᥈ ᤛᤠᤵᤔᤢ᤺ᤴᤎᤢᤶ 19 - LIFOTNT

ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤕᤜᤥᤛᤠᤐᤠᤋᤧᤴ ᤑᤧ᤺ᤰᤋᤢ

¹ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤕᤖᤢᤛᤗᤧ᤺ᤶᤒᤠ ᤁᤢᤜᤠᤱᤜᤡᤶᤔᤥ ᤏᤢᤖᤡᤰ ᤋᤠᤖᤡᤰ ᤏᤢ᤺ᤰᤂᤧᤓᤧᤖᤧᤀᤠᤱ ᤀᤣᤃᤠᤱ.

² ᤜᤏᤠᤏᤡᤖᤧ ᤁᤢᤛ᤻ᤛᤠ ᤌᤢᤶᤕᤠ ᤁᤧᤀᤡᤒᤠ ᤕᤣᤜᤢᤴ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧ॥ ᤕᤣᤜᤢ᤺ᤸᤗᤧ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤁᤢ᤹ᤀᤡᤃᤧᤓᤧᤶᤒᤧᤴ ᤁᤧᤓᤠ᤹ᤖᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤔᤡᤜᤠ᤹ᤏᤢ ᤆᤢᤶᤍᤧ᤺ᤱ ᤁᤧᤔᤧᤳᤇᤡᤱᤅᤠᤱ ᤌᤣ ᤀᤠᤍᤠᤱᤒᤠ ᤁᤧᤏᤡᤱᤘᤠ᤹ ᤋᤠᤒᤡ᥅ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤧᤴ ᤀᤠᤍᤠᤱᤒᤠᤖᤧ ᤁᤧᤛᤶᤎᤠᤱ ᤀᤡᤍᤠᤖᤥ॥

³ ᤜᤧᤰᤁᤣᤛᤠᤱ ᤀᤠᤍᤠᤱᤒᤠᤖᤧ᤹ᤀᤥ ᤁᤢᤓᤠ ᤏᤢᤒᤠ ᤐᤠ᤺ᤴᤏᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤗᤠᤈᤣ᤹ᤀᤥᤗᤠᤶ ᤁᤧᤀᤡ᤺ᤰᤂᤢ ᤁᤧᤍᤣᤛᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤁᤥ᤺ᤵᤔᤠ ᤀᤠᤍᤠᤱᤒᤠᤖᤧ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤘᤠ᤹ᤖᤥ॥”

ᤕᤜᤥᤛᤠᤐᤠᤋᤖᤧ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ

⁴ ᤕᤜᤥᤛᤠᤐᤠᤋᤖᤧ ᤁᤢᤕᤢᤱᤔᤠᤍᤧᤴ ᤕᤖᤢᤛᤗᤧ᤺ᤶᤔᤥ ᤏᤧᤛ᤻ᤛᤧ॥ ᤂᤢᤏᤧ᤹ ᤕᤠᤶᤔᤥ ᤒᤣᤷᤛᤣᤒᤠᤒᤠ ᤔᤏᤠᤜᤠ᤹ᤀᤥ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤐᤣᤀᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤰᤋᤢ ᤋᤠᤖᤢᤛᤡ॥

⁵ ᤂᤢᤏᤧ᤹ ᤗᤠᤈᤣ᤹ ᤁᤧᤖᤧᤰᤁᤣ ᤕᤜᤢᤍᤠᤒᤠ ᤌᤠᤵᤌᤣ᤺ᤰ ᤕᤠᤶᤎᤣᤰᤐᤠ ᤕᤧᤰᤕᤰ ᤌᤰᤔᤠ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥

⁶ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤎᤣ ᤁᤧᤈᤥᤃᤢᤶ᤹. ᤂᤧᤴ ᤐᤠ᤺ᤴᤏᤥ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤣ᤺ᤴ ᤁᤖ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤸᤗᤧ ᤏᤡ᤺ᤴᤎᤥ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤈᤧᤰᤋᤢᤶᤛᤡᤶᤔᤡᤸᤗᤧ ᤂᤡᤏᤡ᤹ᤏᤢ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤂᤠᤛᤧᤴ ᤁᤧᤗᤥ᤺ᤴᤍᤢᤶ᤹॥

⁷ ᤀᤠᤸᤗ ᤕᤜᤘᤣ ᤍᤠᤱᤒᤧᤴ ᤁᤡᤵᤔᤠ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ᤀᤥ ᤘᤠ᤹ᤖ॥ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴ. ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠ ᤏᤢ ᤛᤢᤖᤢᤋᤩᤠᤱ ᤋᤠ᤺ᤰᤔᤏᤠᤒᤧᤴ ᤏᤠᤛᤡ ᤔᤧᤎ᤺ᤳᤋᤢᤴ᤹॥”

⁸ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤐᤠ᤺ᤴᤎᤱ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤋᤱᤔᤠᤖᤧ ᤗᤠᤃᤡ ᤕᤜᤥᤛᤠᤐᤠᤋᤧᤸᤗᤧ ᤕᤖᤢᤛᤗᤧ᤺ᤶᤔᤥᤀᤠᤱ ᤁᤢᤓᤠ ᤗᤧᤒᤡᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤜᤡᤶᤛᤕᤱ ᤜᤡᤶᤛᤕᤱᤒᤠ ᤗᤠᤶᤗᤥᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥

⁹ ᤂᤢᤏᤧ᤹ ᤂᤧᤱᤜᤠ᤹ ᤁᤴ ᤀᤡᤱᤈᤠᤱᤜᤠ᤹ ᤐᤡᤖᤢᤛᤡ—“ᤂᤡᤏᤡ᤹ ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤧᤴᤏᤢ ᤁᤡᤛᤧᤶᤔᤧ᤹ ᤜᤧᤰᤁᤩᤠᤱ ᤏᤛᤠ᤺ᤴᤛᤠᤒᤠ ᤐᤥᤱᤔᤠᤀᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱ᤹॥

¹⁰ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤂᤡᤏᤡ᤹ ᤁᤠ᤹ᤀᤡᤜᤠ᤹ᤗᤠᤶ ᤂᤡᤏᤡ᤹ ᤋᤃᤡ ᤁᤧᤍᤠᤒᤠ ᤁᤧᤖᤧᤰ ᤋᤢ᤺ᤴᤍᤣᤜᤠ᤹. ᤔᤏᤠᤛᤧᤵᤔᤠ ᤋᤢ᤺ᤴᤍᤣ ᤏᤠᤶᤗᤠ ᤐᤥᤱᤛᤠᤱ. ᤀᤡᤃᤪ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤡᤃᤪ ᤛᤠᤶᤕᤥᤌᤡᤶ ᤀᤡᤃᤪ ᤌᤡᤶᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤐᤥᤱᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤰᤋᤱᤒᤠ ᤐᤖᤡᤰᤗᤧᤴ ᤑᤧᤴᤕᤠ᤺ᤶᤒᤰᤁᤠᤱ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤂᤡᤏᤡ᤹ ᤂᤧᤱᤜᤠ᤹ ᤛᤠᤶᤍᤡᤱ ᤐᤡᤖᤧᤶᤛᤡᤶᤔᤧ᤹॥ ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤏᤢ ᤂᤡᤏᤡ᤹ ᤁᤠ᤹ᤀᤡᤜᤠ᤹ᤀᤥᤀᤠᤱ ᤂᤧᤸᤗᤧ ᤗᤠᤃᤡ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤀᤡᤍᤠᤖᤥ॥ ᤁᤖ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤁᤧᤈᤥᤃᤢᤶᤏᤧᤓᤃᤪ ᤂᤡᤏᤡ᤹ ᤀᤠᤵᤋᤡᤰᤛᤠᤒᤠ ᤁᤧᤶᤒᤥ᤺ᤰᤂᤡᤴ॥

¹¹ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤛᤶᤎᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤀᤔᤷᤕᤠᤜᤴ ᤛᤢᤜᤠᤱᤕᤢᤰᤐᤠ ᤘᤠ᤹॥ ᤜᤠᤱᤈᤢᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤢᤍᤠᤒᤠ ᤌᤠ᤺ᤰᤗᤠᤶᤗᤥᤒᤠ ᤀᤡᤛ᤻ᤔᤠᤀᤣᤗᤖᤧ ᤁᤢᤛ᤻ᤛᤠ ᤈᤒᤍᤡᤕᤠᤜᤴ ᤂᤡᤏᤡ᤹ ᤌᤢᤱᤎᤥ ᤛᤢᤜᤠᤱᤕᤢᤰᤐᤠ ᤘᤠ᤹॥ ᤗᤧᤒᤡᤜᤠ᤹ᤃ ᤂᤡᤏᤡ᤹ ᤋᤃᤡ ᤛᤢᤜᤠᤱᤕᤢᤰᤐᤠ ᤁᤢᤀᤡᤛᤡᤰ ᤕᤠ᤺ᤶᤒᤰ ᤔᤧᤈᤥᤰ॥ ᤁᤧᤎᤢᤶᤒᤠ ᤏᤢ ᤕᤥᤎᤥ ᤔᤧᤸᤗ᤹ᤔᤏᤠᤒᤠ ᤐᤥ᤺ᤰᤂᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤴ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤛᤥᤖᤡᤰ ᤘᤠ᤹ᤖᤖᤥ॥”