फीलीप्पी 2 - ल्होमीछ्यम्ब डीक्प झ्यीत् गोगेन् १-४ 1 ख्रीष्ट्तङ् या मत् ढेब यो़क्केन् झ्यीनी, खीत्रङ्ल ॱलोप्स्यीक् धङ् खोङ्गी झ्यम्बे लम्नी ॱसीम्ल ॱस्यीक् ॱङीक्केन् धङ् धम्बे थुदङ् कङ्ज्यीक्प युङ्गेन् बेत्। हुनी क खीत्रङ् नङ्दु चीदुङ् धङ् ॱङीङ्ज्यी युङ्गेन् बेत्। 2 ङे ॱसीम्ल गव छ्यीम्मु युङल खीत्रङ् नङ्दु हुन्दुक् झ्यीब झ्युङ्न, ॱसीम् च्यीक् ली़ च्यीक् झ्यीन दम्ङीत् मीप्पे झ्यम्ब धङ् छ्यम्ब डीक्प झ्यीज्यीत्। 3 रङ्ज्यी़ धङ् ज्यीम्गेत् ॱमत् ॱस्यो़प्प, ॱनोम्ज्युङ् झ्यीन रङ्ले ॱयोङ्मा ढक्पा ॱसम्ज्यीत्। 4 खीत्रङ् ॱसोस्सोरङ्गी धो़ल्ल छ्युवक् मेम्ब, ॱयोङ्गी धो़ल्ल अक् तो़ज्यीत्। येशु ॱनोम्ज्युङ् यो़प्प ५-११ 5 ख्रीष्ट् येशुगी थुदङ् छ्येत्मीत् खीत्रङ्गी ॱसीम् दी इक् युङ् गोगेन् बेत्। 6 खोङ् को़न्ज्योक्तङ् डगेन् यो़च्च्यङ्, खोङ्गी रोरङ् को़न्ज्योक्तङ् डगेन् दी ॱलो़ तोङ् छुन युङ बेत्। 7 हुगो झ्यीनी, खोङ् कोलीमील कीन, ॱयोक्पुदङ् डगेल्ल मीली़ल युङ बेत्। 8 हुन्दुक् झ्यीन खोङ् मादु भप्न युङ्न कुरुस्ल ढोङ् ढोङ् थुक्ल को़न्ज्योक्की क धङ् धम्ल चीन युङ बेत्। 9 हीगो झ्यीनी को़न्ज्योक्की खोङ् छ्यीम्मुल तो़न्न स्यक्न खोङ्ल मीङ् छ्यीस्स्यो घयेत् कुरीक्ले छ्यीस्स्यो दी ॱनङ बेत्। 10 हीगो झ्यीनी तेङ् यी़न यो़प्प, जम्बुलीङ्न यो़प्प धङ् ॱसे होक्ल यो़प्प घयेक्की यप् को़न्ज्योक्ल तो़प्प पुबे ढीक्ल येशुगी छेन् डेन्न खोङ्गी ढुङ्दु पीमुङ् चुन 11 केच्च्योक् ॱनग छङ्मे मी घयेत् कुरीक्की येशु ख्रीष्ट् चोव ज्यीन्दक् बेत् सीन्न सीर् गो़ ॱस्यर्केन् बेत्। (यशैया ४५:२३) छी थर्वे मीजीगी छ्यलु १२-१६ 12 ङे झ्यम्बे मी खीत्रङ्सो, ङ हुदु खीत्रङ्दङ् यो़प्पे यङ्ल खीत्रङ्गी को़न्ज्योक्की कल चीन दो़क्कुक्। ॱनी हुन्दो ङ हुदु मीप्पे कप्ल आक् हरुङ् गदु झ्यीन को़न्ज्योक्ल ज्यीब खुर्न दर्कीन् दर्कीन् खीत्रङ्गी मीजीगी छ्यलु दी थर् छरे लेमु डस्सी झ्यीज्यीत्। 13 घन्ड हीन् सीन्न खीत्रङ्गी ढीक्ल को़न्ज्योक्की थुल यो़प्प दी खीत्रङ्ल आक् ॱलोल युङल धङ् हुगो डुप्च्ये यो़प्पल को़न्ज्योक्की सोगेन् बेत्। 14 खीत्रङ्गी घङ् झ्यीप्पे लेल कोल्लोक् मीत् युङ, थी़न्डीक् युङे लेमु झ्यीज्यीत्। 15 हुनी खीत्रङ् धीङ्सङ्गी मी ॱहेन्ज्योक्प छ्यी़रीय घयेक्की छीक्तु खीत्रङ् ङीबे ज्यी़त् मीप्प, ॱसीम् कप्पु, को़न्ज्योक्की भीज नक्चक् मीप्प युङ धङ् जम्बुलीङ्दु खीत्रङ्गी छी थर्वे केच्च्य तो़न्न छेङ्गी रील कर्म ॱस्यर डस्सी खीत्रङ् युङ्गेन् बेत्। 16 हीनी हस्सो़त् ङे खीत्रङ्गी घुङ्दु टेत् च्येत्न घङ् कले च्येप्पे ले दी घो ॱमीत् छ्यो़त्ल ॱमत् ॱसोङ हीम्बल ख्रीष्ट् झ्यो़म्बे ङीङ्गी यङ्ल ङल ङोम्ज्येत् ॱस्यो़च्च्ये युङ्गेन् बेत्। ॱस्यी गो़ ॱस्यरल गव यो़क्केन् १७-१८ 17 खीत्रङ्गी छ्य स्यक्प दी को़न्ज्योक्ल छ्यो़प्प पुबदङ् डगेन् बेत्। ॱनी ङ हीदु ॱस्यी गो़ ॱस्यर्न ॱनी, ङे ॱरोक् दी गोङ्ज्यङ्गी छ्यो़प्प पुबदङ् छ्येत्मीत् खीत्रङ्गी छ्य स्यक्प दीदङ् दल डोगेन् बेत्। ॱनी हील अक् ङ गव दुक्। हीगी ढीक्ल ङल अक् खीत्रङ्दङ् कङ्ज्यीक्ल गेस यो़त्। 18 ॱनी खीत्रङ् ॱअङ् ङ डस्सीरङ् ङदङ् दल गव धङ् गेस झ्यीलेच्च्यीत्। तीमोथी धङ् इपाफ्रोडीटस् तोङे केच्च्य १९-३० 19 खीत्रङ् घन्दुक् झ्यीब यो़दङ् हुगी केच्च्य घयेत् ॱह घोन, ङल ॱलो दीय युङ्ज्ये यो़प्पल तीमोथी खीत्रङ्दङ् ठेत्तु तोङ्ज्येमे ढो़ यो़त्। ॱनी हीगो चोव ज्यीन्दक् येशुगी थुल यो़त्न ॱनी, ङे ज्योक्पु तङ् योङ्। 20 तीमोथी हुगो डस्सी खीत्रङ्गी ढीक्ल गन्दीक्म च्युगा झ्यीन गेन् खुर्केङ्गी मी ङदङ् दल ॱयोङ्मा मीन्दुक्। 21 ॱयोङ्मा हुबे येशु ख्रीष्ट्की धो़ङ्गी लेमु मेम्ब, ॱसोस्सोरङ्गी युङ्ज्यी़गी लेमु झ्यीक्कुक्। 22 फल भीजे स्यप्च्यी़ ज्युब डस्सी केच्च्य ॱनेम्बु टोम्बे लेल तीमोथीगी ङल दगु झ्यीन, रो घन्दुक्मे छ्यप्स्यक् छ्यीम्मुल थो़म्ब बेक्क हुगो खीत्रङ्ल ॱस्यो़च्च्ये यो़क्केन् बेत्। 23 ॱनी हीदु ङल तीङ्ला घन्ड युङ्गो़दङ् हुगो ङल ॱस्यो़च्च्ये झ्युङ्नी, हुनी ॱस्यर्च्यक् गोत्त तोङ्ज्ये ॱनो़ब यो़त्। 24 ॱनी ङरङ् अङ् खीत्रङ्दङ् ज्योक्पु ठेत् छुज्ये यो़प्पे देङ्जो़त् चोव ज्यीन्दक्ल खीन यो़त्। 25 हज्यरङ्गी पी़न्ज्या ङे ले च्यीक्की छ्यीट्टो, छ्य च्यीक्की ॱमक्मी डस्सीगी छ्यीट्टो इपाफ्रोडीटस् ङल स्यप्च्यी़ ज्युक्केङ्गी दगु गो़ब दील खीत्रङ्गी छप्पुल गोत्त तङ्ज्युङ्। ॱनी हुन्दो यङ् खीत्रङ् च्याल ॱलोक्न तोङ् गोयेत् ॱनो़ब यो़त्। 26 ॱनी ॱलोक्न तोङ्ज्ये दी रोगी खीत्रङ् छीगङ् ढेम्ब झ्यीगुक्। ॱनी गोत्त हीदु नगुक् सीरे केच्च्य खीत्रङ्गी ॱह घोदुक् सीर रोगी हीदु ॱह घोनी, हुनी ॱसीम् ॱमत् कीब झ्युङ्सोङ्। 27 हीम्ब त नन ॱस्यीज्येलरङ् थुक्प बेत्। ॱनी को़न्ज्योक्की ॱङीङ्ज्यी जेत्नी, ॱसो़ब बेत्। ॱनी ॱङीङ्ज्यी दी गोत्तल च्यीक्पु मेम्ब, ङल अक् ॱसीम्दुक्की थोक्ल ॱसीम्दुक् नोङ्ज्ये मीप्पल झ्युङ्। 28 ॱनी गोत्त हुदु ठेत्नी, खीत्रङ्सोल आक् गेस युङ धङ् ङे च्युगा दी इक् च्युङ्दु डोज्येल ज्योक्सी तङ् योङ्। 29 ॱनी हुदु ॱलीबे यङ्ल खीत्रङ् गेस झ्यीन चोव ज्यीन्दक्की मी हीम्ब ॱसम्न गोत्तल ॱसुमी़ झ्यीज्यीत्। हीगो डस्सीगी मील खीत्रङ्गी तो़प्प झ्यीज्यीत्। 30 घन्ड हीन् सीन्न ङल खीत्रङ्गी झ्यीत् ॱमीत् छुगेङ्गी स्यप्च्यी़ ज्युन ख्रीष्ट्की लेगी ढीक्ल ॱस्यीज्येमरङ् ॱयेङ्न आक्, रोरङ्गी ॱरोक्ल फङ मीप्प झ्यीब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.