᥇ ᤌᤡᤛ᤻ᤛᤗᤥᤏᤡᤁᤡ 2 - LIFOTNT

ᤌᤡᤛ᤻ᤛᤗᤥᤏᤡᤁᤠᤀᤥ ᤐᤠᤘᤗᤖᤧ ᤁᤢᤔᤠᤱᤛᤣᤘᤠ

¹ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧᤃ ᤂᤡᤏᤡ᤹ᤀᤥ ᤋᤠ᤺ᤔᤏᤠᤒᤠᤴ ᤜᤏᤧ ᤔᤧᤒᤥ᤺ᤰᤂᤧᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥

² ᤁᤖ ᤂᤡᤏᤡ᤹ᤀᤥ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤑᤡᤗᤡᤵᤐᤡ ᤕᤧᤰᤕᤰᤁᤥ ᤀᤠᤏᤡᤃᤣ ᤏᤠᤔᤧᤎᤠ᤺ᤛᤢ ᤔᤧᤒᤡᤖᤡᤃᤧᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤡᤃᤧᤒᤠᤱᤃ ᤂᤡᤏᤡ᤹ ᤁᤧᤏᤡᤛᤢᤶ ᤁᤧᤗᤧᤛ᤻ᤛᤢᤶᤔᤠᤱᤅᤣ ᤁᤧᤘᤕᤡ᤹ᤖᤥ॥ ᤔᤏᤠᤜᤠ᤹ᤖᤧ ᤀᤠᤏᤡᤃᤣ ᤛᤠ᤹ᤖᤡᤰ ᤔᤧᤀᤳᤋᤡᤃᤧᤛᤠᤱ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤡᤃᤧᤖᤥ॥

³ ᤀᤠᤏᤡᤃᤣ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤴ ᤋᤠᤵᤑᤧ᤺ᤶᤒᤠ ᤀᤡᤃᤪ ᤆᤡ᤺ᤴᤈᤡ᤺ᤶᤒᤠ ᤏᤡᤱᤘᤠ᤹ᤗᤠᤶ ᤋᤩᤧᤒᤠ ᤔᤣ᤺ᤴᤗᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤀᤠᤳᤋᤡᤴᤏᤠᤱ ᤀᤡᤱᤗᤧᤰ ᤔᤧᤵᤔᤠ ᤔᤧᤃᤥ᤺ᤳᤋᤢᤶᤒᤧᤴᤗᤥ॥

⁴ ᤂᤧᤸᤗᤧ ᤁᤢᤗᤧᤰᤘᤠ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤕᤠᤵᤔᤡ ᤛᤢᤶᤒᤥᤎᤠᤛᤠᤒᤠ ᤀᤡᤋᤡᤃᤧᤀᤠᤱ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤗᤰᤐᤧᤴ ᤐᤡᤖᤡᤃᤧᤀᤠᤱ ᤘᤠ᤹ᤒᤠᤸᤗᤧ ᤀᤠᤵᤑᤠᤸᤗᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣᤖᤰ ᤐᤠᤖᤡᤃᤧ᤹ᤖᤥ॥ ᤀᤠᤏᤡᤃᤧᤃ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤶᤒᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤕᤠ᤺ᤶᤒᤰ ᤆᤥᤃᤢᤶᤒᤧ᤹ᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤛᤡᤰᤗᤢᤱᤔᤠᤴ ᤛᤠ᤹ᤖᤢᤖᤥ॥

⁵ ᤀᤠᤏᤡᤃᤣ ᤂᤡᤏᤡ᤹ᤀᤥ ᤋᤩᤧ᤹ᤀᤡᤃᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤏᤠ ᤁᤧᤗᤧᤶᤒᤠ ᤐᤠᤴ ᤔᤧᤒᤠ᤺ᤳᤋᤢᤶᤒᤧᤴ ᤗ᤹ᤖᤡᤰ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤱᤅᤡᤴ ᤀᤠᤏᤡᤃᤣ ᤜᤢᤰᤁᤥ ᤌᤠᤔᤠ ᤐᤠ᤺ᤴᤜᤠ᤹ᤀᤠᤱ ᤔᤧᤒᤠ᤺ᤳᤋᤢᤶᤒᤧᤴ॥ ᤂᤧᤴ ᤐᤠ᤺ᤴᤜᤠ᤹ᤖᤧᤴ ᤋᤥ᤺ᤴᤍᤡᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤘᤠ᤹ᤖᤥ॥

⁶ ᤀᤠᤳᤋᤡᤴ ᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶᤒᤠ ᤀᤠᤏᤡᤃᤣ ᤔᤡᤱᤛᤥᤎᤠ᤺ᤱᤛᤥ ᤁᤧᤈᤥᤃᤢᤶᤏᤡ. ᤏᤠᤖᤠ ᤁᤧᤓᤥᤛᤢᤶᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤶᤒᤧᤴ. ᤜᤧᤰᤁᤩᤠᤱ ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤡᤃᤧᤛᤠᤱ ᤂᤡᤏᤡ᤹ ᤕᤖᤡᤰ ᤐᤠ᤺ᤴᤜᤠ᤹ ᤔᤧᤏᤠ᤺ᤰᤁᤠᤛᤡᤃᤧᤴᤗᤥ॥

⁷ ᤁᤖ ᤂᤡᤏᤡ᤹ ᤗᤢᤶᤔᤥ ᤀᤅᤧ᤺ᤰᤘᤠᤴ ᤁᤢᤶᤔᤠᤖᤧ ᤁᤶᤒᤪᤠᤱ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤏ᤺ᤶᤏ᤺ᤶᤔᤠᤱ ᤁᤶᤒᤪᤠᤱ ᤔᤧᤳᤋᤠᤛᤡᤃᤧᤀᤠᤱ ᤘᤠ᤹ᤖᤥ॥

⁸ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤥᤖᤰ ᤔᤣ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤌᤣᤛᤠᤱ ᤆᤥ᤺ᤰᤔᤠ ᤕᤠᤖᤡᤵ ᤘᤕᤡᤃᤧ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤛᤠ᤹ᤖᤡᤰ ᤀᤠᤏᤡᤃᤣ ᤗᤢᤱᤔᤠ᤹ ᤋᤢᤰᤁᤠᤛᤡᤃᤧᤖᤥ॥

⁹ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤣ ᤋᤢᤰᤂᤣᤴ ᤏᤢ ᤕᤠᤶᤒᤢᤎᤡᤰᤁᤡᤴ ᤛᤧᤰᤂᤠᤀᤣ ᤂᤡᤏᤡ᤹ ᤏᤡᤱᤘᤠ᤹ᤛᤥᤀᤥ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤀᤥ ᤀᤡᤱᤓᤴ ᤆᤥᤃᤢᤶᤒᤧᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤴᤈᤩᤧ᤹ᤀᤡᤴᤗ ᤑᤠ᤹ᤀᤠᤱ ᤀᤠᤏᤡᤃᤣ ᤛᤧᤴᤍᤡᤰ ᤗᤧᤴᤍᤡᤰ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ॥

¹⁰ ᤀᤠᤏᤡᤃᤧᤃ ᤂᤡᤏᤡ᤹ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤏᤢ ᤀᤠᤰᤂᤧᤴ ᤛᤣᤛᤣ. ᤛᤠᤶᤕᤥᤒᤠ ᤏᤢ ᤑᤥᤋᤩᤠ ᤔᤣ᤺ᤴᤏᤣᤒᤠ ᤕᤧᤵᤗᤧᤰᤁᤥ ᤘᤕᤡᤃᤧ ᤗ᤹ᤖᤡᤰ ᤁᤧᤏᤡᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤂᤡᤏᤡ᤹ ᤁᤧᤘᤕᤡ᤹ᤖᤥ॥

¹¹ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤠᤒᤢᤍᤡᤱ ᤁᤢᤛ᤻ᤛᤠᤴ ᤁᤶᤒᤪᤠᤱ ᤔᤧᤳᤋᤢ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤁᤠᤰ ᤁᤶᤒᤪᤠᤱ ᤔᤧᤳᤋᤠᤛᤡᤃᤧᤒᤠᤴ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

¹² ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤜᤡᤱᤔᤴᤏᤥ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤀᤠ᤺ᤴᤇᤡᤱᤔᤠ ᤐᤡᤀᤠᤛᤡᤃᤧ ᤜᤠᤱᤜᤠᤱ ᤔᤧᤳᤋᤠᤛᤡᤃᤧᤖ ᤆᤰᤔᤧᤸᤗ᤹ᤀᤣ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤂᤢᤏᤧ᤹ᤀᤣ ᤀᤠᤒᤠᤅᤣ ᤔᤡᤔᤡᤍᤡᤱᤃᤧᤴ ᤁᤢᤜᤠᤱᤈᤢᤶᤔᤥ ᤗᤰ ᤂᤥᤛᤧ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥

¹³ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤏᤥᤃᤧᤴ ᤐᤡᤖᤢᤶᤒᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤀᤥ ᤋᤠᤖᤢᤶᤒᤧᤸᤗᤧ ᤂᤧᤱᤃ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤐᤠ᤺ᤴᤈᤠᤴ ᤜᤧᤰᤁᤣ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤋᤧᤴᤍᤡᤱ ᤁᤧᤈᤥᤃᤢᤶ॥ ᤀᤠᤸᤗ ᤂᤡᤏᤡ᤹ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤴᤏᤡᤴ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤰᤗᤥ॥

¹⁴ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤕᤜᤢᤍᤡᤕᤠ ᤌᤢᤶᤔᤥ ᤂᤪᤡᤛ᤻ᤋ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤱ ᤁᤧᤀᤡ᤺ᤳᤋᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤧᤱᤜᤠ᤹ ᤏᤡᤱᤄᤢᤶ ᤔᤧᤔᤧᤳᤋᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤀᤠᤒᤠᤅᤣ ᤗᤠᤈᤣ᤹ᤛᤠᤒᤠᤜᤠ᤹ᤖᤧ ᤋᤢᤰᤂᤣ ᤁᤧᤶᤈᤠ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥

¹⁵ ᤕᤜᤢᤍᤡᤜᤠ᤹ᤖᤧᤃ ᤀᤢᤏᤠᤜᤢᤖᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ᤺ᤴᤏᤠᤱ ᤔᤧᤛᤧᤖᤢᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧᤀᤠᤱ ᤏᤡᤱᤄᤢᤶ ᤔᤧᤔᤧᤳᤋᤡᤃᤧᤀᤠᤱ ᤔᤧᤏᤠ᤺ᤳᤋᤡᤃᤧ ᤔᤧᤗ᤺ᤳᤋᤡᤃᤧᤖᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤴᤍᤠ᤺ᤛᤢᤴ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤀᤳᤋᤢᤛᤡᤖᤥ॥

¹⁶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛᤧᤴᤗᤵ ᤔᤧᤱᤄᤥᤛᤢᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤔᤠ ᤀᤠᤏᤡᤃᤣ ᤕᤠᤵᤔᤡ ᤛᤠᤰᤔᤠ ᤋᤶᤛᤡᤱ ᤔᤧᤈᤥᤃᤢᤖ ᤔᤧᤘᤠ᤹ᤖᤥ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤗᤢᤶᤛᤡᤱᤗ ᤐᤳᤗᤥ॥ ᤁᤖ ᤀᤠᤸᤗᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤧᤴ ᤂᤧᤱᤜᤠ᤹ᤀᤥ ᤆᤢᤰᤋᤧᤀᤠᤱ ᤘᤠ᤹ᤖᤥ॥

ᤌᤡᤛ᤻ᤛᤗᤥᤏᤡᤁᤡᤜᤠ᤹ ᤕᤠᤶᤔᤥ ᤋᤢᤶᤔᤠᤛᤡ ᤐᤠᤘᤗᤖᤧ ᤁᤢᤏᤡᤱᤘᤠ᤹

¹⁷ ᤀᤠᤸᤗ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧᤃ ᤛᤵᤑᤠᤖᤰ ᤂᤡᤏᤡ᤹ᤏᤢ ᤛᤧᤴᤍᤡᤃᤧᤀᤠᤱ ᤘᤕᤡᤃᤧᤛᤠᤱ ᤏᤡᤱᤘᤠ᤹ᤀᤥᤃ ᤔᤣ᤺ᤴᤗᤥ॥ ᤂᤡᤏᤡ᤹ᤏᤢ ᤋᤢᤶᤔᤠ ᤕᤶᤒᤠ ᤏᤡᤱᤘᤠ᤹ ᤘᤠ᤹ᤒᤠᤸᤗᤧ ᤂᤡᤏᤡ᤹ᤀᤥ ᤏᤢ᤺ᤱᤔᤠ ᤋᤠᤔᤠ ᤛᤠ᤹ᤖᤡᤰ ᤋᤶᤛᤡᤱ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥

¹⁸ ᤀᤠᤏᤡᤃᤣ ᤂᤡᤏᤡ᤹ᤀᤥ ᤋᤠᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤠᤘᤗ ᤀᤠᤒᤠᤅᤣᤀᤠᤱ ᤀᤧᤳᤗᤧᤱ ᤋᤠᤔᤠ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤏᤡᤃᤣ ᤗᤠᤶ ᤛᤠᤰᤋᤡᤃᤧᤖᤥ॥

¹⁹ ᤀᤠᤸᤗ ᤂᤡᤏᤡ᤹ᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤴ ᤏᤢ᤺ᤱ ᤕᤢ᤺ᤸᤗᤧ ᤂᤢᤏᤧ᤹ ᤁᤢᤍᤃᤡ ᤀᤠᤏᤡᤃᤣ ᤏᤡᤱᤛᤠᤱ ᤏᤢ ᤛ᤺ᤵᤔᤠᤴ ᤂᤡᤏᤡ᤹ᤏᤡᤱᤗᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤛᤡᤰ ᤛᤶᤃᤧᤴ ᤋᤡᤆ᤺ ᤁᤢᤀᤡᤛᤡᤰ ᤜᤠᤱᤜᤠᤱᤃᤧᤴ ᤌᤢᤶᤄᤥᤴ ᤂᤡᤏᤡ᤹ ᤔᤧ᤺ᤴᤏᤡᤱᤒᤡ᥅

²⁰ ᤛᤧᤰᤂᤠᤛᤠᤱ ᤀᤠᤏᤡᤃᤣ ᤛ᤺ᤵᤔᤠ ᤏᤢ ᤏᤧᤒᤥ ᤁᤧᤓᤶᤒᤠᤃ ᤂᤡᤏᤡ᤹ᤏᤡᤱᤅᤣᤖᤥ॥