Kɔgya 111 - Katɔti Ɔku Kedee

¹ Bɛya na bumwi Unwoti. Amii kadi ƒui bekyuli, bimwi Unwoti lɛnyi. Ami ndubɔgya-nwu enu lɛsiku mina kayi kemmo ƒui na kesii kani na nwuna bekyuli bása beli.

² Unwoti ablala ébomo geen. Na bekyuli bani nwuna ablala ammɔ aayɔ́-ma kaƒɔ ni, baawia-nya kalɔ benu.

³ Nwuna lɛla biala na ɔɔbla liikeye na uudie nwuna lɛgadi keyi. Na nwuna ala bɔbla buse siin úsela uwi ƒui.

⁴ Na kalɛ na nwuna ablala ammɔ ébomo ɔsu ni, ɔ́ya na bulayiƒala-nya kudii. Unwoti ubo lɛƒɔndia na ɔɔnu kɔnyana lɛnɔ.

⁵ Bekyuli bani mɔɔkpali-nwu na baabu-nwu ni, uute-ma bana lɛdila uwi biala. Na ulayiƒala nwuna bunyimi bɔni na únyimi.

⁶ Unwoti údie ɔ́tina nwuna bekyuli kalɛ na ubo ɔyikun na ala ani na ɔ́bla úte-bu ɔsu. Ɔsi kalɛ na ɔ́ya na kadi bamba bekyuli kɔlɔ ƒui kúnwini abu kɔdi ɔsu.

⁷ Na lɛla biala na ɔ́bla ni, bɔƒiɔ bɔdi buuubo-nwu kemmo. Na nwuna ɔda bubo bɔdi kama kekpokɔ.

⁸ Bɔdi litemi geen lɛni ndubunye siin bute uwi ƒui.

⁹ Unwoti uukpó taaƒɔ nwuna bekyuli. Na ulalɛ bunyimi bɔni na únyimi ku nwuna bekyuli kama kudii. Use kedee na ɔlɛka bɔyia-nwu.

¹⁰ Ukyuli ɔni mɔɔyia Unwoti uusé kalɔ taada anu. Na bani ƒui mɔɔsia nwuna ɔda bubo anu ni, beenú ala abuni kalɔ. Ɔmɛni ɔsu na ɔlɛka buteemwi-nwu uwi biala kemmo.