མད༌ཐཱ༌ 9 - New Testament in Ladakhi Langageزاپھوگکھانجیک پھانچوگا زادس۔ 1 حضرت عیسیٰ مسیح ٹُھوزینگا ژونتے تشوے پھارکا کھونگرانگی ڈونگکھیرلا سکیودّا زادس۔ 2 تیرو می کھاچیگی زاپھوگکھانجیک مالتسیکا کھورتے حضرت عیسیٰ سی یودسا کھیونگس۔ کھونگونی میبو گیالچوگچیسّی ایمان چوکھانبو حضرت عیسیٰ سی زیگستے کھونگی زاپھوگکھانبوا مولس، ”بُوژا سیمسدے چوس، نگے کھیرانگی دِیگپاگونلا مُعافی تانّگاد۔“ 3 تیبو تشورّاچیگ شریعتی عالِم کھاچیگی سیمسّی نانّگا سامس، ”ای می بوے نلوق چوس۔“ 4 کھونگونی سامکھانبو حضرت عیسیٰ سی کھیینتے مولس، ”کھیوجے کھیوجارانگی سیمسّی نانّگا سیمسنگان چیا سامّاد۔ 5 چی سامّاراگ، ’ کھیرانگی دِیگپا مُعافی تانگستے این‘ زیرچیسپو لامو اینّوگا یا ’لانگستے ڈول‘ زیرچیسپو؟ 6 اِین نانگ اِبنِ آدم دُنیائیکا دِیگپا مُعافی تانگچیسّی وانگچھا یودکھانبو کھیوجا ستانین“ تینے حضرت عیسیٰ سی زاپھوگکھانبوا مولس، ”لونگس، رانگی مالتسا کھورتے کھانگپا سونگ۔“ 7 کھو لانگس یانگ کھانگپا سونگ۔ 8 میتشوگسّی تیبو تھونّگاچیگ، سیوا تانگ جیگسّی نانّگا، میا یتسوگسّی وانگچھا سالّا زادچیسلا خُدا ستودپا پھولس۔ متّی بودّا زادس۔ 9 حضرت عیسیٰ مسیح تیکانے سکیودین یود زانے، متّی ٹھالنینسے ناسّیکا دُوگستے یودا زِیگس یانگ کھونگی کھوا مولس، ”نگے ستینگرانگنے ڈونگس۔“ کھو لانگستے حضرت عیسیٰ سی ستینگرانگنے ڈانگس۔ 10 ستینگنے حضرت عیسیٰ سی متّی کھانگپا گونگزان دونّالا سکیودتے یودتوس، ٹھالّینکھان تانگ جان دِیگپاچان می مانگپوانگ حضرت عیسیٰ تانگ لوبٹوگسگون نیامپو کھارجی زالا یونگستے یودپین۔ 11 فریسی پاگونّی تیبو تھونّگاچیگ، کھونگونی حضرت عیسیٰ سی لوبٹوگس گونلا ٹیس، ”کھیوجے لوبپون، ٹھالّینکھان تانگ دِیگپاچان میگون نیامپو چیا دونتانگ دونّانوگ؟“ 12 حضرت عیسیٰ سی تیبو سانّاچیگ، کھونگی مولس، ”زُومو یونگکھانجیکّا مانے کھامزانگ میجیکّا امچھی گوسّا مانوگ۔ 13 سونگ یانگ خُدے، قُربان پھولچیس مانپا، چیگ تانگ چیگّا سنینگرجے ستانچیسپو نگے دودپا این مولکھانّی تونبو چی این ہاگوچیسّی سونڈوس چوس۔ کھیوجا ٹانگپو این سامکھانگونلا مانپا، دِیگپاچانگونلا بودّا نگا یونگسپین۔“ سنیینگپا لوگثولگون حضرت عیسیٰ سی سوما لابجاگون نیامپو ماثے۔ 14 تینے یوحنّانی لوبٹوگسگون حضرت عیسیٰ مسیح یودسا یونگستے کھونّگا ٹیس، ”نگاجا تانگ فریسی پاگون روزا لان مانگپو دوگّاد، اِین نانگ نیرانگی لوبٹوگسگون چیا روزا دوگّا مانوگ؟“ 15 حضرت عیسیٰ سی لانسالس، ”باگستونّی نانّگا ماگپا نیامپو یود زانے کھوے ڈونپوگونّی ردوگپو چوینّا؟ میچو۔ توسپو لیباین نام ماگپا ڈونپوگونّے پھیستے کھیرین، تینے کھونگونی ردوگپو چوستے روزا دوگین۔“ 16 ”سوجیکّیانگ کوسلاگ سنیینگپاجیکّا راس سومے لانبا تابّا مانوگ، کالتیس تابنا کوس ٹھواچیگ لانبا سومابو کھونگستے کوس چھادکھانبو مانّگا تھوا چوانوگ۔“ 17 تینّا تسوگسلا چھانگ سوما پاگسپے سکیاپا سنینگپے نانّگا میلوگ۔ کالتیس لوگنا چھانگبوا سکیور لانگستے پاگسپے سکیاپا بوستے چھاداین، چھانگ بوتے سکیاپانگ دودمید چھین۔ اِین نانگ چھانگ سوما پاگسپے سکیاپا سومے نانّگا لوگنا چھانگ تانگ پاگسپا نیسکو سکیوبین۔ زُومو یودکھانّی بومو تانگ بومو چھونگون شیکھان۔ 18 مسیح یشُوحی تیگون مولین یودتوس، یہُودی پے عبادت خانہے اُسکیونگ جیک یونگستے پِیکدونگ ژُوگستے کھونّگا زیرس، ”نگے بومو داگسارانگ شی، اِین نانگ نیرانگ سکیودتے نیرانگی چھاگ کھویکا بورّا زادنا، کھو سوناین۔“ 19 حضرت عیسیٰ تانگ کھونگی لوبٹوگسگون جانگستے اُسکیونگ نیامپو سکیودّا زادس۔ 20 تینّا توسلا بودکھانّی لو چوگنییسنے پھارلا توسگیون ٹھاق بینگچیسّی زُومو یودکھانّی بوموجیک حضرت عیسیٰ سی گیابنے یونگستے کھونگی نامزے ٹُوجیکّا لاگپا توگس۔ 21 کھوے کھورانگی سیمسّی نانّگا سام، ”کالتیس کھونگی نامزا لاگپا تھوگنا نگے زُومو گیالّانوگ۔“ 22 حضرت عیسیٰ سی گیورّا زادتے بوموا زِیگس، ”بومو، سیمستے چوس۔ کھیرانگی ایمانی کھیرانگ پھانچوگستے این“، تینّامالّا کھوے زُومو گیال۔ 23 حضرت عیسیٰ سی اُسکیونگی کھانگپے نانّگا سکیودّاچیگ لینگبو پھوکھانگونّی نیانگانّی نیاگس پھوین یانگ میگون کُوچو تانگین نگواین زِیگس۔ 24 حضرت عیسیٰ سی کھونگونلا مولس، ”بینگتے سونگ، بوموبو ماشیا نییدلوگستے این“، اِین نانگ کھونگونی ٹھیلگود تانگس۔ 25 کھونگون پھیلوگا پھینگستے ستینگنے حضرت عیسیٰ سی بومو یودسے نانّگا سکیودتے، کھوے لاگپا تھامسّاچیگ، بوموا سروک لوگستے تھوب یانگ کواگ لانگس۔ 26 یانگ تے ناتسُولبو یول گانگپوے نانّگا پھیل۔ جارا تانگ ہانڈانگ گُون پھانچوگا زاد۔ 27 بوموے کھانگپانے حضرت عیسیٰ مسیح بینگتے سکیود زانے، جارا نیس کھونگی ستینگرانگنے یونگستے کُوچو تانگین زیرس، ”گیالپو حضرت داؤد ّی اولاد نگاجیکا سنینگرجے زاد۔“ 28 حضرت عیسیٰ سی کھانگپے نانّگا سکیودّاچیگ، جارا نیسکو کھونگ یودسا یونگس۔ کھونگی مولس، ”نگا، کھیوجا پھانچوگ نیانین سامتے ایمان چوادا؟“ کھونگ نیسکوے زیرس، ”نگاجے ایمان چواد۔“ 29 تینے حضرت عیسیٰ سی کھونگونی میگیکا چھاگ بورتے مولس، ”کھیوجا ایمان یودکھان نانگجین ڈوبشیگ۔“ 30 کھونگونی میگ گیالتے تھونگتھوب یانگ حضرت عیسیٰ سی کھونگونلا، ”یبوے سکورلا سوانگ ماشاد“ مولتے سپانگ پُودّا زادس۔ 31 اِین نانگ کھونگون پھیلوگا سونگتے یولجونگس گانگپوے نانّگا حضرت عیسیٰ سی کھونگونلا زادکھانّی ناتسُولبو پھیلچوگس۔ 32 کھونگ نیسکو چھا تشارّاچیگ، ردود جوگسکھان ہانڈانگجیک حضرت عیسیٰ سی یودسا کھیونگس، 33 یانگ ردود پو پھینّگاچیگ، ہانڈانگبوے سپیرا تانگس۔ میتشوگس ہالاستے زیرس، ”بنی اِسرائیلی نانّگا ایتسوگشیگ مانے ماتھونگ۔“ 34 اِین نانگ فریسی پاگونّی زیرس، ”ردودگونّی گوبے کھوا ردودگون پھینگچیسّی کھیود تانگستے اینوگ۔“ لاسمیی گھوسدوم۔ 35 حضرت عیسیٰ مسیح ڈونگکھیر تانگ گامیول تشانگمالا سکیودتے، مجلِس گُونی نانّگا لابجا سالین نامکھے گیالثیدّی گاموےناتسُولبو شادّا زادس، یانگ زُومو تانگ ناد تشانگما پھانچوگا زادس۔ 36 کھونگی میتشوگسپو زیگسّاچیگ، کھونگّونّیکا سنینگرجے سکییس چیازیرنا کھونگون ناگس تھونگکھان یانگ روگس ماتھوبکھان، لُوگ زی میدکھانّی لُوگ ژوگس یودپین۔ 37 تینے حضرت عیسیٰ سی لوبٹوگس گونلا مولس، ”ستونتھوگ چھینموجیک رنگا چھوگچھوگ دوگ، اِین نانگ ستونتھوگ رنگاکھانّی لاسمی ما نیونگونجیک مانے میدوگ۔ 38 تیبویپھیا ستونتھوگی داگپو خُدا ستونتھوگ رنگاکھانّی لاسمی مانّگا کالا زادچیسلا دُعا چھوس۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation