᥈ ᤛᤠᤵᤔᤢ᤺ᤴᤎᤢᤶ 18 - LIFOTNTᤔᤡᤁᤠᤕᤠ᤺ᤸᤗᤧ ᤀᤠᤜᤠᤒᤖᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢ 1 ᤕᤜᤥᤛᤠᤐᤠᤋᤧᤴ ᤛᤠ᤹ᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤁᤢᤔᤡᤱ ᤁᤧᤀᤡᤱᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤧᤴᤏᤢ ᤀᤡᤳᤇᤠᤒᤠ ᤆᤥ᤺ᤰᤔᤠᤗᤠᤶ ᤁᤧᤛᤢ॥ 2 ᤁᤢᤓᤠ ᤋᤱᤒᤣ ᤀᤣᤃᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤀᤠᤜᤠᤒᤖᤧ ᤁᤢᤍᤢᤶᤛᤧ ᤐᤣ॥ ᤀᤠᤜᤠᤒᤖᤧ ᤕᤜᤥᤛᤠᤐᤠᤋᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤌᤧ᤺ᤰᤐᤧᤳ ᤁᤧᤎᤠᤱᤒᤠᤜᤠ᤹ ᤁᤢᤈᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤕᤖᤡᤰ ᤔᤧᤸᤗᤢᤰᤜᤠ᤹ ᤏᤢ ᤐᤡᤳᤜᤠ᤹ ᤛᤩᤧᤖᤢᤛᤡ ᤜᤧᤰᤁᤩᤠᤱ ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤜᤢᤛᤢ॥ 3 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤌᤣ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤁᤧᤓᤠ᤹ᤒᤠᤀᤠᤒᤡ᥅” ᤕᤜᤥᤛᤠᤐᤠᤋᤖᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤧᤰᤋᤱᤒᤠᤀᤣᤛᤠᤒᤠ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤍᤠᤱᤒᤠᤖᤧᤀᤣ ᤁᤧᤔᤏᤠ ᤁᤢᤛᤡᤱᤒᤠᤛᤡ॥ ᤁᤴ ᤌᤱᤅᤥ ᤀᤠᤏᤡᤃᤣ ᤀᤠᤍᤠᤱᤒᤠ ᤑᤠ᤹ᤀᤠᤛᤡᤃᤧ᤹॥” 4 ᤁᤖ ᤕᤜᤥᤛᤠᤐᤠᤋᤖᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤀᤰᤂᤣᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤴ ᤋᤃᤡ ᤛᤢᤈᤠ ᤏᤠ᤺ᤰᤋᤧ᤹ᤀᤥ॥” 5 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤡᤵ ᤗᤡᤛᤡ ᤕᤠᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤑᤢᤰᤂᤢᤛᤡᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤌᤣ ᤀᤠᤱᤃᤠ᤹ ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤳᤋᤢᤱᤒᤡ ᤀᤡ ᤔᤧᤓᤳᤋᤠᤴᤒᤡ᥅” ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢ. “ᤌᤱᤅᤥ ᤑᤳᤋᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥ ᤌᤠᤛᤢ ᤁᤧᤒᤡᤖᤥ॥” 6 ᤁᤖ ᤕᤜᤥᤛᤠᤐᤠᤋᤖᤧ ᤛᤣ᤺ᤴᤍᤥᤛᤢ. “ᤛᤢᤈᤠ ᤏᤠ᤺ᤰᤔᤠᤖᤧ ᤗᤠᤃᤡ ᤌᤣ ᤁᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤐᤠᤱᤒᤡ᥅” 7 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤕᤜᤥᤛᤠᤐᤠᤋᤧᤴ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤧᤴ ᤗᤠᤶᤒᤠ ᤛᤢᤈᤠ ᤏᤠ᤺ᤰᤔᤠᤖᤧ ᤗᤠᤃᤡ ᤀᤠᤸᤗᤛᤠᤱ ᤗᤳᤇᤠ ᤔᤏᤠᤃ ᤘᤠ᤹ᤀᤠ. ᤁᤖ ᤂᤧᤴ ᤔᤏᤠᤴ ᤀᤠᤱᤃᤠ᤹ ᤆᤡ᤺ᤳᤋᤢᤱ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤴ᤹॥ ᤂᤧᤸᤗᤧ ᤋᤠᤵᤑᤧ᤺ᤶᤒᤠᤖᤰ ᤐᤠ᤺ᤳᤋᤢ᤹॥ ᤂᤧᤱᤃ ᤕᤡᤶᤗᤠᤖᤧ ᤁᤢᤛ᤻ᤛᤠ ᤔᤡᤁᤠᤕᤠᤴᤗᤥ॥” ᤕᤜᤥᤛᤠᤐᤠᤋᤖᤧ ᤏᤢᤃᤵ ᤐᤡᤖᤢ. “ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ᥄” 8 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤌᤡᤰᤐᤠ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤕᤡᤶᤗᤠᤖᤧ ᤁᤢᤛ᤻ᤛᤠ ᤔᤡᤁᤠᤕᤠᤴ ᤂᤡᤔᤥ ᤋᤠᤖᤧ᤹॥” 9 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤏᤢ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤜᤠᤱᤈᤠᤱᤅᤥ ᤛᤠᤔᤖᤡᤕᤠᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤍᤃᤡ ᤆᤠᤎᤠᤶᤔᤠᤍᤧᤴ ᤏᤡ᤺ᤳᤋᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤠᤱᤕᤢᤰᤏᤠᤜᤠ᤹ᤀᤥ ᤕᤢᤅᤧᤃᤖᤧᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤋᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤃᤧ॥ 10 ᤁᤣᤏᤠᤏᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤸᤗᤧ ᤑᤧᤴᤈᤣ᤹ ᤋᤠᤱᤜᤠ᤹ ᤆᤥᤃᤢᤀᤠᤱ ᤕᤢᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢᤖᤥ—‘ᤀᤠᤍᤠᤱᤒᤠᤛᤡᤖᤧ ᤀᤖᤠᤔᤡᤜᤠ᤹ ᤜᤷᤃᤢᤵ ᤁᤧᤶᤔᤧᤱᤛᤢᤛᤡᤴᤗ ᤌᤠᤖᤡᤰ ᤂᤧᤱᤜᤠ᤹ ᤁᤴ ᤋᤠᤱᤜᤠ᤹ᤖᤧ ᤗᤶᤔᤠᤱ ᤗᤶ ᤁᤧᤗ᤺ᤶᤛᤢᤛᤡ᤹॥’” 11 ᤘᤣ᤹ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤶᤓᤠ ᤁᤶᤓᤗ᤹ᤖᤡᤰᤁᤣ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤃᤧ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤳᤋᤧ᤹ᤀᤠᤱ ᤏᤠ᤺ᤴᤍᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤖᤠᤔᤥᤋ-ᤃᤡᤗᤠᤍᤧᤴ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤛᤢ᤹॥” 12 ᤔᤡᤁᤠᤕᤠᤴ ᤁᤧᤀᤢ᤺ᤵᤐᤠ ᤁᤧᤍᤠ᤺ᤵᤐᤠ ᤀᤡᤱᤄᤱᤛᤠᤒᤧᤸᤗᤧ ᤂᤧᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤘᤣ᤹ᤜᤠ᤹ᤖᤧᤃ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤜᤠᤱᤅᤡᤸᤗᤧ ᤁᤢᤗᤡᤱᤍᤥ ᤁᤧᤵᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤒᤳ॥ ᤀᤠᤍᤠᤱᤒᤠᤖᤧ ᤁᤧᤒᤠ᤺ᤴᤏᤡᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴᤏᤢ ᤁᤧᤍᤱᤒᤠ ᤐᤥᤱᤗ. ᤏᤡᤱᤘᤠ᤹ ᤁᤧᤍᤠᤒᤠ ᤐᤠᤴ ᤐᤠ᤺ᤳᤋᤧ᤹॥” 13 ᤁᤖ ᤔᤡᤁᤠᤕᤠ᤺ᤸᤗᤧ ᤐᤠ᤺ᤳᤋᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤏᤢ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤆᤩᤠ ᤔᤧᤳᤋᤠ. ᤂᤧᤴᤗᤰ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹᥄” 14 ᤀᤠᤸᤗ ᤂᤢᤏᤧ᤹ ᤁᤧᤖᤧᤍᤩᤧ᤺ᤸᤗᤧ ᤀᤠᤜᤠᤒ ᤜᤠᤱᤅᤡᤸᤗᤧ ᤂᤧᤴ ᤛᤣ᤺ᤴᤍᤥᤛᤢ. “ᤔᤡᤁᤠᤕᤠᤀᤣ. ᤖᤠᤔᤥᤋ-ᤃᤡᤗᤠᤍᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡᤃᤣ ᤋᤧᤴᤎᤱ ᤆᤥ᤺ᤰᤛᤧ ᤐᤣᤃᤡᤃᤧᤀᤡ. ᤀᤡ ᤔᤧᤒᤣᤃᤡᤃᤧᤴᤏᤡ᥅” ᤔᤡᤁᤠᤕᤠ᤺ᤸᤗᤧ ᤔᤧᤳᤋᤢ. “ᤌᤱᤅᤥ ᤑᤳᤋᤧ᤹ᤀᤠᤱ ᤂᤧᤴ ᤏᤠ᤺ᤴᤍᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥ ᤌᤠᤖᤥ॥” 15 ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤁᤢᤈᤧᤰᤐᤠ ᤐᤠ᤺ᤴᤗᤰ ᤐᤠ᤺ᤳᤋᤧ᤹. ᤘᤣ᤹ ᤐᤠᤴ ᤔᤧᤒᤠ᤺ᤳᤋᤧᤴᤏᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤰᤂᤧᤴᤗᤧᤱ ᤂᤧᤏᤧ᤹ ᤔᤠᤱᤃᤧᤜᤧᤰᤛᤡᤱᤗ ᤕᤠ᤺ᤴᤏᤧᤒᤠᤒᤣ᥅” 16 ᤂᤧᤒᤩᤠᤱ ᤔᤡᤁᤠᤕᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ᤃ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤸᤗᤢᤰᤁᤶᤒᤠ ᤔᤣ᤺ᤴᤏᤣᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤁᤥ᤺ᤰᤔᤠᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤔᤧᤒᤥ᤺ᤰᤂᤧᤒᤠ ᤏᤡᤛᤢᤱᤛᤡᤱ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. ‘ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤢᤴᤍᤠᤱᤒᤠ ᤜᤥᤵ॥ ᤂᤧᤱᤜᤠ᤹ ᤁᤧᤖᤧᤰ ᤏᤢᤖᤡᤰᤁᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤜᤡᤶᤜᤡᤶ ᤔᤧᤒᤣ᤺ᤰᤗ॥’” 17 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤂᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤋᤠᤵᤑᤧ᤺ᤶᤒᤠᤖᤰ ᤐᤠ᤺ᤳᤋᤢ᤹ ᤏᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤴ ᤑᤠ᤹ᤀᤠᤱ ᤌᤣ ᤀᤠᤱᤃᤠ᤹ ᤀᤠᤍᤠᤱᤒᤠ ᤔᤧᤳᤏᤧᤀᤠᤱ ᤔᤧᤘᤕᤧᤏᤧᤶᤒᤡ᥅” 18 ᤔᤡᤁᤠᤕᤠ᤺ᤸᤗᤧ ᤀᤠᤸᤗᤛᤠᤱ ᤐᤠ᤺ᤳᤋᤢ. “ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧ᤹—ᤕᤜᤘᤣ ᤍᤠᤱᤒᤧᤴ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤂᤢᤏᤧ᤹ ᤁᤢᤈᤢᤰᤘᤠ ᤏᤢ ᤁᤢᤓᤧᤱᤘᤠ ᤗᤧᤵᤔᤠᤱ ᤔᤧᤕᤧᤒᤧᤀᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤀᤥ ᤕᤢᤅᤧᤒᤠ ᤀᤠᤱᤃᤠ᤹ ᤏᤡᤛᤢᤱ॥ 19 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. ‘ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤵᤔᤠᤀᤠᤱ ᤂᤧᤵᤔᤥ ᤛᤧᤵᤔᤠᤖᤧ ᤗᤠᤃᤡ ᤜᤠ᤺ᤳᤗᤧ ᤀᤠᤜᤠᤒᤧᤴ ᤜᤢᤛᤢᤒᤠᤒᤣ᥅’ “ᤌᤡᤰᤗᤧ ᤁᤶᤓᤍᤠᤱᤒᤠ ᤛᤢᤈᤠ ᤏᤢ ᤘᤣ᤹ᤀᤡᤸᤗᤧ ᤘᤣ᤹ ᤛᤢᤈᤠ ᤔᤧᤒᤡᤖᤢ॥ 20 ᤐᤡᤵᤔᤡᤖᤡ ᤁᤢᤛᤥ᤺ᤴᤍᤡᤀᤥ ᤗᤳᤇᤠ ᤕᤠᤶᤛᤠᤶᤎᤡᤰ ᤋᤃᤡ ᤑᤧᤖᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤂᤧᤴ ᤜᤢᤛᤢᤱ᤹॥’ “ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤍᤥᤛᤢ. ‘ᤀᤠᤰᤂᤩᤠᤱᤒᤣ᥅’ 21 “ᤂᤧᤸᤗᤧ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤂᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤕᤠᤶᤛᤠᤶᤎᤡᤰ ᤐᤥᤱᤅᤠ॥’ “ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. ‘ᤂᤧᤏᤧ᤹ ᤂᤧᤴ ᤜᤢᤔᤠᤖᤧ ᤗᤠᤃᤡ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥᤱ᤹॥ ᤐᤣᤃᤧ᤹ᤀᤠᤱ ᤜᤢᤛᤧ᤹॥’ 22 “ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤠᤖᤧ ᤁᤴ ᤁᤧᤖᤧᤰ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤕᤠᤶᤛᤠᤶᤔᤡᤴ ᤁᤣ᤺ᤳᤋᤢ ᤐᤡᤖᤢᤛᤡᤀᤠᤱ ᤕᤠᤰ॥ ᤀᤠᤍᤠᤱᤒᤠᤖᤧ ᤁᤧᤔᤧᤰᤔᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤛᤢᤖᤢᤀᤠᤱ ᤘᤠ᤹॥” 23 ᤂᤧᤒᤩᤠᤱ ᤁᤣᤏᤠᤏᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤴ ᤌᤠ᤺ᤱ ᤌᤠᤅᤧᤀᤠᤱ ᤔᤡᤁᤠᤕᤠ᤺ᤸᤗᤧ ᤁᤢᤏᤠᤖᤠᤀᤥ ᤌᤠᤵᤐᤪᤠ᤺ᤸᤗᤧ ᤗᤧᤱ ᤔᤧᤳᤋᤢ. ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤀᤠᤸᤗ ᤀᤠᤳᤋᤡᤗᤠᤶ ᤐᤥ᤺ᤰᤂᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤱᤃᤠ᤹ᤗᤠᤶ ᤂᤧᤏᤧ᤹ᤏᤢ ᤐᤠ᤺ᤵᤔᤠᤖᤧ ᤗᤠᤃᤡ ᤐᤣᤒᤣ᥅” 24 ᤔᤡᤁᤠᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ ᤀᤠᤵᤑᤣᤰ ᤕᤠᤰᤑᤠᤱᤅᤥ ᤛᤡᤃᤠᤱ ᤆᤡᤱᤛᤡᤱᤛᤧ ᤁᤧᤒᤣ᤺ᤰᤐᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥” 25 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤀᤡᤱᤈᤠᤱ ᤐᤡᤖᤢ. “ᤔᤡᤁᤠᤕᤠᤴ ᤋᤧᤶᤛᤧ᤹ᤀᤠᤱ ᤕᤧᤰᤕᤰᤁᤥᤒᤠ ᤕᤢᤰᤛᤠᤒᤠ ᤀᤠᤔᤥᤏ ᤏᤢ ᤜᤠᤱᤛᤠ ᤕᤥᤀᤠᤛᤖᤧ ᤂᤢᤴᤇᤡ᤹ ᤗᤰᤐᤧᤴᤏᤥ ᤜᤢᤰᤛᤢᤵᤋᤧᤛᤧ᤹. ᤂᤶᤓᤩᤠᤱ ᤔᤧᤳᤋᤧᤛᤧ᤹. 26 ‘ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤔᤏᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤶᤔᤧ᤹. ᤜᤧᤰᤁᤩᤠᤱ ᤏᤢᤖᤡᤰ ᤋᤠᤖᤡᤰᤁᤠᤱ ᤀᤠᤱᤃᤠ᤹ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤂᤢᤏᤧ᤹ ᤂᤖᤧ᤺ᤱ ᤏᤢ ᤆᤫᤠ᤺ᤳᤗᤰ ᤐᤡᤖᤧᤶᤔᤧ᤹ ᤘᤣ᤹ ᤌᤣᤀᤠᤱ ᤔᤧᤒᤡᤖᤧᤶᤔᤡᤴᤏᤧ᤹॥’” 27 ᤔᤡᤁᤠᤕᤠ᤺ᤸᤗᤧ ᤀᤢᤘᤠ ᤆᤥᤃᤢᤀᤠᤱ ᤐᤠ᤺ᤳᤋᤢ. “ᤀᤠᤍᤠᤱᤒᤠ ᤏᤢᤖᤡᤰ ᤋᤠᤖᤡᤰᤁᤠᤱ ᤁᤧᤏᤢ᤺ᤱ ᤁᤧᤍᤠᤏᤧᤓᤃᤪ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ᤏᤢ ᤐᤠᤖᤧᤒᤠ ᤔᤧ᤺ᤴᤗᤳᤇ॥” ᤂᤢᤏᤧ᤹ ᤀᤠᤸᤗᤛᤠᤱ ᤕᤥ᤹ᤖᤢᤀᤠᤱ ᤐᤠ᤺ᤳᤋᤢ. “ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ᥄” ᤀᤠᤜᤠᤒᤧᤴ ᤖᤠᤔᤥᤋ-ᤃᤡᤗᤠᤍᤀᤥ ᤔᤧᤛᤩᤧᤖᤢ 28 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤧᤴ ᤏᤢ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤖᤠᤔᤥᤋ-ᤃᤡᤗᤠᤍᤀᤥ ᤌᤥ᤺ᤰᤏᤧᤛᤡ ᤐᤣᤛᤡ॥ 29 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤁᤢᤛᤣ᤺ᤴ ᤔᤧᤴᤏᤡ᤺ᤔᤏᤠᤒᤠ ᤆᤠᤱ ᤆᤠᤰᤂᤢᤱᤅᤠᤱ ᤌᤱᤅᤥ ᤐᤣ᤺ᤰᤁᤠ. ᤁᤖ ᤀᤠᤍᤠᤱᤒᤠᤖᤧ ᤁᤧᤜᤠᤱᤈᤠᤱᤅᤡᤴᤏᤣ ᤆᤠᤰᤂᤧ᤹॥” ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤁᤢᤛᤣ᤺ᤴ ᤔᤧᤴᤏᤡ᤺ᤔᤏᤠᤒᤠ ᤆᤠᤱ ᤆᤠᤰᤂᤢᤀᤠᤱ ᤌᤱᤅᤥ ᤐᤣ॥ 30 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴᤏᤢ᤺ᤸᤗᤧ ᤘᤣ᤹ ᤆᤢᤰᤛᤠ ᤀᤡᤃᤪ ᤕᤶᤒᤠᤏᤢ ᤌᤱ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤀᤠᤖᤠᤔᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤀᤴᤗᤠᤜᤠ᤹ᤀᤥᤒᤠ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤌᤰᤔᤥᤒᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧ॥ 31 ᤀᤠᤸᤗ ᤀᤴᤗᤠᤎᤠᤜᤠ᤹ᤀᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤕᤜᤥᤛᤠᤐᤠᤋᤧᤴ ᤔᤧᤏᤡᤛᤢᤸᤗᤧ ᤂᤧᤱᤜᤠ᤹ᤖᤧ “ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤒᤠ ᤜᤠᤱ” ᤔᤧᤗᤣ᤺ᤳᤋᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤓᤳᤇᤧ ᤜᤡᤸᤗᤡᤰ ᤔᤧᤜᤡᤛᤡᤱ. ᤁᤖ ᤕᤜᤥᤛᤠᤐᤠᤋᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤑᤠ᤹ᤖᤢ. ᤂᤶᤓᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤀᤴᤗᤠᤎᤠᤜᤠ᤹ᤀᤥᤒᤠ ᤌᤰᤔᤥᤒᤠᤜᤠ᤹ ᤂᤢᤏᤧ᤹ᤗᤠᤶ ᤌᤡᤰᤏᤠᤜᤠᤱ ᤜᤡᤛᤢᤍᤣᤛᤢᤛᤡ॥ 32 ᤌᤣᤀᤠᤱᤓᤧᤸᤗᤧ ᤌᤰᤔᤥᤒᤠᤜᤠ᤹ᤖᤧ ᤂᤢᤏᤧ᤹ᤃ ᤀᤡᤛᤪᤠᤀᤡᤗᤒᤠ ᤜᤠᤱ ᤔᤧ᤺ᤴᤗᤳᤇ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤑᤵᤔᤠ ᤔᤧᤏᤠ᤹ᤖᤢ॥ 33 ᤁᤖ ᤁᤢᤓᤠ ᤌᤡᤰᤗᤧ ᤁᤢᤗᤡᤴ ᤗᤧ᤹ᤖᤢᤀᤠᤱ ᤁᤢᤍᤥ᤺ᤱᤅᤡᤴ ᤀᤡᤔᤧᤴᤏᤡ ᤂᤠᤔᤧᤴᤏᤡ ᤀᤠᤒᤢᤍᤣᤛᤢ. ᤜᤧᤰᤁᤩᤠᤱ ᤂᤧᤴ ᤋᤥ᤺ᤱᤅᤡᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤁᤢᤛᤠ᤺ᤱᤒᤣ ᤛᤣ᤺ᤵᤆᤠᤱᤅᤡᤸᤗᤧ ᤁᤢᤍᤢᤶᤒᤣᤀᤥ ᤕᤠᤱᤄᤢ॥ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤀᤴᤗᤠᤎᤠ ᤁᤧᤗᤥᤱᤒᤧᤴ ᤔᤧᤳᤋᤢ. “ᤀᤴᤗᤠᤎᤠᤴ ᤜᤡᤛᤧ᤹ᤀᤠᤱ ᤀᤠᤱᤃᤠ᤹ ᤋᤧᤴᤎᤱ ᤁᤧᤒᤥᤱᤒᤠᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤠᤱᤅᤧ᤹॥ ᤀᤠᤱᤃᤠ᤹ ᤁᤠ᤺ᤴᤍᤠᤱᤅᤠᤱ ᤘᤠ᤹॥” 34 ᤏᤠᤶᤎᤠᤎᤠᤀᤣ ᤋᤧᤴᤎᤱ ᤐᤥ᤺ᤰᤂᤧᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤜᤠᤱᤅᤡᤴ ᤁᤢᤀᤴᤗᤠᤎᤠᤀᤥ ᤂᤧ᤺ᤶᤛᤡᤱᤅᤠᤱ ᤀᤖᤠᤔᤡᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤐᤳᤇᤧ॥ ᤂᤢᤏᤧ᤹ ᤕᤢ᤺ᤴᤇᤡᤰ ᤀᤠᤶᤓᤠ ᤜᤧᤰᤁᤣᤗ᤹ᤖᤡᤰᤁᤣ ᤐᤳᤇᤧ. ᤂᤧᤒᤩᤠᤱ ᤏᤠᤶᤎᤩᤧ᤺ᤸᤗᤧ ᤂᤢᤏᤧ᤹ ᤛᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.