Buk a Muca me aŋwen ame Olwoŋo Wel 24 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

¹ Ka Balaam oneno ni Rwot mito miyo Icrael winyo, en mom owoto i tyet kite ame obedo timo i kare ocele ca, ento olunyo wiro waŋe neno tim.

² Balaam te tiro waŋe malo, te neno jo Icrael kun oguro kemagi atekere atekere. Cuny Obaŋa rik te bino i kome,

³ en te cako wero koppere ni, “Man kop a Balaam wot a Beor, kop a dano a waŋe doŋ oyabere,

⁴ dano ame winyo kop ame Obaŋa kobo, dano ame neno anyut ame Won Twer nyuto, dano amerette piny, cite mom gire mio waŋe:

⁵ Kemani luŋ mwonya meicel, Yakobo, gony Icrael luŋ daŋ mwonya kittono.

⁶ Nen acalli i luŋ ame opette kuka kuka, calo potti ame tye i dog kulo; calo elwa ame Rwot opito, calo yen cedar ame oradde i dog pii.

⁷ Pii bino bedo mollo i gulu mere, koti mere bino durre i ŋet kulli apipim, abaka mere bino bedo dit akato Agag oko, loccere bino bedo malo meicel.

⁸ Obaŋa okwanye i Miciri, en tye i akinagi acalo tuŋ jobi ager. En bino camo orok ame okworrere oko, bino tuturo cogogi ŋido atitino, te celogi pel kede atero mere.

⁹ En onyoŋo piny, obuto calo eŋatu, acalo min eŋatu; ŋa kara a cunye tek me tuge? Gum myero bed i kom jo luŋ ame lammi winyo dok jo luŋ ame ceni, ceŋ, myero bed i wigi.”

Balaam otito kop ame bino timere i nyim

¹⁰ Akemo te mako Balak atek i kom Balaam, omio en te bapo ciŋe, te kobo baŋ Balaam ni, “An onwoŋo alwoŋi me ceno okwora, koŋ doŋ inen, aman yin dok ilunyo lammigi winyo odoko tyen adek twal.

¹¹ Pi mannono, yin doŋ myero iriŋ oko, idok i kabedoni. Rik an akobo ni, ‘Ateni, abino keto kwogo i komi’, cite Rwot gire ogeŋi limo kwogo-nono.”

¹² Balaam te kobbi Balak ni, “Kara rik mom akobo baŋ okwena ame icwao baŋa ni,

¹³ ‘Kadi bed Balak onwoŋo omia ode ame opoŋ i ryal kede jabu, onwoŋo mom atwero timo ginnoro a mom Rwot Obaŋana ociko, kun atimo gin aber onyo arac ame an amito; gin ame Rwot bino kobo, en ame an daŋ abino kobo?’ ”

¹⁴ Nen ba, an doŋ awot oko baŋ jo me turwa, bye koŋ, me abin ami iŋe gin ame jo man bino timo i kom jo meri i kare ame tye i nyim,

¹⁵ Balaam te cako wero koppere ni, “Man kop a Balaam wot a Beor, kop a dano a waŋe doŋ oyabere,

¹⁶ dano ame winyo kop ame Obaŋa okobo, dano ame ŋeo gin ame Ŋat Amalo Meicel ŋeo dano ame neno anyut ame Won Twer tio, dano amerette piny cite, mom gire mio waŋe

¹⁷ An anene, cite mom aman; anene, cite mom tye kan aceggi: acerroro waŋŋoro abino, ame bino ya i Yakobo, abiro loc bino ya iyi Icrael; bino tutuco tur nyim jo Moab, te tyeko teko awobe a Ceti luŋ,

¹⁸ Lobo Edom obino mayo oko, jo Ceir ame okworrere, en bino mayo lobogi oko, kun Icrael tye ka lweny i tek meicel.

¹⁹ Yakobo bino loyo loc jo ame obwot i boma Ar obino neko oko!”

²⁰ Eka te dok lokere neno Amalek, te cako wero koppere ni, “Amalek yam obedo rok me agege, cite i agikki obino tyeko oko luŋ.”

²¹ Te dok lokere neno jo Keni, te cako kobo koppere ni, “Iri wunu kare alac i kabedowu, ogero pacowu i wi lela;

²² ento jo a Kain obino yako iweŋ, Acur aterowu i opii pi kare a rom mene?”

²³ Balaam te dok cako wer ni, “Oi do, jo ame oya i tuŋ anyarodi!

²⁴ Mel apol bino tuno kun oya i Kittim, bino yelo Acur kede Eber atek; en daŋ obino neke oko.”

²⁵ Balaam doŋ te ya oko dok ceŋ i kabedo mere, Balak doŋ te wot oko.