱᤃᤢᤀᤥ ᤗᤠᤵᤔᤧᤍᤣᤛᤢ॥ 17 ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤛᤢᤳᤌᤥ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤔᤧᤜᤣ᤺ᤰᤋᤢ. ᤜᤧᤰᤁᤩᤠᤱ ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤀᤠ᤺ᤶᤓᤥ᤹ᤀᤥ ᤌᤠᤖᤡᤰ ᤔᤧᤃᤧᤖᤧ॥ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤕᤧᤳᤇᤡ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴᤏᤣ ᤛᤢᤳᤌᤥ ᤔᤧᤈᤥᤃᤢ॥ ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤋᤢᤰᤛᤡᤃᤣᤰᤐᤠ ᤕᤧᤴᤏᤥᤀᤣ ᤂᤧᤱᤜᤠ᤹ᤖᤧ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤔᤧᤛᤢᤖᤢᤖᤥ॥ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤔᤧᤍᤥᤴᤍᤢ 18 ᤂᤧᤴ ᤀᤣᤃᤠᤱ ᤗᤧᤒᤡᤜᤠ᤹ ᤜᤠᤱᤜᤡᤶᤔᤥ ᤔᤧᤒᤣᤀᤠᤱ ᤜᤡᤈᤁᤡᤕᤠ ᤜᤠᤱᤅᤡᤴ ᤔᤧᤔᤧᤳᤋᤢ. “ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ. ᤂᤧᤵᤔᤥᤒᤠ ᤁᤧᤖᤧᤰ ᤂᤵᤐᤩᤠ ᤛᤠᤔᤠᤜᤠ᤹. ᤌᤧ᤺ᤰᤐᤧᤳ ᤂᤖᤧ᤺ᤱ ᤋᤥ᤺ᤶᤔᤏᤠ ᤏᤧᤔᤏᤠᤒᤠ ᤆᤵᤋᤧᤴᤏᤡᤴ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹ᤏᤢ ᤛᤥᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤶᤔᤡᤴ ᤁᤧᤖᤧᤰ ᤀᤠᤏᤡᤃᤣ ᤛᤢᤳᤌᤥ ᤆᤥ᤺ᤰᤔᤠ ᤛᤢᤖᤢᤶᤒᤧ॥ 19 ᤜᤧᤰᤁᤩᤠᤱ ᤀᤠᤜᤠᤈ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤂᤢᤏᤧ᤹ ᤏᤛᤠᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤀᤠᤱ ᤛᤧᤛᤢᤏᤧᤛ᤻ᤛᤢᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ᤀᤠᤱ ᤀᤠᤏᤡᤃᤣ ᤛᤢᤳᤌᤥ ᤆᤥᤃᤢᤶᤒᤧᤀᤠᤱ ᤛᤠᤔᤠᤕᤢᤰᤏᤠᤍᤧᤴᤜᤠ᤹ᤀᤥ ᤕᤢᤰᤂᤢᤶᤒᤧ॥ ᤀᤠᤸᤗ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤃᤡ ᤕᤢᤱᤔᤏᤠᤛᤡᤀᤠᤱ ᤕᤢᤱ॥” 20 ᤜᤡᤈᤁᤡᤕᤠ ᤜᤠᤱᤅᤡᤴ ᤀᤠᤴᤍᤣᤴ ᤋᤠᤏᤠᤶᤛᤠ ᤐᤥᤃᤧᤀᤠᤱ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤑᤢᤰᤂᤢᤛᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤌᤥ᤺ᤰᤛᤡᤱ ᤐᤣ॥ 21 ᤂᤧᤱᤜᤠ᤹ᤖᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤛᤧᤃᤶᤒᤠ ᤐᤡᤳ ᤏᤢᤛᤡ. ᤌᤢ᤺ᤶᤒᤠ ᤏᤢᤛᤡ. ᤁᤢᤶᤒᤠᤒᤠ ᤔᤧᤸᤗᤢᤰ ᤏᤢᤛᤡ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠ ᤏᤢᤛᤡ ᤜᤠᤱᤈᤢᤶᤔᤡᤸᤗᤧ ᤗᤠᤃᤡ. ᤛᤣᤛᤣᤍᤧᤴᤏᤡᤸᤗᤧ ᤗᤠᤃᤡ ᤏᤢ ᤕᤜᤢᤍᤠ᤺ᤸᤗᤧ ᤗᤠᤃᤡ ᤔᤧᤍᤠᤖᤢᤛᤡ॥ ᤜᤠᤱᤅᤡᤸᤗᤧ ᤜᤠᤖᤢᤏᤖᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤴᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤠᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤛᤡ ᤀᤡᤱᤈᤠᤱ ᤐᤡᤖᤢᤛᤡ॥ 22 ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤧᤃᤶᤒᤠ ᤐᤡᤳᤜᤠ᤹ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤴ ᤛᤠᤔᤠᤰᤂᤡᤴ ᤔᤧᤍᤣ᤹ᤖᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤗ᤹ᤖᤡᤰ ᤔᤧᤜᤢᤰᤂᤢ ᤔᤧᤍᤣᤛᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤌᤢ᤺ᤶᤒᤠᤜᤠ᤹ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤛᤠᤔᤠᤰᤂᤡᤴ ᤔᤧᤍᤣ᤹ᤖᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤗ᤹ᤖᤡᤰ ᤔᤧᤜᤢᤰᤂᤢ ᤔᤧᤍᤣᤛᤢ॥ ᤂᤶᤓᤩᤠᤱ ᤁᤢᤶᤒᤠᤒᤠ ᤔᤧᤸᤗᤢᤰᤜᤠ᤹ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤛᤠᤔᤠᤰᤂᤡᤴ ᤔᤧᤍᤣ᤹ᤖᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤗ᤹ᤖᤡᤰ ᤔᤧᤜᤢᤰᤂᤢ ᤔᤧᤍᤣᤛᤢ॥ 23 ᤂᤧᤴ ᤀᤣᤃᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤜᤠᤱᤅᤡᤴ ᤏᤢ ᤛᤱᤈᤢᤶᤓᤥᤜᤠ᤹ᤖᤧ ᤔᤧᤍᤠᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤔᤧ᤺ᤴᤍᤠᤜᤠ᤹ ᤛᤶᤎᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤔᤧᤏᤧᤛ᤻ᤛᤢ॥ 24 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤴ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤖᤧ ᤁᤢᤗᤠᤕᤥᤸᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤑᤠ᤹ᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤧᤍᤥᤴᤍᤢᤛᤡ॥ ᤌᤣᤀᤠᤱᤓᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤁᤧᤖᤧᤰ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤋᤥ᤺ᤶᤔᤠ ᤐᤥᤱ᤹ ᤁᤧᤗ᤹ᤒᤠ ᤀᤡᤱᤈᤠᤱ ᤜᤠᤱᤅᤡᤸᤗᤧ ᤐᤡᤖᤢᤛᤡᤀᤠᤱ ᤘᤕᤧ॥ 25 ᤍᤠᤀᤢᤍ ᤜᤠᤱᤅᤡᤴ. ᤜᤠᤱᤅᤡᤸᤗᤧ ᤁᤢᤎᤢᤶᤕᤠ ᤁᤧᤀᤡᤒᤠ ᤃᤠᤍᤧᤴ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤸᤗᤧ ᤏᤡ᤺ᤴᤎᤥ ᤔᤧᤈᤥᤃᤢ ᤔᤧᤒᤡᤖᤢᤛᤡᤒᤠ ᤌᤡᤶ ᤁᤢᤀᤡᤛᤡᤰ ᤜᤡᤈᤁᤡᤕᤠᤜ᤺ᤸᤗᤧ ᤗᤧᤒᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤠᤜᤡᤵᤜᤠ᤹. ᤀᤴᤔᤣᤜᤠ᤹ ᤏᤢ ᤋᤢ᤺ᤱᤃᤣᤜᤠ᤹ᤏᤢ ᤛᤥᤛᤥᤖᤡᤰ ᤂᤢᤴᤇᤡ᤹ ᤕᤠ᤺ᤶᤒᤰᤁᤥ ᤑᤳᤇᤢᤛᤡ॥ ᤁᤴ ᤌᤡᤶᤔᤡᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤐᤡᤖᤢᤛᤡᤀᤠᤱ ᤘᤕᤧ॥ 26 ᤜᤧᤰᤁᤣᤗ᤹ᤖᤡᤰ ᤗᤧᤒᤡᤜᤠ᤹ ᤍᤠᤀᤢᤍᤖᤧ ᤁᤢᤔᤢᤰᤗᤠᤜᤠ᤹ ᤔᤧᤃᤠᤵᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤛᤠᤍᤠᤱᤜᤠ᤹ ᤔᤧᤕᤠᤱᤛᤡᤱᤅᤠᤱ ᤔᤧᤕᤧᤶᤛᤡᤱ॥ 27 ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤴᤍᤧᤶᤔᤧ᤹ ᤑᤠ᤹ᤀᤠᤱ ᤜᤡᤈᤁᤡᤕᤠ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ॥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤠ᤺ᤶᤒᤰᤁᤡᤴ ᤔᤧᤜᤣ᤺ᤰᤋᤢᤸᤗᤧ ᤛᤠᤍᤠᤱᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱ ᤍᤠᤀᤢᤍᤧᤸᤗᤧ ᤁᤢᤔᤢᤰᤗᤠᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥᤴᤏᤠᤱ ᤛᤠᤶᤔᤧᤵᤔᤠ ᤔᤧᤜᤣ᤺ᤰᤋᤢ॥ 28 ᤛᤠᤶᤗᤥ ᤛᤠᤶᤃᤧᤔᤧᤵᤐᤠᤜᤠ᤹ ᤛᤠᤶᤔᤧᤗᤥᤖᤧ ᤜᤧᤰᤁᤩᤠᤱ ᤛᤠᤍᤠᤱᤜᤠ᤹ ᤁᤧᤔᤢ᤺ᤵᤐᤠᤜᤠ᤹ᤖᤧ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢ ᤜᤶᤓᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤈᤥᤃᤧ॥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤂᤠᤵᤐᤢᤌᤩ᤺ᤱ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤁᤶᤓᤗ᤹ᤖᤡᤰᤁᤣ ᤆᤰᤔᤧᤸᤗ᤹ᤀᤣ ᤐᤥ᤺ᤰᤂᤧᤀᤠᤱ ᤐᤳᤇᤧ॥ 29 ᤛᤡᤍᤢᤱᤈᤓᤠᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤆᤢᤖᤧᤀᤠᤱ ᤜᤡᤈᤁᤡᤕᤠ ᤜᤠᤱᤅᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤌᤢᤱᤒᤥ᤹ᤜᤈ᤹ ᤔᤧᤕᤢᤱᤛᤡᤱᤅᤠᤱ ᤛᤧᤘᤠ ᤔᤧᤈᤥᤃᤧ॥ 30 ᤜᤡᤈᤁᤡᤕᤠᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤍᤠᤀᤢᤍᤧᤴ ᤏᤢ ᤌᤢᤶᤕᤠ ᤁᤧᤀᤡᤒᤠ ᤀᤠᤛᤠᤐᤖᤧ ᤁᤢᤛᤢᤳᤗᤠᤀᤥ ᤗᤧᤒᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥᤴ ᤛᤠᤶᤔᤧᤵᤔᤠ ᤔᤧᤒᤠᤱᤄᤢᤛᤡ॥ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤛᤥᤛᤥᤳᤗᤖᤠᤱ ᤆᤥ᤺ᤰᤏᤢ ᤂᤢᤏᤧ᤹ ᤁᤢᤏᤠᤖᤠ ᤔᤧᤓᤥᤛᤢ. ᤜᤧᤰᤁᤩᤠᤱ ᤛᤠᤒᤴ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤔᤧᤳᤋᤢ॥ 31 ᤂᤧᤒᤩᤠᤱ ᤜᤡᤈᤁᤡᤕᤠ᤺ᤸᤗᤧ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤀᤠᤒᤠᤅᤣ ᤁᤧᤍᤥ᤺ᤴᤏᤠᤍᤡᤀᤠᤱ ᤁᤧᤘᤕᤡ᤹॥ ᤂᤡᤏᤡ᤹ ᤛᤡᤍᤢᤱᤈᤓᤠᤜᤠ᤹ ᤏᤢ ᤏᤢᤃᤧᤴ ᤋᤥ᤺ᤶᤔᤠ ᤂᤡᤏᤡ᤹ ᤛᤡᤍᤢᤱᤈᤓᤠᤜᤠ᤹ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤡᤏᤡ᤹ ᤋᤩᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤛᤱᤈᤢᤶᤓᤥᤜᤠ᤹ᤖᤧ ᤛᤡᤍᤢᤱᤈᤓᤠᤜᤠ᤹ ᤏᤢ ᤏᤢᤃᤧᤴ ᤋᤥ᤺ᤶᤔᤠ ᤛᤡᤍᤢᤱᤈᤓᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤏᤡᤱᤘᤠ᤹ᤗᤠᤶ ᤁᤧᤛ᤺ᤵᤐᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤍᤠᤖᤢ॥ 32 ᤛᤱᤈᤢᤶᤓᤥᤜᤠ᤹ᤖᤧ ᤔᤧᤍᤠᤖᤢᤛᤡᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤂᤠᤏᤡ᤺ᤳ ᤏᤢᤒᤥᤱ ᤛᤧᤃᤶᤒᤠ ᤐᤡᤳᤜᤠ᤹. ᤁᤡᤵ ᤌᤡᤰ ᤌᤢ᤺ᤶᤒᤠᤜᤠ᤹. ᤁᤡᤵ ᤏᤧᤳᤇᤡ ᤁᤢᤶᤒᤠᤒᤠ ᤔᤧᤸᤗᤢᤰᤜᤠ᤹ ᤔᤧᤘᤕᤧ॥ ᤁᤴᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡ॥ 33 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤛᤡᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤃ ᥌᥆᥆ ᤛᤧᤃᤶᤒᤠ ᤐᤡᤳᤜᤠ᤹ ᤜᤧᤰᤁᤩᤠᤱ ᥉.᥆᥆᥆ ᤔᤧᤸᤗᤢᤰᤜᤠ᤹ ᤏᤢ ᤔᤧ᤺ᤴᤍᤠᤜᤠ᤹ ᤔᤧᤘᤕᤧ॥ 34 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤔᤧᤛᤢ᤺ᤴᤍᤧᤒᤠᤸᤗᤧ ᤆᤥᤃᤢᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤧᤖᤧᤰ ᤁᤢᤜᤥᤖᤰᤐᤠᤜᤠ᤹ ᤀᤱᤔᤠ ᤔᤧᤴᤇᤢᤰᤋᤢᤴ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤕᤠ᤺ᤶᤒᤰᤁᤡᤴ ᤔᤧᤴᤈᤢ᤺ᤳᤋᤣ ᤌᤧᤶᤒᤠ ᤏᤢ ᤘᤣ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣᤛᤣᤛᤠᤱᤛᤠᤱ ᤔᤧᤴᤈᤥ᤺ᤰᤛᤡᤱᤅᤣ ᤌᤠᤖᤡᤰ ᤂᤢᤴᤇᤡ᤹ ᤗᤧᤒᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤠ᤹ᤖᤢᤛᤡ॥ ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤢᤶᤔᤥ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤛᤡᤱᤔᤠ ᤐᤠ᤺ᤴᤏᤥ ᤗᤧᤒᤡᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤛᤡᤱᤛᤡᤱ ᤕᤧᤰᤕᤧᤰ ᤔᤧᤗ᤹ᤖᤧᤀᤠᤱ ᤔᤧᤘᤕᤧ॥ 35 ᤁᤧᤖᤧᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤴᤏᤢ ᤛᤥᤖᤡᤰ ᤋᤥ᤺ᤶᤔᤏᤠᤒᤠ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤌᤡ ᤛᤡᤍᤢᤱᤈᤓᤠ᤺ᤴᤏᤢ ᤛᤥᤖᤡᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤘᤧᤳᤋᤧᤛᤖᤧ ᤘᤕᤧ॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤔᤠᤱᤛᤧᤘᤠᤴ ᤋᤃᤡ ᤜᤧᤰᤁᤣᤀᤣ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ॥ 36 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤏᤢ ᤂᤧᤴ ᤜᤧᤶᤔᤩᤠᤰ ᤜᤠᤖᤠ ᤆᤥ᤺ᤰᤔᤠ ᤆᤢᤖᤧᤒᤠᤸᤗᤧ ᤆᤥᤃᤢᤸᤗᤧ ᤜᤡᤈᤁᤡᤕᤠ ᤜᤠᤱᤅᤡᤴ ᤏᤢ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.