᥈ ᤛᤠᤵᤔᤢ᤺ᤴᤎᤢᤶ 26 - LIFOTNT

ᤕᤜᤢᤍᤠᤒᤠ ᤜᤠᤱ ᤀᤢᤈ᤻ᤈᤡᤕᤠᤜ

¹ ᤂᤧᤒᤩᤠᤱ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤁᤧᤕᤥᤒᤠ ᤀᤢᤈ᤻ᤈᤡᤕᤠᤜᤴ ᤔᤧᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤶᤒᤠ ᤀᤔᤛᤩᤠᤜ᤺ᤸᤗᤧ ᤁᤢᤗᤧᤰᤘᤠᤀᤥ ᤜᤠᤱ ᤔᤧᤈᤥᤃᤢ॥

² ᤀᤔᤛᤩᤠᤜᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤀᤣᤃᤠᤱ ᤀᤢᤈ᤻ᤈᤡᤕᤠᤜ᤺ᤸᤗᤧᤀᤣ ᤀᤣᤗᤠᤋ ᤕᤧᤰᤕᤰᤁᤡᤴ ᤕᤠᤶᤔᤥ ᤆᤥᤃᤢᤀᤠᤱ ᤕᤜᤢᤍᤠᤀᤥ ᤏᤢ᤺ᤰᤋᤢ॥

³ ᤀᤢᤈ᤻ᤈᤡᤕᤠᤜᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤅᤠᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤁᤥᤗᤩᤠᤜ ᤘᤕᤧ॥ ᤂᤢᤏᤧ᤹ ᤕᤖᤢᤛᤗᤧᤔ ᤁᤧᤕᤢᤱᤔᤠ ᤘᤕᤧ॥

⁴ ᤀᤢᤈ᤻ᤈᤡᤕᤠᤜ᤺ᤸᤗᤧ ᤂᤢᤏᤧ᤹ ᤁᤢᤶᤒᤠ ᤀᤔᤛᤩᤠᤜᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤘᤕᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥

⁵ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤠᤀᤥ ᤏᤡᤛᤠᤶ ᤁᤧᤜᤢ᤹ᤒᤠ ᤈᤁᤖᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤂᤢᤏᤧ᤹ ᤁᤧᤖᤧᤰ ᤁᤢᤛᤡᤰᤗᤢᤱᤔᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤗᤥᤔᤠᤴ ᤁᤥ᤺ᤳᤋᤢ॥ ᤕᤜᤘᤣ ᤍᤠᤱᤒᤧᤴ ᤁᤥ᤺ᤳᤋᤢ ᤜᤰᤛᤢᤖ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤏᤢ᤹ᤔᤠ ᤋᤠᤔᤠ ᤐᤡᤖᤢ॥

⁶ ᤀᤢᤈ᤻ᤈᤡᤕᤠᤜᤴ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤋᤧᤴᤎᤱ ᤆᤥ᤺ᤰᤔᤠᤍᤧᤴᤏᤥ ᤐᤣᤀᤠᤱ ᤃᤠᤋ. ᤕᤒ᤻ᤏᤣ ᤏᤢ ᤀᤛ᤻ᤍᤥᤍᤒᤠ ᤗᤢᤱᤎᤠᤰᤜᤠ᤹ ᤗᤢ᤺ᤴᤍᤢᤍᤣᤛᤢ॥ ᤂᤢᤏᤧ᤹ ᤀᤛ᤻ᤍᤥᤍ ᤏᤡ᤺ᤳᤋᤠᤱ ᤏᤢ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤧᤰᤕᤰᤜᤠ᤹ ᤆᤥᤃᤢ॥

⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤐᤗᤡᤛ᤻ᤋᤡᤜᤠ᤹. ᤃᤢᤖ-ᤒᤠᤗᤀᤥ ᤁᤧᤕᤢᤱᤒᤠ ᤀᤖᤒᤡᤜᤠ᤹ ᤏᤢ ᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠ ᤑᤠ᤹ᤖᤢ॥

⁸ ᤀᤶᤔᤥᤏᤡᤜᤠ᤹ᤖᤧ ᤀᤢᤈ᤻ᤈᤡᤕᤠᤜᤀᤥ ᤜᤢᤰᤘᤠᤜᤠ᤹ ᤔᤧᤓᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤛᤥ ᤁᤢᤎᤠᤱᤛᤥᤴ ᤔᤡᤛᤪ ᤗᤠᤈᤣ᤹ᤒᤠ ᤀᤡ᤺ᤴᤍᤥᤀᤥ ᤌᤠᤖᤡᤰ ᤀᤡᤅᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥

⁹ ᤀᤢᤈ᤻ᤈᤡᤕᤠᤜ᤺ᤸᤗᤧ ᤕᤖᤢᤛᤗᤧᤔ ᤁᤢᤛᤢᤰᤐᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ. ᤏᤧᤏᤧᤒᤠᤍᤧᤴᤏᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤏᤢ ᤗᤢᤱᤎᤠᤰᤁᤥᤒᤠ ᤁᤢᤛᤢᤰᤐᤥᤒᤠ ᤀᤡᤗᤠᤶᤔᤥᤀᤠᤱ ᤆᤱᤜᤡᤶᤜᤠ᤹ ᤆᤥᤃᤢᤀᤠᤱ ᤂᤧᤴ ᤛᤧ᤺ᤵᤛᤡᤱᤔᤠᤱᤍᤧᤴ ᤆᤥᤃᤢ॥

¹⁰ ᤂᤢᤏᤧ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤘᤣ᤹ ᤆᤱᤜᤡᤶᤜᤠ᤹ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤏᤧᤏᤧᤒᤠᤍᤧᤴ ᤏᤧᤵᤔᤠᤱ ᤐᤡᤛᤠᤱ ᤂᤢᤏᤧ᤹ ᤁᤢᤒᤡᤳ ᤁᤢᤎᤰᤛᤠᤜᤠ᤹ ᤕᤖᤡᤰ ᤁᤢᤗᤢᤵ ᤔᤧᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤘᤒᤠᤰᤜᤠ᤹ ᤋᤕᤢᤏᤧᤛ᤻ᤛᤢ॥ ᤁᤥ᤺ᤰᤔᤠ ᤏᤢ ᤋᤧᤶᤒᤣ᤹ᤀᤥ ᤂᤢᤏᤧ᤹ ᤁᤢᤕᤠ᤺ᤴᤃᤧᤔᤒᤠ ᤔᤏᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤁᤧᤗᤣ᤺ᤵᤐᤠᤜᤠ᤹ᤀᤠᤱ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤠ᤺ᤶᤔᤔᤠ ᤀᤡᤰᤋᤠᤵᤐᤥ ᤏᤡᤱᤘᤠ᤹ ᤁᤧᤒᤡᤒᤠ ᤘᤕᤧ॥

¹¹ ᤁᤴᤏᤢ᤺ᤸᤗᤧ ᤘᤣ᤹ ᤀᤢᤈ᤻ᤈᤡᤕᤠᤜᤖᤧ ᤌᤱ ᤆᤥ᤺ᤰᤔᤠ ᤁᤧᤜᤢ᤹ᤛᤡᤱᤒᤠ ᤏᤢ ᤋᤧᤴᤎᤱᤗᤧ ᤗᤠᤃᤡ ᤀᤠᤓᤧᤸᤗᤧᤛᤠᤱ ᤕᤠᤖᤡᤵ ᤁᤧᤒᤥᤱᤒᤠ ᤕᤖᤡᤰ ᤌᤰᤛᤢᤒᤠᤜᤠ᤹ᤀᤠᤱ ᤁᤳᤋᤢᤛᤡ॥ ᤌᤰᤛᤢᤒᤠᤜᤠ᤹ᤀᤥᤒᤠ ᤔᤠ ᤛᤢᤜᤠᤱᤔᤡᤒᤠ ᤕᤜᤡᤀᤣᤗ ᤏᤢ ᤛᤢᤜᤠᤱᤕᤢᤰᤐᤠ ᤔᤠᤛᤣᤕᤠᤜ᤺ᤸᤗᤧ ᤕᤠᤶᤏᤠ᤺ᤳᤏᤡ᤺ᤳ ᤁᤢᤀᤡᤛᤡᤰ ᤁᤢᤗᤢᤵ ᤁᤢᤗᤢᤵ ᤆᤥᤃᤧᤛᤢᤀᤠᤱ ᤜᤠᤱᤅᤡᤸᤗᤧ ᤗᤳᤇᤠ ᤁᤢᤛᤢᤜᤠᤱᤕᤢᤰᤐᤠ ᤜᤏᤏᤩᤠᤜᤖᤧ ᤁᤢᤕᤢᤰᤁᤥ ᤁᤴᤜᤠ᤹ ᤔᤧᤘᤕᤧᤖ ᤕᤠ᤺ᤴᤍᤧᤛᤢᤛᤡ॥

¹² ᤔᤢᤰᤁᤧᤃᤢᤒᤠ ᤁᤧᤃᤢᤒᤠ ᤌᤰᤗᤧᤱᤒᤠᤜᤠ᤹ ᤁᤧᤒᤠᤱᤒᤠ ᤜᤡᤶᤛᤕᤱᤜᤠ᤹ᤀᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤂᤠᤏᤡ᤺ᤳᤋᤡᤴ ᥈.᥌᥆᥆ ᤘᤕᤧ॥

¹³ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤠᤱᤅᤡᤴ ᤑᤠ᤹ᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᥉.᥆᥍.᥋᥆᥆ ᤌᤰᤗᤧᤱᤒᤠᤜᤠ᤹ ᤁᤧᤘᤠ᤹ᤒᤠ ᤋᤧᤴᤎᤱ ᤁᤧᤈᤥ᤺ᤰᤐᤠ ᤌᤰᤛᤢᤒᤠᤜᤠ᤹ᤀᤠᤱ ᤔᤧᤘᤕᤧ॥

¹⁴ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤢᤈ᤻ᤈᤡᤕᤠᤜ᤺ᤸᤗᤧ ᤂᤥᤜᤠ᤹. ᤗᤠ᤺ᤰᤜᤠ᤹. ᤌᤠ᤺ᤰᤂᤢ᤺ᤱᤜᤠ᤹. ᤛᤠ᤺ᤱᤒᤣ ᤛᤧ᤺ᤵᤆᤠᤱᤜᤠ᤹. ᤗᤡᤜᤠ᤹ ᤏᤢ ᤀᤷᤍᤥᤜᤠ᤹ ᤕᤠᤖᤡᤵ ᤆᤥᤃᤢ॥

¹⁵ ᤆᤱᤜᤡᤶᤜᤠ᤹ᤀᤥ ᤏᤢ ᤆᤶᤒᤧᤳ ᤆᤶᤒᤧᤳ ᤗᤢᤱᤎᤠᤰ ᤁᤧᤕᤧᤵᤐᤠ ᤌᤰᤛᤢᤒᤠ ᤕᤧᤵᤏᤠᤜᤠ᤹ᤀᤥ ᤀᤥᤃᤵ ᤆᤥ᤺ᤰᤔᤠᤖᤧ ᤗᤠᤃᤡ ᤑᤧᤴᤈᤣ᤹ ᤁᤧᤎᤰᤐᤠᤜᤠ᤹ᤖᤧ ᤔᤧᤎᤃᤢᤒᤠ ᤋᤥ᤺ᤱᤜᤠ᤹ ᤌᤰᤛᤢᤒᤠᤜᤠ᤹ᤖᤧ ᤔᤧᤀᤠᤒᤢᤖ ᤜᤧᤰᤁᤩᤠᤱ ᤕᤶᤒᤕᤶᤒᤠ ᤗᤢᤱᤜᤠ᤹ ᤔᤧᤛᤢ᤺ᤰᤛᤢ ᤔᤧᤍᤣᤛᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤂᤈᤢᤶᤄᤕᤠᤜᤠ᤹ ᤕᤠᤖᤡᤵ ᤆᤥᤃᤢ॥ ᤂᤢᤏᤧ᤹ ᤁᤢᤔᤡᤱᤅᤡᤴ ᤁᤧᤖᤧᤰ ᤐᤡᤛᤠᤱ ᤛᤧᤖᤧᤀᤠᤱ ᤘᤕᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤖᤥ॥

ᤀᤠᤱᤍᤡᤱ ᤗ᤹ᤔᤠᤖᤧ ᤆᤥᤃᤢᤸᤗᤧ ᤀᤢᤈ᤻ᤈᤡᤕᤠᤜ᤺ᤸᤗᤧ ᤂᤢᤶᤍᤡᤱ ᤂᤥᤛᤢ

¹⁶ ᤁᤖ ᤀᤢᤈ᤻ᤈᤡᤕᤠᤜᤴ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤀᤠᤱ ᤀᤣᤃᤠᤱ ᤂᤢᤏᤧ᤹ ᤀᤠᤱᤍᤡᤱ ᤁᤢᤗ᤹ᤔᤠᤖᤧ ᤆᤥᤃᤢᤸᤗᤧ ᤂᤢᤏᤧ᤹ ᤆᤥ᤺ᤴᤍᤧ॥ ᤂᤢᤏᤧ᤹ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤢᤰᤐᤠ ᤜᤠ᤺ᤶᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠᤛᤧᤀᤠᤱ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢ॥

¹⁷ ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤈᤷᤕᤠᤜᤴ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤘᤣ᤹ ᤕᤧᤵᤐᤥᤱ ᤜᤠᤱᤜᤠᤱ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤠᤱᤅᤡᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤛᤡᤃᤠᤱ ᤔᤧᤒᤣ॥

¹⁸ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤠᤍᤢᤶᤍᤢᤶᤒᤠ ᤔᤧᤔᤧᤳᤋᤢ. “ᤀᤢᤈ᤻ᤈᤡᤕᤠᤜᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤢᤰᤐᤠ ᤜᤠ᤺ᤶᤔᤠ ᤕᤠ᤺ᤶᤒᤰᤁᤡᤴ ᤀᤠᤍᤠᤱᤒᤠᤖᤧᤴ ᤔᤣ᤺ᤴ॥ ᤁᤴ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡᤃ ᤋᤥ᤺ᤶᤔᤏᤠᤒᤠ ᤜᤠᤖᤢᤏᤖᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤘᤠ᤹॥ ᤛᤣᤛᤣᤍᤧᤴᤏᤥᤗᤠᤶ ᤗ᤺ᤴᤍᤧᤀᤠᤱ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤏᤛᤠᤴ ᤁᤧᤗᤧᤰᤂᤢᤀᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤀᤠᤍᤠᤱᤒᤠᤖᤧ ᤌᤧᤔᤠ ᤀᤡᤱᤎᤠᤱᤅᤠᤱ ᤁᤧᤱᤄᤥᤛᤢᤴ᤹॥”

¹⁹ ᤁᤢᤜᤢᤰᤁᤥ ᤛᤠᤱᤋᤧᤖᤧ᤺ᤱᤅᤡᤴ ᤕᤠᤱᤛᤡᤱᤅᤠᤱ ᤛᤢᤰᤐᤠ ᤜᤠ᤺ᤶᤔᤠ ᤁᤧᤈᤥ᤺ᤰᤐᤠ ᤀᤢᤈ᤻ᤈᤡᤕᤠᤜ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤑᤢᤀᤡ ᤐᤥᤃᤧ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤏᤢ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤐᤳᤇᤧᤖ ᤂᤧᤱᤜᤠ᤹ᤖᤧᤀᤣ ᤂᤢᤴᤇᤡ᤹ ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤂᤢᤏᤧ᤹ ᤁᤢᤍᤫᤠᤒᤥ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤠ ᤗ᤺ᤴᤍᤧ॥

²⁰ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤈᤷᤕᤠᤜᤴ ᤏᤢ ᤘᤣ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤥᤔᤧᤔᤧᤳᤋᤢᤀᤠᤱ ᤔᤧᤒᤳᤇᤧᤖ ᤁᤢᤍᤫᤠᤒᤥ ᤗᤥᤃᤣ᤹ ᤋᤢᤰᤔᤠ ᤗ᤺ᤴᤍᤧᤒᤠ ᤂᤧᤱᤜᤠ᤹ᤖᤧ ᤔᤧᤏᤡᤛᤢ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤜᤠᤖᤠᤜᤠᤖᤠ ᤔᤠᤱᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤋᤢᤰᤔᤧᤸᤗᤧ ᤂᤢᤏᤧ᤹ ᤋᤖᤢᤖ ᤕᤠ᤺ᤴᤍᤢᤀᤠᤱ ᤘᤕᤧ॥

²¹ ᤀᤢᤈ᤻ᤈᤡᤕᤠᤜ ᤜᤠᤱᤅᤡᤴ ᤂᤢᤏᤧ᤹ ᤁᤢᤛᤡᤔᤠ ᤕᤧᤴ ᤌᤧᤶᤒᤠᤀᤣ ᤗᤥᤃᤣ᤹ ᤋᤢᤰᤔᤧᤸᤗᤧ ᤋᤖᤢ॥ ᤂᤢᤏᤧ᤹ ᤗᤠ᤺ᤳᤗᤠ᤺ᤳ ᤜᤡᤶᤔᤥ ᤗᤥᤃᤣ᤹ ᤐᤠᤖᤠᤔᤠ ᤋᤢᤰᤔᤧᤸᤗᤧ ᤁᤧᤍᤶᤒᤠ ᤐᤥ᤺ᤰᤂᤧᤀᤠᤱ ᤕᤢᤱᤔᤠ ᤜᤣ᤺ᤰᤋᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤢᤏᤧ᤹ ᤗᤠ᤺ᤵᤔᤠ ᤔᤧᤄᤥᤛᤧᤴ॥ ᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤗᤠᤶ ᤂᤢᤏᤧ᤹ ᤔᤧᤛᤧᤴᤍᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤥᤋᤠᤔᤧᤸᤗᤧ ᤜᤠᤱᤜᤡᤶᤔᤡᤴ ᤀᤥᤔᤧᤵᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤗᤠᤈᤣ᤹ᤀᤥ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥

²² ᤀᤢᤈ᤻ᤈᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰ ᤐᤠ᤺ᤴᤜᤠ᤹ ᤁᤢᤜᤣ᤺ᤰᤛᤡᤱᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰᤁᤣ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤀᤠᤱ ᤐᤳ॥

²³ ᤀᤢᤈ᤻ᤈᤡᤕᤠᤜᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠ ᤀᤡᤰᤋᤠᤵᤐᤥ ᤔᤧᤗᤢᤵᤋᤢ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤗᤥᤃᤣ᤹ ᤋᤢᤰᤔᤧᤸᤗᤧ ᤋᤖᤢᤒᤠᤖᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤕᤥᤋᤠᤔᤧᤴ ᤜᤠᤱ ᤐᤥ᤺ᤰᤂᤧᤖᤥ॥