མད༌ཐཱ༌ 2 - New Testament in Ladakhi Langage

شار چھوگسنے سکیودکھانّی مجُوسی عالِم کُن۔

¹ ہیرودِیس گیالپو این زانے، یہُودیہ یولّی بیت لحمی نانّگا حضرت عیسیٰ سکیس۔ تیتوسلا شار چھوگسنے مجُوسی عالِم سکارما سیلکھانّی می کھاچیگ یروشالیمّی گیالسا یونگستے

² ٹیس، ”یہُودی پے گیالپو لتامسکھانبو کانے دُوگ؟ نگاجا کھونگی سکارما شار چھوگسلا تھونگپا، کھونّگا سجدہ چوا یونگسپین۔“

³ تے سپیرابو تشورّاچیگ، گیالپو ہیرودِیس ہالاستے جیگس یانگ یروشالیم پا تشانگمانگ۔

⁴ گیالپو ہیرودِیس اِمام کُنی چھونمو گون تانگ شریعتی عالِم تشانگما بودتے خُدے لدامّا زادکھانّی مسیحا کارُو سکیچیس دوگ زیرتے ٹیس۔

⁵ کھونگونی لانتانگس، ”یہُودیہ ڈونگکھیر بیت لحما۔ کازوگ پیغمبری خُدے مولّا زادکھانبو ڈِیازادتے اینوگ،

⁶ یہُودیہ ڈونگکھیر بیت لحم، ’یہُودی پے یولجونگسّی نانّگا کھیوجے ڈونگکھیر چھونگونبوانگ، ڈونگکھیر ما کھاگچانجیک گیورین، چیازیرنا کھیوجے ٹونے تیزوگ وانگثولپاجیک یونگین، کابوے بنی اِسرائیل پا نگے میگونلا لُوگ زی تشولّا ستاستوگ چوین‘۔“

⁷ تینے ہیرودِیس شار چھوگسّی مجُوسی عالِم کُن سوانگ گیوسچھا ماچوگّا چیگپو بودتے سکارما گومارانگ تھونگکھانّی توسپو گیوسچوس۔

⁸ کھوے کھونگون بیت لحما لامچوگستے زیرس، ”سونگ، جیبسال چوستے ٹھوگوبو ژول، یانگ کھونگ تھوبّاچیگ لوگستے یونگستے نگا شود، چیازیرنا نگا کھونگ جالّا سونگتے کھونّگا چولین۔“

⁹ گیالپوے سپیرا زیرکھانگون نیانتے ستینگنے، کھونگون شار چھوگسلا تھونگکھانّی سکارمے گیابنے سونگ، کا بو ٹھوگو یودسے ناسّیکا لیبّاچیگ، نامکھے نانّگا ڈول ماڈولّا دُوگس۔

¹⁰ سکارمابو ڈول ماڈولّا دُوگستے تھونّگاچیگ، کھونگونی سیمستھادپوے گانگ۔

¹¹ کھانگپے نانّگا چھاچیگ، کھونگونی ٹھوگو کھونگرانگی اما حضرت مریم نیامپو تھونگ، یانگ کھونگون پِیکمویکا گییلتے کُوسپا نیامپو سجدہ تانگس ۔ تینے ستیرغامگون پھیستے سیر، ٹیجیم چانّی سپوس تانگ میر زیرکھانّی ٹیجیم چانّی مارناگی سکییسگون کھونّگا پھولس۔

¹² یانگ نیلامی نانّگا خُدے کھونگونلا گیالپو ہیرودِیس یودسا لوگستے ماچھا مولس، یانگ لام سوسوجیکنے رانگیولّا لوگستے سونگ۔

مصری یولجونگسلا شورّا زادس۔

¹³ مجُوسی عالِم کُن لوگستے چھاچیگ، خُدے فرشتا جیک حضرت یُوسفؔ ی نییلامّی نانّگا مولین جال، ”لونگس، ٹھوگو تانگ کھونگی اما مصری یولجونگسلا ٹھیدتے شور۔ یانگ نامتشوگپا نگے میزیر تےتےتشوگپا تیرو دوگ، چیازیرنا گیالپو ہیرودِیس ٹھوگوبو سادچیسلا ژالین۔“

¹⁴ حضرت یُوسفؔ لانگستے ٹھوگو تانگ ٹھوگوی اما حضرت مریم نیسکو ٹھیدتے تینّا ژانلا مصری یولّا شورتے سونگ،

¹⁵ کارُو کھونگون گیالپو ہیرودِیس شیـ شی ژوگپا جوگس۔ کازوگی خُدے پیغمبر گیُودتے، ”نگے مصر یولنے پھیلوگا نگارانگی بُوژا بودپین“ مولتے یودکھانبو ڈانڈا ڈوب۔

¹⁶ گیالپو ہیرودِیس مجُوسی عالِم گونّی گوبسکور تانگکھانبو ہاگوپا ماثانٹے ثو یونگس۔ کھوے بیت لحم تانگ تے نییکھورّی یولّی نانّگا یودکھانّی بُوژا لو نیس یانگ تیسانگ چھونّگا تشانگما سود زیرتے کا تانگس، کا بو مجُوسی عالِم گونّی تانگپورانگ سکارمابو تھونگ زیرکھانّی توس نانگجین اِنپین۔

¹⁷ تینے پیغمبر حضرت یرمیاہ گیُودتے خُدے مولکھانگون ڈوب۔ تیبو نی،

¹⁸ ”رامے یولنے سکاد تشورین، نگوین یانگ ردوگپو چوین۔ راہیلّی اولاد رانگی ٹھوگوگونّی پھیا نگوین، اِین نانگ سیمسّو میگوس، چیازیرنا ٹھوگوگون شیتے مید۔“

مصر نے لوگتے سکیودس۔

¹⁹ گیالپو ہیرودِیس شیتے ستینگنے، حضرت یُوسفؔ مصری یولّا یودی توسلا کھوا نییلامّی نانّگا خُدے فرشتا جیکّی مولس،

²⁰ ”لونگس، ٹھوگو تانگ کھونگی اما ٹھیدتے بنی اِسرائیلی یولّا سونگ چیازیرنا ٹھوگو سادّالا ژالکھانگون شیتے مید۔“

²¹ تیبویپھیا حضرت یُوسفؔ لانگستے ٹھوگو تانگ کھونگی اما ٹھیدتے بنی اِسرائیلی یولّا لوگستے سونگ۔

²² اِین نانگ حضرت یُوسفؔ بی ارکھیلییس کھوے ابا ہیرودِیس تشابسلا یہُودیہ گیالپو چوکھانبو تشورّاچیگ، کھو یہُودیہ یولجونگسلا لوگستے چھاچیسلا جیگس۔ کھوا نیلامّی نانّگا لابجا زاد پاسانگ گلِیلی یولجونگسلا سونگ۔

²³ کھونگون سونگتے ناصرة زیرکھانّی ڈونگکھیرّی نانّگا دُوگس۔ تینّابویپھیا سنگونمے پیغمبر گونّی کھونگی سکورلا مولکھانبو ڈانڈا ڈوب، ”کھونّگا ناصرة پا جوین۔“