Zabbuli 2 - Luganda Bible 2003

Omusiige wa Mukama

¹ Lwaki amawanga geegugunga, n'abantu ne balowooza ebitaliimu?

² Bakabaka b'ensi baateekateeka, n'abafuzi bateeseza wamu okulwanyisa Mukama n'omusiige we

³ nga bagamba nti: “Ka tukutule enjegere zaabwe, tweggyeko ekikoligo kyabwe.”

⁴ Mukama ng'ali waggulu abasunga era abasekerera.

⁵ Olwo n'abagamba ng'asunguwadde, n'abatiisa ng'aswakidde nti:

⁶ “Ku lusozi lwange olutukuvu Siyooni, nateekako kabaka.”

⁷ “Nja kulangirira ekiragiro kya Mukama. Mukama yagamba nti: ‘Oli mwana wange, olwaleero nkuzadde.

⁸ Nsaba, nze ndikuwa amawanga gonna n'ensi yonna, bibe bibyo.

⁹ Olibimenya n'omuggo ogw'ekikomo, olibyasaayasa ng'entamu y'omubumbi.’ ”

¹⁰ Kale kaakano bakabaka mugeziwale, abafuzi b'ensi muyige.

¹¹ Muweereze Mukama nga mutya. Mumusseemu ekitiibwa nga mukankana,

¹² sikulwa ng'asunguwala ne muzikirira. Obusungu bwe tebulwa kusituka. Ba mukisa abo bonna abamweyuna.