निसुम्
सेःक्युक्मिबा पावलरे़ कन् सक्इङ्घङ्ङिन् फिलिप्पि ये़क्यक्कोबा सेसेहुप्लक्को के़वाॽबा नसानिबाहाॽ हाक्तुसिबारो॥ फिलिप्पिःन् मे़सेदोनिया मे़प्मनाबा रोमि खाम्घुसमा थिक् ये़क्यक् वये़॥ आइन् ताःन्दिक् खे़न् युरोप पयम् लाजेॽओ ने़रो॥ थिक् ये़म्मो पावलरे़ फिलिप्पिओ पेआङ् सुनाइङ् इङ्भोसु, हे़क्क्याङ् खे़प्मो सेसेहुप्लक् हेःक्तु (सेःक्युक्मिबा १६:११-४०)॥ कन् सक्इङ्घङ्ङिन् साप्ते़ल्ले़ पावले़न् पुङ्लाहिम्मो साक्ते़आङ् यागे़॥ खे़न् ये़म्मो फिलिप्पि सेसेहुप्लक्को इङ्ले़क्पा निसाम्मिन् इङ्भोसे़र वये़बाल्ले़ चोगुल्ले़ खुने़ॽ कुसक्मा पुॽरे़आङ् वये़॥ कर कन् सक्इङ्घङ्ङो पावलरे़ चोगुबा नसाःन्निल्ले़ फिलिप्पिओबा नसानिबाहाॽओ सःप्मान् नु हाङ्हाङ् लॽमान् तारु पिरुसिरो॥
कन् सक्इङ्घङ्ङिन् साप्माए के़बोङ्बा पान् थे वये़भे़ल्ले़ फिलिप्पिबा नसानिबाहाॽ नोगे़न् पिमासि वये़, थेआङ्भे़ल्ले़ खे़ङ्हाॽरे़ पावले़न् चाहाबो थ्ये़ःल्ले़ कुभाॽ मे़बिरुआङ् वये़रो॥ खुने़ॽ नु फिलिप्पिबा नसानिबाहाॽओ इनोगे़न् तुक्खे त्ये़ःल्ले़ खे़ङ्हाॽ आःन्छिङ्मा पिमासि नु हाङ्हाङ् मे़प्मासि फाॽआङ्ङाङ् कन् सक्इङ्घङ्ङिन् साप्तुबारो॥ इङ्गाॽरक् चोगुङ् चाङ् लॽरिक् आङ्दिङ् लॽमाआङ् वाॽमानुःल्ले़ ये़सुरे़ कुनःम्नःम्बा ये़प्ले़क्किन् नु नोस्रङ्ङिन् इःप्मा नाःप्मा पोङ् फाॽआङ् पेलि फाक्तुसिरो॥ ख्रिस्ते़न्नु थिक्हुप् के़बोङ्बा खुनिॽ हिङ्मन्निन् निङ्वाॽफुमाङ्ङिल्ले़ कुहाङ्वा मुॽइ नु पर्धाःम्लो फाॽआङ् मे़त्तुसिॽ॥ कन् हिङ्मन्निन् यहुदि साम्योथिम् नु साक्थिम्हाॽ मे़इःत्तु मे़नाःत्तुआङ् मे़घोसुबा मेःन्, कर ये़सु ख्रिस्ते़न् नसान् मे़जोगुआङ् मे़घोःसुबारो लॽरिक् पोधक्तुसिॽ॥ ये़सु ख्रिस्तओ नसान् के़जोःक्पाआङ् खुने़ॽनु थिक्हुप् के़बोङ्बाहाॽरे़ निङ्वाॽफुमाङ्लाम् मे़घोसुबा सःप्मान् नु सनारुङ्ङिल्ले़ कुयाःम्बेओ साप्तुआङ् हाक्तुसिरो॥
कन् सक्इङ्घङ्ङिल्ले़ नसानिबा हिङ्मन्नो नु नसाःन्नो खोगे़दे़प्पा सःप्मान्, निङ्वाॽइरे़ खोःप्मान्, थिक्हुप्पिन् हे़क्क्याङ् नसाःन्नो इगेःक्काङ् पप्मा के़बोङ्बा पाःन्निल्ले़ कुयाःम्बेओ पाःत्तुॽ॥ फिलिप्पिबा सेसेहुप्लक्को के़वाॽबा नसानिबाहाॽ पावलरे़ आक्खे़न् साॽरिक् लुङ्माॽ तुक्तुसि के़लॽबा पाःन्निन् कन् सक्इङ्घङ्लाम्बा से़क्खा थाःप्लो॥
ताङ्बा थामिङ्
निसुम् नु तुवान् १:१-११
पावलरे़ आबाङे कुदुक्खे कुलाक्खे १:१२-२६
ख्रिस्ते़न्नु के़वाॽबा हिङ्मन् १:२७–२:१८
तिमोथिन् नु इपाफ्रोदाइतसरे़ खुन्छिॽ लागि निङ्सेक् २:१९-३०
निङ्वाॽफुमाङ्ङिल्ले़ कुनिङ्वाॽ तामाए पोङ् ३:१–४:९
पावलरे़ फिलिप्पिबा कुन्जुम्हाॽ नोगे़न् पिरुसिॽ ४:१०-२०
कुनुप्मा से़वा ४:२१-२३
