Abalam 3 - Luganda Bible 2003

Ab'amawanga amalala agaasigala mu nsi eyo

¹ Kale Mukama n'aleka ab'amawanga agamu okusigala mu nsi eyo okugeza Abayisirayeli abataalaba ku ntalo z'e Kanaani.

² Ekyo yakikola, nga ky'ayagala, kwe kuyigiriza eby'entalo Abayisirayeli aba buli mulembe, naddala abo abaali tebabeerangako mu lutalo.

³ Abo abaalekebwa mu nsi eyo, be b'omu bibuga by'Abafilistiya ebitaano, n'Abakanaani bonna, n'Abasidoni n'Abahiivi, abatuuze b'omu nsozi z'omu Lebanooni okuva ku Lusozi Baali Herumooni, okutuuka awayingirirwa mu Hamati.

⁴ Baali ba kugeza Bayisirayeli okulaba oba nga banaawuliranga ebiragiro bya Mukama, bye yalagira bajjajjaabwe, ng'ayita mu Musa.

⁵ Abayisirayeli ne babeera mu Bakanaani n'Abahiiti, n'Abayebusi.

⁶ Ne bawasa abakazi mu bantu abo, era ne bafumbizaamu bawala baabwe era ne basinzanga balubaale baabwe.

Omulamuzi Otiniyeeli

⁷ Abayisirayeli ne beerabira Mukama, Katonda waabwe, ne bakola ebibi ne bamunyiiza, ne basinza balubaale Baali ne Asera.

⁸ Mukama kyeyava asunguwalira ennyo Abayisirayeli, n'aleka Kusani Risatayimu, kabaka wa Mesopotaamiya okubawangula, n'abafugira emyaka munaana.

⁹ Awo Abayisirayeli ne bakaabirira Mukama, n'abatumira omuntu eyabanunula, ye Otiniyeeli, mutabani wa Kalebu, muto wa Kenazi.

¹⁰ Omwoyo gwa Mukama ne gujja ku ye, n'akulembera Yisirayeli. N'agenda mu lutalo, Mukama n'amuwa okuwangula Kusani Risatayimu, kabaka wa Mesopotaamiya.

¹¹ Ensi n'ebaamu emirembe okumala emyaka amakumi ana. Otiniyeeli n'afa.

Omulamuzi Ehudi

¹² Abayisirayeli ne baddamu okukola ebibi ne banyiiza Mukama. N'olwekyo Mukama n'awa Egulooni kabaka wa Mowaabu amaanyi okulwanyisa Yisirayeli.

¹³ Egulooni ne yeegatta n'Abammoni n'Abamaleki, ne bawangula Yisirayeli, ne bawamba Yeriko, ekibuga eky'enkindu.

¹⁴ Abayisirayeli ne bafugibwa Egulooni okumala emyaka kkumi na munaana.

¹⁵ Awo Abayisirayeli ne bakaabirira Mukama, n'abatumira omuntu okubanunula, ye Ehudi mutabani wa Gera, Omubenyamiini. Ehudi oyo yali wankonokono. Abayisirayeli ne bakwasa Ehudi ebirabo abitwalire Egulooni kabaka wa Mowaabu.

¹⁶ Ehudi yali yeeweeserezza ekitala eky'obwogi ku njuyi zombi, nga kiweza sentimita ng'amakumi ataano obuwanvu. N'akyesiba ku kisambi kye ekya ddyo, munda mu ngoye ze.

¹⁷ N'atwalira Egulooni Kabaka wa Mowaabu ebirabo. Egulooni yali musajja munene nnyo.

¹⁸ Ehudi bwe yamala okuwaayo ebirabo, n'alagira abantu abaabyetikka baddeyo ewaabwe.

¹⁹ Naye Ehudi kennyini n'akoma ku mayinja amoole agaali okumpi ne Gilugaali, n'addayo eri Egulooni, n'agamba nti: “Ayi Ssaabasajja, nnina obubaka obw'okukuwa mu kyama.” Awo Kabaka n'alagira abaweereza be nti: “Mutuleke ffekka!” Bonna ne bava w'ali ne bafuluma.

²⁰ Kabaka bwe yali ng'atudde yekka mu kisenge kye ekiweweevu eky'okuwummuliramu ekya waggulu, Ehudi n'ajja gy'ali, n'agamba nti: “Nnina obubaka bwo obuvudde eri Katonda.” Kabaka n'asituka ku ntebe ye.

²¹ Ehudi n'akozesa omukono gwe ogwa kkono, n'aggyayo ekitala ku kisambi kye ekya ddyo, n'akifumita kabaka mu lubuto.

²² Ekitala kyonna ne kimubuliramu n'ekiti kyakyo, amasavu ne gazibikira we kiyingiridde. Ehudi teyakisikaamu mu lubuto lwa kabaka, ne kiggukira emabega.

²³ Awo Ehudi n'afuluma n'amuggaliramu, enzigi n'azisiba,

²⁴ n'agenda. Abaweereza bwe bajja ne balaba ng'enzigi z'ekisenge ekyawaggulu nsibe, ne balowooza nti kabaka mw'ali yeeteewuluzaako mu kasenge akoomunda.

²⁵ Ne balindako ebbanga lye baalowooza nti limala. Bwe baalaba nga taggulawo, ne bakwata ekisumuluzo, ne baggulawo. Ne basanga mukama waabwe ng'agudde wansi afudde.

²⁶ Ehudi n'atoloka nga bakyalindirira. N'ayita mu mayinja amoole, n'atuuka gy'anaawonera e Seyira.

²⁷ Bwe yatuuka eyo mu nsi ya Efurayimu, n'afuuwa eŋŋombe okuyita Abayisirayeli. N'abakulembera, ne baserengeta wamu naye okuva mu nsi ey'ensozi.

²⁸ N'agamba nti: “Mungoberere, Mukama abawadde okuwangula abalabe bammwe Abamowaabu.” Ne bagoberera Ehudi, ne baserengeta, ne beekwata ekifo Abamowaabu we baali ab'okusomokera Omugga Yorudaani, ne bataganya muntu n'omu kusomoka.

²⁹ Ku mulundi ogwo ne batta mu Bamowaabu abasajja nga omutwalo gumu ab'amaanyi era abazira, ne watabaawo awonawo.

³⁰ Ku lunaku olwo Abayisirayeli ne bawangula Mowaabu. Ensi n'ebaamu emirembe okumala emyaka kinaana.

Omulamuzi Samugaari

³¹ Omukulembeze eyaddirira, yali Samugaari, mutabani wa Anati. Naye yanunula Yisirayeli bwe yatta Abafilistiya lukaaga n'omuwunda.