Malaki 2 - Luganda Bible 2003

¹ Mukama Nnannyinimagye agamba nti: “Kino kye kiragiro kye mbawa mmwe bakabona:

² muteekwa okunzisaamu ekitiibwa mu ebyo bye mukola. Bwe mutaafengayo kuwulira bye ŋŋamba, ndibateekako ekikolimo, era nditeeka ekikolimo ku bye mufuna okubayimirizaawo. Ddala mmaze okubiteekako ekikolimo, kubanga ekiragiro kyange temukissaako mwoyo.

³ Ndibonereza abaana bammwe, era ndisiiga mu maaso gammwe obusa bw'ensolo ze mutambidde, ne muggyibwawo wamu nabwo.

⁴ Olwo mulimanya nga nze nabawa mmwe ekiragiro kino, endagaano gye nakola ne bakabona, bazzukulu ba Leevi, ereme kumenyebwa.

⁵ “Mu ndagaano yange, nabasuubiza okubawa obulamu n'emirembe. Era nabibawa balyoke banzisengamu ekitiibwa. Mu biro ebyo, banzisangamu ekitiibwa era bantyanga.

⁶ Baayigirizanga bituufu sso si bikyamu. Baabeeranga wamu nange mu ddembe, nga ba mpisa nnungi, era baalesangayo bangi okukola ebibi,

⁷ kubanga mulimu gwa bakabona okuyigiriza abantu bammanye. Era abantu bandigenzenga gye bali okuyiga bye njagala bakole, kubanga be babaka ba Mukama Nnannyinimagye.

⁸ “Naye mmwe bakabona, muvudde mu kkubo ettuufu ne muwaba. Bye muyigiriza bireetedde bangi okukola ebikyamu. Mumenya endagaano gye nakola nammwe.

⁹ Kyenvudde mbafuula aba wansi era abanyoomebwa mu bantu bonna, kubanga temukola bye mbalagira, era bwe muba muyigiriza abantu bange, mukozesa kusosola.”

Abantu abakuusa

¹⁰ Ffenna tetulina kitaffe omu? Katonda tali omu eyatutonda? Kale lwaki tuba abakuusa eri bannaffe? Era lwaki tunyooma endagaano, Katonda gye yakola ne bajjajjaffe?

¹¹ Abantu b'omu Buyudaaya bafuuse bakuusa, ne bakola ekyenyinyalwa mu Yerusaalemu ne mu Yisirayeli yonna. Boonoonye Essinzizo lya Mukama ly'ayagala. Bawasizza abakazi abasinza balubaale.

¹² Buli musajja eyakola ekyo, Mukama amuggye mu Bayisirayeli, era aleme kumukkiriza kuddamu kwetaba wamu na ba ggwanga lyaffe nga batonera Mukama Nnannyinimagye ebirabo.

¹³ Ekirala kye mukola kye kino: alutaari ya Mukama mugitobya amaziga, nga mukaaba era nga mukuba ebiwoobe, kubanga Mukama takyasiima bye mumuleetera.

¹⁴ Mwebuuza ekimugaana okubisiima. Tabisiima, kubanga mumenyeewo endagaano ey'obufumbo gye mwakola n'abakazi be mwawasa mu buvubuka bwammwe. Be bannammwe be mwakola nabo endagaano nga Mukama ye mujulirwa, naye ne mutaba beesigwa.

¹⁵ Katonda teyatonda omuntu ng'alina omubiri n'omwoyo ogw'obulamu? Ky'ayagala kwe kumuzaalira abaana abamutya. Kale mwekuumenga, waleme kubaawo atali mwesigwa eri omukazi gwe yawasa mu buvubuka bwe.

¹⁶ Mukama Nnannyinimagye era Katonda wa Yisirayeli agamba nti: “Nkyawa okwawukana kw'abafumbo, ng'omusajja akola eky'obukambwe okugoba mukazi we. Kale mwekuumenga, waleme kubaawo atali mwesigwa.”

Olunaku olw'okusalirako omusango luli kumpi

¹⁷ Mukooyezza Mukama n'ebigambo bye mwogera. Naye mwebuuza nti: “Tumukooyezza tutya?” Mumukooyezza nga mugamba nti: “Buli akola ebibi, aba mulungi mu maaso ga Mukama, era Mukama amusanyukira.” Oba nga mwebuuza nti: “Katonda omwenkanya ali ludda wa?”