२ ठेसलोनिकि 2 - लोहोरुङ्पारभु टामाबाङ् याॽल लिहा खानावाँ 1 बुबुनानुसाचि, पारभु येसु खिरिस्टमि टामॆ लःमि बारेबि हाङ् निवाँहाङ्ऎ कानि येसु चुऎ ठालबि खोम्मॆ खानावाँमि बारेबि काङ्कॆ आन्ना नुःर लोखाचिम्, 2 याॽमिचिऎ पारभु टामॆ डिना टाखॆडा कामानुङ् निवाँहाङ्बाङ् काङ्कॆ यामुमिम्पा कामानुङ् यामुखाङ्सामि हाङ् खानावाँ इबिटानि हाङ् साब्चिराबाङ् लोसामि हाङ्स, हुन्न आन्ना आफुसानॆ हाङ् आकिसिआनॆ। 3 आसॆ सङ्क आन्ना आफोप्सिॽमिर। मान्ठाभनॆ डिरिक् याॽमिचिबाङ् निवाँहाङ् नुङ् खिमॆटुमॆ योम्पक् मालिरढारि हाङ् यायेॽमा मॆड्डिङ्मा याॽमि नासॆलिमाम् लागि मॆटारढारि आक्क डिना टानि। 4 आक्कसॆ निवाँहाङ् हाङ् याॽमिचिऎ निवाँहाङ् कामानुङ् चुङ्मिम्पा चोब्न ठका काइर लॆकु। मसॆ खो खोसॆॽन आक्खा चोब्न निवाँहाङ्बाङ् ढ्या मुकु हाङ् काङान निवाँहाङ्ङा कामानुङ् निवाँहाङ्मि खिमहङ्सि पेनुक। 5 माल् काङा आन्नानुङ् चुइङ्र लोमिम्पा इघा चोब्न खानावाँ मिॽलापाम्निनॆ? 6 हाङ् आक्क उम् लःबि टे खाङ्मुर कामानुङ् माङ्ऎ चाइ लाब्भुङ्डुवॆ लोमॆ खानावाँ आन्नॆ लेकाम्निन। 7 मान्ठाभनॆ आक्क यायेॽमा मॆड्डिङ्मा हिङ्वाऎ खुनिङ्म योम्पक् ग यिक्पखॆडु। हाङ् आक्क लाप्ढाङ्खुबा चाइ निवाँहाङ्ऎ मालाराङ्रढारि खोसॆ म लाप्ढाङ्कु। 8 हाङ् आक्क डॆङ्पि म यायेॽमा मॆड्डिङ्मा याॽमि खाङ्मु हाङ् पारभु येसुऎ आक्क खोम् याःमि सक्माऎ नासॆ लॆकु हाङ् पारभु खोम् निङ्लावा नुङ् टामार आक्क चॆक्मावा मॆड्डिङ्मा मुकु। 9 खो साइटानमि चॆक्मावा नुङ् टाहाङ् याॽमिचि फोप्सिॽमाम् लागि हुन्नाहा चोब्न खालाहा चॆक्मावामि योम्पक्, आक्खॆॽमा लुहा खानावाँ हाङ् चिन्नामि योम्पक् यिगुकु। 10 हाङ् आक्कसॆ हिङ्खामा पिक्खुबा खानावाँ सिच्चासे निवाँ मॆड्डिङ्मा याॽमि लिमानुङ् काइसॆ लाम्फुबि लङ्पडामिहाचि चाइ फोप्सिकुचि। खोचि डुखाबि सिःक्मि मान्ठाभनॆ खोचिऎ चाइबानऎ खानावाँ हाङ् हिङ्खामा सिच्चाउचि। 11 मसॆ निवाँहाङ्ऎ खोचिऎ फोप्सिमाम् लागि एक्क खानावाँ खोचिबि पाङ्हाङ्कु मसॆ खोचिऎ हुन्नऎ खानावाँबि निवाँयुङ् लॆटुचिर। 12 मान्ठाभनॆ चाइबानऎ खानावाँ सिच्चाखुबाचि, टर हिङ्वा योम्पक् नेन्चाखुबा चोब्न याॽमिचि आब्डिक् नुङ्मा लिमिर कामानुङ् निवाँहाङ्ऎ ग लॆकु। नुःर निवाँयुङ् लॆःॽमॆ 13 पारभुऎ नाम्नाम् पिस्सिमिम्पा बुबुनानुसाचि, काङ्कॆ आन्नामि लागि निवाँहाङ् ओहाक् पिॽमान लॆ। मान्ठाभनॆ याॽलऎ बाङ्न निवाँहाङ्ऎ आन्ना हिङ्चाआनॆ कामानुङ् सॆगानि हाङ् चाइबानऎ खानावाँ सक्पि आन्नॆ लॆःॽमिम्पा निवाँयुङ् नुङ् सॆङ्सॆङॆ लावाबाङ् आन्ना सॆङ्सॆङॆ मुसे लाखॆडानि। 14 आक्कमि लागिॽन निवाँहाङ्ऎ आन्ना काङ्कॆ खेम्मिॽमिम्पा नुऎ खानावाँबाङ् कानिम् पारभु येसु खिरिस्टमि निङ्लावा आन्नॆ स टक्चाआनॆ कामानुङ् सेःरानि। 15 मसॆ बुबुनानुसाचि, नुःर पेनानॆ हाङ् काङ्कॆ लोमिम्पा आठावा साप्हाङ्पा खानावाँ रक्न पाइढाङ्सानॆ। 16 हाङ् कानिम् पारभु येसु खिरिस्ट हाङ् कानिम् निवाँहाङ् आपाऎ कानि नाम्नाम् पिस्सिडि। हाङ् खोम् हानाम्स आलुक्खॆखुबा नाम्नावाँबाङ् नुऎ आसा पिट्टि। 17 खोसॆ आन्नामि निवाँ चॆकुवॆ मुसुर हाङ् आन्ना हानाम्स काम्नुऎ योम्पक् नुङ् खानावाँ इखुबा मुसानिर। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.