Olevi 2 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Mot moko kwon me yalo Obaŋa

¹ “Ka ŋattoro okelo mot me moko kwon me yalo Rwot, mottere myero bed moko kwon apwottere. En bino onyo moo iye, dok te keto iye odok luban,

² te kela baŋ awobe Aron, ame gin olamdog. Dano acel i akinagi bino juko moko kwon apwot kede moo poŋ ciŋe, karacel odok lubannere luŋ; alamdog bino waŋo man i wi keno lam, wek obed me po i kome, mot me awaŋa i mac, gin a ŋwece kur a yomoro cuny Rwot.

³ Gin ame odoŋ i kom moko kwon me yalo Obaŋa bino bedo me Aron kede awobe mere; mano en dul acil meicel i kom mot awaŋa i mac baŋ Rwot.

⁴ “Ka ikelo wunu mot me yalo Obaŋa, me moko kwon ame otedo i keno myero bed capat a tobi mom iye, me moko kwon apwottere ame orubo i moo, onyo me capat areppere a tobi mom iye, ame owiro moo i komgi.

⁵ Dok ka motti obedo me moko kwon ame otedo i tako nyonyo, myero bed me moko kwon apwottere a tobi mom iye, ame orubo kede moo;

⁶ yin ibino nyinyilo atitino eka ite onyo moo iye; mano me mot me moko kwon.

⁷ Dok ka motti obedo me moko kwon otedo i cupuria, ibino tedo i moko kwon apwottere karacel kede moo.

⁸ Ibino kela mot me moko kwon ame otedo kede jami-nono baŋ Rwot; ka doŋ omio oko baŋ alamdog, alamdog bino kela i keno lam.

⁹ Alamdog bino kwanyo moko kwon me po iye, te waŋo i wi keno lam, me mot awaŋa i mac, gin a ŋwece kur a yomoro cuny Rwot.

¹⁰ Gin ame odoŋ i kom moko kwon me yalo Obaŋa bino bedo me Aron kede awobe mere; mano en dul acil meicel i kom mot awaŋa i mac baŋ Rwot.

¹¹ “Mot me moko kwon ame okelo baŋ Rwot, myero mom ted i tobi, pien mom ibino wunu waŋo tobi onyo moo kic me mot awaŋa i mac baŋ Rwot.

¹² Aco ka obedo mot me cam ogeo cek i wi mwaka, itwero wunu kelo baŋ Rwot, cite mom myero migi i wi keno lam me bedo gin a ŋwece kur a yomoro cuny.

¹³ Ibino keto kado i motti me moko kwon luŋ; mom ibino miyo kado me cikere Obaŋani rwenyo i motti me moko kwon; motti luŋ ame ibino miyo, ibino miyo karacel i kado.

¹⁴ “Ka ce imio mot me moko kwon me cam me wi mwaka baŋ Rwot, ibino miyo wit kal anyen ame oodo, ote celo i mac, obed mot me moko kwon me cam me wi mwaka.

¹⁵ Ibino keto moo iye, kun daŋ iketo iye odok luban; mano en mot me moko kwon.

¹⁶ Alamdog bino kwanyo kallogo ame oodo, kede moo karacel kede odok lubanner luŋ, te waŋo me po i kome; mano en mot awaŋa i mac, gin a ŋwece kur a yomoro cuny Rwot.