᥈ ᤛᤠᤵᤔᤢ᤺ᤴᤎᤢᤶ 22 - LIFOTNT

ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜ

¹ ᤕᤖᤢᤛᤗᤧ᤺ᤶᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤕᤜᤥᤖᤠᤔᤖᤧ ᤁᤢᤗᤧᤰᤘᤠ ᤂᤢᤏᤧ᤹ ᤁᤢᤛ᤻ᤛᤠ ᤑᤥ᤺ᤰᤘᤠᤒᤠ ᤀᤜᤈᤩᤠᤜᤴ ᤜᤠᤱ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤌᤱᤅᤥ ᤀᤖᤒᤡᤜᤠ᤹ᤏᤢ ᤁᤧᤍᤱᤒᤠᤀᤠᤱ ᤏᤠᤵᤔᤠ ᤜᤡᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤧ᤹ ᤁᤧᤖᤧᤰ ᤕᤶᤒᤠ ᤁᤢᤛ᤻ᤛᤠᤜᤠ᤹ ᤔᤧᤛᤩᤧᤖᤢᤛᤡᤀᤠᤱ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤕᤜᤥᤖᤠᤔᤖᤧ ᤁᤢᤛ᤻ᤛᤠ ᤀᤜᤈᤩᤠᤜᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ॥

² ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤌᤡᤰ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤀᤋᤗᤩᤠᤜ ᤘᤕᤧ॥ ᤂᤢᤏᤧ᤹ ᤁᤢᤶᤔᤠ ᤀᤥᤔᤪᤡᤖᤧ ᤁᤢᤶᤔᤧᤴᤇᤠ᤹ᤔᤠ ᤘᤕᤧ॥

³ ᤀᤜᤈᤩᤠᤜᤴᤏᤠᤱ ᤀᤠᤜᤠᤒ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥᤒᤠ ᤕᤧᤵᤗᤧᤰᤁᤥ ᤗᤠᤱᤄᤣᤃᤧ. ᤌᤣᤀᤠᤱᤓᤧᤸᤗᤧ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤶᤔᤠᤖᤧ ᤂᤢᤏᤧ᤹ ᤀᤠ᤺ᤴᤇᤡᤱᤔᤠ ᤐᤡᤖᤢ॥

⁴ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤘᤕᤧ ᤂᤢᤏᤧ᤹ᤀᤠᤱ ᤀᤠᤶᤓᤠ ᤂᤧᤴ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤶᤒᤠ ᤔᤠᤛᤡᤱᤅᤠᤱ ᤀᤣᤃᤠᤱ ᤂᤧᤱᤜᤠ᤹ ᤂᤢᤏᤧ᤹ ᤑᤧᤰᤁᤧᤗᤠ᤺ᤶᤒᤠ ᤛᤢᤈᤠᤛᤠᤒᤠ ᤔᤧᤒᤥ᤺ᤰᤂᤧ॥

⁵ ᤖᤠᤔᤥᤋ-ᤃᤡᤗᤠᤍᤀᤥ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤖᤧ ᤁᤢᤍᤰᤗᤧᤱᤘᤠᤀᤥ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤢᤛ᤻ᤛᤠ ᤕᤥᤖᤠᤔᤧᤴᤏᤢ ᤋᤣ᤺ᤱ ᤆᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡ॥ ᤀᤠᤖᤠᤔᤡᤜᤠ᤹ᤖᤧ ᤕᤥᤖᤠᤔᤧᤴ ᤔᤧᤄᤠ᤺ᤴᤍᤢ.

⁶ ᤜᤧᤰᤁᤩᤠᤱ ᤖᤠᤔᤥᤋᤀᤥ ᤀᤠᤖᤠᤔᤒᤠ ᤜᤈᤠᤀᤣᤗᤧᤴᤏᤢ ᤁᤧᤒᤥᤱᤒᤠ ᤌᤱᤅᤥ ᤁᤠ᤺ᤴᤍᤧᤒᤠᤗᤠᤶ ᤘᤣ᤺ᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤡᤈᤖᤣᤗᤀᤥ ᤏᤢ᤺ᤰᤂᤧᤀᤠᤱ ᤐᤣ॥ ᤂᤧᤒᤩᤠᤱ ᤕᤜᤢᤍᤠᤒᤠ ᤜᤠᤱ ᤕᤜᤥᤖᤠᤔᤖᤧ ᤁᤢᤛ᤻ᤛᤠ ᤀᤜᤈᤩᤠᤜᤴ ᤕᤥᤖᤠᤔᤧᤴ ᤋᤢᤶᤔᤠᤖᤧ ᤗᤠᤃᤡ ᤕᤡᤈᤖᤣᤗ ᤐᤣ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤠ᤺ᤴᤍᤧᤀᤠᤱ ᤏᤧᤛ᤻ᤛᤧ॥

⁷ ᤀᤜᤈᤩᤠᤜ᤺ᤸᤗᤧ ᤕᤥᤖᤠᤔᤧᤴ ᤋᤢᤔᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤜᤈᤩᤠᤜᤴ ᤀᤠᤃᤧᤖ ᤕᤠ᤺ᤴᤍᤢ॥ ᤀᤠᤶᤓᤠ ᤂᤧᤴ ᤋᤢᤔᤧᤛᤡᤒᤠ ᤕᤧᤶᤔᤥ ᤀᤜᤈᤩᤠᤜᤴ ᤕᤥᤖᤠᤔᤧᤴᤏᤢ ᤛᤥᤖᤡᤰ ᤏᤡᤶᤛᤡᤖᤧ ᤁᤢᤛ᤻ᤛᤠ ᤕᤣᤜᤢᤴ ᤋᤢᤶᤛᤧ ᤐᤣ॥ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤕᤣᤜᤢ᤺ᤴᤏᤣ ᤕᤢᤰᤋᤡᤱ ᤆᤥᤃᤢᤀᤠᤱ ᤘᤕᤧ॥

⁸ ᤕᤣᤜᤢ᤺ᤸᤗᤧ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤥ ᤂᤠᤛᤧᤴ ᤆᤥ᤺ᤰᤔᤠ ᤂᤢᤶᤍᤡᤱ ᤋᤠᤖᤢᤸᤗᤧ ᤀᤜᤈᤩᤠᤜᤖᤧ ᤁᤢᤗᤠᤃᤡ ᤛᤧᤘᤠ ᤁᤧᤈᤥ᤺ᤰᤐᤠ ᤕᤜᤢᤍᤠᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤀᤜᤈᤩᤠᤜᤖᤧ ᤁᤢᤴᤏᤠᤰᤐᤠᤜᤠ᤹ ᤕᤣᤜᤢ᤺ᤸᤗᤧ ᤋᤢᤔᤢᤛᤡᤀᤠᤱ ᤛᤩᤧᤖᤢᤛᤡ॥

⁹ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤀᤜᤈᤩᤠᤜᤴ ᤜᤰᤛᤢ. ᤜᤧᤰᤁᤩᤠᤱ ᤕᤣᤜᤢᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤠᤔᤖᤡᤕᤠ ᤗᤠᤈᤣ᤹ᤀᤥ ᤆᤡᤱᤛᤡᤱᤅᤠᤱ ᤕᤢᤅᤧᤸᤗᤧ ᤔᤧᤍᤢᤔᤢ॥ ᤂᤧᤱᤜᤠ᤹ᤖᤧ ᤀᤜᤈᤩᤠᤜᤴ ᤕᤣᤜᤢᤀᤥ ᤔᤧᤕᤢᤖᤢᤀᤠᤱ ᤔᤧᤛᤩᤧᤖᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤗᤢᤵᤋᤢ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤁᤧᤖᤧᤰ ᤁᤢᤛᤡᤰᤗᤢᤱᤔᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤗᤥᤔᤠᤴ ᤁᤧᤃᤥ᤺ᤵᤐᤠ ᤕᤜᤥᤛᤠᤐᤠᤋᤖᤧ ᤁᤢᤛ᤻ᤛᤠ ᤘᤕᤧᤖᤥ॥” ᤂᤧᤴ ᤀᤣᤃᤠᤱ ᤜᤠᤱᤈᤢᤶᤔᤥ ᤀᤜᤈᤩᤠᤜᤖᤧ ᤁᤢᤜᤡᤶᤛᤕᤱᤅᤥ ᤀᤠᤳᤋᤡᤴᤏᤠᤱ ᤔᤢᤰᤁᤧᤃᤢᤒᤠ ᤔᤧᤒᤥ᤺ᤰᤂᤧᤴᤗᤥ॥

ᤀᤋᤗᤩᤠᤜ ᤏᤢ ᤕᤥᤀᤠᤛ

¹⁰ ᤀᤜᤈᤩᤠᤜᤖᤧ ᤁᤢᤶᤔᤠ ᤀᤋᤗᤩᤠᤜᤖᤧ ᤁᤢᤛ᤻ᤛᤠᤴ ᤛᤩᤧᤒᤠ ᤏᤡᤛᤢᤀᤠᤱ ᤕᤜᤢᤍᤠᤒᤠ ᤜᤠᤱᤜᤡᤶᤛᤕᤱᤜᤠ᤹ ᤁᤧᤖᤧᤰ ᤔᤧᤱᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤗ᤺ᤴᤍᤧ॥

¹¹ ᤁᤖ ᤕᤜᤥᤖᤠᤔ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤕᤜᤥᤛᤣᤒᤠ᤺ᤸᤗᤧ ᤀᤜᤈᤩᤠᤜ᤺ᤸᤗᤧ ᤁᤢᤛ᤻ᤛᤠ ᤕᤥᤀᤠᤛᤧᤴ ᤛᤧᤵᤔᤠ ᤔᤧᤈᤥᤃᤢᤛᤡᤒᤠ ᤜᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤛᤫᤠ᤺ᤳ ᤂᤧᤳᤋᤢᤀᤠᤱ ᤋᤣ᤹ᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤃᤵᤔᤠ ᤔᤧᤴᤇᤢᤔᤠᤴᤏᤢ ᤂᤢᤏᤧ᤹ ᤗᤳᤇᤠ ᤀᤡᤶᤔᤠᤍᤧᤴ ᤕᤠᤰᤑᤠᤱᤅᤥ ᤆᤡᤰᤂᤢ ᤕᤢᤰᤂᤢᤛᤡ॥ ᤕᤜᤥᤖᤠᤔ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠᤖᤧ ᤁᤢᤔᤣᤳ ᤕᤜᤥᤛᤣᤒᤠᤴ ᤀᤜᤈᤩᤠᤜᤖᤧ ᤁᤢᤴᤏᤧ᤹ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤕᤥᤀᤠᤛᤧᤴ ᤀᤋᤗᤩᤠᤜᤖᤧ ᤁᤢᤜᤢᤰᤁᤥ ᤔᤧᤴᤎᤠᤀᤣ ᤆᤡᤰᤂᤢ ᤕᤢᤰᤂᤢ. ᤜᤧᤰᤁᤩᤠᤱ ᤀᤋᤗᤩᤠᤜ᤺ᤸᤗᤧ ᤕᤥᤀᤠᤛᤧᤴ ᤛᤩᤧᤵᤔᤠ ᤔᤧᤄᤥᤛᤢᤴ॥

¹² ᤀᤋᤗᤩᤠᤜᤖᤧ ᤕᤜᤢᤍᤠ ᤗᤠᤈᤣ᤹ᤀᤥ ᤜᤠᤱᤕᤢᤰ ᤆᤥᤃᤢᤸᤗᤧ ᤕᤥᤀᤠᤛᤧᤴ ᤂᤧᤱᤜᤠ᤹ᤏᤢᤀᤣ ᤛᤥᤖᤡᤰ ᤕᤜᤘᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤆᤡᤱᤛᤡᤱᤅᤠᤱ ᤕᤢᤅᤧᤖᤥ॥