᥈ ᤛᤠᤵᤔᤢ᤺ᤴᤎᤢᤶ 28 - LIFOTNTᤕᤜᤢᤍᤠᤒᤠ ᤜᤠᤱ ᤀᤠᤜᤠᤈ ( ᥈ ᤜᤠᤱ ᥇᥌:᥇-᥊ ) 1 ᤀᤠᤜᤠᤈᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤛᤢᤎᤧᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤂᤢᤏᤧ᤹ ᤂᤧᤴ ᤔᤧᤈᤥᤃᤢᤴ॥ 2 ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤔᤡᤴ ᤏᤠ᤺ᤳᤋᤢᤀᤠᤱ ᤒᤠᤗ ᤔᤠᤱᤜᤠ᤹ᤖᤧ ᤗᤠᤃᤡ ᤕᤥ᤺ᤶᤔᤏᤠᤒᤠ ᤏᤠᤘᤠᤀᤡᤳᤗᤠᤜᤠ᤹ ᤆᤥᤃᤢᤛᤡ॥ 3 ᤂᤢᤏᤧ᤹ ᤒᤣᤏ-ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥ ᤛᤡᤍᤢᤱᤈᤓᤠᤜᤠ᤹ᤀᤠᤱ ᤋᤥ᤺ᤴᤍᤢ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤳᤋᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤠᤈᤣ᤹ᤗᤠᤶ ᤗ᤺ᤳᤋᤢᤍᤣᤛᤢᤛᤡᤀᤠᤱ ᤘᤕᤧ. ᤂᤧᤱᤜᤠ᤹ᤖᤧᤀᤣ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤕᤧᤵᤗᤧᤰᤁᤡᤴ ᤏᤠ᤺ᤳᤋᤢᤀᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤡᤀᤥ ᤔᤡᤎᤡᤰᤂᤢᤛᤡᤀᤠᤱ ᤛᤡᤍᤢᤱᤈᤓᤠ ᤆᤥᤃᤢᤛᤡ॥ 4 ᤂᤢᤏᤧ᤹ ᤆᤴᤈᤶᤒᤠᤍᤧᤴᤜᤠ᤹ᤀᤥ ᤏᤢ ᤁᤥ᤺ᤰᤔᤠᤜᤠ᤹ᤀᤥ ᤜᤧᤰᤁᤩᤠᤱ ᤜᤢᤶᤒᤧᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢᤀᤠᤱ ᤛᤢᤰᤐᤠ ᤜᤠ᤺ᤴᤍᤢᤖᤥ॥ ᤀᤖᤠᤔ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴᤏᤢ ᤌᤱ ( ᥈ ᤜᤠᤱ ᥇᥌:᥋ ) 5 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤖᤠᤔᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥᤗᤠᤶ ᤜᤠᤖᤡᤍᤩᤧᤖ ᤕᤠ᤺ᤴᤍᤢ॥ ᤀᤠᤖᤠᤔᤡᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤺ᤴᤍᤢᤀᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤀᤥᤗᤠᤶ ᤕᤖᤡᤰ ᤔᤧᤍᤧᤶᤛᤢᤛᤡᤀᤠᤱ ᤍᤔᤛ᤻ᤁᤛᤀᤥ ᤔᤧᤍᤣ᤹ᤖᤢᤛᤡ॥ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤣᤁᤜ᤺ᤸᤗᤧ ᤁᤢᤜᤢᤰᤁᤥᤀᤠᤱ ᤌᤩᤧ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤈᤠᤓᤧᤖᤧᤖ ᤏᤠ᤺ᤴᤍᤢ॥ 6 ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤌᤡᤰᤕᤠ᤺ᤴᤗᤧ ᤕᤜᤢᤍᤠᤒᤠ ᥇.᥈᥆.᥆᥆᥆ ᤌᤰᤛᤢᤒᤠᤜᤠ᤹ ᤛᤩᤧᤖᤢᤛᤡ. ᤌᤣᤀᤠᤱᤓᤧᤸᤗᤧ ᤕᤜᤢᤍᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤧᤖᤢᤀᤠᤱ ᤘᤕᤧ॥ 7 ᤗᤳᤇᤠ ᤛᤎᤠᤛᤡᤱᤔᤠ ᤁᤧᤄᤥᤒᤠ ᤀᤣᤑᤪᤠᤀᤡᤔᤡ ᤔᤏᤠ ᤈᤡᤁᤪᤡ᤺ᤸᤗᤧ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤠᤛᤣᤕᤠᤜᤴ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤀᤥᤔᤧᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤢᤜᤠᤱᤕᤢᤰᤐᤠ ᤀᤈᤪᤁᤠᤔᤧᤴ ᤏᤢ ᤜᤠᤱᤅᤡᤸᤗᤧ ᤁᤢᤛᤡᤃᤠᤱ ᤋᤠᤰᤑᤠᤀᤥᤒᤠ ᤀᤣᤸᤁᤠᤏᤠ᤺ᤴ ᤛᤩᤧᤖᤢᤛᤡ॥ 8 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤢᤍᤠᤗᤠᤶ ᤂᤢᤴᤇᤡ᤹ ᤆᤢᤶᤍᤣᤱᤜᤠ᤹ᤀᤥᤒᤠ ᥈.᥆᥆.᥆᥆᥆ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ॥ ᤂᤧᤱᤜᤠ᤹ᤖᤧ ᤕᤖᤡᤰ ᤔᤧᤏᤠᤵᤋᤢᤛᤡᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ᤀᤠᤱ ᤔᤧᤍᤣ᤹ᤖᤢᤀᤠᤱ ᤛᤠᤔᤖᤡᤕᤠᤀᤥ ᤔᤧᤎᤠᤰᤋᤢᤖᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤥᤍᤣᤍ 9 ᤁᤖ ᤛᤠᤔᤖᤡᤕᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤥᤍᤣᤍ ᤔᤧᤵᤔᤏᤠᤒᤠ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤌᤡᤰ ᤘᤕᤧ. ᤌᤰᤛᤢᤒᤠᤜᤠ᤹ ᤛᤠᤔᤖᤡᤕᤠ ᤔᤧᤏᤢ᤺ᤰᤂᤧ ᤔᤧᤎᤠᤅᤧᤖ ᤔᤧᤒᤳᤇᤧᤒᤠ ᤕᤧᤶᤔᤥ ᤂᤢᤏᤧ᤹ ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤗ᤺ᤴᤍᤧ॥ ᤂᤢᤏᤧ᤹ ᤂᤧᤴ ᤌᤰᤛᤢᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤁᤢᤕᤠ᤺ᤰᤗᤧ᤹ᤖᤧᤒᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤛᤡᤒᤠᤖᤥ॥ ᤁᤖ ᤂᤡᤏᤡ᤹ᤃ ᤛᤠ᤹ᤖᤡᤰ ᤛᤡᤰᤐᤥ᤺ᤰᤔᤧᤸᤗᤧ ᤁᤧᤎᤢᤰᤋᤡᤀᤠᤱ ᤂᤧᤱᤜᤠ᤹ ᤕᤢᤔᤪᤧᤰ ᤁᤧᤛᤩᤧᤖᤢᤶᤛᤡᤶᤒᤧᤴ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤁᤧᤖᤧᤀᤠᤱ ᤘᤠ᤹॥ 10 ᤀᤠᤸᤗ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹ ᤂᤰᤐᤧᤳ ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤆᤥ᤺ᤰᤔᤠᤛᤡ ᤏᤡᤱᤘᤠ᤹ ᤁᤧᤈᤥᤃᤢᤶ᤹॥ ᤀᤰᤂᤣ ᤁᤧᤈᤥᤃᤢᤶᤔᤡᤸᤗᤧ ᤌᤣ ᤂᤡᤏᤡ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤵᤋᤡᤰᤛᤠᤒᤠ ᤁᤧᤶᤒᤥ᤺ᤰᤂᤡᤴᤏᤠᤱᤒᤡ᥅ 11 ᤀᤠᤸᤗ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤠᤶᤔᤧ᤹᥄ ᤂᤡᤏᤡ᤹ ᤁᤠᤀᤡᤜᤠ᤹ᤀᤥᤗᤠᤶ ᤁᤧᤍᤧᤶᤛᤢᤶ ᤁᤧᤎᤠᤰᤋᤢᤶᤛᤡᤶᤒᤠᤜᤠ᤹ ᤏᤢ᤺ᤰᤋᤧᤶᤍᤣᤛᤧᤶᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤌᤩᤧᤀᤠᤱ ᤘᤠ᤹॥” 12 ᤂᤧᤒᤩᤠᤱ ᤁᤢᤓᤠ ᤁᤢᤓᤠ ᤀᤣᤑᤪᤠᤀᤡᤔᤒᤠ ᤗᤠᤶᤗᤥᤒᤠ ᤕᤣᤜᤥᤜᤠᤏᤠᤏᤖᤧ ᤁᤢᤛ᤻ᤛᤠ ᤀᤈᤷᤕᤠᤜ. ᤔᤛᤡᤸᤗᤣᤔᤥᤋᤖᤧ ᤁᤢᤛ᤻ᤛᤠ ᤒᤣᤖᤣᤁᤩᤠᤜ. ᤛᤸᤗᤢᤔᤖᤧ ᤁᤢᤛ᤻ᤛᤠ ᤕᤣᤜᤡᤈᤁᤩᤠᤜ᤺ᤴ ᤏᤢ ᤜᤍ᤻ᤗᤤᤖᤧ ᤁᤢᤛ᤻ᤛᤠ ᤀᤔᤠᤛᤠᤴ ᤌᤱᤅᤥᤗᤠᤶ ᤁᤧᤏᤢ᤺ᤱᤒᤠᤀᤠᤱ ᤁᤧᤎᤠᤱᤒᤠᤖ ᤁᤧᤒᤵᤐᤠᤜᤠ᤹ᤏᤢ ᤆᤡᤍᤢᤵ ᤔᤧᤍᤢᤔᤧ॥ 13 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤁᤴ ᤐᤢᤱᤗᤠᤎᤠᤒᤠᤜᤠ᤹ ᤂᤡᤏᤡ᤹ ᤁᤳᤌᤥ ᤌᤠᤰᤔᤠᤛᤡ ᤔᤧᤏᤢ᤹ᤏᤧᤴ॥ ᤂᤡᤏᤡ᤹ ᤆᤩᤠᤈᤩᤠ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤂᤡᤏᤡ᤹ ᤀᤠᤵᤋᤡᤰᤛᤠᤒᤠ ᤁᤧᤒᤥ᤺ᤰᤂᤡ᤹॥ ᤌᤣ ᤂᤡᤏᤡ᤹ ᤗᤠᤕᤥᤴ ᤏᤢ ᤀᤠᤵᤋᤡᤰᤁᤡᤴ ᤕᤥ᤹ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤔᤡ᥅ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤀᤠᤵᤋᤡᤰᤛᤠᤒᤠ ᤐᤥ᤺ᤰᤂᤡᤃᤧ ᤆᤢᤖᤡᤃᤧᤀᤠᤱ ᤘᤕᤡᤃᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤖᤧ ᤁᤢᤍᤰᤗᤧᤱᤘᤠᤀᤥ ᤂᤢᤏᤧ᤹ ᤛᤠ᤹ᤖᤡᤰ ᤁᤡᤵᤔᤠᤃᤧᤄᤢᤒᤠ ᤁᤢᤛᤠᤰᤁᤧᤴᤏᤡᤴ ᤌᤩᤧᤀᤠᤱ ᤘᤠ᤹॥” 14 ᤁᤸᤗᤧᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤌᤰᤗᤧᤱᤒᤠᤜᤠ᤹ᤖᤧ ᤐᤢᤱᤗᤠᤎᤠᤒᤠᤜᤠ᤹ ᤔᤧᤈᤥᤃᤢᤛᤡᤒᤠᤜᤠ᤹ ᤔᤧᤗᤧᤖᤢᤛᤡ ᤜᤧᤰᤁᤩᤠᤱ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤏᤧᤛ᤻ᤛᤢᤔᤧᤎ॥ 15 ᤂᤧᤱᤜᤠ᤹ᤖᤧ ᤐᤢᤱᤗᤠᤎᤠᤒᤠ ᤔᤧᤈᤥᤃᤢᤛᤡᤒᤠᤜᤠ᤹ ᤀᤠᤶᤓᤠ ᤂᤧᤴ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤔᤢᤖᤠᤔᤧᤔᤧᤳᤋᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤧᤗᤧᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤛᤠᤔᤠᤐᤢᤔᤠᤜᤠ᤹ᤗᤠᤶ ᤁᤧᤖᤧᤰ ᤗᤧᤰᤆᤠ᤹ᤒᤢᤎᤢ᤺ᤰᤐᤠ ᤔᤏᤠᤜᤠ᤹ ᤆᤠᤱᤘᤠᤴ ᤔᤧᤒᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤐᤢᤱᤗᤠᤎᤠᤒᤠᤜᤠ᤹ ᤆᤠᤱ ᤏᤢ ᤗᤠᤱᤛᤢ᤺ᤵ ᤔᤧᤈᤠᤰᤋᤢᤛᤡ. ᤂᤶᤓᤩᤠᤱ ᤆᤠᤔᤠ ᤌᤢᤱᤔᤠ ᤔᤧᤒᤡᤖᤢᤛᤡᤀᤠᤱ ᤏᤡ᤺ᤱᤃᤣ᤹ᤀᤠᤱ ᤔᤧᤜᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤆᤠ᤹ᤖᤡᤰ ᤁᤧᤏᤠᤒᤠ ᤁᤧᤄᤡ᤺ᤶᤒᤠᤜᤠ᤹ ᤏᤢ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ ᤂᤧᤱᤜᤠ᤹ᤖᤧ ᤀᤍᤱᤜᤠ᤹ᤀᤥ ᤔᤧᤃᤣ᤺ᤳᤋᤢᤛᤡᤀᤠᤱ ᤂᤢᤴᤇᤡ᤹ ᤁᤠ᤹ᤀᤡᤜᤠ᤹ᤀᤥ ᤂᤧᤒᤰᤛᤡᤱ ᤛᤡᤱᤒᤢᤱᤜᤠ᤹ᤖᤧᤴ ᤕᤧᤰᤕᤰ ᤕᤖᤡᤜᤥ ᤌᤠᤖᤡᤰ ᤔᤧᤏᤢ᤺ᤰᤋᤢ ᤔᤧᤕᤢᤖᤢᤛᤡ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤌᤥ ᤛᤠᤔᤖᤡᤕᤠ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥ ᤀᤠᤜᤠᤈᤖᤧ ᤀᤛ᤻ᤛᤢᤖᤧᤴ ᤁᤢᤓᤠ᤹ ᤏᤠ᤺ᤰᤋᤢ ( ᥈ ᤜᤠᤱ ᥇᥌:᥍-᥏ ) 16 ᤂᤧᤴ ᤕᤧᤶᤔᤥ ᤀᤠᤜᤠᤈ ᤜᤠᤱᤅᤡᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤧᤴ ᤁᤢᤓᤠ᤹ ᤏᤠ᤺ᤰᤛᤧ ᤐᤠᤱᤄᤢᤍᤣᤛᤢᤛᤡ॥ 17 ᤌᤣᤀᤠᤱᤓᤧᤸᤗᤧ ᤀᤣᤍᤥᤔᤡᤜᤠ᤹ᤖᤧ ᤕᤠᤶᤔᤥ ᤕᤜᤢᤍᤠᤴ ᤌᤱᤅᤥ ᤔᤧᤓᤳᤋᤢᤀᤠᤱ ᤔᤏᤠᤜᤠ᤹ ᤐᤢᤱᤗᤠᤎᤠᤒᤠ ᤔᤧᤈᤥᤃᤢ ᤔᤧᤍᤣ᤹ᤖᤢᤛᤡ॥ 18 ᤐᤗᤡᤛ᤻ᤋᤡᤜᤠ᤹ᤖᤧᤀᤠᤱ ᤌᤧᤃᤢᤃᤢᤒᤠ ᤏᤢ ᤕᤜᤢᤍᤠᤒᤠ ᤏᤣᤃᤣᤒᤀᤥᤒᤠ ᤕᤧᤰᤕᤰᤜᤠ᤹ᤀᤥ ᤔᤧᤏᤠᤵᤋᤢᤛᤡ॥ ᤂᤧᤱᤜᤠ᤹ᤖᤧ ᤒᤣᤌ-ᤛᤣᤔᤣᤛ. ᤀᤕᤩᤠᤗᤥᤏ ᤏᤢ ᤃᤍᤣᤖᤥᤋ ᤜᤧᤰᤁᤩᤠᤱ ᤛᤥᤂᤥ. ᤋᤡᤶᤏᤠ ᤏᤢ ᤃᤡᤶᤈᤥ. ᤂᤧᤴ ᤁᤒᤪᤡᤱᤒᤠ ᤐᤠᤱᤈᤢᤶᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤠᤱ ᤜᤢᤰᤁᤠᤵ ᤔᤧᤈᤥᤃᤢᤀᤠᤱ ᤕᤢᤰ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ॥ 19 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤈᤖᤧ ᤆᤥᤃᤢᤸᤗᤧᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤢᤍᤠᤴ ᤏ᤺ᤶᤏ᤺ᤶᤒᤠ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤜᤢᤍᤠᤀᤥ ᤑᤧᤴᤕᤠ᤺ᤶᤒᤰ ᤑᤥᤛᤢᤀᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤠ ᤗᤧᤵᤔᤠᤱ ᤛᤠ᤹ᤖᤡᤰᤁᤣ ᤏᤛᤠᤴ ᤁᤧᤗᤧᤱᤒᤠ ᤐᤥ᤺ᤰᤂᤧ॥ 20 ᤂᤧᤒᤩᤠᤱ ᤀᤛ᤻ᤛᤢᤖᤒᤠ ᤜᤠᤱ ᤋᤡᤃ᤻ᤗᤋ-ᤐᤡᤗᤣᤛᤖᤧᤴ ᤂᤢᤏᤧ᤹ ᤁᤢᤓᤠ᤹ᤛᤧ ᤑᤧᤖᤧ. ᤁᤖ ᤂᤢᤏᤧ᤹ ᤑᤠ᤹ᤔᤠᤖᤧ ᤁᤢᤗᤧᤰᤘᤠ ᤇᤧᤴᤏᤠ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢ॥ 21 ᤀᤠᤜᤠᤈᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ. ᤜᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤗᤠᤶ ᤁᤢᤓᤠ ᤐᤠ᤺ᤴᤜᤠ᤹ ᤋᤣ᤹ᤖᤢᤀᤠᤱ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤐᤡᤖᤢ. ᤁᤖ ᤁᤴᤜᤠ᤹ ᤁᤧᤖᤧᤰ ᤌᤣᤏᤠᤎᤣᤒᤠ ᤐᤥ᤺ᤰᤂᤧᤖᤥ॥ ᤀᤠᤜᤠᤈᤖᤧ ᤁᤢᤗᤠᤕᤥ 22 ᤀᤠᤶᤓᤠ ᤁᤴ ᤀᤠᤜᤠᤈ ᤜᤠᤱᤅᤡᤴᤏᤣ ᤂᤢᤏᤧ᤹ ᤋᤢᤰᤂᤣ ᤆᤩᤧᤒᤠ ᤕᤧᤶᤔᤥ ᤀᤠᤸᤗᤛᤠᤱ ᤇᤧᤴᤏᤠ ᤛᤠ᤹ᤖᤡᤰ ᤕᤜᤘᤣ ᤍᤠᤱᤒᤠ ᤗᤧᤵᤔᤠᤱ ᤏᤛᤠᤴ ᤁᤧᤗᤧᤱᤒᤠ ᤐᤥ᤺ᤰᤂᤧ॥ 23 ᤂᤢᤏᤧ᤹ ᤁᤧᤏᤠ᤺ᤶᤒᤠ ᤍᤔᤛ᤻ᤁᤛᤒᤠ ᤔᤠᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤰᤋᤱᤒᤠ ᤏᤡᤱᤘᤠ᤹ ᤀᤡ᤺ᤳᤋᤢ. “ᤀᤖᤠᤔᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤠ᤹ᤖᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤓᤠ᤹ᤀᤠᤖ ᤑᤠ᤹ᤀᤠᤱ ᤀᤠᤱᤃᤠ᤹ᤀᤠᤱ ᤂᤧᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱ᤹॥” ᤁᤖ ᤛᤧᤰᤂᤠ᤺ᤸᤗᤧᤃ ᤂᤧᤱᤜᤠ᤹ᤖᤧᤀᤣ ᤂᤢᤏᤧ᤹ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤀᤠᤃᤧᤖ ᤔᤧᤈᤥᤃᤢ॥ 24 ᤀᤠᤜᤠᤈᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤂᤵᤐᤩᤠ ᤛᤠᤔᤠᤜᤠ᤹ ᤑᤢᤰᤂᤢ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤂᤵᤐᤩᤠ ᤛᤠᤔᤠᤜᤠ᤹ ᤁᤢᤶᤈᤡᤰᤔᤠ ᤆᤥᤃᤢ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤠᤶᤎᤣ᤺ᤳᤜᤠ᤹ ᤀᤧᤳᤋᤢᤀᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤁᤧᤖᤧᤰ ᤔᤠᤖᤠᤶᤜᤠ᤹ᤖᤧ ᤁᤢᤛᤢᤰᤐᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ॥ 25 ᤜᤧᤰᤁᤩᤠᤱ ᤕᤜᤢᤍᤠᤒᤠ ᤕᤧᤰᤕᤰ ᤌᤰᤔᤠ ᤘᤣ᤹ ᤔᤠᤱᤜᤠ᤹ᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤌᤧᤃᤢᤜᤠ᤹ᤀᤥ ᤔᤠᤱᤎᤠ᤺ᤴᤜᤠ᤹ ᤆᤥᤃᤢ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤕᤠ᤺ᤰᤗᤧ᤹ᤖᤧᤖ ᤕᤠ᤺ᤴᤍᤢ॥ 26 ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ 27 ᤀᤠᤜᤠᤈᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤔᤧᤈᤡᤰᤂᤢ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤅᤥ ᤔᤧᤴᤏᤧᤛ᤻ᤛᤢᤴ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤜᤡᤈᤁᤡᤕᤠᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.