᥈ ᤛᤠᤵᤔᤢ᤺ᤴᤎᤢᤶ 24 - LIFOTNTᤕᤜᤢᤍᤠᤒᤠ ᤜᤠᤱ ᤕᤥᤀᤠᤛ ( ᥈ ᤜᤠᤱ ᥇᥈:᥇-᥇᥌ ) 1 ᤕᤥᤀᤠᤛᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤋᤱᤒᤣ ᤏᤢᤛᤡ ᤕᤥᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤡᤒᤥᤱ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠ ᤒᤣᤷᤛᤣᤒᤠ ᤁᤧᤕᤢᤱᤔᤠ ᤛᤡᤒᤩᤠ ᤘᤕᤧ॥ 2 ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤁᤢᤜᤡᤱᤜᤡᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤕᤥᤀᤠᤛᤖᤧ ᤀᤠᤶᤓᤠ ᤂᤧᤴ ᤆᤥᤃᤢ॥ 3 ᤕᤜᤥᤕᤠᤍᤠ᤺ᤸᤗᤧ ᤕᤥᤀᤠᤛᤖᤧ ᤁᤢᤗᤠᤃᤡ ᤔᤣ᤺ᤳ ᤏᤧᤳᤇᤡ ᤛᤣᤃᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤔᤧᤴᤇᤢᤔᤠ ᤕᤧᤶᤒᤡᤳᤇᤠ ᤁᤢᤛ᤻ᤛᤠ ᤔᤧᤘᤕᤧ॥ 4 ᤁᤢᤓᤠ ᤕᤧᤶ ᤀᤣᤃᤠᤱ ᤕᤥᤀᤠᤛᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ॥ 5 ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤑᤢᤰᤂᤢᤛᤡᤀᤠᤱ ᤔᤧᤳᤋᤢᤛᤡ. “ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤋᤱᤒᤣ ᤌᤰᤔᤠ ᤔᤧᤗ᤺ᤳᤋᤢᤒᤠ ᤕᤠᤱᤜᤠ᤹ ᤑᤢᤰᤂᤧᤶᤔᤧ᤹॥ ᤂᤶᤓᤩᤠᤱ ᤁᤴ ᤕᤠ᤺ᤶᤒᤰᤁᤡᤴ ᤂᤡᤔᤥ ᤆᤥᤃᤧᤶᤍᤣᤛᤧᤶᤔᤧ᤹॥” ᤁᤖ ᤗᤧᤒᤡᤜᤠ᤹ᤖᤧ ᤂᤧᤴ ᤕᤠ᤺ᤶᤒᤰᤁᤡᤴ ᤂᤡᤔᤥ ᤔᤧᤴᤈᤥᤃᤢᤴ॥ 6 ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰ ᤁᤧᤕᤢᤱᤒᤠ ᤛᤠ᤺ᤱᤃᤠᤜᤡᤶᤔᤡᤴ ᤂᤠᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠᤴ ᤏᤢ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥᤜᤠ᤹ᤖᤧ ᤔᤧᤃᤢ᤺ᤳᤋᤢᤛᤡᤒᤠ ᤀᤣ᤺ᤱᤕᤠᤱᤅᤡᤴ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤗᤠᤶᤒᤠ ᤀᤠᤍᤠᤱᤒᤠᤖᤧ ᤌᤣᤀᤠᤱ ᤗᤧᤒᤡᤜᤠ᤹ ᤑᤥᤱᤔᤠ ᤁᤧᤶᤒᤠᤱᤄᤢᤴᤛᤡᤴᤒᤠᤒᤣ᥅” 7 ᤀᤠᤸᤗ ᤂᤧᤴ ᤁᤢ᤹ᤀᤡᤃᤧᤓᤧᤶᤔᤠ ᤀᤋᤗᤩᤠᤜ᤺ᤸᤗᤧ ᤁᤢᤛ᤻ᤛᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤔᤧᤗᤠᤛᤧᤀᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤛᤣᤛᤣ ᤆᤡᤃᤰᤘᤠᤜᤠ᤹ ᤒᤠᤗ ᤔᤠᤱᤜᤠ᤹ ᤛᤧᤘᤠ ᤔᤧᤵᤔᤠᤛᤡ ᤕᤠ᤺ᤶᤒᤰᤁᤥ ᤔᤧᤕᤠᤅᤢᤀᤠᤱ ᤘᤕᤧ॥ 8 ᤜᤠᤱᤅᤡᤸᤗᤧ ᤛᤴᤍᤥᤰ ᤌᤡᤰ ᤆᤥᤰ ᤐᤠᤱᤄᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣᤳ ᤗᤠ᤺ᤰᤁᤠᤳ ᤕᤢᤱᤔᤠ ᤐᤠᤱᤄᤢᤛᤡ॥ 9 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ ᤁᤢ᤺ᤳᤋᤢᤛᤡᤒᤠ ᤀᤣ᤺ᤱᤕᤠᤱᤅᤡᤴ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤠᤖᤢᤖ ᤐᤥᤱ᤹ ᤑᤠ᤹ᤀᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤁᤧᤖᤧᤰ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢ॥ 10 ᤜᤧᤰᤁᤩᤠᤱ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤀᤠᤵᤑᤣᤰ ᤏᤡᤱᤘᤠ᤹ᤗᤠᤶᤒᤠ ᤕᤠᤱ ᤔᤧᤍᤠᤖᤢᤀᤠᤱ ᤛ᤺ᤴᤍᤥ᤺ᤰᤁᤡᤴ ᤔᤧᤴᤍᤡᤶᤔᤣ ᤌᤠᤖᤡᤰ ᤂᤧᤵᤔᤥ ᤔᤧᤕᤠᤰᤋᤢ॥ 11 ᤗᤧᤒᤡᤜᤠ᤹ᤖᤧ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤂᤧᤴ ᤛᤴᤍᤥᤰᤁᤡᤴ ᤔᤧᤍᤠᤖᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤛᤎᤧᤰ ᤋᤡᤶᤛᤧᤒᤧᤴ ᤏᤢᤖᤡᤰ ᤀᤥᤔᤧᤔᤧᤳᤋᤢ॥ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤔᤡᤒᤧᤴ ᤏᤢ ᤔᤠ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤛᤢᤜᤠᤱᤕᤢᤰᤐᤧᤴ ᤂᤧᤴ ᤁᤢᤄᤠᤗᤧᤶ ᤗᤡᤱᤔᤠᤖᤧ ᤗᤠᤃᤡ ᤋᤩᤧᤛᤡ. ᤜᤧᤰᤁᤩᤠᤱ ᤂᤧᤴ ᤛᤴᤍᤥᤰᤁᤡᤴ ᤕᤠᤶᤔᤥ ᤀᤠᤶᤓᤠ ᤂᤧᤴ ᤁᤢᤕᤢᤰᤏᤠᤀᤥᤀᤣ ᤔᤧᤕᤢᤰᤂᤢ॥ ᤂᤧᤱᤜᤠ᤹ᤖᤧ ᤌᤡᤰᤕᤠ᤺ᤴᤎᤰ ᤜᤠᤒᤠ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤂᤠᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤖᤡᤰ ᤕᤠᤱ ᤔᤧᤓᤢᤰᤂᤢ॥ 12 ᤜᤠᤱᤅᤡᤴ ᤏᤢ ᤕᤜᤥᤕᤠᤍᤠ᤺ᤸᤗᤧ ᤂᤧᤴ ᤕᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤠᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴᤏᤥ ᤐᤡᤖᤧᤳᤇᤢᤛᤡ॥ ᤂᤧᤱᤜᤠ᤹ᤖᤧ ᤔᤠᤱᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤏᤠᤶᤕᤠᤰᤁᤥ ᤔᤧᤓᤳᤇᤢᤛᤡᤒᤠ ᤗᤢᤱᤃᤧᤃᤠᤶᤒᤠ ᤏᤢ ᤛᤡᤱᤃᤧᤃᤠᤶᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤑᤧᤴᤈᤣ᤹ ᤏᤢ ᤁᤠᤛᤠᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤆᤥᤒᤣᤃᤢᤜᤠ᤹ ᤔᤧᤒᤡᤖᤢᤛᤡ॥ 13 ᤁᤶᤓᤗ᤹ᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤣ ᤂᤢᤴᤇᤡ᤹ ᤜᤢᤰᤁᤥ ᤁᤴ ᤆᤠ᤺ᤱᤘᤠ ᤔᤧᤵᤔᤠ ᤕᤠ᤺ᤶᤒᤰᤁᤡᤴ ᤋᤃᤡ ᤐᤥᤖᤧ॥ ᤂᤧᤱᤜᤠ᤹ᤖᤧ ᤋᤃᤡᤒᤠᤀᤣ ᤁᤢᤒᤡ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤕᤠᤶᤔᤥ ᤔᤧᤈᤥᤃᤢᤀᤠᤱ ᤂᤧᤴ ᤆᤠ᤺ᤱᤘᤠ ᤔᤧᤔᤧᤳᤋᤢ॥ 14 ᤂᤧᤱᤜᤠ᤹ᤖᤧ ᤁᤴ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢ ᤔᤧᤛᤢᤖᤢᤀᤠᤱ ᤁᤧᤏᤶᤒᤠ ᤕᤠᤱᤅᤡᤴ ᤜᤠᤱᤅᤡᤴ ᤏᤢ ᤕᤜᤥᤕᤠᤍᤠᤀᤥ ᤔᤧᤍᤠᤖᤢᤀᤠᤱ ᤔᤧᤒᤡᤖᤢᤛᤡ॥ ᤂᤧᤴ ᤕᤠᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤕᤠ᤺ᤶᤒᤰ ᤏᤧᤵᤔᤠᤱᤗᤧ ᤗᤠᤃᤡ ᤛᤠᤔᤠᤐᤢᤔᤠᤜᤠ᤹. ᤜᤧᤰᤁᤩᤠᤱ ᤘᤣ᤹ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤂᤵᤐᤩᤠᤜᤠ᤹ ᤔᤧᤎᤃᤢ॥ ᤕᤜᤥᤕᤠᤍᤠᤴ ᤁᤢᤜᤡᤱᤜᤡᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤆᤰᤔᤧᤸᤗ᤹ᤀᤣ ᤔᤧᤍᤥᤴᤍᤢ॥ 15 ᤀᤠᤸᤗ ᤕᤜᤥᤕᤠᤍᤠᤴ ᤕᤖᤡᤰ ᤋᤱᤒᤣ ᤜᤡᤅᤧ ᤜᤧᤰᤁᤩᤠᤱ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᥇᥉᥆ ᤋᤱᤒᤣ ᤕᤥᤖᤧᤸᤗᤧ ᤔᤠᤛᤡᤱ॥ 16 ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤜᤠᤱᤜᤠ᤹ᤖᤧᤀᤣ ᤂᤢᤴᤇᤡ᤹ ᤀᤡᤐᤢᤱᤅᤥ ᤔᤧᤈᤡᤰᤂᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤠᤱᤜᤡᤶᤔᤡᤸᤗᤧ ᤗᤠᤃᤡ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧᤖᤥ॥ ᤕᤥᤀᤠᤛᤖᤧ ᤁᤢᤓᤧᤴ ᤕᤠ᤺ᤶᤒᤰ 17 ᤕᤜᤥᤕᤠᤍᤠᤴ ᤔᤠᤛᤡᤱᤅᤠᤱ ᤀᤣᤃᤠᤱ ᤕᤜᤢᤍᤠᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤕᤥᤀᤠᤛ ᤜᤠᤱᤅᤡᤴ ᤛᤧᤘᤠ ᤔᤧᤳᤇᤧ ᤔᤧᤍᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤢᤏᤧ᤹ ᤂᤧᤵᤛᤢᤖ ᤔᤧᤕᤠ᤺ᤴᤍᤢ॥ 18 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤔᤧᤗᤧᤖᤢᤀᤠᤱ ᤀᤛᤣᤖᤠ ᤔᤠᤱᤛᤡᤳᤗᤠᤱᤜᤠ᤹ ᤏᤢ ᤘᤣ᤹ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢ॥ ᤁᤴ ᤀᤠᤵᤋᤡᤰᤁᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤛᤶᤎᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤀᤡᤖᤧᤍᤩᤧ॥ 19 ᤁᤖ ᤂᤧᤱᤜᤠ᤹ ᤂᤢᤏᤧ᤹ᤀᤥᤀᤣ ᤜᤡᤔᤠ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤐᤠᤱᤄᤢᤛᤡ॥ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤋᤡᤰᤁᤧᤴ ᤀᤥ᤺ᤴᤔᤧᤎᤠᤰᤋᤢᤛᤡ. ᤁᤖ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤴᤍᤧᤴᤍᤧᤴ॥ 20 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤁᤢᤛ᤻ᤛᤠ ᤈᤁᤖᤡᤕᤠᤀᤥ ᤌᤠᤛᤡᤱ ᤕᤧ॥ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤂᤡᤏᤡ᤹ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤓᤣ᤺ᤴᤍᤢᤶᤒᤠᤒᤣ᥅ ᤂᤡᤏᤡ᤹ ᤁᤧᤴᤏᤢᤖᤡᤴ ᤁᤧᤴᤍᤠᤛᤡᤴᤗᤥ॥ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ ᤁᤧᤏᤠ᤹ᤖᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤀᤠᤱ ᤂᤡᤏᤡ᤹ ᤁᤧᤏᤠ᤹ᤖᤡᤀᤠᤱ ᤘᤠ᤹᥄’” 21 ᤁᤖ ᤂᤧᤱᤜᤠ᤹ᤖᤧ ᤈᤁᤖᤡᤕᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤍᤱ ᤔᤧᤈᤥᤃᤢ. ᤜᤧᤰᤁᤩᤠᤱ ᤕᤥᤀᤠᤛ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤔᤧᤄᤥᤛᤢᤀᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤗᤰᤂᤢᤶᤔᤥ ᤈᤁᤖᤡᤕᤠᤴ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤩᤧᤖᤢ॥ 22 ᤕᤥᤀᤠᤛ ᤜᤠᤱᤅᤡᤸᤗᤧ ᤈᤁᤖᤡᤕᤠ᤺ᤸᤗᤧ ᤁᤢᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤆᤥᤃᤢᤒᤠ ᤜᤠᤱᤛᤧᤘᤠᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴᤏᤠᤱ ᤁᤢᤛ᤻ᤛᤠ ᤈᤁᤖᤡᤕᤠᤴ ᤛᤧᤵᤔᤠ ᤐᤠᤱᤄᤢᤛᤡ॥ ᤛᤡᤔᤠ ᤆᤥᤃᤧᤸᤗᤧ ᤈᤁᤖᤡᤕᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤏᤡᤛᤢᤖ. ᤜᤧᤰᤁᤩᤠᤱ ᤁᤴ ᤁᤢᤀᤡᤛᤡᤰ ᤂᤡᤏᤡ᤹ ᤂᤢᤶᤍᤡᤱ ᤁᤧᤒᤡᤖᤡᤖᤖᤥ᥄” ᤕᤥᤀᤠᤛᤖᤧ ᤁᤢᤜᤠᤱᤕᤢᤰ ᤕᤧᤶᤔᤡᤸᤗᤧ ᤁᤢᤏᤢᤵᤔᤠ 23 ᤀᤠᤶᤓᤠ ᤂᤧᤴ ᤋᤱᤒᤣ᤺ᤸᤗᤧ ᤁᤢᤏᤢᤵᤔᤥ ᤀᤖᤠᤔᤡ ᤌᤰᤛᤢᤒᤠᤜᤠ᤹ ᤕᤥᤀᤠᤛᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤓᤧᤖᤧ॥ ᤂᤧᤱᤜᤠ᤹ᤖᤧ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤌᤱ ᤔᤧᤈᤥᤃᤢᤀᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤔᤧᤛᤩᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤂᤢᤴᤇᤡ᤹ ᤆᤡᤃᤰᤘᤠ ᤛᤠᤔᤠᤜᤠ᤹ ᤍᤔᤛ᤻ᤁᤛᤒᤠ ᤜᤠᤱᤅᤧᤀᤥ ᤔᤧᤜᤠᤅᤢ ᤔᤧᤍᤣᤛᤢ॥ 24 ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤆᤒᤧ᤺ᤳᤇᤡᤰ ᤌᤰᤛᤢᤒᤠ ᤗᤢᤵᤜᤠ᤹ᤖᤰ ᤌᤱ ᤔᤧᤈᤥᤃᤧ. ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤒᤠ ᤕᤖᤡᤰ ᤌᤰᤛᤢᤒᤠ ᤛᤢᤶᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ॥ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤗᤧᤖᤢᤒᤠᤸᤗᤧ ᤆᤥᤃᤢᤸᤗᤧ ᤕᤥᤀᤠᤛᤖᤧ ᤂᤥᤔᤠ ᤕᤠᤖᤢᤒᤠ ᤂᤢᤶᤍᤡᤱᤅᤡᤴ ᤀᤡᤖᤧᤍᤩᤧ॥ 25 ᤜᤠᤱᤅᤡᤴ ᤛᤠ᤹ᤖᤡᤰ ᤔᤧᤄᤠ᤺ᤴᤍᤢᤀᤠᤱ ᤀᤠᤖᤠᤔᤡᤜᤠ᤹ ᤔᤧᤒᤣ ᤂᤧᤴ ᤀᤣᤃᤠᤱ ᤕᤜᤥᤕᤠᤍᤠ᤺ᤸᤗᤧ ᤁᤢᤛ᤻ᤛᤠᤴ ᤛᤩᤧᤒᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠᤖᤧ ᤗᤠᤃᤡ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤂᤢᤏᤧ᤹ ᤁᤢᤏᤧᤳᤏᤠᤀᤥᤀᤣ ᤔᤧᤛᤩᤧᤖᤢ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤛᤩᤧᤀᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ. ᤁᤖ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤅᤥᤃ ᤔᤣ᤺ᤴ॥ 26 ᤂᤧᤴ ᤋᤠᤵᤑᤧ᤺ᤶᤒᤠ ᤐᤠ᤺ᤴᤍᤱ ᤁᤧᤈᤥ᤺ᤰᤐᤠᤜᤠ᤹ᤃ ᤀᤶᤔᤥᤏᤡ ᤔᤧᤴᤇᤢᤔᤠ ᤛᤡᤶᤔᤋᤖᤧ ᤁᤢᤛ᤻ᤛᤠ ᤈᤠᤒᤠᤍ ᤏᤢ ᤔᤥᤀᤠᤒᤡ ᤔᤧᤴᤇᤢᤔᤠ ᤛᤡᤔᤪᤡᤋᤖᤧ ᤁᤢᤛ᤻ᤛᤠ ᤕᤜᤥᤈᤠᤒᤠᤍᤧᤴ ᤘᤕᤧᤛᤡ॥ 27 ᤕᤥᤀᤠᤛᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥᤒᤠ ᤐᤠ᤺ᤴ. ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤂᤢᤏᤧ᤹ ᤕᤠᤶᤔᤥ ᤆᤥᤃᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤔᤛᤩᤠᤜᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.