Abalam 2 - Luganda Bible 2003

Malayika wa Mukama ayogera n'Abayisirayeli

¹ Awo Malayika wa Mukama n'ava e Gilugaali n'agenda e Bokimu, n'agamba Abayisirayeli nti: “Nabaggya mu nsi y'e Misiri ne mbaleeta mu nsi gye nasuubiza bajjajjammwe. Nagamba nti sirimenya ndagaano yange gye nakola nammwe.

² Temuukolenga ndagaano na bantu abali mu nsi eno. Mumenyewo alutaari zaabwe. Naye mmwe temukoze nga bwe nabalagira. Lwaki mujeemye?

³ Kale kaakano mbagamba nti sirigobayo bantu abo nga mugendayo. Banaabanga balabe bammwe, era munaakemebwanga okusinza balubaale baabwe.”

⁴ Malayika wa Mukama bwe yamala okwogera ebyo, Abayisirayeli bonna ne batema emiranga, ne bakaaba amaziga.

⁵ Ekifo ekyo kyebaava bakituuma erinnya Bokimu, ne baweera eyo ebitambiro eri Mukama.

Okufa kwa Yoswa

⁶ Awo Yoswa n'asiibula Abayisirayeli ne bagenda, buli omu okufuna ekitundu ky'ensi kye yagabana.

⁷ Abayisirayeli baaweerezanga Mukama ebbanga lyonna Yoswa lye yamala nga mulamu, era n'ebbanga lyonna, nga wakyaliwo abakulembeze, abaamusinga okuwangaala, abaalaba ku bikuuno byonna, Mukama bye yakolera Yisirayeli.

⁸ Omuweereza wa Mukama, mutabani wa Nuuni, yafa ng'awangadde emyaka kikumi mu kkumi.

⁹ Ne bamuziika mu kitundu kye, kye yagabana mu Timunati Sera, mu nsi ya Efurayimu ey'ensozi, mu bukiikakkono obw'olusozi Gaasi.

¹⁰ Era n'ab'omulembe ogwo bonna ne bafa. Ne waddawo ab'omulembe ogwaddirira, abataamanya Mukama, wadde ebyo bye yakolera Yisirayeli.

Abayisirayeli tebasinza Mukama

¹¹ Awo Abayisirayeli ne bakola ekyanyiiza Mukama, ne basinza Babbaali.

¹² Ne bava ku Mukama, Katonda wa bajjajjaabwe, eyabaggya mu nsi y'e Misiri, ne basinza balubaale, ab'abantu ababeetoolodde, ne babavuunamira, ne basunguwaza Mukama.

¹³ Mukama baamuvaako, ne baweereza Baali ne Asitarooti.

¹⁴ Mukama n'asunguwalira nnyo Abayisirayeli, n'abawaayo eri abanyazi ne babanyagako ebyabwe. N'aleka abalabe baabwe bonna abaali babeetoolodde, ne babawangula, Abayisirayeli nga tebakyasobola kwetaasa.

¹⁵ Buli lwe baagendanga mu lutalo, nga Mukama abaleetera akabi, nga bwe yali agambye okukola. Ne beeraliikirira nnyo!

¹⁶ Mukama n'abawa abakulembeze okubawonya abanyazi.

¹⁷ Naye Abayisirayeli ne batawuliriza bakulembeze baabwe. Ne bataba beesigwa eri Mukama, wabula ne basinza balubaale. Bajjajjaabwe baawuliranga ebiragiro bya Mukama, naye bano tebaakola bwe batyo.

¹⁸ Mukama bwe yawanga Abayisirayeli omukulembeze, Mukama yayambanga omukulembeze oyo, era yabawonyanga abalabe baabwe, ebbanga lyonna omukulembeze lye yamalanga nga mulamu. Mukama yabakwatirwanga ekisa, kubanga baasindanga olw'okubonyaabonyezebwa n'okunyigirizibwa.

¹⁹ Naye omukulembeze bwe yafanga, abantu baddanga mu mize gyabwe egy'edda, ne baba babi n'okusinga bajjajjaabwe. Baaweerezanga era baasinzanga balubaale, ne bagaana okulekayo empisa zaabwe embi.

²⁰ Awo Mukama n'asunguwalira nnyo Yisirayeli, n'agamba nti: “Ab'eggwanga lino bamenye endagaano gye nalagira bajjajjaabwe okukuumanga, era tebakyampulira.

²¹ Kale nange okuva leero sikyagobyemu ba mawanga agaali gakyali mu nsi eno, Yoswa we yafiira.

²² Nja kuyita mu bo okugeza Abayisirayeli, ndabe oba nga banaakwatanga, oba tebaakwatenga makubo gange, nga bajjajjaabwe bwe baagakwatanga.”

²³ N'olwekyo Mukama n'aleka ab'amawanga ago mu nsi eyo, n'atabagobaamu mangu era n'ataganya Yoswa kubawangula.