Malaki 2 - E’yo Siza Alatararu Munguniri BIBLIA

Yehovani egazu Israeli ma dria yini eri kulerisiri

¹ Te curu’do, utalau edeta edepi ’diyi la, azita ’dori ovu emini.

² Emi ka ga eriko si, azini emi ka asi ’ba drinia diza fezu ma ru vu ku, Yehova asikari ongulumuruniri ’yo ’dini, ka’dini ma nga ani trita nderi ma ti pe emi dria, azini ma nga drileba emini ’diyi otri ra; e, ma tri yi ’bo, a’disiku emini asi ’bale lidrinia kurisi.

³ Emi ndre, ma nga ori emini ombe kakokoru, ma nga vini yamanaka tri emi andretia, adaru yamanaka anyapa emini edeta edezu ’diyiniri, ma nga emi ’be afa nderi be tualu.

⁴ Emi nga ni ani ma pe azita ’diri ma ti emi vuma’i, ’dini aziza mani ma ovu Levi be ’dani ani, Yehova asikari ongulumu­runiri ’yoni.

⁵ Aziza mani eri beri ovu ndra aziza idri pini asi anzuru ’beri’i, te ma fe yi eri dri, ’dini eri ma ru ani; te eri ru ma ra, eri ovu vini urisi ndra ru manisi.

⁶ Azita e’yo adaruniri ovu ndra eri ma tilia indi, azini yi isuni e’yo onyi kokoruri eri ma tia ku. Eri aci ndra ma be asi anzuru pi ma alia onyi be, azini eri oja ndra ’ba kakau onzi yini kuzu.

⁷ Te onyiru atalau edeta edepiri ma tile ma mba e’yo niza ma ta, ’dini ’ba ma nda imbata azitani eri ma tilia indi beni; a’disiku eri Yehova asikari ongulumuruniri ma ojio.

⁸ Te emi oja emi kalaa leti kuzu ’bo; emi fe ’ba kakau e’de va azita emini imbalerisi; emi eza aziza Leviniri ra, Yehova asikari ongulu­muruniri ’yoni.

⁹ E’yo ’disi ma! ’ba emi toko, saarure ’ba dria ma milia, ekile emini geri mani ma ta mbazu kurile, te emini azita imbaria emi ’ba ope ope.

¹⁰ Ama dria ata aluni ku ya? Mungu aluri ’bani amani ku ya? Ka’dini ama dria alu alu ama adripi ici lokirisi, aziza a’bi amanini ezazu ’dini a’disi ya?

¹¹ Yuda ’ye e’yo ’ba icizu lokirisi, e’yo ngule onziri ovu ’yezaru Israeli pi ma eselia Yerusalemu be; Yudani e’yo alatararu Yehova erini le1e turiniri ezale ra, erini adrou ani’baruri ma zini jele’irisi.

¹² ’Ba ’yepi ’dinileri ma dri, Yehovani nga ’ba engapi o’duasiri pi dri ja ’ba e’yo omvipiri be, Yakobo ma hema ma aliasi, tualu ’ba edeta edepi Yehova asikari ongulumuruniri driri be!

¹³ Azini emi ’ye vini afa ’diri dika emi a’bu pari edeta edezu Yehova driri ma dri mindre pisi awu pie, otaza pie, erini asile edeta feza nele dika kurisi, azini eri ma avani ovule afa a’izu emi dri kurisi.

¹⁴ Te emi ’yo nga kini, A’di e’yosi ya? A’disiku Yehovani ovule ’ba e’yo aziza emi ma eselia oku mini bile anziokururi beri ma e’yo ndrepiri’irisi, oku nde mini icile lokirisi, ka tro eri ovu mi agyi, azini oku mini aziza ma e’yosiri’i ti.

¹⁵ Eri edeni ndra alu ku ya, eri ka ovu orindi joloko be ti? A’di e’yosi alu ya? Eri nda ori ’ba Mungu rupirini. Ka’dini emi mba di orindi emini ma ta, ’ba aluni ma ’ye icita lokirini oku erini anziokururi vu ku.

¹⁶ A’disiku ma ngu e’yo oku ’odrozuri onzi, Yehova Mungu Israeliniri ’yoni, azini ma ngu vini ’ba afa suza ini supi eganasiri onzi indi, Yehova asikari ongulumuruniri ’yoni. Ka’dini emi mba di orindi emini ma ta, emi ma ici ’ba lokirisi ku.

O’du e’yo lizanirini ogogo

¹⁷ Emi fe Yehovani ande e’yo ’yoza emini ’diyisi ’bo. Te kiri emi i ’yo nga kini, Ama fe eri ande e’yo ngosi ya? E’yo ’diri ma alia, emi ’kini, ’Ba dria alu alu onzi ’yepi ’diyi yi onyiru Yehova ma milia, eri ovu vini ayikosi ’ba ’diyi ma e’yosi. Kani, Mungu e’yo lipi kililiruri eri ngoa ya?