᥈ ᤛᤠᤵᤔᤢ᤺ᤴᤎᤢᤶ 25 - LIFOTNTᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜ ( ᥈ ᤜᤠᤱ ᥇᥊:᥈-᥌ ) 1 ᤀᤔᤛᤩᤠᤜᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤏᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤜᤥᤀᤍᤡᤏ ᤘᤕᤧ॥ ᤂᤢᤏᤧ᤹ ᤕᤖᤢᤛᤗᤧᤔ ᤁᤧᤕᤢᤱᤔᤠ ᤘᤕᤧ॥ 2 ᤀᤔᤛᤩᤠᤜ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤁᤖ ᤁᤧᤖᤧᤰ ᤁᤢᤏᤡᤱᤘᤠ᤹ᤖᤧ ᤔᤧᤈᤥᤃᤢᤴ॥ 3 ᤂᤢᤏᤧ᤹ ᤁᤢᤜᤢᤰᤁᤥ ᤜᤠᤱᤈᤢᤶᤔᤡᤴ ᤕᤥᤎᤥ ᤔᤧᤸᤗ᤹ᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤶᤒᤠ ᤜᤠᤱᤅᤡᤴ ᤁᤧᤛᤩᤧᤵᤐᤠ ᤛᤢᤜᤠᤱᤕᤢᤰᤐᤠᤜᤠ᤹ ᤂᤢᤏᤧ᤹ ᤛᤩᤧᤖᤢᤛᤡ॥ 4 ᤁᤖ ᤂᤢᤏᤧ᤹ ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ “ᤐᤠᤏᤢᤍᤡᤱ ᤐᤠᤜᤠ᤹ ᤂᤢᤴᤇᤡ᤹ ᤛᤠᤀᤣᤜᤠ᤹ᤖᤧ ᤗᤠᤃᤡ ᤏᤢ ᤛᤠᤀᤣᤜᤠ᤹ ᤐᤠᤏᤢᤍᤡᤱ ᤐᤠᤜᤠ᤹ᤖᤧ ᤗᤠᤃᤡ ᤛᤧᤵᤔᤠᤛᤡ ᤔᤣ᤺ᤴ. ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤕᤥᤀᤥ ᤔᤧᤛᤡᤖ” ᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ᤃ ᤔᤧᤛᤩᤧᤖᤢᤛᤡᤴᤗᤥ॥ ᤀᤣᤍᤥᤔᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ( ᥈ ᤜᤠᤱ ᥇᥊:᥍ ) 5 ᤀᤔᤛᤩᤠᤜ᤺ᤸᤗᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤑᤢᤰᤂᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤜᤡᤶᤛᤕᤱ ᤁᤢᤀᤡᤛᤡᤰ ᤁᤧᤖᤧᤰ ᤕᤜᤢᤍᤠ ᤜᤧᤰᤁᤩᤠᤱ ᤒᤣᤏᤩᤠᤔᤡᤏ ᤜᤧᤴᤇᤡᤱ ᤜᤧᤴᤇᤡᤱᤅᤥᤒᤠ ᤌᤰᤔᤥᤒᤠᤜᤠ᤹ ᤏᤢ ᤁᤡᤵ ᤌᤡᤰ ᤁᤡᤵ ᤌᤡᤰᤁᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤔᤧᤘᤕᤧᤖ ᤕᤠ᤺ᤴᤍᤢᤛᤡ॥ ᤂᤢᤏᤧ᤹ ᤏᤡᤒᤥᤱ ᤋᤱᤒᤣ ᤁᤧᤃᤧᤵᤐᤠ ᤜᤧᤰᤁᤩᤠᤱ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤋᤱᤒᤣ ᤁᤧᤕᤥᤒᤠᤜᤠ᤹ ᤂᤰᤐᤧᤳ ᤛᤢᤵᤛᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳᤋᤡᤴ ᥉.᥆᥆.᥆᥆᥆ ᤕᤥᤖᤧ॥ ᤂᤧᤱᤜᤠ᤹ ᤁᤧᤖᤧᤰ ᤌᤱ ᤆᤥ᤺ᤰᤔᤠ ᤁᤧᤛᤢᤰᤐᤠ ᤜᤧᤰᤁᤩᤠᤱ ᤗᤠ᤺ᤰ ᤏᤢ ᤂᤥ ᤕᤠᤱᤔᤠ ᤁᤧᤛᤢᤰᤐᤠ ᤔᤧᤘᤕᤧ॥ 6 ᤂᤢᤏᤧ᤹ ᤁᤡᤵ ᤌᤡᤰ ᤕᤢᤵᤐᤠ ᤋᤥᤖᤠ ᤜᤢᤅᤢᤀᤠᤱ ᤀᤡᤛᤪᤠᤀᤡᤗᤗᤠᤶ ᥇.᥆᥆.᥆᥆᥆ ᤔᤢᤰᤁᤧᤃᤢᤒᤠ ᤌᤰᤗᤧᤱᤒᤠᤜᤠ᤹ ᤕᤢᤖᤢᤛᤡ॥ 7 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤎᤡᤰ ᤂᤢᤏᤧ᤹ᤀᤥ ᤋᤩᤧᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤠ ᤜᤠᤱᤅᤣ. ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤀᤠᤍᤠᤱᤒᤠᤖᤧ ᤔᤧᤍᤣ᤹ᤖᤧᤛᤧᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤏᤢ ᤜᤥᤵ—ᤀᤣᤑᤪᤠᤀᤡᤔᤒᤠ ᤀᤠᤳᤋᤡᤴ ᤔᤏᤠᤜᤠ᤹ᤏᤢᤀᤠᤱ ᤜᤥᤵ॥ 8 ᤀᤠᤍᤠᤱᤒᤠ ᤜᤠᤱᤜᤠᤱ ᤗ᤹ᤖᤡᤰ ᤌᤱ ᤁᤧᤈᤥ᤺ᤰᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤠᤖᤡ ᤁᤧᤍᤠᤖ ᤁᤧᤕᤠ᤺ᤴ. ᤌᤣᤀᤠᤱᤓᤧᤸᤗᤧ ᤜᤠᤖᤡ ᤆᤠ᤺ᤵᤔᤠ ᤔᤢᤰᤛᤠᤶ ᤂᤢᤏᤧ᤹ ᤁᤳᤋᤢ᤹॥” 9 ᤀᤔᤛᤩᤠᤜ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤔᤧᤳᤋᤢ. “ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤡᤖᤢᤱᤛᤡᤱᤒᤠ ᤂᤧᤴ ᤁᤡᤵ ᤌᤡᤰ ᤋᤥᤖᤠ ᤕᤢᤵᤐᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤌᤣ ᤆᤥᤃᤢᤱᤒᤠᤒᤣ᥅” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠ ᤁᤡᤵ ᤌᤡᤰᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤡᤔᤠ ᤁᤧᤛᤢᤰ᥄” 10 ᤁᤸᤗᤧᤆᤥᤃᤢᤸᤗᤧ ᤀᤔᤛᤩᤠᤜ᤺ᤸᤗᤧ ᤀᤣᤑᤪᤠᤀᤡᤔᤗᤠᤶ ᤂᤢᤏᤧ᤹ᤀᤥ ᤁᤧᤕᤢᤒᤠ ᤌᤰᤛᤢᤒᤠᤜᤠ᤹ ᤛᤧᤴᤍᤢᤛᤡᤀᤠᤱ ᤜᤡᤶᤔᤥ ᤐᤠᤱᤄᤢᤍᤣᤛᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤕᤜᤢᤍᤠᤒᤠᤜᤠ᤹ᤏᤢ ᤂᤢᤴᤇᤡ᤹ ᤛᤠ᤹ᤖᤡᤰ ᤛᤠᤰᤁᤧᤴ ᤐᤥᤃᤧ᤹. ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤡᤰᤐᤥ᤺ᤰᤔᤧᤸᤗᤧ ᤌᤣᤀᤠᤱ ᤔᤧᤴᤏᤡᤀᤣ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣ॥ 11 ᤂᤧᤴ ᤀᤣᤃᤠᤱ ᤀᤔᤛᤩᤠᤜ᤺ᤸᤗᤧ ᤛᤢᤈᤠ ᤏᤠ᤺ᤰᤋᤢᤀᤠᤱ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤕᤢᤶᤗᤠ᤺ᤰᤂᤠᤱ ᤏᤧᤏᤧᤒᤠᤍᤧᤴᤏᤥ ᤐᤣ. ᤜᤧᤰᤁᤩᤠᤱ ᤂᤧᤵᤔᤥ ᤛᤣᤀᤡᤖᤒᤠ ᥇᥆.᥆᥆᥆ ᤔᤏᤠᤜᤠ᤹ ᤛᤩᤧᤖᤢᤛᤡ॥ 12 ᤕᤜᤢᤍᤠᤒᤠ ᤌᤰᤛᤢᤒᤠᤜᤠ᤹ᤖᤧ ᤘᤣ᤹ ᥇᥆.᥆᥆᥆ ᤔᤏᤠᤜᤠ᤹ ᤁᤢᤜᤡᤱᤘᤧᤳ ᤔᤧᤍᤧᤶᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤕᤠᤰᤐᤣ᤹ᤀᤡᤸᤗᤧ ᤁᤢᤈᤱᤅᤥ ᤔᤧᤍᤣ᤹ᤖᤢᤛᤡᤀᤠᤱ ᤔᤢ ᤔᤰᤔᤧᤎᤠ᤺ᤴᤍᤢᤛᤡ॥ ᤂᤧᤵᤔᤥ ᤂᤧᤱᤜᤠ᤹ ᤔᤧᤍᤥ᤺ᤰᤋᤧᤀᤠᤱ ᤁᤢᤓᤢᤍᤢᤰᤔᤠ ᤔᤧᤒᤥ᤺ᤰᤂᤧ॥ 13 ᤀᤠᤶᤓᤠ ᤂᤧᤴ ᤕᤧᤶᤔᤥ ᤀᤔᤛᤩᤠᤜ᤺ᤸᤗᤧ ᤌᤱᤅᤥ ᤔᤧᤴᤎᤠᤀᤣ ᤜᤡᤶᤔᤥ ᤐᤠᤱᤄᤢᤍᤣᤛᤢᤛᤡᤒᤠ ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤛᤠᤔᤖᤡᤕᤠᤀᤠᤱ ᤕᤥ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤒᤣᤌ-ᤜᤥᤖᤥᤏ ᤌᤠᤖᤡᤰ ᤔᤧᤏᤠᤵᤋᤢᤛᤡ॥ ᤂᤧᤱᤜᤠ᤹ᤖᤧ ᥉.᥆᥆᥆ ᤔᤏᤠᤜᤠ᤹ ᤔᤧᤛᤩᤧᤖᤢᤛᤡᤀᤠᤱ ᤕᤖᤡᤰ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤍᤣ᤹ᤖᤢ॥ 14 ᤀᤣᤍᤥᤔᤡᤜᤠ᤹ ᤔᤧᤏᤠ᤺ᤴᤍᤢᤛᤡᤀᤠᤱ ᤔᤧᤏᤢ᤺ᤰᤂᤧᤸᤗᤧ ᤀᤔᤛᤩᤠᤜ᤺ᤸᤗᤧ ᤛᤣᤀᤡᤖᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤑᤧᤳᤋᤢᤛᤡᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤠᤱ ᤆᤥᤃᤢᤛᤡ॥ ᤂᤢᤏᤧ᤹ ᤂᤧᤴ ᤔᤠᤱᤜᤠ᤹ ᤛᤧᤘᤠ ᤔᤧᤳᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ 15 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤔᤛᤩᤠᤜ᤺ᤴᤏᤢ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤎᤡᤰ ᤐᤠᤱᤄᤢᤍᤠᤛᤢ. ᤂᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥᤗᤠᤶ ᤂᤢᤴᤇᤡ᤹ ᤀᤠᤵᤑᤣᤰ ᤔᤏᤠᤜᤠ᤹ ᤋᤠᤱᤔᤠᤛᤧ᤺ᤵᤔᤠ ᤔᤧᤴᤇᤢᤰᤔᤏᤠᤒᤠ ᤔᤠᤱᤜᤠ᤹ᤗᤠᤶ ᤁᤢᤓᤠ᤹ ᤀᤠᤍᤠᤱᤒᤠᤖᤧ ᤌᤣᤀᤠᤱ ᤁᤧᤃᤥ᤺ᤳᤋᤢᤒᤠᤒᤣ᥅” 16 ᤂᤧᤴ ᤔᤏᤠ᤺ᤴ ᤐᤠᤖᤧᤀᤠᤱ ᤐᤳᤇᤧᤸᤗᤧ ᤀᤔᤛᤩᤠᤜ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤌᤣ ᤀᤠᤏᤡᤃᤣ ᤂᤧᤏᤧ᤹ ᤜᤠᤱᤈᤢᤶᤔᤥᤒᤠ ᤛᤢᤈᤠᤛᤠᤒᤠ ᤕᤢᤰᤋᤡᤱ ᤆᤥ᤺ᤰᤁᤠᤛᤡᤃᤧᤀᤠᤱ ᤘᤕᤧᤒᤡ᥅ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ᥄ ᤌᤣᤀᤠᤱ ᤂᤧᤏᤧ᤹ ᤁᤧᤜᤡᤱᤔᤧᤴ ᤁᤧᤛᤠᤰᤐᤥ ᤁᤧᤎᤠᤛᤢ᥅” ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤐᤠ᤺ᤵᤔᤠ ᤏᤠ᤹ᤔᤠᤏᤢ᤺ᤸᤗᤧ ᤋᤃᤡ ᤀᤰᤂᤣ ᤗ᤹ᤖᤧ. “ᤀᤠᤍᤠᤱᤒᤠᤖᤧ ᤀᤰᤂᤣ ᤁᤧᤈᤥᤃᤢᤀᤠᤱ ᤀᤠᤱᤃᤠ᤹ ᤀᤠᤛᤢᤈᤠᤴ ᤁᤧᤱᤄᤧᤵᤛᤢᤶᤒᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠ ᤔᤧᤱᤔᤠ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹ᤖᤥ॥” ᤀᤡᤛᤪᤠᤀᤡᤗᤏᤢ ᤐᤥ᤺ᤰᤂᤧᤒᤠ ᤌᤱ ( ᥈ ᤜᤠᤱ ᥇᥊:᥎-᥈᥆ ) 17 ᤂᤧᤴ ᤀᤣᤃᤠᤱ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜ᤺ᤸᤗᤧ ᤂᤢᤏᤧ᤹ ᤁᤢᤛᤢᤈᤠᤍᤠᤱᤒᤠᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡᤀᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤢᤖᤧ ᤁᤢᤶᤔᤧᤴᤇᤠ᤹. ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤌᤰᤔᤠ ᤛᤠ᤺ᤳᤋᤢ. “ᤕᤧ᤹. ᤀᤠᤏᤡ᤹ ᤏᤠᤍᤢᤶᤍᤢᤶᤒᤠ ᤋᤴᤏᤠᤍᤡ॥” 18 ᤁᤖ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤖᤧ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤀᤰᤋᤱᤒᤠ ᤏᤢᤃᤵ ᤐᤡᤖᤢ—“ᤗᤧᤒᤏᤠᤏᤒᤠ ᤗᤳᤇᤠ ᤛᤣᤷᤍᤠ᤺ᤰᤔᤧᤸᤗᤧ ᤗᤧᤒᤏᤠᤏᤀᤥᤒᤠᤀᤣ ᤗᤳᤇᤠ ᤛᤠᤶᤔᤠᤱᤛᤡᤱᤅᤡᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢ. ‘ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤴ ᤀᤠᤱᤃᤠ᤹ ᤀᤠᤛ᤻ᤛᤠ ᤕᤧᤶᤒᤡᤳᤇᤠ᤺ᤴᤏᤢ ᤔᤣ᤺ᤰᤂᤡᤶ ᤔᤧᤳᤋᤧ᤹॥’ ᤂᤧᤒᤩᤠᤱ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤌᤰᤛᤠᤎᤡᤰ ᤂᤧᤵᤔᤥᤗᤠᤶ ᤐᤥ᤺ᤰᤂᤧᤀᤠᤱ ᤐᤣ᤺ᤸᤗᤧ ᤂᤧᤸᤗᤧ ᤛᤣᤷᤍᤠ᤺ᤰᤔᤧᤴ ᤆᤡᤍᤥ᤹ ᤋᤥ᤹ᤖᤢᤖᤳᤇ॥ 19 ᤀᤠᤸᤗ ᤀᤔᤛᤩᤠᤜᤀᤣ. ᤂᤧᤏᤧ᤹ ᤀᤣᤍᤥᤔᤡᤜᤠ᤹ ᤏᤠ᤺ᤴᤍᤢᤱᤛᤡᤱ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢ᤹. ᤜᤧᤰᤁᤩᤠᤱ ᤕᤶᤒᤠ ᤁᤧᤜᤧᤴᤇᤡᤱᤅᤠᤱ ᤀᤠᤱᤍᤡᤱ ᤁᤧᤗ᤹॥ ᤀᤠᤵᤑᤣᤰ ᤁᤧᤜᤡᤶᤔᤥᤀᤣ ᤜᤠᤒᤠ ᤕᤢᤅᤧᤃᤖᤧ᤹॥ ᤂᤧᤏᤧ᤹ ᤀᤠᤵᤑᤣᤰ ᤏᤢ ᤕᤜᤢᤍᤠ᤺ᤴᤏᤠᤱ ᤔᤧᤱᤔᤠᤖᤧ ᤗᤠᤃᤡ ᤌᤣᤀᤠᤱ ᤁᤧᤛᤠᤰᤐᤥ ᤁᤧᤎᤠᤛᤡᤱᤒᤠᤒᤣ᥅” 20 ᤁᤖ ᤀᤔᤛᤩᤠᤜ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤶᤄᤧᤶᤔᤠᤱ ᤔᤧᤗᤠᤵᤋᤢᤴ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤣᤍᤥᤔᤒᤠ ᤔᤠᤱᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤡᤶᤍᤢᤛᤡᤀᤠᤱ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤕᤣᤜᤥᤀᤠᤛᤖᤧ ᤁᤢᤜᤢᤰᤁᤥ ᤌᤠᤔᤠᤛᤡᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧ॥ 21 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤧᤴ ᤋᤃᤡ ᤌᤠᤛᤡᤱ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤕᤜᤢᤍᤠᤒᤠ ᤒᤣᤌ-ᤛᤣᤔᤣᤛᤀᤥ ᤌᤱ ᤌᤰᤋᤧᤛᤡ॥ 22 ᤀᤡᤛᤪᤠᤀᤡᤗᤖᤧ ᤕᤜᤢᤍᤠᤴ ᤜᤠᤖᤡᤈᤠ᤺ᤳᤋᤢ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤄᤧᤳᤇᤡᤱ॥ 23 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤧᤸᤗᤧ ᤀᤜᤈᤩᤠᤜᤖᤧ ᤁᤢᤶᤔᤧᤴᤇᤠ᤹. ᤕᤥᤀᤠᤛᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤒᤣᤌ-ᤛᤣᤔᤣᤛᤀᤥ ᤋᤧᤶᤛᤢᤀᤠᤱ ᤕᤖᤢᤛᤗᤧᤔ ᤌᤠᤰᤋᤢ॥ ᤂᤢᤏᤧ᤹ ᤀᤣᤑᤪᤠᤀᤡᤔᤒᤠ ᤗᤠᤶᤎᤣ᤺ᤳᤋᤥᤏᤢ ᤁᤢᤛᤢᤰᤐᤥᤒᤠ ᤗᤢᤱᤅᤥ ᤌᤠᤖᤡᤰ ᤁᤡᤵ ᤗᤡᤛᤡ ᤜᤢᤰᤛᤡᤰ ᤕᤠᤖᤡᤰ ᤕᤖᤢᤛᤗᤧᤔ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤢᤍᤣᤛᤢ॥ 24 ᤂᤢᤏᤧ᤹ ᤀᤥᤒᤣᤍ-ᤀᤣᤍᤥᤔᤖᤧ ᤀᤥᤔᤧᤵᤔᤠ ᤁᤢᤗᤰᤐᤧᤴᤏᤥ ᤔᤧᤕᤢᤰᤂᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤥᤛᤢᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤁᤧᤖᤧᤰ ᤂᤵᤐᤩᤠᤜᤠ᤹ ᤜᤧᤰᤁᤩᤠᤱ ᤜᤠᤱᤜᤡᤶᤔᤥ ᤁᤧᤕᤢᤱᤒᤠ ᤀᤡᤔᤧᤸᤗᤢᤱᤒᤠ ᤆᤡᤃᤰᤘᤠᤜᤠ᤹ᤏᤢ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤒᤠ ᤜᤠᤱᤒᤡᤑᤩᤢᤱᤒᤠᤜᤠ᤹ᤀᤠᤱ ᤗ᤺ᤳᤋᤢᤍᤣ᤹ᤖᤢᤛᤡᤀᤠᤱ ᤂᤢᤏᤧ᤹ ᤛᤠᤔᤖᤡᤕᤠ ᤏᤢ᤺ᤰᤂᤧᤒᤣ॥ 25 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤧᤴᤏᤢ᤺ᤸᤗᤧ ᤕᤜᤢᤍᤠᤒᤠ ᤜᤠᤱ ᤕᤣᤜᤥᤀᤠᤛᤖᤧ ᤁᤢᤛ᤻ᤛᤠ ᤀᤔᤛᤩᤠᤜᤴ ᤌᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤖᤡᤰ ᤜᤡᤅᤧ॥ 26 ᤀᤔᤛᤩᤠᤜᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤌᤣᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 27 ᤀᤔᤛᤩᤠᤜᤴ ᤕᤜᤘᤣ ᤍᤠᤱᤒᤧᤴ ᤗᤠᤶᤒᤠ ᤗᤠ᤺ᤳᤗᤠ᤺ᤳ ᤐᤥ᤺ᤰᤂᤧᤒᤣᤀᤠᤱᤎᤥᤀᤣ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤐᤥ᤺ᤰᤂᤧᤖ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤳᤇᤡᤱᤅᤠᤱ ᤗᤠᤁᤡᤛ ᤐᤣ॥ ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤔᤏᤠᤜᤠ᤹ ᤗᤠᤁᤡᤛ ᤔᤧᤒᤠᤱᤄᤢᤛᤡᤀᤠᤱ ᤂᤢᤏᤧ᤹ ᤀᤠᤶᤓᤠ ᤂᤧᤵᤔᤥ ᤔᤧᤛᤩᤧᤖᤢ॥ 28 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤈᤣᤎᤰᤁᤡᤴ ᤀᤴᤏᤡᤴ ᤔᤧᤃᤢ᤺ᤳᤋᤢᤀᤠᤱ ᤕᤖᤢᤛᤗᤧᤔ ᤔᤧᤓᤧᤳᤋᤢ॥ ᤂᤢᤏᤧ᤹ ᤂᤧᤵᤔᤥ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.