फिलिपियों 4 - लाहौली बाइबिल

¹ हे गिऊ प्यारे साथी विशवासी रे, गेह केतंङ साते महस दाह लहज़ातग दंङ गेह केतंङ साते दोईमी इंतज़ार लेह लेहकी तोतोग। अंऊ गिऊ खुशी ए गिऊ ईनाम तोह, गिऊ प्यारे न्वारे, प्रभुरिंङ दि ध्यांए ठ्रोह खड़े बंङज़ुंई।

व्यवहारिक निर्देश

² गेह यूओदिया ए सुनतुखे, झुल्ला रिहंङ रंङ साते विनती लहज़ातग, कि प्रभुरिंङ ठ्रोहका शुहचे बंङज़ुंई।

³ हे सच्चे साथी सुनतुखे, गेह करंङ साते बिनती लहज़ातग कि का दुह मेच़िमी तु मदत लोह, कि दोरे ला एनातु बिचंङ ठ्रोहका शुहचे बंङज़ोर, छना कुचे दोच़ी गेरंङ साते रूठे खबर फेलाच़िमी थल्जी, क्लेमेंस ए गिऊ ऊई साथीरंङ साते मेहनत लहरी, अतु मिन जीवनो कताबारिंङ च़ेहसी तोह।

⁴ प्रभुरिंङ सदा खुश बंङज़ुंई; गेह यह्च़ा कुट्रातग, खुश बंङज़ुंई।

⁵ केहतु कोमलता भत्ते मीहतु टोईच़ी प्रगट शोतो, प्रभु यीशु युरनाह वापिस अपतो।

⁶ अंऊ ला गप्पो चिंद थालंही, पर हर इच्च़ा हालाता रिंङ केहतु निवेदन, प्रार्थना ए बिनती रंङ साते धन्यवाद रंङ साते परमेश्वरो तुईज़ी हाज़िर लेह केऊर।

⁷ दोहपल परमेश्वरो शांति, अंऊ मीहू समझबे परे तोह, केहतु सेहम ए केहतु विचार मसीह यीशु रिंङ सोटेगे ताऊतो।

दि गप्पा रिंङ ध्यान लगाएतुंई

⁸ झांह लेह, हे गिऊ प्यारे साथी विशवासी रे, अंऊ-अंऊ गप्पारे हेले तोह, दंङ अंऊ-अंऊ गप्पारे आदरो जोगे तोह, अंऊ-अंऊ गप्पारे ठीक तोरे, अंऊ-अंऊ गप्पारे पवित्र तोह, अंऊ-अंऊ गप्पारे सलटे तोतोर, दंङ अंऊ-अंऊ गप्पारे सेहमा गमेकी तोह मतलब अंऊ गप्पा रूठे ए षटणो जोगे तोह दोतु टोईच़ी ए केहतु सेहम लेहकी बंङज़ी जूंस।

⁹ गिऊ गप्पा रंङ साते ए गिऊ कमो दोरच़ी अंऊ ला केहच़ी सिखेक्च़ातंई ए ग्रहण लहज़ातंई, दोऊ ए हिसाबे ज़ोई, दोथर शांति ऊ परमेश्वर केतंङ साते बंङज़ोतो।

दानो थल्जी धन्यवाद

¹⁰ गेह प्रभुरिंङ महस खुश तोतोग कि हेंतेग धोंण ध्याड़ो थल केहतु विचार यह्च़ा गिह्बी ढबाह च़रच़िमी थल्जी शुई; पक्‍का ए केतिंङ तुहई लाह दिऊ विचार तोहई, पर केतिंङ मोका माह खोकसिरी।

¹¹ दि गेह दिऊ थल्जी माह कुट्रातग, कि गिह्बी छोह् आ गप्पो कमी तोह, छना कुचे गेह भत्ते हालातरिंङ सन्तुष्ट बंङज़ी सिखेगी इलजी तोतोग।

¹² गेह गरीब ए भरपूरी झुल्ला रिंङ बंङज़ी सिखेक्सा इलोग, हर इच्च़ा हालातरिंङ ए भत्ते पाहठी गेह तृप्त शुहबी ञेंच़ातग। अपेहल गिऊ कछंङ ज़ेइमी थल्जी महस धिर शवात दंङ अपेहल गिऊ कछंङ ज़ेइमी थल्जी थोड़े शवात गेह झुल्ला रिंङ बंङज़ी सीखेसी इलजी तोतोग।

¹³ मसीहू दोरच़ी अंऊ गिह्बी दोई सामर्थ रंड्रा दोऊ मदते गेह भत्ते धिर ले तरच़ातग।

¹⁴ दंङ तांला केहच़ी रूठे लहरिन कि गिऊ कलेशा रिंङ गिह्बी ढबाह रंड्रीमी दोरच़ी गिऊ साथी शुहचे ईलांई,

¹⁵ हे फिलिप्पी शहरो मीहरे, केहच़ी ञेंहच़ातंई कि अपेहल गेह रूठे खबरो प्रचारो शुरूआती ध्याड़ा रिंङ मकिदुनिया प्रदेशो दोरच़ी घेंङौ यात्रा शुरू लहज़ी दोहपल अच़ा इलिगा दोहथर केतिंङ केट्रा ऊई अरिया कलीसिया ओ मीहच़ी लेन-देनो पाहठी गिऊ मदत माह लहरिर।

¹⁶ झांह लेह अंऊ मुक्का गेह थिस्लुनीके शहर तोईग, दोहथर ला केहच़ी गिऊ ज़रूरत पूरा लहच़िमी थल्जी महस फेरा ढबाह चरच़ातेंई।

¹⁷ गेह दि दिऊ थल्जी माह कुट्रातग कि गेह ढबाह जुंज़ातग पर गेह जुंज़ातग कि दिबी दुह रूठे गिनती रिंङ शामिल लेह जूंशी तोह अंऊ केहच़ी तुहई ए लेह चरच़ातन दंङ अतु थल्जी परमेश्वरो केतिंङ ईनाम रमतो।

¹⁸ गिऊ दोर भत्ते धिर तोद पर महसे बे बढ़कर तोह; अंऊ चीज़ारे केहच़ी इपफ्रुदीतुसो गुह्ट्री दोरच़ी च़रसी तोहई, दुह खोक्शे गेह तृप्त शुहचे इलिगा, दि झांह ठ्रोह तग तोह अंऊ केहच़ी परमेश्वर बि चढ़ाके दंङ अंऊ रूठे वास रंड्रा। अंऊ परमेश्वर ग्रहण लहच़ी दंङ खुश शुहबी।

¹⁹ दंङ गिऊ परमेश्वर ला एनोह दुह साहुकारी ऊ हिसाबे अंऊ महिमा रंङ साते यीशु मसीह रिंङ तोह, केहतु भत्ते कमी पूरा लोहतो।

²⁰ परमेश्वर हेंदु बाह ओ महिमा युगानयुग शुहवा लोहतो। अमीन।

अंतिम नमस्कार

²¹ यीशु मसीह रिंङ भत्ते परमेश्वरो मीहतिंङ गिऊ तरफे नमस्कार कुंई, अंऊ विशवासी न्वारे गेरंङ साते तोतोर केतिंङ नमस्कार कुट्रातोर।

²² भत्ते परमेश्वरो मीहरे, खास लेह अंऊ महाराजा (कैसरो) खानदानो विशवासी तोतोर, केतिंङ नमस्कार कुट्रातोर।

²³ ञेंहतु प्रभु यीशु मसीहू मोह्ड़े दाह केतंङ भत्ते तंङ साते बंङज़ोतो। अमीन।