Zabbuli 5 - Luganda Bible 2003

Okusaba Katonda atukuume

¹ Wulira bye ŋŋamba, ayi Mukama, tegereza omulanga gwange.

² Wulira okwegayirira kwange, ggwe Kabaka wange era Katonda wange.

³ Ku makya owulira eddoboozi lyange. Enjuba ng'evaayo nkusaba, ne nnindirira ky'ononziramu.

⁴ Ggwe Katonda atasanyukira bikolwa bibi, akola ekibi tabeera naawe.

⁵ Abeenyumiriza tobakkiriza mu maaso go, okyawa bonna abakola ebibi.

⁶ Ozikiriza aboogera eby'obulimba; abatta abantu era n'ab'enkwe, Mukama obakyayira ddala.

⁷ Naye nze, olw'ekisa kyo ekingi, nnaayingiranga mu nnyumba yo. Nnaasinzizanga mu Ssinzizo lyo ettukuvu, ne nkussaamu ekitiibwa.

⁸ Ayi Mukama, nnuŋŋamya nkolenga ky'oyagala, kubanga nnina abampalana bangi. Ndaga bulungi ekkubo lyo lye mba nkwata.

⁹ Abalabe bange bye boogera tebyesigibwa, ekibali ku mutima kwe kukola ebibi. Emimiro gyabwe ye ntaana eyasaamiridde, boogera bya kuwaanawaana.

¹⁰ Ayi Katonda, basalire omusango okubasinga. Bo bennyini be baba bagwa mu mitego gyabwe. Bagobe mu maaso go olw'ebibi byabwe ebingi, kubanga bakujeemedde ggwe.

¹¹ Naye bonna abakwesiga basanyuke, bayimbenga n'essanyu bulijjo, kubanga ggwe obakuuma. N'abakwagala basanyukirenga mu ggwe,

¹² kubanga, ayi Mukama, owa omukisa abakola by'oyagala. Ekisa kyo kibakuuma ng'engabo.