फिलिप्पि 1 - लोहोरुङ्1 येसु खिरिस्टमि योम्पक् मुखुबा पावल नुङ् टिमोठिबाङ् फिलिपिबि चुःक्मिहा मान्डालिबिहा टुङ्घङ्पाचि हाङ् मान्डालि खाङ्खुबाचि हाङ् चोब्न सॆङ्सॆङॆ याॽमिचि ग साब्चिरा साब्हाङ्मे पाइकुङ्चि। 2 कानिम् आपा निवाँहाङ् नुङ् कानिम् पारभु येसु खिरिस्टऎ आन्ना नाम्नावाँ नुङ् सान्टि पिट्टानिर। पावलमि पारठाना 3 हानाम्स आन्ना मिॽलाकानिर काङॆ चुङुकुङॆ निवाँहाङ् हानाम्स ओहाक् पिकुङ् 4 हाङ् हानाम्स आन्ना चोब्नमि लागि पारठाना लॆःॽङार चेन्चासे पारठाना लॆःॽङा। 5 मान्ठाभनॆ नुऎ खानावाँ खेम्मिॽमॆ योम्पक्बि आन्नॆ निवाँयुङ् लॆःॽमिम्पा डिनाबाङ् हढारि सङ्क पाइबाक्मॆ सिःॽङानि। 6 हाङ् निवाँहाङ्ऎ आन्ना हङ्सि यिक्मिम्पा काम्नुऎ योम्पक् येसु खिरिस्ट होइखेपा सङ्क माटारढारि निवाँहाङ्ऎन मुकु हाङ् यॆरुकु कामानुङ् काङॆ लेकुङ। 7 हाङ् आन्नामि बारेबि काङॆ गरहाङ् मिन्मा नुऎ लि मान्ठाभनॆ काङॆ आन्ना एट्टान नाम्नाम् पिसिकानि। आन्नॆ काङा गरक्ल सॆक्चिम्पि चुःॽङार हाङ् बाहिरा चुइङ्र नुऎ खानावाँ इबिॽमा हाङ् आक्क खानावाँ कोब्माडोब्माम् लागि पाइबाक्मॆ सिःॽङानि। निवाँहाङ्मि नाम्नावाँऎन ग खानावाँ चाइ निवाँहाङ्ऎ कानि पिॽमिम्पा यो। 8 हाङ् आन्ना नाम्नाम् पिसिॽमॆ निवाँ खिरिस्ट येसुमि निवाँबाङ्न टाडॆ। हाङ् काङॆ आन्ना चुप्मा मिनुकानि लोमॆ चाइबानऎ लोमॆ निवाँहाङ्ऎ लेकु। 9 काङामि पारठाना चाइ आन्ना नाम्नाम् पिसिॽमॆ खानावाँबि पुःसे खारानॆ। आक्क नाम्नाम् पिसिॽमॆ खानावाँ चाइ चाइबानऎ खानावाँ नुङ् माङ् चाइ काइसॆ नुङ् काम्नुऎ ये लोमॆ फाक्हिमॆ निवाँ लिर। 10 मसॆ आन्नॆ माङ् चाइ काम्नुऎ हाङ् काइसॆ लोमॆ खानावाँ फाक्हिकाम्नि हाङ् खिरिस्ट टामार आन्ना सॆङ्सॆङॆ नुङ् आब्डिक् मॆड्डिङ्मा याॽमिचि लिकानि। 11 येसु खिरिस्टमि चॆक्मावाबाङ् टाङ्पामि हिङ्खामाबि निवाँनेन् योम्पक् यिगानॆ। आन्नामि काम्नुहा योम्पक् खाङुकुचिहाङ् याॽमिचिऎ निवाँहाङ् ङेबुकुचि हाङ् निङ् ठेरुकुचि। हिङ्चामा लोमॆ चाइ खिरिस्ट न 12 बुबुनानुसाचि, काङा सक्पि सिट्टाडॆ खानावाँऎ ग नुऎ खानावाँ फुबक्मॆ योम्पक् लिडा लोमॆ खानावाँ आन्नॆ लेसाम्नॆ कामानुङ् काङा मिन्ङा। 13 मान्ठाभनॆ काङॆ खिरिस्टमि खानावाँ खेम्मिॽमिम्पासॆ काङा सॆक्चिङ्पि सिडिङॆ ये लोमॆ हाङ् खिम्पिहा चोब्न टिलिङ्गाचि नुङ् होइढा याॽमिचिऎ वाब्डुचि। 14 हाङ् काङा सॆक्चिम्पि सिडिङॆसॆ ऎॽवाहा बुबुनानुसाचि पारभुबि चॆकुवॆ लिडामि हाङ् मान्किसिरे नुऎ खानावाँ खेम्मिखुबा चॆक्मावा नुङ्मा याॽमि लिडामि। 15 हाङ् ऎॽवाचिऎ चाइ काङॆ यिक्मिम्पा योम्पक्बि सिरि मिन्से काङॆ रक्न खिरिस्टमि योम्पक् मुटिखाङ्मि हाङ् ऎॽवाचिऎ चाइ नुऎ निवाँ नुङ्न नाम्नाम् पिस्सिसे योम्पक् यिगुक्मि। 16 खोचिऎ आक्क नुऎ खानावाँ खेम्मिकुचि मान्ठाभनॆ खोचिऎ नाम्नाम् पिसिङामि हाङ् काङा निवाँहाङ्ऎ नुऎ खानावाँ खेम्मिसि पाङ्हाङ्डिङ् कामानुङ् लेकुचि। 17 हाङ् होइडाचिऎ चाइ काम्नुऎ निवाँऎ हॆॽनॆ टर काङा सॆक्चिम्पि चुःॽङार काङॆ डुखा सक्पि डुखा आङ्मा सिॽङार कामानुङ् काइसॆ निवाँऎ खिरिस्टमि खानावाँ खेम्मिकुचिमि। 18 टर माङ्हाङ्स ग खानावाँमि बारेबि काङा चाइ चेन्चाॽङा। काम्नुऎ निवाँऎ हाङ्स हाङ् काइसॆ निवाँऎ हाङ्स खिरिस्टमिन खानावाँ खेम्मिॽमॆ योम्पक् लिसा। 19 मान्ठाभनॆ, आन्नामि पारठाना नुङ् पारभु येसु खिरिस्टमि लावाऎ पाइबाॽङा हाङ् काङा ग सेक्चिम्बाङ् फागुॽङा कामानुङ काङॆ लेकुङ्। 20 हाङ् काङॆ एट्टान मिन्डुङॆ खानावाँ हाङ् काङामि आस चाइ माङ्भनॆ, काङा ङेसिमाबि सिॽङानि, टर हानाम्स चॆकुवॆ याॽमि लिसे सिखॆॽमा सिःॽङा हाङ्स, हिङ्चाङा हाङ्स काङामि चोब्न हिङ्खामाबाङ् खिरिस्टमि निङ् ठेॽमॆ योम्पक् लिःर लोमॆन। 21 मान्ठाभनॆ काङा चाइ मान्ठा हिङ्चाङा भनॆ, खिरिस्टमि निङ्लावा लॆःॽमाम् लागिॽन हिङ्चाङा सिःखॆॽमा ग झाना नुऎन लि। 22 टर ग सालुङ्बि हिङ्चासे नुऎ योम्पक् यिक्मार काम्नुऎ लिऎ रु सिखॆॽमा चाइ नुऎ लिऎ, हाम्पॆ चाइ सॆःक्मॆ खानावाँ मान्सॆःक्हिङा। 23 काङा ग माङ् लॆःॽमॆ लॆःॽमॆ पिक्खॆडिङ् मान्ठाभनॆ ग बाखाटेम याइडामाहाङ् खिरिस्ट नुङ् पेन्मा सङक् मिनुॽङा। ग चाइ एट्टान नुऎ खानावाँ रेम। 24 टर आन्नामि लागि चाइ काङा हिङ्चाढाङ्मान नुऎ खानावाँ रेम। 25 ग खानावाँ काङॆ नुःर लेकुङ। मसॆ आन्नामि निवाँयुङ् पुमिस्सि हाङ् आन्ना एट्टान हाङ्हाङ् मुसि काङा हिङ्चाङा। 26 हाङ् काङा होइखेपा आन्नाबि टाःॽङार काङा लिमिम्पासॆ आन्नॆ खिरिस्ट येसुमि निङ् याॽलऎ बाङ्न नुःर ठेरुकाम्नि। 27 चोब्बाङ् ढ्या खानावाँ चाइ माङ्भनॆ, आन्ना माङ् लॆकानि हाङ्स खिरिस्टमि नुऎ खानावाँ रक्न खॆन्चाकुवॆ योम्पक् टे यिगानॆ। मसॆ काङॆ आन्ना चुब्से खाङ्कानि हाङ्स हाङ् माचुप्रे आन्नामि बारेबि खेमुकुङ् हाङ्स, आन्नॆ एक्क निवाँ मुसे, नुऎ खानावाँमि लागि एक्कसॆ होइक पाइबाक्मिम्पा खाङ्मा मिनुॽङा। 28 आन्ना काइर लॆखुबाचिनुङ् आनआकिसिआनॆ। मान्ठाभनॆ आन्नामि आकिसिमॆ निवाँ चाइ निवाँहाङ्ऎ डॆङ्पि खोचि हानाम्स लुक्खॆॽनॆ डान्डा पिकुचि लोमॆ खानावाँमि चिन्ना यो। हाङ् ग खानावाँ गस रेम, खोचिऎ आन्ना मान्टहाङ् हिङ्चाडानि कामानुङ् लेटकुचि। 29 मान्ठाभनॆ आन्नॆ खिरिस्टबि निवाँयुङ् लॆःॽमॆ बारडाना टे हॆॽनॆ, टर खोमि लागि डुखा आङ्से खोम् योम्पक् यिक्मॆ बारडाना सङ्क टक्चाडाम्नि। 30 हाङ् याॽलहा डिनाबि माङ् नुङ् काङा चुङ्मिम्पा लॆटिङॆ लोमॆ खाङ्डाम्नि। हाङ् आन्नॆ खेमिन्टक्न हस काङा आक्कनुङ् चुङ्मे पाइॽङा। ह आन्ना सङ्क आक्रक्मान डुखा आङ्मॆ पाइकानि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.