Baefeso 2 - Ibayibuli Ingwalaafu

Khukhwaama mu khufwa khuutsya mu bulamu

¹ Ni nanywe mwaba muli baafu lwe bumiinyi ni bibyonako byeenywe.

² Khaale mwaba mukyeendatsaka nga mulondelela shiibala shino byeesi shikana; nga mulondelela umuwuli we bisimu bye mu mbewo, nga niye umwoyo umubi uraambila akari muubo babamiinyalila Wele.

³ Ni nafwe lutweela khwaba nga nibo, nga khulondelela khukhwiwuuma khwe kimibili kyeefwe, khwebirisa nga kimibili ni bibyambaaso byeefwe ni byakana. Khuryo mu busaalikhana bweefwe khwaba babaandu be khukhaliwila kumusaango ni Wele, nga babaandu babaandi boosi ni bali.

⁴ Ne Wele mu buyiindifu bwe shiisa sheewe, ni khukana khweewe khukali khweesi akhukanamo ifwe,

⁵ ikhaba nga khwaba baafu mu byonako, wakhuwa ifwe bulamu atweela ni Kristu. Shino shili lwe bubweela bwa Wele kila abawonesa inywe.

⁶ Ni Wele akhulamusa ifwe atweela ni Kristu Yezu, nalundi wakhwikhasa atweela ni Kristu mweene mu shiibala she mwikulu.

⁷ Shino ashikhola ari nio manya mu miboolo kikiitsa mumoni, okesanise buyiindifu bukali bwe bubweela bweewe, ni shiisa sheewe isiifwe mu Kristu Yezu.

⁸ Lwekhuba inywe babafukiilila mwawonesebwa lwe bubweela bweewe, akhuba lwekhuba ndi inywe mumwashikhola ta, ne shili shiwaanwa sha Wele.

⁹ Shino sishakholebwa lwe buraambi bweenywe bulayi ta, nio ilekhe khubawo umuundu yeesi uwibuyila ta.

¹⁰ Ifwe khuli buraambi bwa Kristu, khukhwabuumbiwa mu Kristu Yezu khuraamba buraambi bulayi, bweesi Wele umweene amala khaale khukhuŋoonaŋoonela ari ifwe khukholatsake.

Buutweela mu Kristu

¹¹ Ni mushebulile muri inywe mumuuli Banaambo mu busaalikhana, beesi Bayudaaya balaangatsaka bari basiinde, ni nabo babeene belaanga bari babenjile lwekhuba baaba bayinjila imbalu iye kumubili ni kamakhono ke babaandu.

¹² Ni mushebulile muri khaale'kho abe mwayawukhanisibwa khukhwaama khu Kristu, mwaba muli Banaambo busa, nga si muli batweela khu baandu ba Wele ta. Abe inywe babaromboora khukhwaama kh'undakaano iilimo ibyo byeesi Wele asuubisa babaandu beewe, mwaba mu shiibala muno nga si muli ni kumwiyikino nalundi nga si muli ni Wele ta.

¹³ Ne mu Kristu Yezu, inywe mumwaba aleeyi, ari mwareerebwile ambi khulwe khutsukha kamafuki keewe.

¹⁴ Lwekhuba Kristu umweene niye lukoosi lweefwe, nga akalusa Bayudaaya ni Banaambo khuuba babaandu batweela, nga awanayo kumubili kweewe kumweene kukwarusawo shiseenge she bubiyile shishawukhanisa.

¹⁵ Niye mu mubili kweewe arusawo kamakaambila ke Bayudaaya, ni bilakilo ni khuwula khwako khwoosi, nio akile mu manaambo kabili arewo umuundu mutweela umuyaakha mu butweela ni naye, areere lukoosi.

¹⁶ Lwe khuufwa khweewe khu musalaba, Kristu akobosawo busaale akari we Bayudaaya ni Banaambo mu mubili mutweela wabakobosa isi Wele, wahesa bubiyile bubwabawo.

¹⁷ Aryo Kristu etsa wababoolela Kamakhuuwa Kamalayi ke lukoosi, is'inywe mumwaba aleeyi, n'isi ibo babaaba ambi.

¹⁸ Lwekhuba khulwa Kristu, fweesi Bayudaaya ni Banaambo khunyala khukhwiitsa isi Paapa mu Mwoyo mutweela.

¹⁹ Nashiryo, inywe si muli lundi Banaambo namwe babeetswa ta, ne muli basaalikhana atweela ni bakhosefu ba Wele, nalundi muli babaandu be ntsu ndweela iya Wele.

²⁰ Ni nanywe mwayombekhebwa khu luwoongwa lwe baarume, ni baŋoosi, ni Kristu Yezu umweene nga niye libaale likhulu lilimisibwile mu soonda.

²¹ Mu niye nimwo mweesi shishombekhe shoosi shiwambanila atweela sheema, lundi shatsowa, shekyela lisaayilo likhulu likhosefu ly'Omukasya.

²² Lundi mu niye mweesi mwombakhibwila atweela khukhwikyela shishikhalo sha Wele mweesi Umwoyo weewe amenya.