Buk a Muca me aŋwen ame Olwoŋo Wel 25 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Jo Icrael oworo Baal me Peor

¹ I kare ame jo Icrael bino i Cittim, jo rik te cako timo tim me abor i kom anyira me Moab.

² Gin te bedo lwoŋo jo kan ame gin oyalo iye obaŋegi, jo daŋ te cam, ote daŋ ryebere piny i nyim obaŋegi.

³ Icrael te miye me woro Baal Peor kittono. Akemo te mako Rwot atek meicel i kom Icrael.

⁴ Rwot te kobbi Muca ni, “Kwany rwode luŋ i akina lwak, iwot iŋabgi i ceŋ i nyim Rwot me wek, Rwot lok cunye akemo mere ager i kom jo Icrael.”

⁵ Muca te kobbi oŋolkop me Icrael ni, “Ŋat acel acel i akinawu myero nek jo mere ame omiye me woro Baal me Peor pirgi kengi.”

⁶ Nen ba, dano moro me Icrael te bino kun okelo nyannoro me Midian, te tero i ode, ame Muca karacel kede lwak jo Aron, Icrael luŋ tye aneno. Lwak onwoŋo tye akok i doggola kema me rwatte.

⁷ Pinekaci wot Eleajar, ame obedo wot Aron, alamdog, ka oneno, oya malo i baŋ lwak, te mako toŋ i ciŋe,

⁸ te wot lubo yo dano me Icrael ca, naka iyi icika i tyelo, te wot cocobo gin aryo luŋ, dano me Icrael kede dako-naca, kun cocobo yie. Mannono te miyo too edeke ya oko i akina jo Icrael.

⁹ Cite onwoŋo doŋ jo ame too edeke oneko romo tutumia pyeraryo wie aŋwen.

¹⁰ Rwot te kobo baŋ Muca ni,

¹¹ “Pinekaci wot Eleajar ame obedo wot Aron alamdog otyeko doŋ miyo akemona dok oko ceŋ i kom jo Icrael, pien nyeko ame onwoŋo omaka, onwoŋo daŋ omaka i akinagi, omio mom doŋ ate tyeko jo Icrael oko pi nyekona.

¹² Pi mannono, yin doŋ kob ni, ‘Nen ba, atyeko doŋ miye cikerena me bedo i kuc,

¹³ cikere-nono bino bedo baŋe, kede baŋ ikwae ame bino lube, cikere me bedo doŋ nakanaka i tic me olamdog, pien nyeko rik omake pi Obaŋa mere, eka te tiyo tic me kwanyo bal oko i kom jo Icrael.’ ”

¹⁴ Nyiŋ dano me Icrael ame oneko, ame rik oneko karacel kede nyako me Midian, onwoŋo obedo Jimri wot a Calu, ame obedo ŋat ame loo ot a kwarogi i akina jo Cimeon.

¹⁵ Nyiŋ nyako me Midian ame rik oneko-nono onwoŋo Kojibi nyaka a Jur ame onwoŋo obedo ŋat ame loo ot a kwarogi i akina jo Midian.

¹⁶ Rwot te kobo baŋ Muca ni,

¹⁷ “Cuny wot agwa i kom jo Midian, me iwot ilweny kedgi;

¹⁸ pien gin daŋ opoto agwa i kom bwolowu me poto i bal i kop i kom Peor, kede kop i kom Kojibi, nyaka aloc me Midian, ame obedo amingi a rik oneko i kare ame too edeke opoto pi kop i kom Peor.”