Kocea 3 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Kocea kede dako ame otiŋo luk

¹ Rwot dok te kobba ni, “Apee dok iwot imar dako ame tye i dyerre ame mare, dok en dako ame mito co ocele, imare kom kite ame Rwot maro kede Icrael, kadi bed jo Icrael lokere gigi baŋ cal jogi kun omaro aŋina olok ame otwo.”

² Mannono omio awile i cekel apar wie abic me ryal, kede cayiri ame romo puku aŋwen kede nucu.

³ Eka ate kobbe ni, “Myero iri baŋa pi kare alac kun mom itimo timmoro me alaya. Kur daŋ ibed ico moro ocele, an daŋ abino bedo amannono tuŋ baŋi.”

⁴ Pien jo Icrael bino ri kare alac aboŋo abaka, kadi aloccoro, aboŋo ginnoro me aŋola me yalo Obaŋa, kadi kidi moro ame ocibo me awora, aboŋo kit callogo me tyet.

⁵ Icennere jo Icrael bino lokkere, te cako yenyo Rwot Obaŋagi, kede abakagi Daudi; gin obino dwogo baŋ Rwot kun otye i lworo kede dok pi berrere i kare ame tye anyim.