᥈ ᤛᤠᤵᤔᤢ᤺ᤴᤎᤢᤶ 20 - LIFOTNTᤕᤜᤥᤛᤠᤐᤠᤋᤖᤧ ᤔᤥᤀᤠᤒ ᤏᤢ ᤀᤶᤔᤥᤏᤧᤴ ᤌᤱᤅᤥ ᤏᤠ᤺ᤴᤍᤢᤛᤡ 1 ᤁᤢᤓᤠ ᤕᤧᤶ ᤀᤣᤃᤠᤱ ᤔᤥᤀᤠᤒᤡ. ᤀᤶᤔᤥᤏᤡ ᤜᤧᤰᤁᤩᤠᤱ ᤁᤢᤓᤠ ᤔᤡᤏᤢᤀᤡᤜᤠ᤹ᤏᤢ ᤔᤧᤓᤢᤱᤛᤡᤱᤅᤠᤱ ᤕᤜᤥᤛᤠᤐᤠᤋᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤔᤧᤓᤧᤖᤧ॥ 2 ᤕᤖᤡᤰ ᤌᤰᤛᤢᤒᤠ ᤛᤢᤶᤜᤠ᤹ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱ ᤏᤠᤎᤠ᤺ᤶᤒᤡ ᤀᤣᤍᤥᤔᤗᤠᤶ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤔᤧᤓᤧᤴᤗ ᤔᤧᤒᤳ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤛᤣᤛᤥᤏ-ᤋᤠᤔᤠᤖ (ᤀᤣᤏ-ᤃᤍᤡ) ᤔᤧᤃᤧᤖᤧ ᤔᤧᤈᤢᤖᤧᤀᤠᤱ ᤔᤧᤘᤠ᤹ ᤑᤠ᤹ᤀᤠᤱ ᤁᤢᤓᤠ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤕᤜᤥᤛᤠᤐᤠᤋᤧᤴ ᤔᤧᤔᤧᤳᤋᤢ॥ 3 ᤁᤶᤓᤍᤠᤱᤒᤠ ᤁᤧᤛᤠᤰᤐᤠ ᤀᤡᤱᤄᤱ ᤂᤧᤵᤛᤢᤀᤠᤱ ᤕᤜᤥᤛᤠᤐᤠᤋᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤁᤥ᤺ᤵᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤢ॥ ᤂᤢᤏᤧ᤹ ᤕᤜᤢᤍᤠᤀᤥ ᤁᤧᤖᤧᤰ ᤋ᤺ᤰᤏᤧᤳ ᤕᤢᤱᤔᤠᤖᤧ ᤗᤠᤃᤡ ᤀᤢᤘᤠ ᤆᤥᤃᤢ॥ 4 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤓᤠ᤹ ᤏᤠ᤺ᤰᤔᤠᤖᤧ ᤗᤠᤃᤡ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤈᤢᤵᤛᤧ॥ ᤂᤢᤏᤧ᤹ ᤛᤢᤈᤠ ᤏᤠ᤺ᤰᤔᤠᤖᤧ ᤗᤠᤃᤡ ᤗᤠᤈᤣ᤹ᤀᤥᤒᤠ ᤕᤧᤰᤕᤰ ᤌᤰᤔᤠᤗᤠᤶ ᤂᤧᤱᤜᤠ᤹ ᤔᤧᤍᤩᤧ॥ 5 ᤕᤜᤢᤍᤠ ᤏᤢ ᤕᤖᤢᤛᤗᤧᤔᤒᤠ ᤆᤢᤶᤗᤢᤱᤅᤡᤸᤗᤧ ᤁᤢᤍᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤁᤢᤛᤱ ᤗᤰᤂᤢᤶ ᤋᤃᤡ ᤕᤧᤶᤛᤡᤱᤅᤠᤱ 6 ᤕᤜᤥᤛᤠᤐᤠᤋᤖᤧ ᤐᤠ᤺ᤳᤋᤢ— “ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣ ᤀᤠᤍᤠᤱᤒᤠᤀᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤏᤧ ᤔᤣ᤺ᤶᤒᤡ᥅ ᤀᤠᤍᤠᤱᤒᤠᤖᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶᤜᤠ᤹ᤀᤥ ᤕᤢᤰ ᤁᤧᤈᤥᤃᤢ᤹॥ ᤀᤠᤍᤠᤱᤒᤠᤖᤧᤀᤣ ᤁᤧᤜᤢᤰᤁᤥ ᤔᤢᤰᤛᤠᤶ ᤏᤢ ᤔᤢᤰ ᤁᤧᤃᤳᤋᤢ᤹॥ ᤀᤠᤍᤠᤱᤒᤠᤏᤢ ᤌᤰᤔᤠ ᤁᤧᤛᤢᤰᤐᤠ ᤜᤠ᤺ᤳᤋᤠᤱ ᤜᤥᤵ॥ 7 ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣ ᤀᤠᤍᤠᤱᤒᤠᤖᤧᤀᤣ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤁᤧᤏᤠ᤺ᤳᤋᤢ ᤁᤧᤍᤣᤛᤢᤛᤡ ᤜᤧᤰᤁᤩᤠᤱ ᤁᤧᤴᤍᤣ᤺ᤱᤒᤠ ᤀᤒᤪᤠᤜᤠᤔᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤁᤴ ᤗᤠᤈᤣᤴ ᤁᤧᤒᤡᤖᤢᤛᤡᤒᤠ ᤔᤣ᤺ᤴᤏᤠᤱᤒᤡ᥅ 8 ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤂᤧᤵᤔᤥ ᤔᤧᤕᤢᤱᤗ ᤔᤧᤘᤠ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤸᤗᤧ ᤗᤠᤃᤡ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤁᤧᤛᤣᤛᤣᤍᤧᤴ ᤌᤡᤰ ᤔᤧᤈᤥᤃᤢᤀᤠᤱ ᤏᤧᤖᤥ. 9 ‘ᤁᤧᤛᤠᤰᤐᤠ ᤋᤢᤰᤂᤣ ᤀᤠᤏᤡᤃᤣ ᤛᤶᤎᤠᤱ ᤐᤥᤱᤍᤠᤏᤧᤓᤃᤪ. ᤀᤡᤃᤪ ᤂᤠᤛᤧᤴᤗᤧ ᤋᤠᤓᤣᤴ ᤁᤡᤃᤪ ᤔᤠᤱᤍᤢᤰᤔᤠ ᤋᤠᤏᤧᤓᤃᤪ. ᤛᤠᤰᤘᤠᤴ ᤐᤥ᤺ᤰᤏᤧᤓᤃᤪ. ᤀᤠᤍᤠᤱᤒᤠᤖᤧ ᤁᤧᤔᤡᤱ ᤁᤧᤘᤠ᤹ᤒᤠ ᤁᤴ ᤔᤠᤱᤜᤡᤶᤔᤧᤸᤗᤧ ᤁᤢᤍᤃᤡ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤕᤧᤶᤔᤠᤍᤡᤃᤧᤖᤥ॥ ᤂᤶᤓᤩᤠᤱ ᤀᤠᤏᤡᤃᤣ ᤁᤧᤛᤠᤰᤐᤠ ᤋᤢᤰᤂᤣᤀᤥ ᤀᤠᤍᤠᤱᤒᤠ ᤐᤣᤗᤡ ᤑᤠᤰᤁᤠᤛᤡᤃᤧ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤐᤣᤗᤡᤴ ᤁᤧᤄᤧᤵᤛᤢᤀᤠᤱ ᤀᤠᤏᤡᤃᤣ ᤀᤠᤃ᤻ᤛᤧ᤺ᤵ॥’ 10 “ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤎᤠᤅᤧᤸᤗᤧ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤀᤶᤔᤥᤏᤡ ᤏᤢ ᤔᤥᤀᤠᤒᤡᤜᤠ᤹ ᤜᤧᤰᤁᤩᤠᤱ ᤛᤣᤀᤡᤖ ᤁᤥ᤺ᤰᤔᤠ ᤑᤠᤱᤈᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤗᤠ᤺ᤵᤔᤠ ᤁᤧᤶᤓᤠ᤺ᤰᤋᤢᤛᤡᤴᤏᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤁᤸᤗᤧ ᤆᤥᤃᤢᤸᤗᤧᤀᤣ ᤂᤧᤱᤜᤠ᤹ ᤘᤣ᤹ ᤗᤠᤶᤒᤠ ᤔᤧᤜᤡᤛᤡᤱᤅᤠᤱ ᤁᤵᤔᤥ ᤔᤧᤓᤧᤖᤧᤀᤠᤱ ᤔᤧᤘᤠ᤹॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤶᤔᤥᤏᤡ ᤏᤢ ᤔᤥᤀᤠᤒᤡᤜᤠ᤹ ᤜᤧᤰᤁᤩᤠᤱ ᤛᤣᤀᤡᤖ ᤁᤥ᤺ᤰᤔᤠ ᤑᤠᤱᤈᤱᤒᤠ ᤔᤏᤠᤜᤠ᤹ ᤔᤧᤶᤔᤧᤰᤂᤢᤛᤡᤴ॥ 11 ᤁᤖ ᤀᤠᤸᤗ ᤀᤥᤔᤧᤳᤋᤧ᤹. ᤁᤴ ᤔᤏᤠᤜᤠ᤹ᤖᤧ ᤀᤠᤏᤡᤃᤧᤏᤢ ᤀᤠᤰᤋᤱᤒᤠ ᤁᤢᤗᤧᤰᤘᤠ ᤔᤧᤏᤢ᤺ᤰᤋᤢᤖ ᤔᤧᤘᤠ᤹॥ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤗᤰᤂᤥᤔᤠ ᤀᤠᤃ᤻ᤒᤧᤖᤧᤒᤠ ᤗᤠᤈᤣ᤹ᤀᤥᤗᤠᤶ ᤀᤠᤏᤡᤃᤣ ᤏᤠ᤺ᤳᤇᤧᤍᤣᤛᤧ ᤂᤧᤱᤜᤠ᤹ ᤔᤧᤓᤧᤴᤗ ᤔᤧᤒᤳ॥ 12 ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤂᤠᤛᤧᤴ ᤁᤧᤴᤈᤥᤃᤢᤛᤡᤴᤒᤡ᥅ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤗᤠᤈᤣᤴ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤁᤧᤓᤧᤶᤒᤠᤖ ᤁᤧᤒᤵᤐᤠ ᤁᤴ ᤕᤖᤡᤰ ᤌᤰᤛᤢᤒᤠ ᤛᤢᤶᤜᤠ᤹ᤏᤢ ᤌᤰᤔᤠ ᤀᤠᤏᤡᤃᤣ ᤔᤢᤰᤛᤠᤶ ᤌᤧᤔᤠᤀᤠᤱ ᤔᤧᤃᤳᤋᤢᤶᤒᤧᤴ॥ ᤀᤠᤏᤡᤃᤣ ᤌᤣ ᤆᤥ᤺ᤰᤔᤠ ᤁᤧᤒᤥᤱᤒᤠ ᤂᤧᤴ ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤴ. ᤁᤖ ᤀᤠᤏᤡᤃᤣ ᤔᤡᤰᤁᤧᤸᤗᤧ ᤀᤠᤍᤠᤱᤒᤠ ᤀᤥᤔᤧᤳᤋᤠᤛᤡᤃᤧ᤹॥” 13 ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤏᤢ ᤂᤢᤴᤇᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ᤀᤠᤱ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤕᤧᤒᤧ॥ 14 ᤂᤧᤒᤩᤠᤱ ᤛᤱᤈᤢᤶᤓᤥ ᤁᤧᤕᤧᤵᤐᤠ ᤀᤠᤛᤠᤐᤖᤧ ᤁᤢᤎᤠ᤺ᤰᤁᤥᤒᤠ ᤗᤳᤇᤠ ᤗᤧᤒᤡ ᤕᤜᤠᤛᤣᤗᤖᤧᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤌᤠᤛᤡᤱ ᤕᤧ॥ ᤂᤢᤏᤧ᤹ ᤔᤳᤋᤏᤩᤠᤜᤖᤧ ᤁᤢᤎᤠ᤺ᤰᤔᤧᤴᤇᤠ᤹. ᤕᤜᤡᤀᤣᤗᤖᤧ ᤁᤢᤒᤧᤴᤔᤧᤴᤇᤠ᤹. ᤒᤏᤠᤕᤠᤜᤖᤧ ᤁᤢᤶᤔᤧᤴᤇᤠ᤹ ᤜᤧᤰᤁᤩᤠᤱ ᤈᤁᤖᤡᤕᤠᤖᤧ ᤁᤢᤛ᤻ᤛᤠ ᤘᤕᤧ॥ 15 ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤕᤰᤕᤢᤱᤒᤠᤛᤣ ᤜᤧᤰᤁᤩᤠᤱ ᤕᤜᤥᤛᤠᤐᤠᤋ ᤜᤠᤱᤅᤣ ᤂᤧᤵᤛᤠᤶᤔᤧ᤹ᤀᤥ. ᤀᤠᤍᤠᤱᤒᤠᤛᤡ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤁᤧᤔᤧᤳᤋᤡᤖᤥ—‘ᤔᤧᤃᤡᤛᤠᤶᤔᤧᤴᤏᤧ᤹. ᤁᤴ ᤕᤖᤡᤰ ᤌᤰᤛᤢᤒᤠ ᤛᤢᤶᤜᤠ᤹ᤏᤢ ᤂᤡᤏᤡ᤹ ᤕᤱᤔᤠ ᤔᤧᤛᤩᤧᤶᤔᤧᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤋᤧᤴᤎᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥ ᤘᤠ᤹. ᤂᤡᤏᤡ᤹ ᤜᤢᤰᤁᤥ ᤔᤣ᤺ᤴ॥ 16 ᤋᤠ᤺ᤴᤍᤡᤰ ᤂᤧᤱᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤗ᤺ᤴᤍᤧᤶᤔᤧ᤹॥ ᤂᤧᤱᤜᤠ᤹ ᤈᤡᤈᤒᤠ ᤌᤠᤶᤔᤠᤱᤒᤠ ᤗᤠᤶᤔᤥ ᤔᤧᤒᤥᤱᤅᤠᤱ ᤔᤧᤎᤠᤱ॥ ᤂᤡᤏᤡ᤹ ᤂᤧᤱᤜᤠ᤹ ᤕᤖᤢᤀᤣᤗᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤧᤏᤧᤒᤠ ᤘᤜ᤺ᤱᤅᤡᤸᤗᤧ ᤏᤠᤛᤔᤠ ᤁᤢᤕᤠᤀᤥ ᤁᤧᤍᤢᤔᤢᤶᤛᤡᤶ᤹॥ 17 ᤁᤴ ᤌᤱᤅᤡᤴ ᤂᤡᤏᤡ᤹ ᤌᤰᤔᤠ ᤔᤧᤒᤥᤱᤏᤧᤴ॥ ᤐᤧᤴᤒᤧᤴ ᤌᤧ᤺ᤰᤐᤧᤳ ᤐᤧᤴᤏᤠᤛᤡᤶᤔᤧ᤹ᤀᤠᤱ ᤜᤠᤱᤄᤠᤶᤔᤧ᤹ᤀᤠᤱ ᤕᤧᤒᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤒᤠ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤏᤡᤔᤠ ᤁᤧᤄᤥᤛᤢᤶ᤹॥ ᤔᤧᤃᤡᤛᤧᤶᤔᤡᤴᤏᤧ᤹ᤀᤠᤱ ᤂᤡᤏᤡ᤹ ᤕᤱᤔᤠᤀᤠᤱ ᤔᤧᤃᤧᤖᤧᤶᤔᤡᤴᤏᤧ᤹॥ ᤋᤠ᤺ᤴᤍᤡᤰ ᤂᤧᤱᤜᤠ᤹ᤏᤢ ᤌᤰᤛᤧ ᤂᤡᤏᤡ᤹ ᤗ᤺ᤴᤍᤧᤶ ᤑᤧᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ ᤗᤧᤵᤔᤠᤱ ᤘᤠ᤹॥’” 18 ᤕᤜᤥᤛᤠᤐᤠᤋᤧᤴ ᤂᤠᤶᤒᤠᤱᤅᤥ ᤛᤠᤒᤴ ᤜᤒᤳ ᤑᤴᤇᤡᤱ. ᤜᤧᤰᤁᤩᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤛᤠᤒᤴ ᤜᤒᤳ ᤔᤧᤓᤴᤇᤡᤱ॥ 19 ᤂᤧᤒᤩᤠᤱ ᤁᤜᤠᤋ ᤏᤢ ᤁᤥᤖᤜ ᤌᤠ᤺ᤰᤁᤥᤒᤠ ᤁᤢᤓᤠ ᤗᤧᤒᤡᤜᤠ᤹ ᤔᤧᤕᤧᤶᤛᤡᤱ ᤜᤧᤰᤁᤩᤠᤱ ᤕᤶᤒᤠ ᤀᤡᤰᤗᤠᤀᤥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ॥ 20 ᤂᤧᤒᤩᤠᤱ ᤂᤧᤱᤜᤠ᤹ ᤋᤠᤏᤠᤶ ᤀᤠᤴᤍᤣᤴ ᤔᤧᤒᤥᤃᤧᤀᤠᤱ ᤋᤁᤥᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤔᤧᤒᤣ॥ ᤂᤧᤱᤜᤠ᤹ ᤔᤧᤗ᤺ᤴᤍᤧ ᤔᤧᤒᤣ᤺ᤸᤗᤧ ᤕᤧᤶᤛᤡᤱᤅᤠᤱ ᤕᤜᤥᤛᤠᤐᤠᤋᤖᤧ ᤔᤧᤳᤋᤢᤛᤡ. “ᤕᤜᤢᤍᤠᤒᤠ ᤏᤢ ᤕᤖᤢᤛᤗᤧᤔᤒᤠ ᤕᤰᤕᤢᤱᤒᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹᥄ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤁᤧᤈᤥᤃᤢᤶᤒᤠᤀᤥ ᤂᤡᤏᤡ᤹ ᤌᤎᤵ ᤔᤧᤸᤗ᤹ᤀᤣ ᤐᤳᤇᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤁᤧᤍᤰᤋᤡ ᤁᤧᤓᤳᤇᤡ᤹॥ ᤂᤢᤏᤧ᤹ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤛᤠᤴ ᤆᤥᤃᤧᤶᤛᤡᤶᤔᤧ᤹. ᤂᤶᤓᤩᤠᤱ ᤂᤡᤏᤡ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥᤰᤂᤡᤖᤥ॥” 21 ᤔᤏᤠᤜᤠ᤹ᤏᤢ ᤐᤠᤴ ᤔᤧᤜᤢᤵᤋᤢᤀᤠᤱ ᤂᤢᤏᤧ᤹ ᤁᤢᤓᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥ ᤛᤠᤶᤔᤧᤵᤔᤠ ᤏᤢ ᤂᤢᤏᤧ᤹ ᤁᤢᤛᤣᤛᤣᤃᤧᤴ ᤁᤢᤜᤠᤱᤘᤠ ᤁᤢᤔᤠᤱᤘᤠ᤺ᤸᤗᤧ ᤁᤢᤏᤠᤖᤠ ᤑᤥᤔᤠᤖᤧ ᤗᤠᤃᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤐᤣ᤺ᤰᤔᤠᤀᤠᤱ ᤛᤠᤶᤗᤥᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤛᤠᤶᤔᤧᤗᤥᤖᤧᤖᤥ— “ᤕᤜᤘᤣ ᤍᤠᤱᤒᤧᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤢᤔᤡ᤺ᤶᤈᤡᤴ ᤛᤍᤠᤍᤡᤱ ᤘᤠ᤹ᤖᤥ॥” 22 ᤂᤧᤱᤜᤠ᤹ᤖᤧ ᤕᤶᤒᤠ ᤀᤡᤰᤗᤠᤀᤥ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤏᤢᤔᤧ᤺ᤴᤏᤧ ᤕᤜᤢᤍᤠ᤺ᤴᤏᤢ ᤌᤱ ᤆᤥ᤺ᤰᤛᤧ ᤁᤧᤓᤧᤶᤒᤠ ᤀᤶᤔᤥᤏᤡ. ᤔᤥᤀᤠᤒᤡ ᤏᤢ ᤛᤣᤀᤡᤖᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤘᤣ᤹ᤜᤠ᤹ᤖᤧ ᤛᤠᤵᤑ ᤔᤧᤓᤳᤋᤢᤛᤡᤖ ᤕᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤡᤔᤧᤍᤩᤧ॥ 23 ᤛᤣᤀᤡᤖ ᤁᤥ᤺ᤰᤔᤠᤗᤠᤶ ᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤧᤱᤜᤠ᤹ ᤕᤢᤔᤪᤧᤰ ᤋᤣᤔᤠᤛᤡ ᤏᤢ ᤔᤧᤱᤔᤠᤛᤡᤖᤧ ᤗᤠᤃᤡ ᤀᤶᤔᤥᤏᤡ ᤏᤢ ᤔᤥᤀᤠᤒᤡᤜᤠ᤹ ᤔᤧᤒᤥᤃᤧ॥ ᤀᤠᤸᤗ ᤂᤧᤱᤜᤠ᤹ᤖᤧ ᤛᤣᤀᤡᤖ ᤁᤥ᤺ᤰᤔᤠᤗᤠᤶ ᤁᤧᤓᤧᤶᤒᤠ ᤔᤏᤠᤜᤠ᤹ ᤔᤧᤔᤧᤰᤂᤢ ᤔᤧᤛᤢᤖᤢᤛᤡ. ᤂᤧᤒᤩᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤗᤢᤶᤔᤥ ᤔᤧᤜᤡᤛᤡᤱᤅᤠᤱ ᤀᤡᤔᤧᤴᤏᤡ ᤂᤠᤔᤧᤴᤏᤡ ᤔᤧᤛᤧᤳᤇᤡᤱ॥ 24 ᤕᤜᤢᤍᤠᤒᤠ ᤔᤏᤠᤜᤠ᤹ ᤗᤢᤱᤄᤪᤧ᤺ᤰ ᤕᤠᤰᤂᤪᤧ᤺ᤰ ᤁᤧᤏᤧᤒᤠ ᤆᤴᤈᤶᤒᤠᤍᤧᤴᤏᤥ ᤔᤧᤃᤧᤖᤧᤀᤠᤱ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤏᤡᤱᤔᤡ ᤌᤰᤛᤢᤒᤠ ᤛᤢᤶᤜᤠ᤹ ᤀᤥᤔᤧᤔᤧᤳᤋᤢᤛᤡᤸᤗᤧ ᤂᤧᤵᤔᤥ ᤂᤧᤱᤜᤠ᤹ ᤔᤧᤛᤩᤧᤖᤢᤛᤡᤀᤠᤱ ᤂᤠᤶᤒᤠᤱᤅᤥ ᤔᤧᤏᤧᤛ᤻ᤛᤧ ᤔᤧᤃᤖᤧᤒᤠ ᤔᤧᤏᤡᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤗᤳᤌᤡᤰᤁᤠᤱ ᤁᤧᤄᤧᤳᤇᤡᤱᤒᤠ ᤜᤥ᤺ᤵᤋᤧ॥ 25 ᤂᤧᤸᤗᤧᤆᤥᤃᤢᤸᤗᤧ ᤕᤜᤥᤛᤠᤐᤠᤋᤧᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ ᤛᤢᤶᤛᤧ ᤔᤧᤕᤧ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤕᤖᤡᤰ ᤏᤡ᤺ᤵᤔᤧᤴᤍᤧᤳ ᤛᤠᤔᤠᤐᤢᤔᤠᤜᤠ᤹. ᤆᤠᤱᤘᤠ᤺ᤴᤜᤠ᤹ ᤏᤢ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤐᤠ᤺ᤴᤜᤠ᤹ ᤋᤣ᤹ᤔᤠᤀᤣ ᤔᤧᤴᤇᤢᤰᤁᤣ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤛᤡ॥ ᤂᤧᤱᤜᤠ᤹ᤖᤧ ᤛᤢᤶᤕᤠᤴ ᤌᤠᤖᤡᤰ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤔᤧᤓᤢᤰᤂᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤜᤠᤶᤓᤩᤠᤖᤡᤰ ᤕᤖᤡᤰ ᤕᤥᤖᤧ॥ 26 ᤗᤡᤕᤠ᤺ᤴᤒᤠ ᤕᤧᤴᤏᤥ ᤂᤧᤱᤜᤠ᤹ ᤒᤖᤠᤁᤠᤜᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤖᤧ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤜᤠᤒᤠ ᤂᤧᤴᤏᤣ ᤏᤧᤖᤥ॥ 27 ᤂᤧᤴ ᤀᤣᤃᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤜᤥᤛᤠᤐᤠᤋᤖᤧ ᤋᤃᤡ ᤗᤠᤶᤗᤥᤛᤢᤛᤡᤀᤠᤱ ᤌᤱ ᤏᤠ᤺ᤶᤔᤠᤏᤢ ᤛᤥᤖᤡᤰ ᤔᤧᤛ᤺ᤳᤋᤧᤖ ᤕᤧᤰᤕᤰᤁᤥ ᤔᤧᤏᤢ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤛᤡᤖ ᤆᤥᤃᤢᤀᤠᤱ ᤘᤕᤧ॥ 28 ᤂᤧᤱᤜᤠ᤹ᤖᤧ ᤀᤴᤔᤣ. ᤀᤴᤔᤣ ᤂᤡᤱᤔᤏᤠᤒᤠ ᤔᤢᤰᤗᤠ ᤔᤧᤔᤢᤰᤂᤢᤖ ᤜᤧᤰᤁᤩᤠᤱ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢᤖ ᤕᤖᤢᤛᤗᤧ᤺ᤶᤔᤥ ᤔᤧᤗᤠᤛᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤗᤠᤛᤧ॥ 29 ᤕᤜᤘᤣ ᤍᤠᤱᤒᤧᤸᤗᤧᤀᤣ ᤀᤡᤛᤪᤠᤀᤡᤗᤒᤠ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥᤃᤢ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤁᤧᤖᤧᤰ ᤗᤠᤈᤣ᤹ᤒᤠ ᤜᤠᤱᤈᤢᤶᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤃᤡᤛᤧᤖᤥ॥ 30 ᤕᤜᤥᤛᤠᤐᤠᤋᤖᤧ ᤁᤢᤜᤠᤱᤈᤢᤶᤔᤥ ᤏᤢ᤹ᤔᤠᤍᤠᤔᤠ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤧᤖᤧᤰ ᤐᤡᤛᤠᤱ ᤏᤠ᤺ᤶᤛᤡᤱᤔᤠ ᤐᤡᤖᤢᤖᤥ॥ ᤕᤜᤥᤛᤠᤐᤠᤋᤖᤧ ᤁᤢᤜᤠᤱᤕᤢᤰᤁᤡᤸᤗᤧ ᤁᤢᤏᤢᤵᤔᤠ ( ᥇ ᤜᤠᤱ ᥈᥈:᥊᥇-᥋᥆ ) 31 ᤁᤶᤓᤗ᤹ᤖᤡᤰ ᤕᤜᤥᤛᤠᤐᤠᤋᤧᤸᤗᤧ ᤕᤜᤢᤍᤠᤀᤥ ᤜᤠᤱᤕᤢᤰ ᤆᤥᤃᤢ॥ ᤜᤠᤱᤕᤢᤰᤏᤠᤀᤥ ᤗᤠᤛᤧᤸᤗᤧ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤀᤈᤢᤒᤠ ᤘᤕᤧ. ᤂᤢᤏᤧ᤹ ᤛᤡᤸᤜᤡᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 32 ᤕᤜᤥᤛᤠᤐᤠᤋᤧᤴ ᤁᤢᤶᤒᤠᤖᤧ ᤏᤠ᤺ᤳᤋᤢᤒᤠ ᤗᤠᤶᤔᤥ ᤗᤠᤱᤄᤣᤃᤧ. ᤜᤧᤰᤁᤩᤠᤱ ᤂᤧᤴ ᤗᤠᤶᤒᤠ ᤌᤡᤰᤏᤠᤜᤠᤱ ᤔᤧᤒᤣᤏᤧᤴ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤆᤥᤃᤢ॥ 33 ᤁᤖ ᤁᤥ᤺ᤰᤔᤠᤜᤠ᤹ᤀᤥ ᤁᤧᤏᤧᤒᤠ ᤔᤠᤱᤎᤠ᤺ᤴᤜᤠ᤹ ᤂᤢᤏᤧ᤹ ᤔᤧᤄᤧᤳᤋᤢᤴ ᤔᤧᤍᤣᤛᤢᤴ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤡᤰᤗᤢᤱᤔᤥᤗᤠᤶ ᤏᤡᤱᤘᤠ᤹ ᤔᤧᤶᤒᤡᤖᤢᤴ॥ 34 ᤕᤜᤥᤛᤠᤐᤠᤋᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰᤁᤣ ᤜᤏᤠᤏᤡᤖᤧ ᤁᤢᤛ᤻ᤛᤠ ᤕᤣᤜᤢᤖᤧ ᤁᤢᤛᤠᤵᤔᤢ᤺ᤴᤎᤢᤶᤔᤥ ᤛᤠᤵᤋᤧᤀᤠᤱ ᤐᤳ॥ ᤂᤧᤱᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤔᤧᤃᤠᤶᤛᤢᤀᤠᤱ ᤐᤳ॥ 35 ᤕᤠᤱᤛᤡ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤖᤧ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤀᤠᤵᤋᤡᤰᤁᤥ ᤁᤧᤎᤠᤒᤠ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤜᤈᤩᤠᤜᤴᤏᤢ ᤛᤥ᤹ᤒᤢ ᤛᤢ᤺ᤵᤋᤢ॥ 36 ᤗᤧᤱᤜᤱ ᤆᤥ᤺ᤰᤔᤠᤖᤧ ᤗᤠᤃᤡ ᤘᤠᤗᤠᤎᤠᤜᤠ᤹ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤀᤜᤈᤩᤠᤜᤴᤏᤢ ᤁᤠ᤹ᤀᤡ ᤜᤢᤵᤋᤢ॥ ᤁᤴ ᤘᤠᤗᤠᤎᤠᤜᤠ᤹ ᤀᤣᤛᤩᤥᤏ-ᤃᤣᤒᤣᤖ ᤘᤠᤃᤵᤂᤣ᤺ᤱᤅᤥ ᤔᤧᤈᤥᤃᤢ ᤔᤧᤛᤢᤖᤢᤛᤡᤀᤠᤱ. 37 ᤔᤠᤖᤣᤛᤠᤒᤠ ᤍᤥᤍᤠᤒᤠᤜᤢᤖᤧ ᤁᤢᤛ᤻ᤛᤠ ᤀᤣᤗᤡᤀᤣᤈᤖᤗᤧ ᤕᤜᤥᤛᤠᤐᤠᤋᤖᤧ ᤁᤢᤍᤰᤗᤧᤱᤘᤠᤀᤥ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢ. “ᤀᤠᤍᤠᤱᤒᤠᤖᤧ ᤀᤜᤈᤩᤠᤜᤴᤏᤢ ᤛᤥ᤹ᤒᤢ ᤁᤧᤛᤢ᤺ᤵᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤔᤧᤱᤃᤵᤔᤏᤠᤒᤠ ᤆᤥᤃᤢ᤹॥” ᤜᤧᤰᤁᤩᤠᤱ ᤂᤧᤴ ᤘᤠᤗᤠᤎᤠᤜᤠ᤹ ᤔᤧᤕᤖᤧ ᤔᤧᤒᤣᤀᤠᤱ ᤗᤧᤱᤜᤱ ᤆᤥ᤺ᤰᤔᤠ ᤗᤠᤶ ᤔᤧᤒᤥ᤺ᤰᤂᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.