᥈ ᤛᤠᤵᤔᤢ᤺ᤴᤎᤢᤶ 27 - LIFOTNT

ᤕᤜᤢᤍᤠᤒᤠ ᤜᤠᤱ ᤕᤥᤋᤠᤔ

¹ ᤕᤥᤋᤠᤔᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤖᤢᤛᤠ ᤘᤕᤧ ᤂᤢᤏᤧ᤹ ᤛᤠᤍᤥᤁᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥

² ᤕᤥᤋᤠᤔᤖᤧ ᤁᤢᤶᤒᤠ ᤀᤢᤈ᤻ᤈᤡᤕᤠᤜ᤺ᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤂᤢᤏᤧ᤹ ᤀᤠᤶᤓᤠ ᤂᤧᤴ ᤆᤥᤃᤢ. ᤁᤢᤶᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤗᤠᤛᤧᤴ॥ ᤜᤶᤓᤛᤠᤱ ᤔᤏᤠᤜᤠ᤹ᤖᤧᤃ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤡᤴᤏᤣ ᤔᤧᤏᤠ᤺ᤳᤋᤢᤀᤠᤱ ᤔᤧᤒᤳᤇᤧ॥

³ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤌᤥᤛᤔᤠ ᤗᤠᤶᤎᤣ᤺ᤳᤋᤧᤴ ᤕᤠᤶᤔᤥ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤥᤑᤣᤗ ᤁᤥ᤺ᤰᤔᤠᤀᤥᤒᤠ ᤗᤢᤱᤎᤠᤰᤁᤡᤴ ᤕᤠᤶᤔᤥ ᤛᤧᤳᤋᤢ ᤆᤥᤃᤢ॥

⁴ ᤂᤢᤏᤧ᤹ ᤕᤜᤢᤍᤠᤒᤠ ᤁᤥ᤺ᤰᤔᤠᤒᤠ ᤗᤠᤈᤣ᤹ᤀᤥ ᤕᤧᤰᤕᤰᤜᤠ᤹ ᤆᤢᤰᤋᤧᤖ ᤆᤥᤃᤢ. ᤜᤧᤰᤁᤩᤠᤱ ᤛᤡᤱᤒᤢᤱ ᤁᤧᤕᤢᤱᤒᤠᤍᤧᤴᤜᤠ᤹ᤀᤥ ᤕᤰᤜᤠ᤹ ᤏᤢ ᤆᤱᤜᤡᤶᤜᤠ᤹ ᤆᤥᤃᤢ॥

⁵ ᤕᤥᤋᤠᤔᤧᤴ ᤀᤶᤔᤥᤏᤡᤜᤠ᤹ᤏᤢ ᤌᤱ ᤌᤰᤋᤧᤀᤠᤱ ᤂᤧᤱᤜᤠ᤹ ᤏᤠ᤺ᤴᤍᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤋᤱᤒᤣᤀᤥ ᤀᤶᤔᤥᤏᤡᤜᤠ᤹ᤖᤧ ᤂᤢᤏᤧ᤹ ᥉᥋᥆ ᤋ᤺ᤴ ᤕᤢᤵᤐᤠ. ᥈᥋.᥆᥆᥆ ᤔᤢᤖᤡ ᤔᤠᤛᤡ ᤏᤢ ᥈᥋.᥆᥆᥆ ᤔᤢᤖᤡ ᤜ᤺ᤰᤛᤡ ᤔᤧᤒᤡᤖᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤛᤡᤃᤣᤰᤐᤠ ᤏᤢ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥᤀᤠᤱ ᤂᤧᤴ ᤕᤠᤖᤡᤰᤁᤣ ᤔᤧᤓᤧᤳᤋᤢᤀᤠᤱ ᤔᤧᤒᤡᤖᤢ॥

⁶ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤢᤏᤧ᤹ ᤏᤢᤒᤠ ᤕᤧᤵᤗᤧᤰᤁᤥ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤥᤋᤠᤔᤧᤴ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧ॥

⁷ ᤕᤥᤋᤠᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰ ᤐᤠ᤺ᤴᤜᤠ᤹. ᤂᤢᤏᤧ᤹ ᤌᤰᤋᤧᤒᤠ ᤁᤧᤖᤧᤰ ᤌᤱᤜᤠ᤹ ᤏᤢ ᤘᤣ᤹ ᤕᤠ᤺ᤶᤒᤰᤜᤠ᤹ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥

⁸ ᤕᤥᤋᤠᤔᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥

⁹ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤜᤠᤈᤧᤴ ᤜᤠᤱ ᤐᤥ᤺ᤰᤂᤧᤖᤥ॥