Efuza 2 - E’yo Siza Alatararu Munguniri BIBLIA

Musa ma osiza

¹ Te agupi alu suruti Leviniri eri je zamva Levinirini okuru.

² Oku nderi isu mva, osi agupimvani; eri ka ne eri ovu mva onyi beni, eri zi eri mba na.

³ Eri ka eco eri zi dika ku, eri ’du afazu acalakaru edele omisiri, eri e’bura aleni odri pisi ese be; eri ’ba mva nderi alenia, eri ’ba eri omi talaa yi tia.

⁴ Amvini nga pa so re, nezu a’dini nga mva nde ’yeni ya.

⁵ Te Farau zi nga esi yia rua ojizu, azini ezoanzi erini ati’baru ’diyi ri aci yi tisi; eri nga afazu nderi ne omi talaa, eri nga ati’bo erini zanaru alu ma ti e eri e’duzu.

⁶ Te eri ka afazu tile zi ’bo, eri ne mva nderi ra; te mi ne, mvani wu wu. Eri ’ba yiki mva nderi vu, eri ’yo, Mva ’ba Ebraniani ma aziri awa’do!

⁷ Amvipini nga di ’yo Farau zi tia,Mi le ma mu mini oku alu Ebraniani omve mva nderi ma indriaru eri endruzu ra ya?

⁸ Te Farau zi ’yo tinia, Mi mu. Odruna nderi mu ra, omve mva ma andrini’i.

⁹ Farau zi ’yo tinia, Mi ’du mva ’diri, mi endru eri ma dri, ma nga mi ofe ra. Oku nga di mva nderi ’du ra, nga eri endru ra.

¹⁰ Mva nderi zo ra, vutinia eri ji eri Farau zi vu, eri ofu mva eriniru. Eri ’da runi Musa’i, eri ’yo ra, mani mule eri esele yiarisi.

Musani apazu Misiriasiri

¹¹ Eri eca ’dini ewu Musani zozu ’boria, eri fu i adripi vu, eri ne teri nzizaru yini; te eri ne ’ba alu Misiriouru erini adripi alu ini Ebraniouru coria.

¹² Te eri one angu kuru kuru, ka ’ba isu ku eri fu ’ba nde Misiriouru ra, nga avuni zi cinya alia.

¹³ Dru ’dini eri efu, ne agupi Ebraniani iri yini yi ofuria; te eri ’yo agu nde i agini ’yepi onziri tia kini, Mi mi adrini fu a’disi ya?

¹⁴ Eri omvi e’yo kini, A’di ’ba mi opiru kani ’ba e’yo lipiru ama driliani ya? Mi le ma fu mini ’ba Misirini fulerile ya? Te Musa ovu urisi, kini, Adaru, ni de e’yo nderi ’bo.

¹⁵ Farau ka e’yo nderi eri ra, eri ndru Musani fuzu. Te Musa apa Farau ma miliasi ra, nga di adri angu Midianinia, eri ri, yi a’di tia ’dale.

¹⁶ Isu de kuhani Midianiari ovu ezoanzi be aziri; yi emu yi ko, yi oko yi oguru kabiloni yi mvuzuri ma alia tre yi ati ma kabilo dri.

¹⁷ Te ’ba kabilo ocepi, azi ’diyi eca, dro yi ra; te Musa nga enga yi aza kozu, nga yi fe kabilo yini dri.

¹⁸ Yi ka emvi Rueli ata yini vu, eri ’yo, Emi emvi andru mbele ’dinile a’di e’yosi ya?

¹⁹ Te yi ’yo, Agu Misiriouru pa ama ’ba kabilo ocepi ’diyi dri, oko yi ama dri indi, fe kabilo dri indio

²⁰ Te eri yo ezoanzi eri ni tia, Eri ngoa ya? Emi ku agu ’diri ’daa a’disi ya? Emi omve eri, ma nya nyaka indio

²¹ Musa a’i ovuzu tualu agupi nderi be, te eri fe Musa dri i zi Ziporani; okuru.

²² Eca osi agimva, ’cia runi Gerisomu’i; a’disiku eri ’yo ra, Ma ndra ani’boni angu juruni ma eselia,

²³ Eri eca ’dini ewu azinisi opi Misiriari dra ra. Anzi Israelini yi ota matusi azi okporurisi, yi owu owu, awu yini ca Mungu vu azi okporu yini ’yele ati’ba yinisi.

²⁴ Te Mungu eri otata yini matusiri ra, azini Mungu ega aziza ini yi ma eselia Iburahimu pi, Isaka pie, Yakobo pieri ma e’yo dika,

²⁵ Mungu ne anzi Israelini, azini Mungu ega e’yo yini ra.