Abalam 4 - Luganda Bible 2003

Omulamuzi Debora ne Baraki

¹ Ehudi bwe yamala okufa, Abayisirayeli ne baddamu okukola ebibi ne banyiiza Mukama.

² Mukama n'abaleka okuwangulwa Yabini, Kabaka wa Kanaani, eyafugiranga mu kibuga Azori. Omuduumizi w'eggye lye yali Sisera, ng'abeera mu Haroseti-Hagoyiimu.

³ Yabini yalina amagaali lwenda ag'ebyuma, n'afuga Yisirayeli n'obukambwe okumala emyaka amakumi abiri. Abayisirayeli ne bakaabirira Mukama abayambe.

⁴ Mu biro ebyo, Debora muka Lappidoti, yali mulanzi, era nga mulamuzi wa Bayisirayeli.

⁵ Yatuulanga wansi w'Olukindu lwa Debora, wakati wa Raama ne Beteli, mu nsi ya Efurayimu ey'ensozi. Eyo Abayisirayeli gye baagendanga gy'ali okubasalira emisango.

⁶ Awo n'atumya Baraki mutabani wa Abinowamu mu Kibuga Kedesi eky'omu Nafutaali, n'amugamba nti: “Mukama, Katonda wa Yisirayeli akulagidde nti: ‘Twala abasajja omutwalo gumu ku b'omu Kika kya Nafutaali n'ekya Zebbulooni, bakuŋŋaanire ku Lusozi Tabori.

⁷ Sisera omuduumizi w'eggye lya Yabini nja kumuleeta okukulwanyisa ku Mugga Kisoni. Ajja n'amagaali ge n'abaserikale be, kyokka nja kukusobozesa okumuwangula.’ ”

⁸ Baraki n'amugamba nti: “Ggwe bw'onoogenda nange, kale nnaagenda. Naye bw'otoogende nange, sijja kugenda.”

⁹ Debora n'addamu nti: “Mazima nja kugenda naawe. Naye ekitiibwa eky'obuwanguzi tekijja kuba kikyo, kubanga Mukama ajja kuwaayo Sisera awangulwe omukazi.” Awo Debora n'asituka, n'agenda ne Baraki e Kadesi.

¹⁰ Baraki n'ayita ab'Ekika kya Nafutaali n'ekya Zebbulooni e Kadesi, abasajja omutwalo gumu, ne bamugoberera. Debora n'agenda wamu naye.

¹¹ Mu kiseera ekyo, Heberi Omukeeni yali yeeyawudde ku Bakeeni banne, bazzukulu ba Hobabu, kitaawe wa muka Musa, n'asimba eweema ye awali omuvule mu Zenannimu, okumpi n'e Kadesi.

¹² Sisera bwe baamubuulira nti Baraki, mutabani wa Abinowamu ayambuse ku Lusozi Tabori,

¹³ Sisera n'akuŋŋaanya amagaali ge gonna olwenda ag'ebyuma, ne basajja be bonna abaali naye, ne bava e Haroseti-Hagoyiimu, ne balaga ku Mugga Kisoni.

¹⁴ Debora n'agamba Baraki nti: “Genda! Mukama akukulembedde. Olwaleero akuwadde okuwangula Sisera.” Awo Baraki n'akkirira olusozi Tabori wamu ne basajja be omutwalo gumu.

¹⁵ Mukama n'afufuggaza Sisera n'amagaali ge gonna, n'eggye lye lyonna n'ebyokulwanyisa, mu maaso ga Baraki. Sisera n'ava mu ggaali ye, n'addusa bigere.

¹⁶ Baraki n'awondera amagaali era n'eggye okutuuka mu Aroseti ekya Bannamawanga. Eggye lya Sisera lyonna ne littibwa. Ne watasigalawo muntu n'omu.

¹⁷ Sisera n'addusa bigere n'atuuka ku weema ya Yayeli muka Heberi Omukeeni, kubanga Yabini Kabaka wa Azori yali mirembe n'ab'ennyumba ya Heberi.

¹⁸ Yayeli n'afuluma okusisinkana Sisera, n'amugamba nti: “Mukama wange, yingira omwange totya.” Sisera n'ayingira mu weema. Yayeli n'amukweka mu lutimbe.

¹⁹ Sisera n'amugamba nti: “Nkwegayiridde, mpa ku mazzi nnyweko, kubanga ennyonta ennuma.” Yayeli n'asumulula ensawo ey'eddiba omubeera amata, n'amuwa n'anywa, n'amukweka nate.

²⁰ Sisera n'agamba Yayeli nti: “Yimirira mu mulyango gwa weema. Bwe wabaawo ajja n'akubuuza nti waliwo omusajja ali muno ogamba nti: ‘Nedda.’ ”

²¹ Sisera yali akooye nnyo, ne yeebaka otulo tungi. Awo Yayeli n'akwata enkondo ya weema n'ennyondo, n'amusemberera ng'asooba, n'amukomerera enkondo mu kyenyi n'eyitamu n'ekwata n'ettaka. Bw'atyo Sisera n'afa.

²² Baraki bwe yajja ng'awondera Sisera, Yayeli n'afuluma okumusisinkana, n'amugamba nti: “Jjangu nkulage omusajja gw'onoonya.” Awo Baraki n'ayingira ne Yayeli, n'asanga Sisera ng'agaŋŋalamye afudde, nga n'enkondo ekomereddwa mu kyenyi kye.

²³ Bw'atyo ku lunaku olwo, Katonda n'awa Abayisirayeli okuwangula Yabini Kabaka wa Kanaani.

²⁴ Abayisirayeli ne beeyongera okumunyigiriza okutuusa lwe baamala okumuzikiriza.