᥈ ᤛᤠᤵᤔᤢ᤺ᤴᤎᤢᤶ 23 - LIFOTNT

ᤀᤋᤗᤩᤠᤜᤖᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ

¹ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤥᤕᤠᤍᤠᤖᤧ ᤁᤢᤔᤢᤰᤛᤠᤶᤔᤡᤴ ᤀᤥ᤺ᤴᤎᤠᤰᤋᤢᤛᤡ॥ ᤂᤢᤏᤧ᤹ ᤁᤡᤵ ᤌᤡᤰ ᤁᤡᤵ ᤌᤡᤰᤁᤥᤒᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹. ᤕᤖᤥᤜᤠᤔᤖᤧ ᤁᤢᤛ᤻ᤛᤠ ᤀᤈᤷᤕᤠᤜ. ᤕᤣᤜᤥᤜᤠᤏᤠᤏᤖᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗ. ᤀᤥᤒᤣᤍᤖᤧ ᤁᤢᤛ᤻ᤛᤠ ᤀᤈᤷᤕᤠᤜ. ᤀᤍᤠᤕᤠᤜᤖᤧ ᤁᤢᤛ᤻ᤛᤠ ᤔᤠᤛᤣᤕᤠᤜ ᤏᤢ ᤈᤡᤁᤪᤡᤖᤧ ᤁᤢᤛ᤻ᤛᤠ ᤀᤣᤗᤡᤛᤠᤐᤠᤋᤧᤴᤏᤢ ᤔᤠᤱᤜᤢᤵ ᤆᤥᤃᤢ॥

² ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤢᤍᤠᤒᤠ ᤁᤧᤖᤧᤰ ᤐᤠᤱᤈᤢᤶᤜᤠ᤹ᤀᤥ ᤔᤧᤒᤣᤀᤠᤱ ᤗᤧᤒᤡᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ᤀᤥᤒᤠ ᤗᤠᤶᤗᤥᤒᤠᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤍᤠᤖᤢᤛᤡ॥ ᤂᤧᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤍᤩᤧ᤺ᤸᤗᤧ.

³ ᤂᤧᤵᤔᤥ ᤁᤧᤈᤢᤶᤒᤠ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤕᤥᤀᤠᤛᤧᤴᤏᤢ ᤔᤠᤱᤜᤢᤵ ᤔᤧᤈᤥᤃᤢ॥ ᤕᤜᤥᤕᤠᤍᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤜᤠᤱᤅᤧᤸᤗᤧ ᤁᤢᤛ᤻ᤛᤠ᤺ᤸᤗᤧ ᤕᤢᤰ ᤆᤥᤃᤢᤖᤖᤥ॥

⁴ ᤀᤠᤸᤗ ᤂᤡᤏᤡ᤹ ᤀᤰᤂᤣ ᤁᤧᤈᤥᤃᤢᤶᤗ ᤐᤥᤱ᤹—ᤛᤒᤠᤌ ᤕᤧᤴᤏᤥ ᤀᤠᤒᤠᤅᤣ ᤕᤠ᤺ᤶᤒᤰᤁᤥ ᤁᤧᤍᤠᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤛᤢᤰᤘᤠ ᤌᤡᤰ ᤔᤠᤗᤠᤶᤎᤣ᤺ᤳᤜᤠ᤹ᤀᤥ.

⁵ ᤘᤣ᤹ ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤆᤤᤲ ᤜᤠᤱᤜᤡᤶᤔᤥ. ᤜᤧᤰᤁᤩᤠᤱ ᤘᤣ᤹ ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤆᤤᤲ ᤜᤡᤶ ᤕᤢᤰᤏᤠ᤺ᤸᤗᤧ ᤁᤢᤒᤢᤱᤅᤥᤒᤠ ᤔᤠ ᤗᤠᤶᤎᤣ᤺ᤳᤋᤥ ᤀᤡᤰᤁᤧᤃᤥᤒᤠ ᤔᤧᤕᤢᤱᤗ॥ ᤘᤣ᤹ ᤁᤧᤖᤧᤰ ᤔᤏᤠᤜᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤰᤂᤢᤶᤜᤠ᤹ᤀᤥ ᤔᤧᤘᤠ᤹ᤖ ᤐᤥᤱ᤹॥

⁶ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤗᤧᤒᤡᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤜᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠ ᤔᤧᤓᤠ᤺ᤰᤋᤠᤶᤛᤡᤶᤔᤧᤴᤏᤧ᤹॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤃ ᤗᤠ᤺ᤵᤔᤠ ᤔᤧᤛᤢᤰ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤍᤥᤴᤍᤢᤛᤡᤀᤠᤱ ᤘᤠ᤹॥ ᤁᤖ ᤘᤣ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤢᤛᤡᤒᤠ ᤀᤡᤱᤈᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤔᤧᤏᤠ᤺ᤳᤋᤢᤀᤠᤱ ᤔᤧᤸᤗᤠ᤺ᤳᤏᤧᤴᤗ॥

⁷ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤜᤠ᤹ ᤔᤧᤃᤠᤵᤛᤡᤱᤅᤠᤱ ᤜᤠᤱᤅᤡᤴ ᤁᤧᤖᤧᤰ ᤐᤡᤛᤠᤱ ᤁᤶᤒᤪᤠᤱ ᤔᤧᤔᤧᤳᤋᤢᤖ॥ ᤁᤢᤓᤠ ᤔᤠᤱᤜᤡᤶᤔᤥ ᤗᤠᤛᤧᤏᤧᤓᤃᤪ ᤂᤧᤴ ᤛᤩᤧᤵᤔᤠ ᤐᤥᤱ᤹॥ ᤂᤡᤏᤡ᤹ᤃ ᤜᤠᤱᤅᤡᤴ ᤀᤠᤳᤋᤡ ᤐᤣ᤺ᤰᤛᤠᤱ ᤂᤢᤏᤧ᤹ ᤁᤢᤒᤣᤛᤠᤱ ᤘᤕᤧᤶᤔᤧ᤹॥”

⁸ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤆᤥᤃᤢᤒᤠ ᤌᤧᤵᤐᤧᤳ ᤐᤠ᤺ᤴᤜᤠ᤹ ᤗᤧᤒᤡᤜᤠ᤹ ᤏᤢ ᤕᤜᤢᤍᤠᤒᤠ ᤁᤧᤖᤧᤰᤗᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ॥ ᤔᤏᤠᤎᤰᤔᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤔᤏᤠᤜᤠ᤹. ᤛᤒᤠᤌᤀᤥ ᤕᤠ᤺ᤶᤒᤰᤁᤥ ᤔᤢᤖᤠ ᤔᤧᤔᤧᤳᤋᤢᤛᤡᤒᤠᤜᤠ᤹ ᤏᤢ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤛᤢ᤺ᤵᤐᤠᤀᤠᤱ ᤕᤠ᤺ᤴᤍᤡᤰ ᤁᤧᤍᤠᤒᤠᤜᤠ᤹ ᤔᤧᤍᤠᤖᤢᤛᤡ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤁᤢᤓᤠ ᤔᤏᤠᤛᤢᤶᤜᤠ᤹ ᤔᤧᤸᤗᤧᤳ ᤔᤧᤴᤍᤣᤛᤡᤱᤅᤣ ᤁᤳᤋᤢᤛᤡ॥

⁹ ᤂᤧᤒᤩᤠᤱ ᤂᤢᤏᤧ᤹ ᤁᤡᤵ ᤌᤡᤰ ᤁᤡᤵ ᤌᤡᤰ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤁᤧᤕᤧᤵᤐᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤗᤠ᤺ᤰᤜᤠ᤹ ᤂᤶᤓᤩᤠᤱ ᤕᤶᤒᤠ ᤏᤢ ᤆᤢᤰᤐᤠ ᤂᤥᤜᤠ᤹ ᤐᤡᤖᤢᤛᤡ॥

¹⁰ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤑᤧᤈᤢᤶᤓᤧᤕᤠᤜᤠ᤹ ᤂᤈᤢᤶᤄᤕᤠᤜᤠ᤹ ᤔᤧᤃᤠᤵᤛᤡᤱᤗ ᤕᤠ᤺ᤴᤍᤢᤛᤡᤀᤠᤱ ᤜᤠᤱᤅᤡᤴ ᤁᤒᤪᤡᤱ ᤁᤵᤔᤠᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤏᤢ ᤔᤠᤱᤜᤡᤶ ᤐᤣᤛᤠᤱ ᤂᤢᤴᤇᤡ᤹ ᤕᤧᤵᤏᤠᤍᤧᤴᤏᤥ ᤔᤠᤱᤜᤡᤶ ᤌᤥᤜᤠᤱ ᤏᤢ ᤕᤥᤜᤠᤱ ᤗᤧᤵᤔᤠᤱ ᤌᤡᤰ ᤁᤢᤛᤢᤰᤐᤥᤗᤠᤶ ᤏᤠᤛᤔᤠ ᤁᤢᤛᤢᤰᤐᤥ ᤌᤠᤖᤡᤰ ᤕᤧᤵᤛᤢᤛᤡ॥

¹¹ ᤂᤧᤴ ᤀᤣᤃᤠᤱ ᤕᤜᤥᤕᤠᤍᤠᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤴ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤋᤡᤆ ᤔᤧᤄᤢ᤺ᤰᤋᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤠᤱᤜᤢᤵᤛᤰ ᤗᤡᤱᤔᤏᤠᤒᤠᤎᤡᤰ ᤔᤧᤒᤡᤖᤢᤀᤠᤱ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤒᤠ ᤀᤢᤘᤠ ᤔᤧᤈᤥᤃᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤠᤱᤎᤥ᤺ᤰᤏᤠ ᤔᤧᤒᤡᤖᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤜᤠᤱᤅᤡᤸᤗᤧ ᤁᤢᤎᤠ᤺ᤰ ᤆᤠ᤹ᤖᤖᤥ᥄”

¹² ᤜᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖ ᤔᤏᤠᤜᤠ᤹ ᤏᤠ ᤏᤢ ᤁᤳᤏᤠ ᤔᤧᤗ᤹ᤖᤧᤀᤠᤱ ᤔᤧᤕᤠᤃᤧᤒᤠ ᤀᤡᤰᤗᤠᤴ ᤀᤋᤗᤩᤠᤜ᤺ᤸᤗᤧ ᤂᤧᤵᤛᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤢᤏᤧ᤹ ᤂᤧᤱᤜᤠ᤹ᤖᤧᤀᤥ ᤋᤩᤧ॥

¹³ ᤜᤧᤰᤁᤩᤠᤱ ᤕᤥᤀᤠᤛ ᤜᤠᤱᤅᤡᤴ ᤛᤡᤳᤗᤠᤱᤅᤡᤸᤗᤧ ᤁᤢᤒᤣᤛᤠᤱ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤕᤠᤀᤥ ᤕᤧᤒᤧᤃᤖᤧᤒᤠ ᤂᤢᤏᤧ᤹ ᤏᤡᤛᤢ॥ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤛᤠᤍᤠᤱ ᤁᤧᤔᤢ᤺ᤵᤐᤠᤜᤠ᤹ ᤜᤠᤱᤅᤡᤸᤗᤧ ᤁᤢᤒᤣᤛᤠᤱ ᤔᤧᤕᤧᤒᤧ. ᤂᤶᤓᤩᤠᤱ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤔᤡᤱᤛᤥ ᤀᤡᤱᤎᤠᤱᤅᤥ ᤕᤧᤕᤧ ᤗ᤹ᤖᤡᤰ ᤛᤥᤛᤥᤳᤗᤖᤠᤱ ᤔᤧᤈᤥᤃᤧᤖ ᤜᤧᤰᤁᤩᤠᤱ ᤛᤠᤍᤠᤱᤜᤠ᤹ ᤔᤧᤔᤢᤰᤂᤢᤖ ᤔᤧᤕᤠᤃᤧ॥ ᤁᤧᤖᤧᤰ ᤔᤏᤠᤜᤠ᤹ ᤔᤧᤛ᤺ᤳᤋᤧᤖ ᤔᤧᤕᤠᤃᤧ॥ ᤜᤧᤰᤁᤩᤠᤱ ᤛᤠᤶᤗᤥ ᤛᤠᤶᤃᤧᤔᤧᤵᤐᤠᤜᤠ᤹ ᤔᤢᤰᤗᤠᤜᤠ᤹ᤏᤢ ᤛᤥᤛᤥᤖᤡᤰ ᤛᤥᤛᤥ᤺ᤳᤗᤖᤠᤱᤅᤡᤴ ᤗᤠᤶᤗᤥᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤔᤧᤕᤠᤃᤧ॥ ᤂᤧᤒᤩᤠᤱ ᤀᤋᤗᤩᤠᤜ ᤜᤠᤱᤔᤧᤸᤗᤧ ᤁᤢᤈᤠᤱᤜᤠ᤹ ᤌᤧ᤺ᤰᤂᤢᤀᤠᤱ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢ. “ᤜᤠᤱᤒᤡᤑᤩᤢᤱ ᤐᤥ᤺ᤰᤛᤧᤖᤥ᥄ ᤜᤠᤱᤒᤡᤑᤩᤢᤱ ᤐᤥ᤺ᤰᤂᤧᤖᤥ᥄”

¹⁴ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤁᤡᤵ ᤌᤡᤰ ᤁᤡᤵ ᤌᤡᤰ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤀᤡᤰᤁᤧᤃᤥᤒᤠ ᤁᤶᤒᤪᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤂᤧᤴ ᤗᤠ᤺ᤰᤁᤠᤳ ᤗ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ᤀᤠᤱ ᤁᤧᤖᤧᤰ ᤋᤠᤓᤣ᤺ᤸᤗᤧ ᤆᤩᤧᤵᤋᤧᤶ ᤛᤧᤖᤧᤶᤛᤡᤶᤔᤧ᤹॥” ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤛᤡᤃᤠᤱ ᤂᤧᤴ ᤔᤧᤛᤩᤧᤖᤧᤶᤔᤡᤴᤏᤧ᤹॥”

¹⁵ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤋᤗᤩᤠᤜᤴ ᤔᤧᤍᤧᤶᤛᤢ. ᤜᤧᤰᤁᤩᤠᤱ ᤜᤠᤱᤜᤡᤶ ᤋᤃᤠᤱ ᤔᤧᤍᤣ᤹ᤖᤢᤀᤠᤱ ᤛᤡᤃᤠᤱ ᤗᤠ᤺ᤵᤔᤠ ᤀᤠᤶᤓᤠ ᤂᤧᤴ ᤀᤴ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤢᤱᤅᤥ ᤔᤧᤛᤩᤧᤖᤢᤖᤥ॥

ᤕᤜᤥᤕᤠᤍᤠ᤺ᤸᤗᤧ ᤋᤥ᤺ᤴᤍᤢᤒᤠ ᤕᤠ᤺ᤶᤒᤰᤜᤠ᤹

¹⁶ ᤂᤧᤴ ᤀᤣᤃᤠᤱ ᤕᤜᤥᤍᤠ᤺ᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤏᤢ ᤁᤧᤖᤧᤰ ᤔᤏᤠᤜᤠ᤹ ᤜᤧᤰᤁᤩᤠᤱ ᤜᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠ ᤔᤧᤒᤥᤱᤗ ᤐᤥᤱ᤹ ᤑᤠ᤹ᤀᤠᤱ ᤔᤠᤱᤜᤢᤵ ᤆᤥᤃᤢ॥

¹⁷ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤒᤠᤗ ᤔᤠᤱᤜᤡᤶᤔᤥ ᤔᤧᤗᤠᤛᤧᤀᤠᤱ ᤂᤧᤴ ᤔᤧᤗᤢ᤺ᤴᤍᤢ ᤔᤧᤍᤣᤛᤢ॥ ᤂᤧᤱᤜᤠ᤹ᤖᤧ ᤂᤧᤵᤔᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤏᤢ ᤏᤠᤘᤠᤀᤡᤳᤗᤠᤜᤠ᤹ ᤁᤢᤶᤈᤡᤰᤔᤠ ᤔᤧᤈᤥᤃᤢ. ᤂᤶᤓᤩᤠᤱ ᤒᤠᤗᤖᤧ ᤁᤢᤕᤰᤕᤠᤒᤠ ᤔᤳᤋᤠᤏᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤖᤧ ᤁᤢᤍᤃᤠᤱ ᤔᤧᤛᤩᤧᤖᤢ॥

¹⁸ ᤂᤧᤒᤩᤠᤱ ᤕᤜᤥᤕᤠᤍᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤀᤥᤔᤧᤵᤔᤠ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤗᤧᤒᤡᤜᤠ᤹ ᤜᤢᤰᤛᤢᤵᤋᤢᤛᤡ॥ ᤁᤢᤜᤣ᤺ᤰᤛᤡᤱᤔᤠ ᤕᤧᤶᤔᤠᤱᤎᤥᤀᤣ ᤛᤧᤘᤠᤛᤠᤶᤗᤥ ᤛᤠᤶᤔᤧᤳᤏᤢ ᤜᤧᤰᤁᤩᤠᤱ ᤛ᤺ᤵᤔᤠᤖ ᤛᤥᤛᤥᤳᤗᤖᤠᤱ ᤆᤥ᤺ᤰᤏᤢ ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤏᤡ᤺ᤴᤎᤥ ᤁᤧᤒᤥᤱᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤍᤠᤀᤢᤍᤖᤧ ᤗᤧᤒᤡᤜᤠ᤹ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤘᤕᤧ॥

¹⁹ ᤁᤢᤓᤠ ᤐᤖᤡᤰᤐᤠ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤛᤡᤃᤠᤱ ᤗᤠ᤺ᤵᤔᤠ ᤔᤧᤶᤓᤠ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤔᤠᤗᤠᤶᤎᤣ᤺ᤳᤜᤠ᤹ᤀᤥ ᤂᤢᤏᤧ᤹ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤕᤧᤵᤛᤢᤛᤡ॥

²⁰ ᤂᤧᤒᤩᤠᤱ ᤌᤰᤔᤥᤒᤠᤜᤠ᤹. ᤋᤢᤶᤔᤩᤠᤱᤜᤠᤱᤜᤠ᤹. ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠᤜᤠ᤹ ᤏᤢ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤜᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤠᤖᤢ॥ ᤂᤧᤱᤜᤠ᤹ ᤌᤥᤛᤔᤠ ᤗᤠᤶᤎᤣ᤺ᤳᤋᤥᤗᤠᤶ ᤔᤧᤒᤥ᤺ᤰᤂᤧᤀᤠᤱ ᤜᤠᤱᤜᤡᤶᤔᤥ ᤔᤧᤗᤠᤛᤧ ᤜᤧᤰᤁᤩᤠᤱ ᤜᤠᤱᤅᤡᤴ ᤜᤠᤱᤕᤢᤰᤏᤠᤀᤥ ᤔᤧᤕᤢᤰᤂᤢ॥

²¹ ᤂᤰᤐᤧᤳ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤕᤧᤰᤕᤰᤁᤥ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤀᤋᤗᤩᤠᤜ ᤜᤠᤱᤔᤧᤴ ᤋᤠᤓᤣ᤺ᤸᤗᤧ ᤔᤧᤛᤩᤧᤖᤢᤀᤠᤱ ᤘᤕᤧᤖᤥ॥