Engero 2 - Luganda Bible 2003

Ebirungi ebiva mu magezi

¹ Mwana wange, singa ossa omwoyo ku bye nkuyigiriza, n'oteerabiranga bye nkulagira okukola;

² n'owuliranga ebigambo eby'amagezi, era n'ofubanga okubitegeera;

³ n'osabanga ofune amagezi, ne weegayiriranga oweebwe okutegeera;

⁴ amagezi n'oganoonyanga ng'anoonya ffeeza, era ng'awenja ebyobugagga ebyakwekebwa,

⁵ olwo olitegeera okutya Mukama, n'ovumbula okumanya Katonda,

⁶ kubanga Mukama ye agaba amagezi, ye atuwa okumanya n'okutegeera.

⁷ Amagezi amatuufu agaterekera abalongoofu, n'akuuma abeewala okwonoona,

⁸ alyoke akuume obwenkanya, alabirire abo abakola by'ayagala.

⁹ Bw'ossa omwoyo ku bye nkutegeeza, olimanya ebituufu n'eby'amazima, n'eby'obwenkanya. Olimanya by'osaanidde okukola.

¹⁰ Olifuuka mugezi, okumanya ne kukusanyusa.

¹¹ Okuteesa obulungi kunaakulabiriranga, n'okutegeera kukukuumenga,

¹² kukuwonyenga okukola ebitasaana, era kukuwonyenga abo aboogera ebitabula abantu.

¹³ Kubakuwonyenga abo abavudde ku kukolanga ebituufu, ne badda mu kukolanga ebibi,

¹⁴ abasanyuka okwonoona, era abaaniriza ebikolwa by'abantu aboonoonefu.

¹⁵ Bo bantu abakyukakyuka, era abatayinza kwesigika.

¹⁶ Olisobola okuwona omukazi ow'empisa embi, agezaako okukusendasenda n'akalimi akawoomerevu.

¹⁷ Omukazi ow'engeri eyo, aleka bba gwe yafumbirwa mu buvubuka, ne yeerabira Katonda bye yalagira.

¹⁸ Kale okugenda ku nnyumba ye, kuba kugenda magombe. Ekkubo erigenda ewuwe, likutwala mu bafu.

¹⁹ Abamukyalira tebadda, tebakomawo mu kkubo ery'obulamu.

²⁰ Kale goberera ekyokulabirako eky'abantu abalungi, okwatenga empisa z'abakola ebituufu,

²¹ kubanga ab'omwoyo omulongoofu be banakkaliranga mu nsi; abataliiko kamogo, be baligisigalamu.

²² Naye Katonda alimalawo ababi mu nsi, n'aboonoonyi balisimbulibwamu.