᥈ ᤛᤠᤵᤔᤢ᤺ᤴᤎᤢᤶ 2 - LIFOTNT

ᤔᤠᤱᤜᤡᤶ ᤆᤥ᤺ᤰᤔᤠ ᤗᤢᤱᤛᤡᤱᤜᤠ᤹ ᤋᤠ᤺ᤵᤔᤠ ᤔᤧᤜᤣ᤺ᤰᤋᤢ

¹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤏᤢ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤃᤡ ᤗᤳᤇᤠ ᤜᤡᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢ॥

² ᤂᤢᤏᤧ᤹ ᥍᥆.᥆᥆᥆ ᤁᤰ ᤁᤧᤃᤢᤒᤠᤜᤠ᤹. ᥎᥆.᥆᥆᥆ ᤗᤢᤱ ᤁᤧᤄᤰᤐᤠᤜᤠ᤹ ᤏᤢ ᤂᤧᤱᤜᤠ᤹ ᤀᤥᤔᤧᤵᤔᤠᤛᤡᤖᤧ ᤗᤠᤃᤡ ᤔᤢᤖᤠ ᤁᤧᤔᤧᤵᤐᤠ ᤁᤧᤈᤥ᤺ᤰᤐᤠ ᥉.᥌᥆᥆ ᤗᤠᤶᤗᤥᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥

³ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤋᤢᤖᤥᤛᤒᤠ ᤜᤠᤱ ᤜᤣᤖᤠᤔᤧᤴ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤡᤱᤄᤱ ᤜᤠᤰᤋᤢᤖᤥ— “ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴ ᤂᤢᤏᤧ᤹ ᤁᤢᤜᤠᤱᤜᤡᤶ ᤕᤢᤱᤔᤠᤍᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤛᤠᤶᤔᤠᤱᤛᤡᤱᤜᤠ᤹ ᤁᤧᤜᤠᤰᤋᤢ ᤁᤧᤕᤢᤛᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤜᤠᤰᤋᤠᤱᤅᤧ᤹ᤀᤥ॥

⁴ ᤀᤠᤸᤗ ᤀᤠᤱᤃᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠᤀᤠᤱ ᤋᤥ᤺ᤶᤔᤠ ᤏᤢ ᤂᤢᤏᤧ᤹ ᤁᤢᤍᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤜᤠ᤺ᤶᤔᤠ. ᤜᤧᤰᤁᤩᤠᤱ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱᤜᤠ᤹ ᤆᤰᤔᤧᤸᤗ᤹ᤀᤣ ᤌᤧ᤺ᤰᤐᤧᤳ ᤌᤧ᤺ᤰᤐᤧᤳ ᤏᤧᤔᤠᤀᤠᤱ ᤋᤥ᤺ᤶᤔᤠᤖᤧ ᤗᤠᤃᤡ. ᤜᤧᤰᤁᤩᤠᤱ ᤋᤠᤏᤠᤶ. ᤕᤢ᤺ᤴᤇᤡᤰ ᤌᤰᤔᤠ. ᤛᤒᤠᤌ. ᤗᤠᤍᤢᤵᤐᤥ ᤏᤢ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤴᤎᤥ ᤆᤥᤃᤢᤒᤠ ᤋᤱᤏᤠᤶᤜᤠ᤹ᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤂᤧᤴ ᤔᤠᤱᤜᤡᤶᤔᤡᤴ ᤂᤢᤏᤧ᤹ ᤁᤢᤗᤠᤃᤡ ᤋᤥ᤺ᤶᤔᤠ ᤆᤥᤃᤢᤱᤗ ᤐᤳᤋᤠ॥ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤁᤴ ᤗᤳᤇᤠ ᤔᤧᤴᤏᤢᤵᤔᤏᤠ ᤛᤍᤠᤍᤡᤱᤒᤠ ᤌᤡᤶᤗᤥ॥

⁵ “ᤀᤠᤱᤃᤠ᤹ ᤆᤥ᤺ᤰᤔᤠ ᤆᤥᤃᤢᤱᤒᤠ ᤔᤠᤱᤜᤡᤶᤔᤡᤴ ᤗᤳᤇᤠ ᤀᤠᤳᤋᤠᤋᤠᤴᤏᤣ ᤕᤶᤒᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤔᤠᤱᤜᤠ᤹ᤏᤢ᤺ᤸᤗᤧ ᤐᤕᤶ ᤕᤶᤒᤠ ᤆᤥᤰ॥

⁶ ᤁᤖ ᤛᤠᤱᤃᤪᤠᤶᤐᤣᤍᤠᤱ. ᤁᤧᤖᤧᤰᤏᤢ᤺ᤸᤗᤧ ᤌᤠ᤺ᤱ ᤁᤧᤏᤧᤒᤠ ᤛᤠᤱᤃᤪᤠᤶᤐᤣᤍᤠᤱᤅᤡᤴᤏᤣ ᤂᤢᤏᤧ᤹ ᤁᤢᤗᤠᤃᤡ ᤆᤢᤰᤛᤠ ᤆᤥ᤺ᤰᤁᤡᤸᤗᤧ ᤜᤠ᤺ᤳᤗᤧ ᤂᤢᤏᤧ᤹ ᤁᤢᤗᤠᤃᤡ ᤔᤠᤱᤜᤡᤶ ᤆᤥ᤺ᤰᤔᤠ ᤛᤢᤰᤋᤢᤒᤣ᥅ ᤂᤢᤏᤧ᤹ ᤁᤢᤍᤃᤡ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤏᤢ᤺ᤸᤗᤧᤀᤠᤱᤎᤥ ᤘᤣ᤹ ᤂᤢᤏᤧ᤹ ᤁᤢᤗᤠᤃᤡ ᤔᤠᤱᤜᤡᤶ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ ᤜᤠ᤺ᤳᤋᤠᤀᤠᤱᤒᤣ᥅

⁷ “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢ ᤌᤡᤰ ᤐᤠᤱᤄᤧᤕᤢᤛᤧ᤹ᤀᤥ. ᤂᤧᤴ ᤔᤏᤠ᤺ᤸᤗᤧ ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠ ᤏᤢ ᤑᤧᤴᤈᤣ᤹ ᤜᤧᤰᤁᤩᤠᤱ ᤐᤠᤖᤠᤴᤗᤠ. ᤁᤢᤜᤧ᤺ᤳᤗᤠ ᤏᤢ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤂᤡ᤺ᤸᤗᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤖ. ᤂᤧᤒᤩᤠᤱ ᤂᤧᤴ ᤁᤢᤓᤢᤱ ᤗᤰᤔᤠᤀᤠᤱ ᤁᤧᤗᤧᤒᤠ ᤔᤏᤠ ᤐᤥᤱᤔᤠ ᤐᤥᤱ᤹॥ ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤋᤠᤖᤢᤛᤡ ᤐᤡᤖᤠᤱᤒᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢᤜᤠ᤹ᤏᤢ ᤛᤥᤖᤡᤰ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤕᤠ᤺ᤶᤒᤰ ᤆᤥᤰ॥

⁸ “ᤀᤠᤱᤃᤠ᤹ ᤗᤧᤒᤏᤠᤏᤗᤠᤶ ᤛᤠᤶᤔᤠᤱᤛᤡᤱ. ᤀᤠᤱ ᤏᤢ ᤋᤄ᤹ᤛᤡᤱᤜᤠ᤹ᤀᤠᤱ ᤜᤠᤰᤋᤠᤱ ᤕᤢᤛᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤗᤧᤒᤏᤠᤏᤀᤥ ᤛᤡᤱᤜᤧᤰᤔᤠ ᤁᤧᤗᤧᤒᤠ ᤔᤧᤈᤥᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹॥

⁹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ᤏᤢ ᤛᤥᤖᤡᤰ ᤕᤖᤡᤰ ᤛᤡᤱᤜᤠ᤹ ᤕᤠᤖᤡᤵ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠ᤺ᤶᤒᤰ ᤔᤧᤈᤥᤰ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤆᤥ᤺ᤰᤔᤠ ᤀᤡ᤺ᤳᤋᤢᤱᤒᤠ ᤔᤠᤱᤜᤡᤶᤔᤡᤴ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤐᤥᤱ᤹॥

¹⁰ ᤛᤡᤱᤃᤧᤜᤧᤰᤐᤠ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹. ᤛᤡᤱᤃᤧᤍᤠᤱᤒᤠᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᥈᥆.᥆᥆᥆ ᤁᤥᤖ ᤔᤠᤛᤡ. ᥈᥆.᥆᥆᥆ ᤁᤥᤖ ᤜ᤺ᤰᤛᤡ. ᥈᥆.᥆᥆᥆ ᤒᤠᤌ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤏᤢ ᥈᥆.᥆᥆᥆ ᤒᤠᤌ ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤐᤡᤖᤢᤱᤛᤡᤱ᤹॥”

¹¹ ᤋᤢᤖᤥᤛᤒᤠ ᤜᤠᤱ ᤜᤣᤖᤠᤔᤧᤸᤗᤧ ᤛᤰᤀᤡᤱᤄᤱ ᤗᤠᤶᤒᤠ ᤁᤴ ᤀᤡᤱᤄᤱᤅᤡᤴ ᤛᤥᤗᤥᤔᤏᤧᤴ ᤜᤠᤰᤋᤢᤖᤥ— “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤀᤠᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤁᤧᤈᤥᤃᤧ॥”

¹² ᤛᤰᤀᤡᤱᤄᤱᤅᤥ ᤜᤣᤖᤠᤔᤧᤸᤗᤧ ᤀᤰᤋᤱᤒᤠᤀᤠᤱ ᤛᤠᤵᤋᤢ— “ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ॥ ᤂᤢᤏᤧ᤹ ᤍᤠᤀᤢᤍ ᤜᤠᤱᤅᤡᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹. ᤏᤧᤜᤡᤏᤡᤱᤘᤠ᤹ ᤏᤢ ᤂᤠᤛᤡᤱᤃᤧᤏᤡ᤺ᤵᤐᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤐᤡᤖᤢᤀᤠᤱ ᤘᤠ᤹. ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤜᤡᤶ ᤌᤡᤰ ᤏᤢ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤃᤡ ᤗᤳᤇᤠ ᤜᤠᤱᤜᤡᤶ ᤆᤥᤃᤢ᤹॥

¹³ “ᤀᤠᤸᤗ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤏᤢ ᤛᤠ᤹ᤖᤡᤰ ᤁᤧᤗᤧᤒᤠ ᤆᤥᤒᤣᤃᤢ. ᤜᤢᤖᤠᤔ-ᤀᤒᤡᤴ ᤐᤠᤱᤄᤢᤱ ᤕᤢᤛᤢᤱᤗ ᤐᤳᤋᤠ॥

¹⁴ ᤂᤢᤏᤧ᤹ᤃ ᤍᤠᤏ ᤌᤠ᤺ᤰᤁᤥᤒᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤋᤢᤖᤥᤛᤒᤠ ᤕᤰᤕᤢᤱᤒᤠᤖᤥ॥ ᤂᤢᤏᤧ᤹ᤃ ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠ. ᤑᤧᤴᤈᤣ᤹. ᤗᤢᤱ. ᤛᤡᤱᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤐᤠᤖᤠᤴᤗᤠ. ᤁᤢᤜᤧ᤺ᤳᤗᤠ ᤜᤧᤰᤁᤩᤠᤱ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤂᤡ ᤏᤢ ᤏᤤᤏᤠᤛᤢᤳ ᤆᤡᤖᤡᤰᤗᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤁᤧᤗᤧᤒᤠ ᤆᤥᤒᤣᤃᤢᤖᤥ॥ ᤂᤢᤏᤧ᤹ᤃ ᤁᤧᤖᤧᤰ ᤐᤖᤡᤰᤗᤧᤴ ᤁᤢᤓᤢᤱ ᤗᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤜᤢ᤹ᤛᤡᤱᤒᤠ ᤔᤏᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤐᤡᤔᤏᤠᤒᤠ ᤀᤠᤳᤋᤡᤴ ᤐᤖᤡᤰᤗᤧᤴ ᤁᤢᤒᤡ ᤕᤠ᤺ᤶᤒᤰᤛᤠᤱ ᤆᤥ᤺ᤰᤔᤠ ᤛᤢᤰᤋᤢ᤹॥ ᤂᤢᤏᤧ᤹ ᤀᤠᤍᤠᤱᤒᤠᤖᤧ ᤁᤧᤗᤧᤒᤠ ᤆᤥᤒᤣᤃᤢ ᤁᤧᤔᤜᤠ᤹ᤏᤢ ᤛᤥᤛᤥᤖᤡᤰ ᤀᤠᤍᤠᤱᤒᤠᤖᤧ ᤁᤧᤶᤒᤠ ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤍᤠᤀᤢᤍᤖᤧ ᤁᤢᤔᤜᤠ᤹ᤏᤢ ᤕᤠ᤺ᤶᤒᤰ ᤆᤥᤰᤗᤥ॥

¹⁵ “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤀᤠᤴᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤠᤱᤜᤢᤵ ᤆᤥᤃᤢᤒᤠ ᤔᤠᤛᤡ. ᤜ᤺ᤰᤛᤡ. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤏᤢ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤜᤠᤅᤧ ᤌᤠᤱᤄᤧ᤹ᤀᤥ॥

¹⁶ ᤀᤠᤍᤠᤱᤒᤠ ᤆᤠᤜᤠ ᤁᤧᤈᤥ᤺ᤰᤐᤠ ᤁᤧᤖᤧᤰ ᤛᤡᤱᤜᤠ᤹ ᤗᤧᤒᤏᤠᤏᤀᤥ ᤀᤠᤏᤡᤃᤣ ᤋᤠᤅᤢᤶᤒᤧ. ᤜᤧᤰᤁᤩᤠᤱ ᤛᤡᤱᤄᤱᤜᤠ᤹ ᤂᤣ᤺ᤰᤂᤢᤶᤒᤧᤀᤠᤱ ᤕᤥᤵᤐᤠ ᤌᤠᤖᤡᤰ ᤘᤍᤣ᤺ᤴᤍᤢᤶ ᤕᤢᤛᤢᤶ ᤐᤡᤀᤠᤛᤡᤃᤧ᤹॥ ᤀᤠᤍᤠᤱᤒᤠᤖᤧ ᤂᤧᤵᤔᤥᤏᤢ ᤕᤖᤢᤛᤗᤧᤔ ᤌᤧᤶᤒᤠ ᤋᤣ᤹ᤔᤠ ᤋᤱᤃᤠᤶ ᤆᤥᤃᤧ᤹ᤀᤥ॥”

ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰ ᤔᤧᤜᤣ᤺ᤰᤋᤢ᤹

¹⁷ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤔᤏᤠᤜᤠ᤹ ᤕᤠᤶᤏᤠ᤺ᤳᤏᤡ᤺ᤳ ᤆᤥᤃᤢᤛᤡᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤕᤠᤶᤏᤠ᤺ᤳᤏᤡ᤺ᤳ ᤆᤥᤃᤢᤛᤡ॥ ᤁᤴᤜᤠ᤹ ᤁᤧᤖᤧᤰᤗᤧ ᥇.᥋᥉.᥌᥆᥆ ᤔᤏᤠ ᤔᤧᤘᤕᤧ॥

¹⁸ ᤂᤢᤏᤧ᤹ ᤁᤴᤜᤠ᤹ᤀᤥᤒᤠ ᥍᥆.᥆᥆᥆ ᤁᤰ ᤁᤧᤃᤢᤒᤠ ᤏᤢ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᥎᥆.᥆᥆᥆ ᤗᤢᤱᤃᤧᤜᤧ᤺ᤵᤐᤠ ᤜᤧᤰᤁᤩᤠᤱ ᤁᤴᤜᤠ᤹ ᤕᤠ᤺ᤶᤒᤰᤁᤥ ᤑᤶᤔᤠᤛᤡᤖᤧ ᤗᤠᤃᤡ ᥉.᥌᥆᥆ ᤃ ᤔᤢᤖᤠ ᤔᤧᤵᤔᤠᤛᤡ ᤕᤠ᤺ᤶᤒᤰᤁᤥ ᤑᤳᤇᤢᤛᤡᤖᤥ॥