Okuva 2 - Luganda Bible 2003

Okuzaalibwa kwa Musa

¹ Awo omusajja ow'omu Kika kya Leevi, n'agenda n'awasa omukazi ow'omu lulyo lwa Leevi.

² Omukazi n'aba olubuto, n'azaala omwana wa bulenzi. Bwe yalaba ng'omwana mulungi, n'amukwekera emyezi esatu.

³ Yalaba takyayinza kwongera kumukweka, n'aleeta ekibaya eky'ebitoogo, n'akisiiga ettosi n'envumbo, n'ateekamu omwana, n'akiteeka mu kitoogo, ku lubalama lw'omugga.

⁴ Mwannyina w'omwana n'ayimirira walako, alabe ekinaamutuukako.

⁵ Awo muwala wa kabaka n'aserengeta ku mugga okunaaba. Abazaana be ne batambula ku lubalama lw'omugga. N'alaba ekibaya mu kitoogo, n'atuma omuzaana we okukireeta.

⁶ Muwala wa kabaka n'akisaanukula, n'alaba omwana. Omwana n'akaaba. N'amusaasira, n'agamba nti: “Ono y'omu ku baana Abeebureeyi!”

⁷ Mwannyina w'omwana n'agamba muwala wa kabaka nti: “Ŋŋende nkuyitire omukazi Omwebureeyi akuyonseze omwana oyo?”

⁸ Muwala wa kabaka n'amugamba nti: “Kale genda.” Omuwala n'agenda n'ayita nnyina w'omwana.

⁹ Muwala wa kabaka n'agamba omukazi nti: “Twala omwana ono omunnyonseze, ndikuwa empeera.” Omukazi n'atwala omwana, n'amuyonsa.

¹⁰ Omwana bwe yakula, n'amuleetera muwala wa kabaka. Muwala wa kabaka n'amufuula mutabani we, n'amutuuma erinnya Musa, ng'agamba nti: “Kubanga namuggya mu mazzi.”

Musa addukira e Midiyaani

¹¹ Lwali lumu, Musa ng'amaze okukula, n'agenda okukyalira baganda be Abeebureeyi, n'alaba nga bwe batuntuzibwa. N'alaba n'Omumisiri ng'akuba Omwebureeyi, omu ku b'eggwanga lya Musa.

¹² Musa n'amagamaga eruuyi n'eruuyi, n'alaba nga tewali muntu, n'alyoka atta Omumisiri, n'amukweka mu musenyu.

¹³ Ku lunaku olwaddirira, n'addayo n'alaba abasajja Abeebureeyi babiri nga balwanagana, n'agamba oyo omusobya nti: “Kiki ekikukubizza munno?”

¹⁴ Omusajja n'addamu nti: “Ani yakufuula omukulu era omulamuzi waffe? Oyagala kunzita nga bwe wasse Omumisiri?” Musa n'atya, n'agamba mu mutima gwe nti: “Abantu baategedde kye nakoze!”

¹⁵ Kabaka bwe yawulira ebibaddewo, n'ayagala okutta Musa. Naye Musa n'adduka kabaka, n'agenda n'abeera mu nsi ya Midiyaani. Lwali lumu, Musa bwe yali ng'atudde okumpi n'oluzzi,

¹⁶ abawala musanvu aba kabona w'e Midiyaani, ne bajja ne basena amazzi, ne bajjuza ebyesero okunywesa endiga n'embuzi za kitaabwe.

¹⁷ Abasumba ne bajja ne babagoba. Naye Musa n'asituka n'abayamba, n'anywesa eggana lyabwe.

¹⁸ Bwe baddayo eri Reweli kitaabwe, n'agamba nti: “Nga mukomyewo mangu olwa leero!”

¹⁹ Ne baddamu nti: “Omumisiri ye atudduukiridde n'atuwonya abasumba, era n'atusenera amazzi, n'anywesa eggana.”

²⁰ N'agamba bawala be nti: “Ali ludda wa? Lwaki mumuleseeyo? Mugende mumuyite, alye emmere.”

²¹ Musa n'akkiriza okubeera n'omuntu oyo, Reweli n'awa Musa muwala we Zippora.

²² Zippora n'azaala omwana ow'obulenzi, Musa n'amutuuma erinnya Gerusoomu, kubanga yagamba nti: “Mbadde mugwira mu nsi eteri yange.”

²³ Nga wayiseewo emyaka, kabaka w'e Misiri n'afa. Naye Abayisirayeli ne basigala nga bakyasinda olw'obuddu bwabwe. Ne bakaaba, era okukaaba kwabwe ne kutuuka eri Katonda.

²⁴ Katonda n'awulira okusinda kwabwe, n'ajjukira endagaano ye gye yakola ne Aburahamu ne Yisaaka ne Yakobo.

²⁵ Katonda n'alaba okubonaabona kw'Abayisirayeli, n'abalumirwa.