Amoc 9 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Ŋattoro mom bino bwot i ciŋ Obaŋa

¹ Aneno Rwot kun ocun i ŋet keno me lam, te kobo ni, “Go wi yen kika, arii yeŋere, me rette oko i wi jo ducu, jo ame odoŋ abino nekogi i pala lweny; mom tye ŋattoro i akinagi ame bino riŋo, mom tye ŋattoro i akinagi ame bino bwot.

² “Kadi bed gin okuny piny naka i Ceol, ciŋa bino wotogi oko i kuno; kadi bed gin oyit malo naka i polo, abino dwogogi oko i kuno piny.

³ Kadi bed gin opono i wi kidi me Karmel, abino yenyogi, abino kwanyogi oko i kuno; kadi bed gin kanne oko i waŋa ite nam piny, abino ciko twol ame bedo kuno kaogi.

⁴ Kadi bed tergi iyi opii nyim okworgi, abino ciko pala lweny kuno nekogi; abino ciko waŋa i komgi, pi timogi rac, mom me timogi ber.”

⁵ Rwot Obaŋa me mony ogudo lobo te meye oko, mio jo luŋ ame bedo iye koko can, lobo luŋ tirjrjere malo bala kulo Nail, dok piny bala Nail me Miciri;

⁶ en Obaŋa ame gero icika mere malo i polo, kun mio wi ode cuŋ i wi lobo; en Obaŋa ame lwoŋo pii me nam te onyo i wi lobo, nyiŋe Rwot.

⁷ “Wun mom irom wunu i jo Eciopia i tuŋ baŋa, wun jo Icrael”, Rwot okobo. “Rik mom akwanyo Icrael i ya lobo Miciri, kede jo Piriciti i ya i Kaputor, kede jo Curia i ya i Kir?

⁸ Nen Rwot Obaŋa doŋ ociko waŋe i kom loc ame tye kede bal, abino wero oko i wi lobo; koŋo ka ot a Yakobo en a mom abino jwero ducu”, man kop a Rwot ikokome.

⁹ “Pien nen ba, abino ciko, abino yeko ot a Yakobo i akina rok luŋ bala kai ame oyeko i yi odero, ento nyig gweŋŋoro mom bino poto piny.

¹⁰ Obalo luŋ ame tye i akina jona, bino to i pala lweny, jona ame kobo ni, ‘Gin arac mom bi no tuno baŋwa, kadi rwatte kedwa’.”

Dwogo jo Icrael

¹¹ “I nino-nono abino gero odoco, gony a Daudi a rik orette, abino wumo kan atwolo oko, abino yiko kan orette, abino gero kit a rik tye kede kare acon;

¹² me wek gin olo jo Edom ame odoŋ, naka rok luŋ ame olwoŋogi i nyiŋa”, man kop a Rwot ame timo man.

¹³ “Nen ba, kare abino”, Rwot okobo, “ŋat ame puro bino nuko ŋat ame kao, ŋat ame nyono olok bino nuko aco koti; koŋo olok alim bino cwer i kiddi bino mollo i wi tur piny.

¹⁴ Abino dwoggo kuc baŋ jona Icrael, gin bino gero boma ame yam odoko wi obur, gin bi no bedo iye; gin bino pi to olok, obino mato koŋo mere, gin bino yiko pottigi, ote camo gin ocek iye.

¹⁵ Abino pitogi i lobogi, mom dok abino putogi, i ya lobo ame amiogi”, man kop a Rwot Obaŋawu.