Luka 2 - Ibayibuli Ingwalaafu

Khusaalikha khwa Yezu

¹ Mu bifukhu ibyo, Kayisaali Agusito warusa likaambila mu baandu be mu buyiinga bweewe bwoosi ari batsye khukhwiwandikhisa.

² Khuno nikhwo khuubala babaandu khukhwanyoowa khubawo nga Kuriniyo niye uwula Siriya.

³ Nashiryo buli mundu watsya khukhwiwandikhisa mu shiriimba she waawe.

⁴ Ni Yozefu naye wama i Nazareti shiriimba she Galilaaya, watsya i Yuda, mu shiriimba sha Daudi shishilaangibwa Betelehemu. Yozefu atsyayo lwekhuba naye umweene aba uwe munda nalundi uwe mu shikuuka sha Daudi.

⁵ Yozefu atsya khukhwiwandikhisa ni Mariya esi aba akanikhisa, n'enga Mariya aba ali shisoombo.

⁶ Ne ni baaba nga bali iyo, bifukhu bya Mariya bye khusaala byoola.

⁷ Aryo wasaala umwaana weewe umukiboole umusiinde, wamubiimbilila mu ngubo tsye babaana baŋaalye, wamwalisa imukali mwikhoŋolo mweesi bibyaayo biliila, lwekhuba si babona shiifwo mu bukono bwe bakyeni ta.

Babaayi ni Bamalayika

⁸ Ne mu shaalo isho, yabayo babaayi be kamasheese mu maayilo, babaaba baliinda kamasheese kaawe shiilo.

⁹ Malayika w'Omukasya wababonekhela, ni shiriifwa sh'Omukasya shabafuusilisa nga shimulikhamulikha, nabo baarya naabi.

¹⁰ Ne Malayika wabaloma ari, “Mukharya ta, lwekhuba bona nabarereere kamakhuuwa kamalayi ke kumwikhoyo kumukali kukuliba n'isi babaandu boosi.

¹¹ Shaleelo shino, mu shiriimba sha Daudi, mwasaalikhilemo Umuwonesi weenywe, niye Kristu Umukasya.

¹² Khano nikho khakane khabe khabonelo isi muli: kane mubone umwaana umuŋaalye wabiimbiwile mu ngubo, nga walisibwile imukali, mwikhoŋolo mweesi bibyaayo biliila.”

¹³ Lubaluba abawo bamalayika babaandi be mwiihe lye mwikulu, nga bali ni malayika uyo, nga baruuya Wele, nga baloma bari,

¹⁴ “Shiriifwa shibe isi Wele Uli Angaaki Lukali, ni mu shiibala lukoosi lube mu baandu boosi beesi Wele asiima.”

¹⁵ Nga bamalayika baarurirewo isi babaayi bano belileyo mwikulu, babaayi baloma bari, “Khakhutsye i Betelehemu, khubone shishiindu shino shishibeleyo, sheesi Umukasya ama khu khumanyisa.”

¹⁶ Baryo beyunakho baatsya wangu, babona Mariya ni Yozefu, n'Umwaana umuŋaalye nga bamwalisile imukali mwikhoŋolo.

¹⁷ Babaayi ni baamala khubona Umwaana, baboolela babaandu bababawo shilomo sheesi Malayika akanikha khu mwana uyo,

¹⁸ ni naabo boosi babawulila belaliila lwe'byo byeesi babaayi baakanikha.

¹⁹ Ne Mariya waliinda bilomo ibyo byoosi, nga abyambaasakho naabi mu mwoyo kweewe.

²⁰ Babaayi belayo, nga babuyila lundi nga baruuya Wele lwe'byo byoosi byeesi bawulila lundi babona, nga byoosi bili nga malayika n'ababoolela.

Yezu bamutwiikha lisiina

²¹ Bifukhu shinaane ni byoola bye khumukhebelamo imbalu, bamutwiikha lisiina bari Yezu; lisiina lyeesi malayika amuwa nga ashiili khukwa ni munda ta.

Yezu bamuwanayo mu Lisaayilo Likhulu

²² Ne bifukhu ni byoola bye khukhwiŋoona nga kamakaambila ka Musa ni kaloma, Yozefu ni Mariya bayila umwaana i Yerusalemu khumuwanayo isi Umukasya,

²³ nga ni sharonebwa mu makaambila k'Omukasya shiri, “Buli shikiboole shiseetsa, kane shibatsake shikhosefu isi Umukasya,”

²⁴ ni khuwanayo tsisaayilo nga baloondelela byeesi kamakaambila k'Omukasya kaloma: bukuruku bubili namwe buwuusi bubwaana bubili.

²⁵ Ne khu mbuka nyene iyo mu Yerusalemu mwabamo umusaani lisiina lyeewe Simeoni, umuundu uwaba umulayi, lundi nga arya Wele. Umusaani uyu aba waliinda khubona khuwonesebwa khwa Isiraeli, nalundi aba wayitsula Umwoyo Umukhosefu.

²⁶ Umwoyo Umukhosefu aba wamubimbulila ari s'alifwa nga ashiili khubona khu Kristu w'Omukasya ta.

²⁷ Simeoni waraangililwa n'Umwoyo Umukhosefu, wiitsa mu Lisaayilo Likhulu. Basaali ni bareera umwaana khumukholela byeesi kamakaambila ka Musa kaloma,

²⁸ Simeoni wasuta Umwaana mu makhono keewe, wabuyila Wele nga aloma ari,

²⁹ “Aso Umukasya, ari n'usiibule umwakaanisi woowo atsye mu lukoosi, nga ni iwe ni wasuubisa,

³⁰ lwekhuba tsimoni tsase tsyaboone buwonesi bubwama is'uli,

³¹ bweesi warengekharengekha mu moni tse babaandu boosi,

³² khuuba buwaanga kwe khubimbulila shiisa shoowo isi Banaambo, ni khureera shiriifwa shoowo isi babaandu boowo ba Isiraeli.”

³³ Paapa ni Maayi b'Omwana beyaanga lwe bilomo byeesi Simeoni amulomakho.

³⁴ Aryo Simeoni wabaloombela ikhabi, ne walomela Mariya ari: “Umwaana yuno warobolebwele ni Wele, lwe khukhwiisa asi baalala asi ni babaandi khulamukha khukhwaama mu bafu khu bakali mu Isiraeli, lundi aliiba khabonelo khakhaama isi Wele kheesi balikhaandisa,

³⁵ nio bimoonyo bye bibyambaaso bye kimyoyo kye babaandu bakali bibimbuliwe. Ni kumutaambo kumwooki kukuuli nga lurima, kuliwuna kumwoyo kwoowo.”

³⁶ Abawo naye umuŋoosi uwekhasi ulaangiwa Ana, umukhaana wa Fanueli, uwe mu shikuuka sha Aseri. Anna aba umuloosi, ne mu bukhaana bweewe, abaakho n'umuseetsa mu bukhwaale khumala kimiiko musaafu kyonyene,

³⁷ ne lwanyuma lwayo wekyela namulekhwa, nga ari khu mbuka yino aba wayolesa kimiiko kamakhumi shinaane na kine kye bukhulu. Niye s'aruraatsakakho Mwisaayilo Likhulu ta, aba nga esaaya Wele shiilo ni kumuusi, nga abuya ntsala lundi nga aloomba.

³⁸ Mu mbuka nyeneyo nga Yozefu ni Mariya ni Yezu bali Mwisaayilo Likhulu, Anna naye woola isi bali, wabuyila Wele, wakanikha khu mwana, nga aboolela boosi babaaba baliindilila Wele khusikula Yerusalemu.

³⁹ Nga Yozefu ni Mariya bamalile khukhola byoosi nga kamakaambila k'Omukasya ni kaloma, bakobolayo i Galilaaya, mu shiriimba she waawe i Nazareti.

⁴⁰ Umwaana watsowa weloosela khuuba ni kamaani, witsusibwa ni kamakhula, ni bubweela bwa Wele bwamubatsakakho.

Yezu nga ali mu Lisaayilo Likhulu

⁴¹ Abe buli mwiiko, basaali ba Yezu batsyatsaka i Yerusalemu khuuba khu Mayiiya ke Khubirakho.

⁴² Ne Yezu n'aba nga wolisile kimiiko liikhumi na kibili kye bukhulu, baatsya ni naye i Yerusalemu khu mayiiya nga isaambo yaawe ni yaba.

⁴³ Nga bifukhu bye kamayiiya byaweelekho, basaali beewe baaba bakobolayo ingo, Yezu warama mu Yerusalemu. Ne basaali beewe balekha khushimanyakho ta.

⁴⁴ Ne nibo ni bambaasa bari ali mwituuli lyaawe, nashiryo bakyeenda lukyeendo lwe shifukhu shitweela. Ne lwanyuma barakikha khumuweentsa mu balebe, ni mu basaale baawe.

⁴⁵ Ne ni balekha khumunyoola ta, bakobolayo i Yerusalemu, nga bamuweentsa.

⁴⁶ Lwanyuma lwe bifukhu bitaru, bamunyoola wikhaale mu Lisaayilo Likhulu akari mu baleekeli, nga abarekeeresa lundi nga abareeba bireebo.

⁴⁷ Boosi babaamuwulila beyaanga lwe kamakyesi ni khukhwiilamo khweewe.

⁴⁸ Basaali beewe ni baamubona basamilila busa. Kila maayi weewe amureeba ari, “Mwana wase, lwashiina kila ukhukholile ifwe uri? Lola paapawo ni nase khubeele khweyembeleele naabi nga khukhuweentsa.”

⁴⁹ Naye wabakobolamo ari, “Lwashiina kila mubeele mumeentsa? Simwamanyile muri shintsakhila ise khuuba mu ntsu ya Paapa?”

⁵⁰ Ne nibo balekha khumanya bulayi sheesi abelamo ta.

⁵¹ Lwanyuma Yezu wakobolayo ni nabo i Nazareti, wabawulilatsaka. Ne maayi weewe waliindatsaka bilomo ibyo byoosi mu mwoyo kweewe.

⁵² Aryo Yezu watsowa mu mubili ni mu makyesi, nga akanibwa ni Wele ni babaandu.