फीलीप्पी 4 - ल्होमीॱलोप्स्यीक् टेप्पे तम् १-९ 1 ङल खीत्रङ् ढेन्सी यो़क्केन् झ्यम्बे पी़न्ज्यासो, खीत्रङ् ङल गेस ॱलोङ्गेन् धङ् ज्येल थोबे थोप् छ्यीम्मी़ स्यमुङ्दङ् छ्येत्मीत् झ्युङ्। ॱनी झ्यम्बे पी़न्ज्यासो, खीत्रङ् हुन्दुक् दीरङ् चोव ज्यीन्दक्तङ् मत् ढेब तेम्बोक्म झ्यीन दो़च्च्यीत्। 2 इयोदीया धङ् सीन्तके भुमु खीत्रङ्सो ॱङीबु, चोव ज्यीन्दक्तङ् मत् ढेब यो़प्पल पीब छ्यम्ब डीक्प झ्यीन दो़च्च्यीत् सीन्न ॱलोप्स ज्यक्केनो। 3 ङे ले च्यीक्की छ्यीट्टो दीम्बरङ्, रङ्गी हुगी भुमु ॱङीबु हुगो डीक्च्या झ्यीन टो़त्रो झ्यी सीन्न सीक्को़दो। केलेमेन्ट् धङ् ङे ले च्यीक्की छ्यीट्टो ॱयोङ्म घयेत्तङ् दल भुमु ॱङीबु हुबे एक् केच्च्य ॱनेम्बु टोम्बे लेल टेत् च्येत्न ङल दगु झ्यीज्युङ्। हुब कुरीक्की मीङ् दी छीये थोल ढीन यो़क्केन् बेत्। 4 चोव ज्यीन्दक्तङ् मत् ढेब यो़प्पल खीत्रङ् ज्यी़न्दु गव झ्यीज्यीत्। हरुङ्द यङ् फीच्च्य सीक्केनो। गव झ्यीज्यीत्। 5 खीत्रङ्ल यो़प्पे गस्सीम् दी मी कुरीक्की ॱह घोज्ये यो़प्पल गये ढङ् झ्यीज्यीत्। घन्ड हीन् सीन्न चोव ज्यीन्दक् झ्यो़म्बे धी़ ॱस्यच्चन ॱलीत् छर बेत्। 6 घन्डे ढीक्ल अक् च्युगा मत् झ्यीज्यीत्। नम् घन्दुक् झ्यीब झ्युङ्न अक्, खीत्रङ्ल घङ् गो़बे खोज्येत् घयेक्की ढीक्ल को़न्ज्योक्ल ॱसुव तप्न थु छ्यी पुन स्युव ज्योप्च्यीत्। 7 खीत्रङ्ल को़न्ज्योक्की ॱमीत् च्यीक्प ॱह दीरङ् घो ॱमीत् छुगेङ्गी ॱसीम् दीव ॱनङ्गेन् बेत्। हुनी हस्सो़त् ख्रीष्ट् येशुदङ् खीत्रङ् मत् ढेबल यो़क्कीन् यो़क्कीर्रङ् खीत्रङ्गी ॱसीम् धङ् ॱसम्ल दी हुगी छ्योप्केन् बेत्। 8 ह स्युक् थदु पी़न्ज्यासो, दीम्बे ढङ्, छ्यप्स्यक् च्येम्मे ढङ्, ढङ्बी़ ढे, चङ्मे ढङ्, पम्बो़त्मे ढङ्, ढक्पागी ढङ्, गागी ढङ् धङ् तो़त् ओ़बे ढङ् हीन्दुक् झ्यीबे ॱवङ्ल ॱसीम्ब तोङ्ज्यीत्। 9 हीगी ढीक्ल खीत्रङ्ल ङे घङ् ॱस्येप्प घयेत् धङ् ङे मीजीनी खीत्रङ्गी घङ् ॱस्यीब घयेत् दी झ्यीज्यीत्। हुनी स्यीव दीव ॱनङ्गेङ्गी को़न्ज्योक् खीत्रङ्दङ् दल स्युगेन् बेत्। फीलीप्पीयागी ढीक्ल पावल्की ढीन् ॱसम्ब १०-२० 10 खीत्रङ्गी हुन्दो स्युक्ला यङ् ङल गो़बे गो़ज्येत् घयेत्ल तेन युङ्नी, चोव ज्यीन्दक्तङ् मत् ढेबे मी ङल यो़प्पल गेस छ्यीम्मु झ्युङ्। खीत्रङ्गी ॱसीम्बे झ्यीच्च्ये ॱनो़ब त यो़क्केन् बेत्। ॱनी झ्यीत् ॱमत् छुब हीन्डो। 11 ॱनी हीगो म दी ङल गो़गुक् सीन्न ढीब मेन्। घन्ड हीन् सीन्न ङल घजो़त् झ्युङ्न अक्, हुल ङे ॱलो दीय झ्यीन दो़त् ॱस्यीज्युङ्। 12 मङा यो़प्पे कप्ल धङ् नुङा यो़प्पे कप्ल युङे लेमु ङल ॱस्यो़च्च्ये यो़त्। डङे यङ्ल, तोब कोम्बे यङ्ल, मङा झ्युङ्, नुङा झ्युङ्, गदुक् आक्तुक् घन्ड झ्युङ्न अक्, हुल ॱलो दीय झ्यीन दो़त् छुबे धो़न् ङे ॱस्यीन यो़त्। 13 घन्ड झ्युङ्न अक्, हुल ख्रीष्ट्की ॱनङे ॱस्यीक्की ङे हुगो ॱअल छयेत्। 14 ॱनी हीन्न अक्, खीत्रङ्गी ङे दुक्प खुर्रोल दगु झ्यीनी, हुगो ङल गस्सी फेन्ज्युङ्। 15 गोम खीत्रङ्ल केच्च्य ॱनेम्बु ॱस्येत्न चव चुन स्यक्न ङ हुनी मासीडोनीया लुङ्बनी थो़न्न डोये यङ्ल छ्यो़ छो ॱयोङ्मा घङ्गो़ ओ़त् मेम्ब, खीत्रङ् फीलीप्पीगी छ्यो़ छोगीरङ् ङे ढीन् ॱसम्न ङल गो़बे खोज्येत् घयेत् टो़प्पे छ्यो़त्तुम् झ्यीज्युङ्। हीगो खीत्रङ्ल आक् ॱस्यो़च्च्ये यो़क्केन् बेत्। 16 ङ थीस्सलोनीका सार्तु दो़प्पे यङ्ल अक् खीत्रङ्गी ङल गो़बे खोज्येत् लेम्म ॱङी ॱसुम् तङ्ज्युङ्। 17 ॱनी हीगो यङ् ङल गो़गुक् सीन्न खीत्रङ्ल फीच्च्य लीङ्गेन् मेन्। खीत्रङ्गी गये ले झ्यीबे चीस्यी दील डेबु ॱमीम्ज्ये यो़प्पल ङे हीगो सीक्को़त्। 18 खीत्रङ्गी इपाफ्रोडीटस्की लक्ल घङ् तङ घयेत् दी ङल ठो़च्च्युङ्। ठो़त्न मो़त् छ्यीली झ्युङ्। ह ङल गज्येन् यो़त्। ॱनी खीत्रङ्गी तङे कुम्मु हीगो को़न्ज्योक्की थुल डोव ढीम स्यीम्बोक्म ॱहीक्केन् को़न्ज्योक् थु गुवे छ्यो़प्पदङ् छ्येत्मीत् झ्युङ्। 19 खीत्रङ्ल गो़ब तोक्प घन्ड युङ्गो़दङ् हुगो ख्रीष्ट् येशुगी लम्नी ङे को़न्ज्योक्की खोङ् रोरङ्गी तो़प्प च्येम्मे नोर्की भङ्जेत्नी खीत्रङ्ल ॱनङ्गेन् बेत्। 20 हज्यरङ्गी यप् को़न्ज्योक्ल धी़ नम ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। छ्यक्सुम् थेमु तङ २१-२३ 21 उन ख्रीष्ट् येशुदङ् मत् ढेब, को़न्ज्योक्की मी चङ्म घयेत्ल ङे छ्यक्सुम् थेमु यो़दो सीन्न ॱस्यो़च्च्यीत्। ॱनी ङदङ् दल यो़क्केन्, हीगी पी़न्ज्या घयेक्की इक् छ्यक्सुम् थेमु सीगुगो। 22 हीन यो़क्केन् को़न्ज्योक्की मी चङ्म घयेत् धङ् हरुङ् मो़स्स्योल सीजर् ज्याबी़ ज्यागङ्गी नङ्ल ले झ्यीक्केन्, मी चङ्म घयेक्की छ्यक्सुम् थेमु सीगुगो। 23 चोव ज्यीन्दक् येशु ख्रीष्ट्की थुज्यी खीत्रङ् घयेक्की ॱसीम्गी दगुल युङ् युङ युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.