Buk a Muca me aŋwen ame Olwoŋo Wel 3 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Wel a jo Levi kede ticgi

¹ Magi gin ikwae Aron kede Muca i kare ame Rwot obedo kop i Muca i wi kidi me Cinai.

² Nyiŋ awobe Aron ene: Nadab atinnere me kao, kede Abiku, Eleajar kede Itamar;

³ maginono nyiŋ awobe Aron, gin obedo olamdog ame owiro kede moo, ame rik oketogi i dog ticgi me bedo olamdog.

⁴ Cite Nadab kede Abiku rik obin oto oko i nyim Rwot i kare a gin otio i mac a rik mom ocikogi me tic kede i nyim Rwot i tim me Cinai; gin rik onwoŋo pwod pe itino moro. Mano en omio Eleajar kede Itamar otio tic me olamdog kun papagi pwod kwo.

⁵ Rwot okobbi Muca ni,

⁶ “Kel atekere a Levi ceggi, ibin iketgi i nyim alamdog Aron me gin ti baŋe.

⁷ Gin bino tiyo tic apapat pire kede pi lwak luŋ i nyim ke ma me rwatte, kare ame gin tio ticgi i kema,

⁸ Gin en ame bino gwoko jami luŋ ame tye i kema me rwatte, dok daŋ otio tic pi jo Icrael i kare ame otio ticgi i kema.

⁹ Ibino miyo jo a Levi baŋ Aron kede awobe mere; gin doŋ atyeko miyogi atwal baŋe kun akwanyogi oko i akina jo Icrael.

¹⁰ Dok ibino keto Aron kede awobe mere, eka gin te tiyo ticgi me olamdog; cite ka ŋattoro ocele onoko aceggi, obino neko dano nono oko.”

¹¹ Rwot dok te kobbi Muca ni,

¹² “Nen, doŋ atyeko kwanyo jo a Levi i akina jo Icrael akaka itino kao luŋ ame ogeo yabo ot nyodo i akina jo Icrael. Jo a Levi bino bedo jona,

¹³ pien itino kao luŋ mera. I nino ame rik aneko iye itino kao luŋ i Miciri ca, en ame daŋ rik akwero iye itino kao luŋ ame tye iyi Icrael me bedo mega, pien itino leyi kede me a dano, gin luŋ bino bedo mega; an a Rwot.”

¹⁴ “Rwot okobo baŋ Muca i tim me Cinai ni,

¹⁵ Kwan wel awobe a Levi luŋ kun ilubo i doggolagi kede doggola a kwarigi, cakere i kom co ame ditogi doŋ oromo dwe acel wot kede malo,”

¹⁶ Muca daŋ te kwano welgi kite a Rwot okobo-nono, kite a yam ociko.

¹⁷ Nyiŋ itino a Levi-nono ene: Gercon, Kokat kede Merari.

¹⁸ Nyiŋ awobe a Gercon kun lubere i doggolagi ene: Libini kede Cimei.

¹⁹ Awobe a Kokat kun lubere i doggolagi ene: Amuram, Ijar, Kebron kede Ujiel,

²⁰ Awobe a Merari kun lubere i doggolagi ene: Makali kede Muci. Magi gin doggola a Levi, kun lubo doggola a kwarigi.

²¹ Jo a Gercon obedo jo me doggola a Libuni kede jo me doggola a Cemei; magi-nono gin jo a Gercon.

²² Wel co iye ame okwano, cakere i kom jo ame ditogi oromo dwe acel wot kede malo oromo tutumia abiro kede mia abic nono.

²³ Jo doggola a Gercon rik oguro kemagi i ŋe kema a Rwot ame dok tutuŋ to,

²⁴ kun atel a jo Gercon obedo Eliacap wot a Lael.

²⁵ Tic awobe a Jo Gercon i kema me rwatte obedo tic me gwoko kema, akemmere kede gi-wumo wie, cuka me wumo doggola kema me rwatte,

²⁶ cuka aŋaba i dyekal, cuka wumo doggola me dyekal ame oguro kema kede keno me lam, kede tollege; kede dok tic ocele luŋ ame mitte i jami magi luŋ.

²⁷ Jo a Kokat obedo jo me doggola Amuram kede doggola a jo Ijar, kede doggola a jo Kobron, kede doggola a jo Ujiel; magi-nono gin doggola a jo Kokat.

²⁸ Wel jo iye ame okwano, cakere i kom jo ame mwaka me ditogi oromo dwe acel wot kede malo oromo tutumia aboro kede mia abicel nono, ame gin rik tio ticgi i kabedo acil.

²⁹ Jo doggola a Kokat rik oguro kemagi i ŋe kema ame dok tutuŋ anyarolum,

³⁰ kun atel a jo Kokat obedo Eliajapan wot a Ujiel.

³¹ Ticgi rik obedo me gwoko canduk, meja, akara mac, keno lam, jami luŋ ame bedo i kabedo acil ame alamdog tio kedgi ducu kede boŋo me icika; kede dok tic ocele luŋ ame mitte i jami magi luŋ.

³² Eleajar wot Aron, alamdog en ame bino bedo adwoŋ ame loo otel a jo Levi, dok en daŋ ame bino neno jo ame gwoko kabedo acil.

³³ Jo Merari obedo jo me doggola a Makali, kede doggola a Muci; maginono gin jo me doggola a Merari.

³⁴ Wel co iye ame okwano cakere i kom jo ame ditogi oromo dwe acel wot kede malo oromo tutumia abicel kede mia aryo nono,

³⁵ Atel a jo Merari obedo Juriel wot Abikail. Gin rik oguro kemagi i yo tutuŋ anyarodi me kema a Rwot.

³⁶ Tic ame omio baŋ awobe a Merari rik obedo tic me gwoko bayi luŋ me kema, arii mege luŋ, pagi mege luŋ, acib tergi luŋ kede ginnoro luŋ otiko ticcere; kede dok tic ocele luŋ ame mitte i jami magi luŋ;

³⁷ karacel kede pagi luŋ i dyekal, kede acib tergi kede teke luŋ ame gurogi, kede tollege.

³⁸ Jo ame rik oguro kemagi i nyim kema tuŋ kide, i nyim kema me rwatte kun ame ceŋ donnyo iye, rik obedo Muca, Aron kede awobe mere. Gin onwoŋo otyeko ketogi me gwoko tic ducu ame mitte i kabedo acil, me tiyo tic luŋ ame mitte pi jo Icrael. Ka ce ŋattoro ocele ata onoko aceggi, danonono obino neko oko.

³⁹ Jo luŋ ame rik okwano welgi i kom jo Levi, ame Muca kede Aron okwano welgi pi lubo cik a Rwot, kun lubo kite a doggolagi tye kede, co luŋ ame ditogi oromo dwe acel wot kede malo oromo tutumia pyeraryo wie aryo.

Jo a Levi kede kite me lakoro itino kao

⁴⁰ Rwot okobo baŋ Muca ni, “Kwan wel itino kao luŋ, ame co a tye i akina jo Icrael, cakere i kom itino ame ditogi doŋ oromo dwe acel wot kede malo; kwan welgi kun ilubo i nyiŋgi.

⁴¹ Ibino tero jo a Levi bed mega, an a Rwot, akaka itino luŋ ame tye i akina jo Icrael, ter daŋ lim a jo Levi luŋ akwo akaka itino kao luŋ me lim akwo me a jo Icrael.”

⁴² Muca daŋ te kwano wel itino kao luŋ ame tye i akina jo Icrael kite a Rwot ociko kede.

⁴³ Wel itino a co luŋ ame okwano kun lubo kite ame nyiŋgi ocoye kede cakere i kom en ame ditogi oromo dwe acel dok kede malo oromo tutumia pyeraryo wie aryo, kede mia aryo i pyerabiro wie adek.

⁴⁴ Rwot okobo baŋ Muca ni,

⁴⁵ “Mi jo a Levi bed akaka itino kao luŋ ame tye i akina jo Icrael, ter daŋ lim a jo Levi luŋ akwo akaka limgi; jo a Levi bino bedo jona; an a Rwot.

⁴⁶ Pi lakoro itino kao a jo Icrael mia aryo kede pyerabiro wie adek ame odoŋ ame co a jo Levi orem oko pirgi

⁴⁷ ibino gamo cekel abic pi dano acel acel; ibino gamo kun ilubo cekel me kabedo acil, ame cekel acel acel romo gero pyeraryo.

⁴⁸ Lim ame olakoro i jo ame odoŋŋono ibino miyo baŋ Aron kede awobe mere.”

⁴⁹ Mano en omio Muca rik te gamo lim me lakere i baŋ jo a rik odoŋ, ame wel a jo Levi mom oromo me lakorogi.

⁵⁰ En rik te gamo lim me ryal ibaŋ itino kao a jo Icrael ame romo cekel tutumia acel kede mia adek kede pyerabicel wie abic, kun lubo cekel me kabedo acil.

⁵¹ Muca te miyo lim me lakere-nono baŋ Aron kede awobe mere, kite ame Rwot ociko kede Muca.