Buk a Muca me aŋwen ame Olwoŋo Wel 34 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

¹ Rwot okobbi Muca ni,

² “Cik jo Icrael kun ikobbigi ni, Ka idonyo wunu i lobo me Kanaan (man en lobo ame ibino nwoŋo wunu me bedo megwu, ame en lobo me Kanaan naka i waŋ apoki mere luŋ),

³ waŋ apoki me lobowu i tutuŋ anyarolum bino cakere i tim me Jin ame omano ŋet Edom. Wan lobowu ikokome i tutuŋ anyarolum bino ya i tuŋ agikki nam me Kado ame tye tuŋ kide;

⁴ eka waŋ lobo te dok wirre kun dok tutuŋ anyarolum, kun wirre i tur ame woto i Akarabim, eka te dok kato i Jin, te wot gik i Kadec-barnea tutuŋ anyarolum. Dok te wot medde kede naka i Kajaradar, te kato i Ajimon.

⁵ Waŋ lobo dok te cako wirre iyi Ajimon, wot i Kulo me Miciri; eka te wot gik i dog nam.

⁶ “Waŋ lobo ame oya i tutuŋ kide bino bedo i Nam Adwoŋ; nammono bino bedo waŋ lobowu i tutuŋ kide.

⁷ “Man en ame bino bedo waŋ apoki i tutuŋ anyarodi; waŋ apoki bino ya i Nam Adwoŋ, ibino yeco wunu waŋ lobo woto naka i kidi me Kor.

⁸ Eka cakere i kidi me Kor, ibino yeco wunu waŋ lobo naka i yo ame woto i Kamat, eka waŋ lobo te gik i Jedad.

⁹ Waŋ lobo dok bino medde anyim naka i Jiporon, te wot gik i Kajar-enan. Man en ame bino bedo waŋ lobowu i tutuŋ anyarodi.

¹⁰ “Waŋ lobo i tutuŋ kide ibino yeco wunu cakere i Kajar-enan, te tuno naka i Cepam.

¹¹ Waŋ lobo te dok lunere piny kun cakere i Cepam woto naka i Ribula ame tye i ŋet Ain, i yo ame tye tutuŋ kide. I kakannono wan lobo dok te luŋere piny wot naka i kor kidi me nam me Kineret, ame tye i yo tutuŋ kide,

¹² Waŋ lobo te dok lunere piny naka i Jordan, te wot gik i nam me Kado. Man en ame bi no bedo lobowu, kede waŋ apoki mere luŋ ame omane.”

¹³ Muca te ciko jo Icrael kun kobo ni, “Man en lobo ame bino bedo megwu kun ipoko wunu kede kwir, ame rik Rwot ociko ni mi atekere aboŋwen kede nucu;

¹⁴ pien atekere a jo Reuben, kede mea jo Gad gin otyeko nwoŋo lobogi oko kun lubo doggola me ot a kwarigi karacel kede nucu me atekere a Manace.

¹⁵ Atekere aryo-nono kede nucu me atekere a Manace, gin otyeko nwoŋo lobogi me bedo megi loka Jordan ame otikere i Jeriko i yo tutuŋ kide, tuŋ ame ceŋ donyo iye.”

¹⁶ Rwot dok te kobo baŋ Muca ni,

¹⁷ “Man en nyiŋ jo ame bino pokkiwu lobo me bedo megwu: Eleajar alamdog, kede Yocwa wot a Nuni.

¹⁸ Ibino kwanyo jo me konyo tic me poko lobo i atekere acel acel dano acel.

¹⁹ Nyiŋ jo-nono ene: Iyi atekere a Juda, ibino kwanyo Kaleb wot a Japune.

²⁰ Iyi atekere a Cimeon, ibino kwanyo Cemuel wot Amikud.

²¹ Iyi atekere a Benjamin, ibino kwanyo Elidad wot a Ciclon.

²² Iyi atekere a Dan, ibino kwanyo Bukki wot a Jogli.

²³ I kom awobe a Yucepu: i kom atekere ikwae a Manace, atel bino bedo Kanniel wot Epod.

²⁴ I kom ikwae Epraim, atel bino bedo Kemuel wot a Ciptan.

²⁵ Iyi atekere ikwae Jabulon, atel bino bedo Elijapan wot a Parnac,

²⁶ Iyi atekere ikwae Icakar, atel bino bedo Paltiel wot Ajan.

²⁷ Eka iyi atekere ikwae Acer, atel bino bedo Akiud wot a Celomi.

²⁸ Iyi atekere ikwae a Naputali, atel bino bedo Pedael wot Amikud.

²⁹ Magi gin lwak jo ame Rwot ociko ni pok lobo baŋ jo Icrael i lobo Kanaan.”