᥈ ᤛᤠᤵᤔᤢ᤺ᤴᤎᤢᤶ 17 - LIFOTNT

ᤕᤜᤥᤛᤠᤐᤠᤋᤧᤴ ᤜᤠᤱ ᤐᤥᤱ᤹

¹ ᤀᤠᤛᤠ᤺ᤸᤗᤧ ᤁᤢᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ॥ ᤂᤢᤏᤧ᤹ ᤀᤡᤛᤪᤠᤀᤡᤗᤗᤠᤶ ᤌᤣ᤺ᤰᤛᤡᤱᤔᤠᤖᤧ ᤗᤠᤃᤡ ᤁᤧᤎᤢᤶᤒᤠ ᤆᤥ᤺ᤰᤛᤡᤱ॥

² ᤂᤢᤏᤧ᤹ ᤕᤜᤢᤍᤠᤒᤠ ᤜᤠᤱᤕᤰ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤌᤰᤛᤢᤒᤠ ᤏᤧᤛ᤻ᤛᤢᤛᤡ॥ ᤜᤧᤰᤁᤩᤠᤱ ᤕᤜᤢᤍᤠ ᤁᤧᤖᤧᤰ ᤏᤢ ᤂᤢᤏᤧ᤹ ᤁᤢᤶᤒᤠ ᤀᤠᤛᤠ᤺ᤸᤗᤧ ᤜᤢᤰᤁᤠᤵ ᤆᤥᤃᤢᤒᤠ ᤀᤣᤑᤪᤠᤀᤡᤔᤒᤠ ᤕᤧᤰᤕᤰᤜᤠ᤹ᤀᤥ ᤁᤶᤒᤪᤠᤱᤗᤧ ᤗᤠᤃᤡ ᤌᤰᤛᤢᤒᤠᤜᤠ᤹ ᤏᤧᤛ᤻ᤛᤢᤛᤡ॥

³ ᤕᤜᤘᤣ ᤍᤠᤱᤒᤧᤴ ᤕᤜᤥᤛᤠᤐᤠᤋᤧᤴᤏᤢ ᤘᤕᤧ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤶᤒᤠᤖᤧ ᤀᤥ᤺ᤴᤎᤠᤰᤋᤢᤒᤠ ᤁᤢᤜᤣ᤺ᤰᤛᤡᤱᤔᤥᤒᤠ ᤁᤢᤒᤡᤜᤠ᤹ ᤁᤢᤀᤡᤛᤡᤰ ᤗᤠᤱᤄᤣᤃᤧ॥ ᤂᤢᤏᤧ᤹ ᤒᤠᤗ ᤔᤠᤱᤜᤠ᤹ ᤔᤧᤏᤠ᤺ᤳᤋᤢᤛᤡᤴ ᤔᤧᤍᤡᤶᤍᤢᤛᤡᤴ.

⁴ ᤁᤖ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤥ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤈᤠ᤺ᤱᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢ॥ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤕᤧᤵᤗᤧᤰᤜᤠ᤹ᤀᤥ ᤔᤧᤘᤏᤧᤴ॥

⁵ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤢᤕᤢᤰᤁᤥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤁᤧᤖᤧᤰᤗᤧ ᤂᤢᤏᤧ᤹ᤀᤥ ᤜᤢᤰᤘᤠᤜᤠ᤹ ᤔᤧᤍᤥᤴᤍᤢ॥ ᤂᤢᤏᤧ᤹ ᤛᤠ᤹ᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤁᤧᤀᤡᤱᤒᤠ ᤐᤥ᤺ᤰᤂᤧ॥

⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤥ ᤗᤠᤱᤄᤣ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢ॥ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤢᤏᤧ᤹ ᤕᤜᤢᤍᤠᤒᤠ ᤔᤠᤱᤎᤠ᤺ᤴᤜᤠ᤹ ᤏᤢ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤏᤠᤘᤠᤀᤡᤳᤗᤠᤜᤠ᤹ ᤂᤧᤳᤋᤢᤍᤣᤛᤢ॥

⁷ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤏᤡᤛᤠᤶ ᤜᤢ᤹ᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠ ᤒᤣᤏ-ᤜᤣᤗ. ᤀᤥᤒᤍᤡᤕᤠ. ᤈᤁᤖᤡᤕᤠ. ᤏᤋᤏᤣᤗ ᤏᤢ ᤔᤡᤁᤠᤕᤠᤴ ᤐᤠᤱᤄᤢᤍᤣᤛᤢᤛᤡ॥

⁸ ᤂᤧᤱᤜᤠ᤹ᤏᤢ ᤛᤥᤛᤥᤖᤡᤰ ᤁᤧᤘᤠ᤹ᤒᤠ ᤑᤠᤱᤛᤡ ᤗᤧᤒᤡᤜᤠ᤹—ᤛᤔᤠᤕᤠᤜ. ᤏᤋᤏᤩᤠᤜ. ᤈᤒᤍᤡᤕᤠᤜ. ᤀᤛᤠᤜᤣᤗ. ᤛᤔᤡᤖᤠᤔᤥᤋ. ᤕᤜᤥᤏᤠᤋᤠᤏ. ᤀᤍᤥᤏᤡᤕᤠᤜ. ᤋᤥᤒᤡᤕᤠᤜ ᤏᤢ ᤋᤥᤒ-ᤀᤍᤥᤏᤡᤕᤠᤜ ᤔᤧᤘᤕᤧ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤡᤛᤠᤔᤠ ᤏᤢ ᤕᤜᤥᤖᤠᤔ ᤘᤕᤧᤛᤡ॥

⁹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤔᤧᤕᤠᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤕᤜᤢᤍᤠᤒᤠ ᤁᤧᤖᤧᤰ ᤐᤡᤛᤠᤱ ᤔᤧᤜᤢ᤹ᤖᤢᤛᤡ॥ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖ ᤂᤧᤱᤜᤠ᤹ ᤕᤜᤢᤍᤠᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤔᤧᤒᤣᤖᤥ॥

ᤕᤜᤥᤛᤠᤐᤠᤋᤖᤧ ᤐᤕᤶ ᤕᤶᤒᤠ ᤁᤢᤕᤠ᤺ᤶᤒᤰ

¹⁰ ᤕᤜᤢᤍᤠ ᤁᤒᤪᤡᤱ ᤐᤡᤛᤠᤱ ᤁᤧᤏᤧᤒᤠ ᤜᤠᤱᤈᤢᤶᤜᤠ᤹ ᤕᤜᤘᤣ ᤍᤠᤱᤒᤧᤴᤏᤢ ᤔᤧᤃᤡᤛᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤥᤛᤠᤐᤠᤋᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤔᤧᤴᤈᤥᤃᤧᤴ॥

¹¹ ᤁᤢᤓᤠ ᤐᤗᤡᤛ᤻ᤋᤡᤜᤠ᤹ᤖᤧᤃ ᤕᤜᤥᤛᤠᤐᤠᤋᤖᤧᤀᤥ ᤔᤡᤰᤋᤥ᤺ᤰᤜᤠ᤹ ᤏᤢ ᤕᤢᤵᤐᤠ ᤌᤥ᤺ᤰᤗᤠ ᤔᤧᤎᤠᤰᤋᤢ॥ ᤀᤖᤒᤡᤜᤠ᤹ᤖᤧᤀᤠᤱ ᥍.᥍᥆᥆ ᤌᤢ᤺ᤶᤒᤠᤜᤠ᤹ ᤏᤢ ᥍.᥍᥆᥆ ᤔᤧ᤺ᤴᤍᤒ᤺ᤰᤁᤠᤜᤠ᤹ ᤔᤧᤎᤠᤰᤋᤢᤛᤡ॥

¹² ᤕᤜᤥᤛᤠᤐᤠᤋᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤕᤜᤢᤍᤠᤀᤥ ᤕᤰᤜᤠ᤹ ᤏᤢ ᤌᤠ᤺ᤱ ᤕᤢᤱᤔᤠ ᤕᤧᤰᤕᤰᤜᤠ᤹ ᤆᤥᤃᤢᤛᤡ॥

¹³ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤂᤢᤏᤧ᤹ ᤘᤧᤳᤋᤧᤛᤖᤧ ᤆᤠᤔᤠ ᤁᤧᤕᤥᤒᤠ ᤁᤢᤈᤠᤜᤠ᤹ ᤑᤢᤰᤂᤢᤕᤢᤰᤂᤢ॥ ᤕᤖᤢᤛᤗᤧ᤺ᤶᤔᤥ ᤆᤠ᤹ᤖᤡᤰ ᤛᤎᤠᤛᤡᤱᤔᤠ ᤁᤧᤄᤥᤒᤠ ᤂᤢᤏᤧ᤹ ᤁᤢᤎᤰᤗᤧᤱᤜᤠ᤹ ᤔᤧᤘᤕᤧ॥

¹⁴ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱ ᤁᤢᤀᤡᤛᤡᤰ ᤁᤶᤓᤗ᤹ᤖᤡᤰ ᤌᤰᤛᤢᤒᤠ ᤕᤠ᤺ᤶᤒᤰᤁᤥ ᤔᤧᤎᤧᤰᤋᤢᤛᤡᤀᤠᤱ ᤔᤧᤘᤕᤧᤖᤥ— ᤕᤜᤢᤍᤠᤗᤠᤶ. ᥇.᥆᥆᥆ ᤗᤢᤵᤐᤥᤒᤠ ᤌᤰᤔᤥᤒᤠᤜᤠ᤹— ᤌᤰᤔᤥᤒᤠ ᤀᤍᤏᤠᤜ ᤏᤢ ᤛᤥᤖᤡᤰ ᥉.᥆᥆.᥆᥆᥆ ᤌᤰᤛᤢᤒᤠᤜᤠ᤹॥

¹⁵ ᤂᤢᤏᤧ᤹ ᤁᤢᤀᤣᤃᤠᤱ ᤌᤰᤔᤥᤒᤠ ᤕᤣᤜᤥᤜᤠᤏᤠᤏ ᤏᤢ ᤛᤥᤖᤡᤰ ᥈.᥎᥆.᥆᥆᥆ ᤌᤰᤛᤢᤒᤠᤜᤠ᤹ ᤔᤧᤘᤕᤧ॥

¹⁶ ᤂᤢᤏᤧ᤹ ᤁᤢᤀᤣᤃᤠᤱ ᤈᤡᤁᤪᤡᤖᤧ ᤁᤢᤛ᤻ᤛᤠ ᤀᤔᤛᤡᤕᤠ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤀᤠᤵᤑᤣᤰ ᤏᤡᤱᤘᤠ᤹ᤗᤠᤶ ᤕᤠ᤺ᤶᤒᤰ ᤔᤧᤈᤥᤃᤧ॥ ᤂᤢᤏᤧ᤹ᤏᤢ ᤛᤥᤖᤡᤰ ᥈.᥆᥆.᥆᥆᥆ ᤌᤰᤛᤢᤒᤠ ᤔᤧᤘᤕᤧ॥

¹⁷ ᤒᤣᤏᤩᤠᤔᤡᤏᤗᤠᤶ— ᤗᤳᤇᤠ ᤔᤢᤰᤁᤧᤃᤢᤒᤠ ᤌᤰᤗᤧᤱ ᤀᤣᤗᤩᤠᤍᤠ ᤏᤢ ᤂᤢᤏᤧ᤹ᤏᤢ ᤛᤥᤖᤡᤰ ᤗᤡᤜᤠ᤹ ᤏᤢ ᤂᤥᤜᤠ᤹ᤖᤧ ᤁᤠᤵᤋᤢᤛᤡᤒᤠ ᥈.᥆᥆.᥆᥆᥆ ᤌᤰᤛᤢᤒᤠ ᤔᤧᤘᤕᤧ॥

¹⁸ ᤂᤢᤏᤧ᤹ ᤀᤣᤃᤠᤱ ᤕᤜᤥᤈᤠᤒᤠᤍ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤖᤧ ᤁᤠᤵᤋᤢᤛᤡᤒᤠ ᥇.᥎᥆.᥆᥆᥆ ᤌᤰᤛᤢᤒᤠ ᤔᤧᤘᤕᤧ॥

¹⁹ ᤕᤜᤢᤍᤠᤀᤥᤒᤠ ᤕᤰ ᤁᤧᤏᤧᤒᤠ ᤕᤧᤰᤕᤰᤜᤠ᤹ᤀᤥ ᤜᤠᤱᤅᤡᤸᤗᤧ ᤏᤧᤛ᤻ᤛᤢᤛᤡᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤁᤴ ᤔᤏᤠᤜᤠ᤹ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤔᤥ ᤔᤧᤗᤠᤛᤧᤀᤠᤱ ᤔᤧᤘᤕᤧᤖᤥ॥