फिलिपियों 2 - लाहौली बाइबिल

मसीहू दीनता ए महानता

¹ अगर केरे मीहतिंङ मसीह रंङ साते थोड़े अरे याहब, दंङ मसीहू दाह रिंङ तसल्ली, दंङ पवित्र आत्मारिंङ संगति, दंङ रे करूणा ए दाह तोह।

² दंङ इच्च़ा सेहमा रंङ साते बंङज़ा, इच्च़ा दाह, दंङ इदि-अई दिरंङ साते दाह ए, केनातु बिचंङ मेल-मिलाप रंङ साते इच्च़ा हिटी रंङ तहच़ि, गिऊ दिह खुशी पूरा लंहि।

³ केनातु फायदा ए हप्सी घमण्डो थल्जी छल्ले थालंही, पर दीनता रंङ साते इच्च़ा इदि-इदि बि केनाह बे रूठे समझेक्तेंई।

⁴ हर इच्च़ा एनोह ए भलाई मशत, पर ऊईतु भलाई ला चिंद लंहि।

⁵ छना मसीह यीशु स्वभाव तोई ध्वांए केहतु ला स्वभाव शुहबी जूंस;

⁶ हालांकि मसीह हेले रि परमेश्वर तोहई, तांला दोई परमेश्वरो बराबरी लहज़िमी जोर माह रांई।

⁷ पर एनोह भत्ते धिर प्रभु अधिकार छोड़ेके च़रति, दंङ दास रूप धारण लेह केहरी, दंङ इच्च़ा मीह बणेंके इलि।

⁸ दंङ मीहू रूपारि प्रगट शुहचे ऐनाबि दीन लहरी, दंङ परमेश्वरो आज्ञाकारिताऊ रिंङ, दुह सिमी थल्जी ला तेयार शुहचे तोहई, दंङ इच्च़ा अपराधी ठ्रोह क्रूसो मौत ला सहन लहरी।

⁹ झांह लेह परमेश्वरे दोबि भत्ते बे महान लहरी, दंङ दोबि दुह मिन रेंई अंऊ भत्ते मिन बे मोह्ड़े तोह।

¹⁰ कि अंऊ स्वर्गारिंङ ए धरतीऊ टोईच़ी ए धरतीऊ योङ तोतोर, दोरे भत्ते यीशु मिन रि आदर रंड्रीमी थल्जी पुष्टू भारे बंङज़ोर;

¹¹ दंङ बाह परमेश्वरो महिमाऊ थल्जी भत्ते एनोह आहच़ि अंगीकार लेह कि यीशु मसीह प्रभु शुह।

संसारारंङ छंङीऊ ठ्रोह चमेक्कपोंई

¹² हे गिऊ प्यारे साथी विशवासी रे, अपेहल गेह केतंङ साते तोईग दोहपल केहच़ी हमेशा परमेश्वरो हुकुमो भाषे लहरिन। एंतेग अपेहल गेह ऊईतार शुहचे इलजी तोतोग, दंङ केतिंङ ऊई ला गप्पा मनेक्च़ी जूंशी तोह। बेह्द रंङ साते केहतु बिचंङ भत्ते तिंङ दुह चीज़ लेह जूंशी तोह अंऊ दुह मीहतु थल्जी सही तोह अंऊ दोतिंङ परमेश्वरे बचाएसी ततो।

¹³ छना कुचे परमेश्वर ए तोह, अच़ि केहतु अंदरेग कम लहज़ा दंङ दोई ए केतिंङ कम लहज़िमी हिटी ए शाक्ति रंड्रा अंऊ दोई दोबि खुश लहज़ा।

¹⁴ दंङ भत्ते कम बिना कुड़कुड़ ए बिना झगड़ा लोहवा लंहि,

¹⁵ ताकि केरे निर्दोष ए रूठे शुहचे ते डेहरे ए हठीले मीहतु बिचंङ परमेश्वरो निष्कलंक सन्तान बड़ेकी तोंई, अतु बिचंङ केरे जीवनो बचन कुरच़ा सर्गो करज़े तु ठ्रोह चमकेपी जूंस।

¹⁶ झांह लेह गेह मसीहू यह्च़ा अपिमी ध्याड़ो थल्जी दि गप्पो टोहकठे घमण्ड लेह तरपोग कि गिऊ कोशिश ए मेहनत लहज़ी बेकार माह शुई।

¹⁷ प्रभु रिंङ केहतु विशवास ए केहतु सेवा परमेश्वर बि चढ़ासी बलिदानो ठ्रोह तोह। अगर दोच़ी गेह सच़ी च़रपोर, तांला गेह खुश तोतोग दंङ केरे भत्ते तंङ साते खुशी मानाएक्च़ातग।

¹⁸ ध्वांए केरेला खुश तोंई, दंङ गेरंङ साते खुशी मनेक्तुंई।

तीमुथियुस ए इपफ्रुदीतुस

¹⁹ गिह्बी प्रभु यीशु रिंङ उम्मीद तोह कि गेह तीमुथियुसाबि केहतु कछंङ युरनाह च़रपोग, ताकि अपेहल दुह वापिस अपतो, केहतु दशा रेड्राते गिऊ याहब बढेक्पोतो।

²⁰ छना कुचे गिऊ कछंङ झांह ठ्रोह स्वभावो ऊई अरिला माह, अंऊ शुद्ध सेहमारंङ साते केहतु चिंद लोहतो।

²¹ छना कुचे भत्तेर एनातु स्वार्थो खोज रिंङ बंङज़ातोर, माह कि यीशु मसीहू।

²² पर केहच़ी ञेंच़ातंई कि तीमुथियुस छना कंङातो कि दुह वफादार तोह। छना योह बाह रंङ साते लहज़ा, ध्वांए ए दोई रूठे खबर फेलाच़िमी थल्जी गेरंङ साते मेहनत लहरी।

²³ झांह लेह गिह्बी उम्मीद तोह कि छना गेह ञेंए केऊग कि गिऊ छि दशा शोतो, ध्वांए हे गेह दोबि दोथर चरच़ि च़रपोग।

²⁴ दंङ गिह्बी प्रभुरिंङ विशवास तोह कि गेह घेंङै ला युरनाह अपोग।

इपफ्रुदीतुसो तरीफ

²⁵ पर गेह इपफ्रुदीतुसाबि अंऊ गिऊ विशवासी न्वा, ए साथी ए रूठे खबरो रक्षा लहज़िमी थल्जी इच्च़ा योद्धा तोह। दोबि केहच़ी गिऊ ज़रूरतो ख्याल लहज़िमी थल्जी गिऊ कछंङ चरच़ि च़रतिन।

²⁶ दोऊ सेहम केहतु भत्ते तु बिचंङ लेहकी तोहई, दंङ दुह बैचेन बंङज़ा ते छना कुचे केहच़ी दोऊ टेहषीऊ हाल रेहशी तरैंई।

²⁷ दंङ हेले दुह टेहची ता इलजी तोहई, देर तचेक कि सिमी जोगे तोहई, पर परमेश्वरे दोऊ टोईच़ी दया लहच़ी दोबि ठीक लहरी; सिर्फ दोऊ ए टोईच़ी मशत, पर गिऊ टोईच़ी ला लहरी कि गिह्बी महस दुख शुहबी मेस।

²⁸ झांह लेह गेह दोबि च़रच़िमी ऊई ला कोशिश लहरिग कि केरे दोरंङ साते यह्च़ा दोहा ते खुश शुहचे ईलांई, दंङ गिऊ चिंद ला कम शुहचे योतो।

²⁹ झांह लेह केरे प्रभुरिंङ दोरंङ साते महसे खुशी रंङ साते दोईनि, दंङ केतिंङ दोऊ ए ठ्रोह दोतु आदर लेह जूंशी तोह,

³⁰ दुह मसीहू कमो थल्जी एनोह जाहन मुसीबत रिंङ केहच़ी सिमी जोगे तोहई, ताकि गिह्बी दोई मदत रें तरपोतो अंऊ केहच़ी केनाज़ि लेह मरपोंई।