ຟີລິບປອຍ INTRO1 - ພຣະຄຳພີລາວສະບັບສະໄໝໃໝ່ຄຳນຳ ໃນການເດີນທາງຄັ້ງທີສອງຂອງອັກຄະສາວົກໂປໂລເພື່ອນຳເອົາຂ່າວປະເສີດໄປສູ່ຄົນຕ່າງຊາດທົ່ວໂລກນັ້ນ, ເພິ່ນໄດ້ຊ່ວຍສ້າງຕັ້ງຄຣິສຕະຈັກຂຶ້ນໃນເມືອງຟີລິບປອຍ (ເບິ່ງ ກຈກ 16:11-40), ເຊິ່ງເປັນເມືອງຂຶ້ນຂອງທະຫານໂຣມທີ່ກະສຽນອາຍຸແລ້ວ. ຊາວຟີລິບປອຍໄດ້ກາຍເປັນເພື່ອນຂອງໂປໂລ ແລະ ເປັນຜູ້ສະໜັບສະໜູນເພິ່ນໄປຕະຫລອດຊີວິດ. ເມື່ອພວກເຂົາໄດ້ຍິນວ່າເພິ່ນຢູ່ໃນໂຣມໃນຖານະນັກໂທດ, ພວກເຂົາຈຶ່ງໄດ້ຮວບຮວມເງິນເພື່ອຊ່ວຍເຫລືອເພິ່ນ ແລະ ສົ່ງເງິນນັ້ນໄປກັບຄົນໜຶ່ງທີ່ເປັນສະມາຊິກຂອງພວກເຂົາ, ຊາຍຄົນນັ້ນມີຊື່ວ່າເອປາໂຟດີໂຕ. ຕໍ່ມາໂປໂລໄດ້ສົ່ງເພິ່ນກັບຄືນມາພ້ອມກັບຈົດໝາຍເພື່ອຂອບໃຈຊາວຟີລິບປອຍສຳລັບມິດຕະພາບ ແລະ ການສະໜັບສະໜູນຈາກພວກເຂົາ. ໂປໂລຮູ້ວ່າຊາວຟີລິບປອຍກຳລັງປະເຊີນກັບຄວາມຂັດແຍ້ງຢ່າງຫລວງຫລາຍ, ດັ່ງນັ້ນ ເພິ່ນຈຶ່ງຍົກເອົາຂອງຊີວິດເພິ່ນເອງເປັນແບບຢ່າງໃນການຕອບສະໜອງຕໍ່ຄວາມຍາກລຳບາກນັ້ນດ້ວຍຄວາມຍິນດີ. ຕະຫລອດທັງຄົນເຝົ້າຍາມໃນລາຊະວັງທັງໝົດນັ້ນກໍຄື ຢູ່ໃນໃຈກາງອານາຈັກຂອງຂອງກາຍຊາ ໂປໂລກໍປະກາດຢ່າງກ້າຫານວ່າພຣະເຢຊູເຈົ້າເປັນອົງພຣະຜູ້ເປັນເຈົ້າ. ຄວາມປາຖະໜາຂອງໂປໂລກໍຄືການທີ່ຊາວຟີລິບປອຍຈະໄດ້ຮັບຄວາມໝັ້ນໃຈຢ່າງດຽວກັນ ແລະ ກ້າປະກາດຂ່າວປະເສີດຫລາຍຂຶ້ນໂດຍບໍ່ຕ້ອງຢ້ານກົວ. ໃນບົດເພງສັນລະເສີນອັນໜ້າອັດສະຈັນ, ໂປໂລຮຽກຮ້ອງໃຫ້ຊາວຟີລິບປອຍມີທັດສະນະຄະຕິຂອງຜູ້ຮັບໃຊ້ເໝືອນກັບພຣະເຢຊູເຈົ້າ. ພຣະອົງບໍ່ໄດ້ຢຶດຕິດກັບຖານະອັນສູງສົ່ງຂອງພຣະອົງ ແຕ່ໄດ້ຖ່ອມພຣະອົງເອງລົງຈົນເຖິງຄວາມຕາຍ ທັງໝົດນີ້ກໍເພື່ອເຫັນແກ່ຄົນອື່ນ. ນີ້ເປັນວິຖີໃໝ່ໃນການເປັນມະນຸດທີ່ໄດ້ເປີດເຜີຍໃນອານາຈັກຂອງພຣະເຈົ້າ. ພວກເຮົາເປັນພົນລະເມືອງໃນອານາຈັກຂອງພຣະເຈົ້າ ແລະ ດັ່ງນັ້ນພວກເຮົາຈຶ່ງລໍຖ້າການກັບມາຫາພວກເຮົາຂອງພຣະຜູ້ຊ່ວຍໃຫ້ພົ້ນຢ່າງກະຕືລືລົ້ນ. ຫລັງຈາກນັ້ນພຣະອົງຈະປ່ຽນແປງຮ່າງກາຍອັນຕ່ຳຕ້ອຍຂອງພວກເຮົາໃຫ້ເປັນເໝືອນຮ່າງກາຍທີ່ຟື້ນຂຶ້ນສູ່ສະຫງ່າລາສີຂອງພຣະອົງ. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.