فیلیپیَل 2 - کتاب مقدس به زبان لکی - گویش مرکزیسرمقش گِرتِن اژ تاواضی مسیح 1 اِسَه اَرّ دلگرمی‌ای اِنوم مسیح هَس، اَرّ دلگُوئی اژ مِحبت هَس، اَرّ رِقیفی اِنوم روحِ خدا هَس، اَرّ ریَم ئو دلسوزی هَس، 2 وَه هُم‌رِأ بیئِن، یِه جور مِحبت اَر یَک داشدِن ئو یِه‌دل ئو هُم‌رِأ بیئِن خَوشی مِه کاملا کَن. 3 اژ حرصی گه اژ خودخواهیَ یا قُراتی هُیچ کاری نَهَن بلکِم وَه تاواضی باقی اژ ووژتو بیتِر بِذانِن. 4 هُیچ کُمتو فَخَد وَه فگِر نفع ووژا ناو بلکِم وَه فگِر باقی‌ش بو. 5 هَراَ فگِرتونَ داشدوئی گه مسیحْ عیسی داشدی. 6 او گه وَه‌یاآگه هُم‌شکِل خدا بی. بِرُوَری وَه‌گَرد خدا نَگِرتیِ قَپا. 7 بلکِم ووژ حالی کِردی شکِل خُلُمی گِرتیِ ووژ ئو بی اِجور اِنسونَل. 8 ئو هَر یَگه بیَ شکِل اِنسونی، ووژ فِروتنا کِردی ئو تا مِردِن جُ‌جُ مِردِن اَر رُی صلیب فِربوبَر بی. 9 اَسَه خدا او فِرَه بِردیِ رُ ئو نُمی بِلِنگ‌تِر اژ کُل نُمَل بَشخیتیَ بی. 10 تا وَه نُم عیسی هر زُنی‌ای بِچَمی اِ آسمو ئو اَررُی زَمی ئو اِژیر زَمی 11 ئو هر زوئونی اعتراف بِهِه گه، عیسی مسیح ’خداونَ‘. اَرِه جِلال خداءِ باوَه. نُیر اِنوم دنیا 12 اِسَه، اِاِ عزیزَل، هَرهُنَ گه هَر فِربوبَر بینونَ، اِسگَه، نه فَخَد وخدی مِه هم بلکِم ویشتِر وخدی نیِم، اَرِیَگه نجاد ووژتو برَسیَ نتیجَه وَه ترسِم‌لرزِم ویشتِری خیرَتتو داشدوئی. 13 اَرِیَگه یَه خداءَ گه هم اِ خواس هم اِ عمل، اَرِه خَوشالی ووژ اِنوم هُمَه کارَ مِهِه. 14 هر کاری بی‌خُت‌خَت ئو بی‌دَمَرَگَه اَنجوم دَن، 15 تاگَه بی‌عِو ئو بی یَگه تصقیرکار بوئینو، آیلَل بی‌عِو خدا بوئینو، اِنومجا نسِل تور ئو اَژرئی‌اِرهاتی‌ای گه هُمَه اِنومو اِجور نُیر اِنوم ایی دنیاءَ بِریقَه‌تونَ مای. 16 کلوم ژییاین سفدِسخد بِگِرِن، تاگَه اِ روژ گِلاهُاردِن مسیح مِه افتخار بِهَم گه بی‌فادَه نَنیامَسِ دو یا بی‌فادَه زیَمَتِم نکیشیَ. 17 جُ‌جُ اَرّ لازم بو خوین مِه اِجور شِراوی گه وَخم بیَ، بِرِشی اَر رُی پیشکَشی قُرونی ایمو هُمَه، خَوشالِم ئو وَه‌گَرد کُل هُمَه خَوشیَ مَهَم. 18 هُمِه‌یش باس هَرهُنَ خَوشال بوئینو ئو وَه‌گَرد مِه خَوشی بِهِینو. تیموتائوس ئو اِپافْرودیتوس 19 اِنوم خداون عیسی امید دیرِم گه هَر وَه ایی زویَ تیموتائوس کِل‌کَم اَرِه تَکتو تاگَه اژ حالتو باخَوَر بوئم ئو مِن‌یش خَوشالا بوئم. 20 اَرِیَگه مِه کسی اِجور او نِرِم گه اِراسی اِهول آسائشتتو بو. 21 اُوُ کُل هانِ دُم نفع ووژونا، نه عیسی مسیح. 22 مِنتائای هُمَه مَذانینو گه تیموتائوس اژ اِنتحو ووژ اِرهاتیَ، گه چطور اِجور کُر وَه‌گَرد باوَه اِ کار انجیل وَه‌گَرد مِه خِلمت کِردیِ. 23 اِسَه امید دیرِم هَریَگه وضِ‌حالِم روشِه بی، او کِل‌کَم اَرِه تک هُمَه. 24 ئو اِنوم خداون اطمینو دیرِم گه ووژیشِم وَه ایی زویَ مام. 25 لازمِم ذِناسد اِپافْرودیتوس‌یش کِل‌بِهَم اَرِه تَکتو، گه بِرا ئو هُمکار ئو هُم‌قطار مِنَ ئو قاصی ئو خادم هُمِئَه اَرِه رَسیدَگی وَه هَوَجَه‌ل مِه. 26 اَرِیَگه اَرِه هُمَه کُل شوق داشدیِ ئو اژ یَگه هُمَه شنَفتِتونَ او مریض بیَ، پَژار بی. 27 اِراسی گه او مریض بی ئو کَتوئی اَر سَکَرات. مِنتائای خدا ریَم اَری کِرد، ئو نه فَخَد اَر او بلکِم اَر مِن‌یش، تاناخواد خُصه‌ی باءِ سر خُصَه‌لِم. 28 اِسَه مِه ویشتِر شوق دیرِم گه کِل‌کَمی، تاگَه هُمَه اِدوارَه اژ یَگه موئینینونی خَوشالا بوئینو، ئو خُصَه مِن‌یش کمتِرا بو. 29 اِسَه اِنوم خداون وَه خَوشی کامل، بِچِنیِ گِرد ئو عزّت بِنِن اَر هُنَ کسَلی. 30 اَرِیَگه اَرِه خِلمت اَر مسیح تا مِردِن چی، ئو اَرِه تِلافَتی کمِ‌کسری خِلمت هُمَه اَر مِه گیو ووژ آوشدیِ خطراِر. |
@ 2024 Korpu Company