२ साप्मुःन्धुम् 2 - लिम्बुमाङ्हिम् चोःक्मा लुङ्सिङ्हाॽ ताःप्मा मे़हेःक्तु ( १ हाङ् ५:१-१८ ) 1 सोलोमन हाङ्ङिल्ले़ यहवे दाङ्बे़ल्ले़ कुमिङ्ङो निङ्वाॽसोक्ले़ लागि लत्छा माङ्हिम् नु खुने़ॽ आप्फेक् कुलागि लत्छा हिम् चोःक्मा निङ्वाॽ निःन्धो चोगु॥ 2 खुने़ॽ ७०,००० कक् के़गुबाहाॽ, ८०,००० लुङ् के़घक्पाहाॽ नु खे़ङ्हाॽ ओमे़प्मासिरे़ लागि मुरा के़मे़प्पा के़जोःक्पा ३,६०० लाम्लोबाहाॽ युक्तिङ् चोगुसि॥ 3 सोलोमन हाङ्ङिल्ले़ तुरोसबा हाङ् हेरामे़न् अक्खे पाःत्तुआङ् इङ्घङ् हाक्तुरो— “आदाङ्बारे़ आङ्गाॽ आम्बा दाउदे़न् खुने़ॽ कुहाङ्हिम् युङ्मादे़न् चोःक्मारे़ लागि साम्माङ्सिङ्हाॽ के़हाक्तु के़युसुआङ् वये़बा कुइसिक् आङ्गाॽ हाक्ताङ्ङे़ॽओ॥ 4 आल्ल आङ्गाॽआङ् यहवे दाङ्बा आनिङ्वाॽफुमाङ्ङिल्ले़ कुमिङ्ङिल्ले़ लागि लत्छा माङ्हिम् चोःक्माआङ् तोःम्मा नु खुने़ॽ कुदगि कुनाम्गे़नुॽबा सुक्पा हाःम्मा, हे़क्क्याङ् तोःम्मनाबा खरे़ःङ्हाॽ चक्मे़ल्लॽए थे़ःक्पे़त् थे़ःक्पे़त् ने़माआङ् तोःम्मारे़ लागि, हे़क्क्याङ् तानाम्, युःन्छिक् थक्मा, सबाथ, लादुप्पो नु यहवे दाङ्बा आनिॽ निङ्वाॽफुमाङ्ङिल्ले़ निःन्धो चोगुबा तङ्नाम्हाॽओ मिधिङ्मनादेमनाबा वयागे़न् सिदुङ्जभा तोःम्मारे़ लागि खे़न् माङ्हिम्मिन् खुने़ॽ कुलागि तोःम्मा चोगुङ्ल पत्ता॥ इस्राइलरे़ कुलागि कन् लत्छा मे़न्नुप्मना सदादिङ्बा थिम्लो॥ 5 “आङ्गाॽ चोःक्मा चोगुङ्बा माङ्हिम्मिन् लत्छा आत्तातान्ने यम्बा पोङ्ॽ, थेआङ्भे़ल्ले़ आनिगे निङ्वाॽफुमाङ्ङिन् के़रे़क् माङ्हाॽनुःल्ले़ पयम् यम्बा चोक्॥ 6 कर साङ्ग्राम्पेदाङ्, के़रे़क्नुःल्ले़ थाःङ् के़ने़बा साङ्ग्राम्पेदाङ्ङिन्ने खुने़ॽ कुलागि चुक्सा चोःक्किल्ले़ हाःत्ले़ खुने़ॽ कुलागि माङ्हिम् चोःक्मा सुक्तुबे? खुने़ॽ कुदगि सिदुङ्जभाहाॽ तोःम्मानुःल्ले़आङ्धो वेॽ खुने़ॽ कुलागि माङ्हिम् के़जोःक्पा आङ्गाॽ हाःत्ताआङ्बे? 7 “कल्ले़चोगुल्ले़ आङ्गाॽ आलागि कुहुक्वा के़नुॽबा चोबेगु थिक् पाङ्घे़युसे़ॽओ, खे़न् मनाःल्ले़ साम्म्याङ्, युप्पा, कासा नु फे़न्जेॽ हे़क्क्याङ् पारान्ला, कुहे़ःत्ला नु हिःक्कोःम्कोःम्बा खिःल्ले़न् याःम्बक् चोःक्मा सुक्तुर, खे़ब्याङ् खे़न् कुभुङ् लक्माआङ् के़ले़बा मना पोङ्मा पोङ्ॽ॥ खुने़ॽग आङ्गाॽ आम्बा दाउदरे़ तारुसि पिराङ्बा कुहुक्वा के़नुॽबा चोबेगुहाॽनु सोरिक् यहुदा नु यरुसले़ःम्मो याःम्बक् चोक्॥ 8 “आङ्गाॽ ले़बनानलाम् साम्माङ्सिङ्, आङ् नु तघॽसिङ्हाॽआङ् हाक्ताङ् युसाङ्ङे़ॽ, थेआङ्भे़ल्ले़ आदाङ्बारे़ के़मनाहाॽ ले़बनानओ सिङ्हे़क्मा के़ले़बा मे़जोक् फाॽआङ् आङ्गाॽ निसुङ्ॽ॥ 9 आङ्गाॽ आमनाहाॽ आदाङ्बारे़ के़मनाहाॽनु सोरिक् यरिक् सिङ्हाॽ यारिप् चोःक्मारे़ लागि याःम्बक् मे़जोक्, थेआङ्भे़ल्ले़ आङ्गाॽ चोःक्मा इःत्तुङ्बा माङ्हिम्मिन् साॽरिक् निङ्वाॽ के़माबा पोङ्ॽ॥ 10 सिङ्गे़हे़क्पा आदाङ्बारे़ के़मनाहाॽ, सिङ्गे़दाङ्बाहाॽरे़ लागि आङ्गाॽ २०,००० कोर मासि, २०,००० कोर हःक्सि, २०,००० बाथ चे़ल्ले़क्सेॽ सेजःङ्वा नु २०,००० बाथ पे़ःङ्वालिःत्छेॽ निःङ्गेॽ पिरुङ्सिङ्ॽ॥” 11 तुरोसबा हाङ् हेरामे़ल्ले़ सक्इङ्घङ् लाम्बा कन् इङ्घङ्ङिन् सोलोमने़न् हाक्तुरो— “यहवे दाङ्बे़ल्ले़ कुमनाहाॽ लुङ्माॽ तुक्तुसिबाल्ले़ चोगुल्ले़ खुने़ॽ आदाङ्बा खे़ङ्हाॽरे़ खुन्छिॽ हाङ् के़जोगे़॥” 12 सक्इङ्घङ्ङो हेरामे़ल्ले़ अक्तङ्बाआङ् साप्तु— “साङ्ग्राम्पेदाङ् नु इक्सादिङ् खाम्बेक् नावागे़न् चइःत् के़जोःक्पा यहवे दाङ्बा इस्राइलबा निङ्वाॽफुमाङ्ङिल्ले़ कुनारा पोररो॥ खुने़ॽ दाउद हाङ्ङिन् सिक्कुम्दिङ् निङ्वाॽ, ने़हिनिङ्वाॽ नु खासिङ्गे़निःप्पा ये़म्बित्छा साधिक् पिरुआङ् वाॽ, खे़ल्ले़ यहवे दाङ्बे़ल्ले़ कुलागि माङ्हिम् थिक् नु खुने़ॽ आप्फेक् कुलागि लत्छा हाङ्हिम् चोगुॽ॥ 13 “आल्ल आङ्गाॽ आदाङ्बारे़ के़लागि कुहुक्चो के़नुॽबा नु साॽरिक् के़ले़बा चोबेगु, हुराम-अबिन् पाङ्घुङ् युसुङ्ल पत्ता॥ 14 खुने़ॽग दान थाःक्कोबा मे़न्छुमाःल्ले़ कुस्सारो॥ हे़क्क्याङ् खुने़ॽ कुम्बा तुरोसबा यक्युङ्बारो॥ खुने़ॽग साम्म्याङ्, युप्पा, कासा, फे़न्जेॽ, लुङ्, सिङ्ले़ याःम्बक् चोःक्मा नु पारान्ला, कुहे़ःत्ला हे़क्क्याङ् हिःक्कोःम्कोःम्बा खि नु नैनासुत् चिरिक्ले़न् याःम्बक् चोःक्माआङ् के़ले़बा चोबेगुरो॥ खुने़ॽग के़रे़क् परिक्ले़न् कुभुङ् लक्मा याःम्बक् चोःक्मा के़हुॽसिङ्बा मनारो, हे़क्क्याङ् खुने़ॽ पिमनाबा आत्तिन् परिक्ले़न् कुबि याःम्बक्साङ् चोःक्मा सुक्तुॽ॥ खुने़ॽ आदाङ्बारे़ के़ले़बा चोबेगु के़महाॽनु सोसोरिक् आदाङ्बारे़ के़म्बा आङ्गाॽ आन्दाङ्बा दाउदरे़ कुमहाॽनु याःम्बक् चोक्लो॥ 15 “कल्ले़चोगुल्ले़ आल्ल आङ्गाॽ आन्दाङ्बे़ल्ले़ खुने़ॽ कुसे़वारोबाहाॽरे़ खुन्छिॽ लागि माङ्हुप् चोगुबा मासि, हःक्सि, पे़ःङ्वालिःत्छेॽ निःङ्गेॽ नु चे़ल्ले़क्सेॽ सेजङ्वान् हाङे़ थाङ्घे़ॽओ॥ 16 आदाङ्बा चाहा के़जोःक्पा के़रे़क् सिङ्हाॽ ले़बनानओ आनिगे ताङुम्बे़, हे़क्क्याङ् सिङ्घङ्हाॽ खेःक्खुम्बे़आङ् योप्पा थारिक् वदेःन्दुम् युसुम् पिआसिगे़ॽ॥ आदाङ्बारे़ खे़प्मोनु यरुसले़म थे़म्बा तेॽमा तङ्गाम् चोगे़ॽओ॥” माङ्हिम् चोःक्मा याःम्बक् मे़हेःक्तुॽ ( १ हाङ् ६:१-३८ ) 17 सोलोमन हाङ्ङिल्ले़ खुने़ॽ कुम्बा दाउदरे़ मनाहाॽ याम्नाःत्निःत् चोगुसिबा कुइसिक् खुने़ॽ इस्राइलओ के़युङ्बा वेॽ लाजेॽबा मनाहाॽ याम्नाःत्निःत् चोगुसि॥ कन्हाॽ के़रे़क्ले़ १,५३,६०० मना मे़वये़॥ 18 खुने़ॽ कन्हाॽओबा ७०,००० कक् के़गुबा नु कोःक्मा फाङ्जङ्हाॽओ ८०,००० लुङ्गे़हे़ःप्पा हे़क्क्याङ् कन्हाॽ याःम्बक्को फम्मासिरे़ लागि ३,६०० ग मुरा मे़प्मासि याःम्बक्को फत्छुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.