Efuza 40 - E’yo Siza Alatararu Munguniri BIBLIA

Bere asozu

¹ Yehova ’yo Musa tia kini.

² Mba alu ma o’du alusi mi ma edre bere hema ti ecizanirini uru.

³ Mi ma ’ba alenia sanduku e’yo eti nzezaniri,mi ma’i bongo jo ale alizuri sanduku nderi a’buzu.

⁴ Azini mi ma ofi mesa, ma ede afa drinia ’diyi kilili; mi ma ofi talapati, ma o’i talani indi.

⁵ Azini mi ma ’ba pari edetani meleru obiese vezuri sanduku e’yo eti nzezaniri ma drilia, azini mi ma ’i bongo bere tilia.

⁶ Mi ma ’ba pari edeta vezuri bere hema ti ecizanirini ma tile ma drilia,

⁷ azini mi ma ’ba awala rua ojizuri hema ti ecizaniri pi ma eselia pari edeta edezuri be, mi osu yi alenia.

⁸ Mi ma i’di kali iri ageia kuru kuru, mi ’i bongo kalitiliari.

⁹ Mi ma ’du odu osule osuri, ma tri ani hema pi ma rua afa dria alenia ’diyi be, mi ’ba eri alatararu afa alenia ’diyi pie dria; eri nga ovu alatararu beni.

¹⁰ Mi ma tri pari edeta vezuri odusi, afa erini ’diyi be dria, te mi ’ba pari edeta edezu nderi alatararu; pari edetaniri nga ovu alatatararu beni.

¹¹ Mi ma tri awala rua ojizuri odusi pani be, mi ’ba eri alatararu.

¹² Mi ma eji Aroni pi anzipi be hema ti ecizaniri ma tilia, mi oji yi yisi,

¹³ mi ma su bongo alatararu ’diyi Aroni ma ruaa, mi ma osu odu eri dria, ma ’ba eri ndu alatararu, ’dini eri ma nga azi kuhanini ma dri beni.

¹⁴ Azini mi ma eji anzipi erini ’diyi, ma su koti yi ruaa,

¹⁵ ma osu odu yi ma dria, ekile mini odu osule yi ati ma driarile, ’dini yi ma nga azi kuhanini ma dri beni: odu osuza yi ma dria nderi nga fe yini ovuzu kuhaniru ’dani ’dani a’bianzi yini vusi.

¹⁶ Musa ’ye ’dini; eri ’ye ’yeke ’yeke ekile Yehovani azile eri tiarile.

¹⁷ Eri nga di eca ’dini, o’du alu eli iriri ma mba alurisi, yi edre bere nde uru.

¹⁸ Musa edre bere nde uru: eri ’ba ’bileni va, edre bauni uru, osu patini rwe rwe ’diyi, enga patini agoferu’diyi;

¹⁹ eri aja hema bere ma dria, a’bu hema dri ururi ci, ekile Yehovani azile Musa tiarile.

²⁰ Eri ’du afa e’yo eti nzezaniri, ’ba eri sanduku alia, osu pati sanduku ’duzu ’diyi eri ruaa, ’ba oguna yiki­niri sanduku dria uru;

²¹ ofi sanduku bere alia, ’i bongo jo ale alizuri uru, a’bu sanduku e’yo eti nzezaniri; ekile Yehovani azile Musa tiarile.

²² Eri ’ba mesa hema ti ecizaniri ma alia, bere ma kala andraleruria, bongo jo ale alizuri ma kalaa amveleru,

²³ eri o’ba mikate drinia kilili Yehova drilia; ekile Yehovani azile Musa tiarile.

²⁴ Eri ’ba talapati hema ti ecizaniri ma alia, oti yi mesa be bere ma kala urule­ruria,

²⁵ o’i tala Yehova drilia; ekile Yehovani azile Musa tiarile.

²⁶ Eri ’ba pari edeta edezu meleruri hema ti ecizaniri ma alia, bongo jo ale alizuri ma drilia,

²⁷ eri ve obiese osale afa aji be arikariru ’diyisiri drinia; ekile Yehovani azile Musa tiarile.

²⁸ Eri ’i bongo bere tilia.

²⁹ Eri ’ba pari edeta vezuri bere hema ti ecizanirini ma tilia, ve drinia edeta vezaruri edeta edele anyafurasiri be; ekile Yehovani azile Musa tiarile.

³⁰ Te eri ’ba awala rua ojizuri hema ti ecizaniri pi ma eselia pari edeta edezuri be, eri osu yi alenia rua ojizu,

³¹ te Musa pi, Aroni pie, anzipi be, oji dri yini pa be awala nderia;

³² yi ka fi hema ti ecizaniri ma alia, azini ka esi pari edeta edezuri vu ogogo, yi adri yi oji ra; ekile Yehovani azile Musa tiarile.

³³ Azini eri e’di kali iruniri bere pi ma ageia pari edeta edezuri be kuru kuru, azini eri ’i bongo kalitiliari. ’Dini Musa de di azi nderi ra.

Iriti pa sopi Bere ma drilialesiri

³⁴ Etu nde ’dasi iriti a’bu hema ti ecizaniri ma dri ci, azini diza Yehovani ga bere nderi ma alia tre.

³⁵ Te Musa econi fizaru hema ti ecizaniri ma alia ku, a’disiku iritini rile hema nderi ma dria cirisi, azini diza Yehovanini gale bere ma alia trerisi.

³⁶ lriti nde ka nga hema nderi ma driarisi ’bo, anzi Israelini ’diyi yi adri dri ko muzu drile drile, aci yini vusi dria;

³⁷ te iriti ka nga ku, yi adrini aci ku cazu kpere o’du erini ngazuria.

³⁸ lriti Yehovaniri ovu bere ma dria etusi, azini aci ovu iriti nde ma alia inisi, suru Israeliniri ma milia dria, aci yini vusi dria.