फीलीप्पी 1 - ल्होमी1 ख्रीष्ट् येशुगी ॱयोक्पु ङ पावल् धङ् तीमोथीगी फीलीप्पीगी सार्न यो़प्पे ख्रीष्ट् येशुदङ् मत् ढेब, को़न्ज्योक्की मी चङ्म घयेत्, छ्यो़ छोगी गोयो़प्प धङ् छ्यो़योक्प घयेत्ल हीगी यीगी हीगो ढीन तोङ्गो़त्। 2 खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्। फीलीप्पीया घयेक्की ढीक्ल ॱसुव तब ३-११ 3 ङल खीत्रङ् ढेन्सो़ युङ्देन् रीदङ् ङे को़न्ज्योक्ल थु छ्यी पु पुब झ्यीक्को़त्। 4 खीत्रङ्गी ढीक्ल नम् ॱसुव तोप् गो़ झ्युङ्न अक्, हुगी यङ्ल ङ गेस लङ्न तोप्को़त्। 5 घन्ड हीन् सीन्न खीत्रङ्गी गोमनी झ्यीनी हजो़त् थुक्ल केच्च्य ॱनेम्बु टोम्गेङ्गी लेल छ्य झ्यीन युङ बेत्। 6 खीत्रङ्गी ॱसीम्ल गोमनी को़न्ज्योक्की जेप्पे गागी ले दी ख्रीष्ट् येशु झ्यो़न् झ्यो़ल्ले एल्ला को़न्ज्योक्की डुप्केन् बेत्। हील ङ देङ् खीन यो़त्। 7 खीत्रङ् ङे ॱङीङ्गी नङ्गी मी हीम्ब झ्यीनी, हीन्दुक् झ्यीबे ॱसीम्ब ॱनो़गुक्। ङ हुदु चो़ल्ल यो़प्पे यङ्ल, केच्च्य ॱनेम्बी़ खबाल लोङ्न धक्पर् झ्यीप्पे यङ्ल धङ् केच्च्य ॱनेम्बु चव चुक्पे यङ्ल खीत्रङ् ङदङ् दल को़न्ज्योक्की थुज्यी च्यीक्की होक्ल छ्य झ्यीन युङ बेत्। 8 ङल खीत्रङ् घन्दुक्मे ढेम्ब दुक्क हीगी ढीक्ल को़न्ज्योक् पङ्बु यो़त्। ॱनी हीगो म दी ख्रीष्ट् येशुल यो़प्पे धुङ्सीम् डस्सी ङ अक् खीत्रङ्ल लङ्गुक्। 9 खीत्रङ् नङ्जोल यो़प्पे झ्यम्ब दी ज्यीक्तु, ॱनी धो़न् दी गदु ॱह घोज्ये यो़प्प धङ् गवक् ॱयुव पीक्लु दी गदु ॱस्यीज्ये यो़प्पे ढीक्ल ङे ॱसुव तोप्को़त्। 10 हुगो डुप्न, हस्सो़त् खीत्रङ्गी गस्स्यो दी घङ्गो बेक्क हुगो ॱयुव पीक् छुगेन् बेत्। हुनी क ख्रीष्ट् झ्यो़म्बे ङीन् थुक्ल खीत्रङ् ॱसीम् चङ्म नक्चक् मीप्प दो़त् छुगेन् बेत्। 11 हुनी हस्सो़त् को़न्ज्योक्ल तो़प्प धङ् यस्सो युङ्ज्ये यो़प्पल ख्रीष्ट्की लम्नी खीत्रङ् ॱसीम् सङ्बुल झ्युङ्न डेबु छेत्मीत् छ्यागेन् बेत्। चो़ल्ल ॱस्योरे लम्नी केच्च्य ॱनेम्बु धर्केन् १२-१८ 12 पी़न्ज्यासो, ङल हीगी घङ् झ्युङ घयेत् हीगी म दी घन्दुक् झ्यीन केच्च्य ॱनेम्बु ढम्बे लेगी ढीक्ल दगु झ्युङ बेक्क हीगो खीत्रङ्गी ॱह घोज्ये यो़प्पल ॱस्यो़च्च्ये ॱनो़ब यो़त्। 13 ङ ख्रीष्ट्की ढीक्ल चो़ल्ल ॱस्योरे केच्च्य हीगो पो़ङ्गङ्गी गोराब घयेत् धङ् हीगी मी ॱयोङ्म घयेत्ल अक् ॱस्यो़च्च्ये झ्युङ्न यो़क्केन् बेत्। 14 ॱनी हीन चोव ज्यीन्दक्तङ् मत् ढेबे पी़न्ज्या मङाल ङ चो़ल्ल ॱस्योरे लेगी हरुङ् ॱलोप्स्यीक् छ्यीदु ॱङीत्न, को़न्ज्योक्की केच्च्य ज्यीक्टक् मीप्प, ॱआर् झ्यीन ॱस्यो़क्केल्ल झ्युङ्सोङ्। 15 ख्रीष्ट्की केच्च्य यरीगी ठदोक्की ॱस्यो़क्केन्, यरीगी डन्दप् झ्यीन ॱस्यो़क्केन्, ॱनी यङ् यरीगी ॱसीम् गङ्ज्येन् खुर्न ॱस्यो़क्केन् बेत्। 16 हीबे ङल झ्यम्ब यो़क्केन् झ्यीनी, ङ केच्च्य ॱनेम्बी़ खबाल खो़प्प दी ॱस्यीनी, हीबे ॱसीम् गङ्ज्येन् खुर्न ॱस्यो़क्केन् बेत्। 17 ॱनी हुगी ॱयोङ्मा ॱसीम् गज्ये मीप्प घयेत् हुबे म दी ङल चो़न्दु दुक्प मङ्दु युङ्गो़ट्टो ॱनो़ब छ्यर्न रोरङ्सो छ्यीजेल्ल ॱस्योर्न ॱस्यो़क्केन् बेत्। 18 ॱनी हीन्न अक्, हुबे ॱसीम् गयेरङ् ॱस्येत्, आक्पेरङ् ॱस्येत्न आक्, ख्रीष्ट्की केच्च्य दी ढम्गेन् बेत्। ॱनी गो़स्यो दी इक् हुगोरङ् बेत्। हील ङ गेस दुक्। ॱनी हरुङ् ङल गेस हीगो ओक् यो़त्। ॱस्यीन आक् गयेत्, ॱसो़न आक् गयेत् १९-३० 19 घन्ड हीन् सीन्न खीत्रङ्गी ॱसुव तब धङ् येशु ख्रीष्ट्की थुगी दगु जेत्न, ङ हीनी थो़न् छुगो़त्। हीगो ङल ॱस्यो़च्च्ये यो़त्। 20 ङ ॱस्यीन आक्, ॱसो़न आक्, ॱङच्च्यी़न् तबु ङल हुन्दो ओक् ज्यीक्टक् मीत्। ङल तीङ्ला आक् ङु छ गोगेङ्गी ले घन्ड अक् मीत् युङ, ङे मीजीनी ख्रीष्ट्ल तो़प्प युङे देङ्जो़त् यो़त्। 21 ङ ॱसोम्बु देत्न ॱनी, हीगो ख्रीष्ट्की ढीक्ल युङ्गो़त्। ॱनी यङ् ॱस्यीन ॱनी, ङल गस्स्यो दी हुगो युङ्गो़त्। 22 ॱनी यङ् ङ हीदु ॱमत् ॱस्यीय देत्न ॱनी, ङरङ्गी लेल फेन् थोब युङ्गो़त्। हीगो झ्यीनी ङे घङ्गो दी इक् दम् ॱमीत् छुबेत्। 23 हीगी ढीक्ल ङे ॱसीम्ब ची ॱङील ॱस्योर्न यो़त्। झ्युङ्न ङ हीगी ली़बु हीगो ॱस्यीनी, ख्रीष्ट्तङ् दल दो़च्च्ये झ्युङ्न गस्स्यो युङेत्। 24 ॱनी म दी खीत्रङ्गी ढीक्ल यङ् ङ हीदु देप्प फेम्बा यो़क्केन् बेत्। 25 हील ङ देङ् खीन यो़त्। खीत्रङ्गी छ्य स्यक्प दी गदु डोवल धङ् छ्य स्यक्न युङे गव दी छ्यीदु डोज्ये यो़प्पल ङ ॱमीत् ॱस्यीय, खीत्रङ् च्याल दो़त्तु युङ्गेन्। हीगो ङल ॱस्यो़च्च्ये यो़त्। 26 ङ फीच्च्य हुदु युङ् छुन ॱनी, खीत्रङ् ख्रीष्ट् येशुदङ् मत् ढेब यो़प्पे गेस दी छ्यीदु युङ्गेन् बेत्। 27 ॱनी घन्ड झ्युङ्ज्यङ्, खीत्रङ्गी मीजीगी छ्यलु दी ख्रीष्ट्की केच्च्य ॱनेम्बुल ओ़ब युङ झ्यीज्यीत्। म दी ङ खीत्रङ्दङ् ठेत्न आक्, ॱमत् ठेत्न आक्, खीत्रङ् घयेत् ॱसीम् च्यीक् ली़ च्यीक् झ्यीन छ्य स्यक्पे लम्ल डोवल ढो़गो च्यीक्ल देत्न, 28 ड घयेत्ल घन्डल अक् ज्यीक्टक् मीप्प दुर्न युङ ङे ॱह घोव स्योक्च्यीत्। हुनी हस्सो़त् ड घयेक्की ॱसीम्ल रोसो ॱयोङ्मा घयेत्ल छी थर्व थोप् डोगुक्, ॱनी हज्यरङ्ल छी थर्व ॱमीत् थोब, खरप्ल डोयेत् ॱनो़ब को़न्ज्योक्की हुबल छ्यर्तु ची़क्केन् बेत्। 29 घन्ड हीन् सीन्न को़न्ज्योक्की ॱनङ्ज्येत् खीत्रङ्गी ख्रीष्ट्ल छ्य स्यक्प दी छ्युवक्की ॱमीत् छेप्प, खोङ्गी ढीक्ल नोङ्गेङ्गी दुक्प हुगो ओक् ॱनङ्ज्येत्रङ् बेत्। 30 खीत्रङ्गी ङ दुक्पदङ् दुर्री चीय एल्ला आक् थोङ बेत्। ॱनी हुन्दो ओक् ङ दुक्पदङ् दुर्री चीय दी ॱह घो यो़ट्टो। हीगो डस्सीगी दुक्प हुन्दो खीत्रङ्ल आक् उन यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.